੭. ਬੀਰਣਥਮ੍ਭਵਗ੍ਗੋ

੨੧੧. ਸੋਮਦਤ੍ਤਜਾਤਕਂ (੨-੭-੧)

੧੨੧. ਅਕਾਸਿ ਯੋਗ੍ਗਂ ਧੁਵਮਪ੍ਪਮਤ੍ਤੋ, ਸਂਵਚ੍ਛਰਂ ਬੀਰਣਥਮ੍ਭਕਸ੍ਮਿਂ;

ਬ੍ਯਾਕਾਸਿ ਸਞ੍ਞਂ ਪਰਿਸਂ ਵਿਗਯ੍ਹ, ਨ ਨਿਯ੍ਯਮੋ ਤਾਯਤਿ ਅਪ੍ਪਪਞ੍ਞਂ.

੧੨੨. ਦ੍ਵਯਂ ਯਾਚਨਕੋ ਤਾਤ, ਸੋਮਦਤ੍ਤ ਨਿਗਚ੍ਛਤਿ;

ਅਲਾਭਂ ਧਨਲਾਭਂ ਵਾ, ਏਵਂ ਧਮ੍ਮਾ ਹਿ ਯਾਚਨਾਤਿ.

ਸੋਮਦਤ੍ਤਜਾਤਕਂ ਪਠਮਂ.

੨੧੨. ਉਚ੍ਛਿਟ੍ਠਭਤ੍ਤਜਾਤਕਂ (੨-੭-੨)

੧੨੩. ਅਞ੍ਞੋ ਉਪਰਿਮੋ ਵਣ੍ਣੋ, ਅਞ੍ਞੋ ਵਣ੍ਣੋ ਚ ਹੇਟ੍ਠਿਮੋ;

ਬ੍ਰਾਹ੍ਮਣੀ ਤ੍ਵੇਵ ਪੁਚ੍ਛਾਮਿ, ਕਿਂ ਹੇਟ੍ਠਾ ਕਿਞ੍ਚ ਉਪ੍ਪਰਿ.

੧੨੪. ਅਹਂ ਨਟੋਸ੍ਮਿ ਭਦ੍ਦਨ੍ਤੇ, ਭਿਕ੍ਖਕੋਸ੍ਮਿ ਇਧਾਗਤੋ;

ਅਯਞ੍ਹਿ ਕੋਟ੍ਠਮੋਤਿਣ੍ਣੋ, ਅਯਂ ਸੋ ਯਂ [ਤ੍ਵਂ (ਕ.)] ਗਵੇਸਸੀਤਿ.

ਉਚ੍ਛਿਟ੍ਠਭਤ੍ਤਜਾਤਕਂ ਦੁਤਿਯਂ.

੨੧੩. ਭਰੁਜਾਤਕਂ (੨-੭-੩)

੧੨੫. ਇਸੀਨਮਨ੍ਤਰਂ ਕਤ੍ਵਾ, ਭਰੁਰਾਜਾਤਿ [ਕੁਰੁਰਾਜਾਤਿ (ਕ.)] ਮੇ ਸੁਤਂ;

ਉਚ੍ਛਿਨ੍ਨੋ ਸਹ ਰਟ੍ਠੇਹਿ [ਰਟ੍ਠੇਨ (ਸੀ. ਪੀ.)], ਸਰਾਜਾ ਵਿਭਵਙ੍ਗਤੋ.

੧੨੬. ਤਸ੍ਮਾ ਹਿ ਛਨ੍ਦਾਗਮਨਂ, ਨਪ੍ਪਸਂਸਨ੍ਤਿ ਪਣ੍ਡਿਤਾ;

ਅਦੁਟ੍ਠਚਿਤ੍ਤੋ ਭਾਸੇਯ੍ਯ, ਗਿਰਂ ਸਚ੍ਚੁਪਸਂਹਿਤਨ੍ਤਿ.

ਭਰੁਜਾਤਕਂ [ਕੁਰੁਰਾਤਕਂ (ਕ.)] ਤਤਿਯਂ.

੨੧੪. ਪੁਣ੍ਣਨਦੀਜਾਤਕਂ (੨-੭-੪)

੧੨੭. ਪੁਣ੍ਣਂ ਨਦਿਂ ਯੇਨ ਚ ਪੇਯ੍ਯਮਾਹੁ, ਜਾਤਂ ਯਵਂ ਯੇਨ ਚ ਗੁਯ੍ਹਮਾਹੁ;

ਦੂਰਂ ਗਤਂ ਯੇਨ ਚ ਅਵ੍ਹਯਨ੍ਤਿ, ਸੋ ਤ੍ਯਾਗਤੋ [ਤ੍ਯਾਭਤੋ (ਸ੍ਯਾ. ਕ.) ਪਹੇਲ਼ਿਗਾਥਾਭਾਵੋ ਮਨਸਿ ਕਾਤਬ੍ਬੋ] ਹਨ੍ਦ ਚ ਭੁਞ੍ਜ ਬ੍ਰਾਹ੍ਮਣ.

੧੨੮. ਯਤੋ ਮਂ ਸਰਤੀ ਰਾਜਾ, ਵਾਯਸਮ੍ਪਿ ਪਹੇਤਵੇ;

ਹਂਸਾ ਕੋਞ੍ਚਾ ਮਯੂਰਾ ਚ [ਹਂਸਕੋਞ੍ਚਮਯੂਰਾਨਂ (ਕ. ਅਟ੍ਠ. ਪਾਠਨ੍ਤਰਂ)], ਅਸਤੀਯੇਵ ਪਾਪਿਯਾਤਿ.

ਪੁਣ੍ਣਨਦੀਜਾਤਕਂ ਚਤੁਤ੍ਥਂ.

੨੧੫. ਕਚ੍ਛਪਜਾਤਕਂ (੨-੭-੫)

੧੨੯. ਅਵਧੀ ਵਤ ਅਤ੍ਤਾਨਂ, ਕਚ੍ਛਪੋ ਬ੍ਯਾਹਰਂ ਗਿਰਂ [ਕਚ੍ਛਪੋਵ ਪਬ੍ਯਾਹਰਂ (ਸ੍ਯਾ.), ਕਚ੍ਛਪੋ ਸੋ ਪਬ੍ਯਾਹਰਂ (ਕ.)];

ਸੁਗ੍ਗਹੀਤਸ੍ਮਿਂ ਕਟ੍ਠਸ੍ਮਿਂ, ਵਾਚਾਯ ਸਕਿਯਾਵਧਿ.

੧੩੦. ਏਤਮ੍ਪਿ ਦਿਸ੍ਵਾ ਨਰਵੀਰਿਯਸੇਟ੍ਠ, ਵਾਚਂ ਪਮੁਞ੍ਚੇ ਕੁਸਲਂ ਨਾਤਿਵੇਲਂ;

ਪਸ੍ਸਸਿ ਬਹੁਭਾਣੇਨ, ਕਚ੍ਛਪਂ ਬ੍ਯਸਨਂ ਗਤਨ੍ਤਿ.

ਕਚ੍ਛਪਜਾਤਕਂ ਪਞ੍ਚਮਂ.

੨੧੬. ਮਚ੍ਛਜਾਤਕਂ (੨-੭-੬)

੧੩੧. ਨ ਮਾਯਮਗ੍ਗਿ ਤਪਤਿ, ਨ ਸੂਲੋ ਸਾਧੁਤਚ੍ਛਿਤੋ;

ਯਞ੍ਚ ਮਂ ਮਞ੍ਞਤੇ ਮਚ੍ਛੀ, ਅਞ੍ਞਂ ਸੋ ਰਤਿਯਾ ਗਤੋ.

੧੩੨. ਸੋ ਮਂ ਦਹਤਿ ਰਾਗਗ੍ਗਿ, ਚਿਤ੍ਤਂ ਚੂਪਤਪੇਤਿ ਮਂ;

ਜਾਲਿਨੋ ਮੁਞ੍ਚਥਾਯਿਰਾ ਮਂ, ਨ ਕਾਮੇ ਹਞ੍ਞਤੇ ਕ੍ਵਚੀਤਿ.

ਮਚ੍ਛਜਾਤਕਂ ਛਟ੍ਠਂ.

੨੧੭. ਸੇਗ੍ਗੁਜਾਤਕਂ (੨-੭-੭)

੧੩੩. ਸਬ੍ਬੋ ਲੋਕੋ ਅਤ੍ਤਮਨੋ ਅਹੋਸਿ, ਅਕੋਵਿਦਾ ਗਾਮਧਮ੍ਮਸ੍ਸ ਸੇਗ੍ਗੁ;

ਕੋਮਾਰਿ ਕੋ ਨਾਮ [ਕੋਮਾਰਿਕਾ ਨਾਮ (ਕ.), ਕੋਮਾਰਿਕੋ ਨਾਮ (ਸ੍ਯਾ. ਪੀ.)] ਤਵਜ੍ਜ ਧਮ੍ਮੋ, ਯਂ ਤ੍ਵਂ ਗਹਿਤਾ ਪਵਨੇ ਪਰੋਦਸਿ.

੧੩੪. ਯੋ ਦੁਕ੍ਖਫੁਟ੍ਠਾਯ ਭਵੇਯ੍ਯ ਤਾਣਂ, ਸੋ ਮੇ ਪਿਤਾ ਦੁਬ੍ਭਿ ਵਨੇ ਕਰੋਤਿ;

ਸਾ ਕਸ੍ਸ ਕਨ੍ਦਾਮਿ ਵਨਸ੍ਸ ਮਜ੍ਝੇ, ਯੋ ਤਾਯਿਤਾ ਸੋ ਸਹਸਂ ਕਰੋਤੀਤਿ.

ਸੇਗ੍ਗੁਜਾਤਕਂ ਸਤ੍ਤਮਂ.

੨੧੮. ਕੂਟਵਾਣਿਜਜਾਤਕਂ (੨-੭-੮)

੧੩੫. ਸਠਸ੍ਸ ਸਾਠੇਯ੍ਯਮਿਦਂ ਸੁਚਿਨ੍ਤਿਤਂ, ਪਚ੍ਚੋਡ੍ਡਿਤਂ ਪਟਿਕੂਟਸ੍ਸ ਕੂਟਂ;

ਫਾਲਞ੍ਚੇ ਖਾਦੇਯ੍ਯੁਂ [ਅਦੇਯ੍ਯੁਂ (ਸੀ. ਪੀ.)] ਮੂਸਿਕਾ, ਕਸ੍ਮਾ ਕੁਮਾਰਂ ਕੁਲਲਾ ਨ [ਨੋ (ਸੀ. ਸ੍ਯਾ. ਪੀ.)] ਹਰੇਯ੍ਯੁਂ.

੧੩੬. ਕੂਟਸ੍ਸ ਹਿ ਸਨ੍ਤਿ [ਸਨ੍ਤੀਧ (ਕ.)] ਕੂਟਕੂਟਾ, ਭਵਤਿ [ਭਵਨ੍ਤਿ (ਕ.)] ਚਾਪਿ ਨਿਕਤਿਨੋ ਨਿਕਤ੍ਯਾ;

ਦੇਹਿ ਪੁਤ੍ਤਨਟ੍ਠ ਫਾਲਨਟ੍ਠਸ੍ਸ ਫਾਲਂ, ਮਾ ਤੇ ਪੁਤ੍ਤਮਹਾਸਿ ਫਾਲਨਟ੍ਠੋਤਿ.

ਕੂਟਵਾਣਿਜਜਾਤਕਂ ਅਟ੍ਠਮਂ.

੨੧੯. ਗਰਹਿਤਜਾਤਕਂ (੨-੭-੯)

੧੩੭. ਹਿਰਞ੍ਞਂ ਮੇ ਸੁਵਣ੍ਣਂ ਮੇ, ਏਸਾ ਰਤ੍ਤਿਂ ਦਿਵਾ ਕਥਾ;

ਦੁਮ੍ਮੇਧਾਨਂ ਮਨੁਸ੍ਸਾਨਂ, ਅਰਿਯਧਮ੍ਮਂ ਅਪਸ੍ਸਤਂ.

੧੩੮. ਦ੍ਵੇ ਦ੍ਵੇ ਗਹਪਤਯੋ ਗੇਹੇ, ਏਕੋ ਤਤ੍ਥ ਅਮਸ੍ਸੁਕੋ;

ਲਮ੍ਬਤ੍ਥਨੋ ਵੇਣਿਕਤੋ, ਅਥੋ ਅਙ੍ਕਿਤਕਣ੍ਣਕੋ;

ਕੀਤੋ ਧਨੇਨ ਬਹੁਨਾ, ਸੋ ਤਂ ਵਿਤੁਦਤੇ ਜਨਨ੍ਤਿ.

ਗਰਹਿਤਜਾਤਕਂ ਨਵਮਂ.

੨੨੦. ਧਮ੍ਮਧਜਜਾਤਕਂ (੨-੭-੧੦)

੧੩੯. ਸੁਖਂ ਜੀਵਿਤਰੂਪੋਸਿ, ਰਟ੍ਠਾ ਵਿਵਨਮਾਗਤੋ;

ਸੋ ਏਕਕੋ ਰੁਕ੍ਖਮੂਲੇ [ਅਰਞ੍ਞਸ੍ਮਿਂ (ਸੀ. ਸ੍ਯਾ. ਪੀ.)], ਕਪਣੋ ਵਿਯ ਝਾਯਸਿ.

੧੪੦. ਸੁਖਂ ਜੀਵਿਤਰੂਪੋਸ੍ਮਿ, ਰਟ੍ਠਾ ਵਿਵਨਮਾਗਤੋ;

ਸੋ ਏਕਕੋ ਰੁਕ੍ਖਮੂਲੇ, ਕਪਣੋ ਵਿਯ ਝਾਯਾਮਿ;

ਸਤਂ ਧਮ੍ਮਂ ਅਨੁਸ੍ਸਰਂਤਿ.

ਧਮ੍ਮਧਜਜਾਤਕਂ ਦਸਮਂ.

ਬੀਰਣਥਮ੍ਭਵਗ੍ਗੋ ਸਤ੍ਤਮੋ.

ਤਸ੍ਸੁਦ੍ਦਾਨਂ –

ਅਥ ਬੀਰਣਥਮ੍ਭਵਰੋ ਚ ਨਟੋ, ਭਰੁਰਾਜਵਰੁਤ੍ਤਮਪੁਣ੍ਣਨਦੀ;

ਬਹੁਭਾਣਿ ਅਗ੍ਗਿਪਵਨੇ ਮੂਸਿਕਾ, ਸਹਲਮ੍ਬਤ੍ਥਨੋ ਕਪਣੇਨ ਦਸਾਤਿ.