੬. ਨਤਂਦਲ਼੍ਹਵਗ੍ਗੋ

੨੦੧. ਬਨ੍ਧਨਾਗਾਰਜਾਤਕਂ (੨-੬-੧)

੧੦੧. ਨ ਤਂ ਦਲ਼੍ਹਂ ਬਨ੍ਧਨਮਾਹੁ ਧੀਰਾ, ਯਦਾਯਸਂ ਦਾਰੁਜਪਬ੍ਬਜਞ੍ਚ [ਬਬ੍ਬਜਞ੍ਚ (ਸੀ.)];

ਸਾਰਤ੍ਤਰਤ੍ਤਾ ਮਣਿਕੁਣ੍ਡਲੇਸੁ, ਪੁਤ੍ਤੇਸੁ ਦਾਰੇਸੁ ਚ ਯਾ ਅਪੇਕ੍ਖਾ.

੧੦੨. ਏਤਂ ਦਲ਼੍ਹਂ ਬਨ੍ਧਨਮਾਹੁ ਧੀਰਾ, ਓਹਾਰਿਨਂ ਸਿਥਿਲਂ ਦੁਪ੍ਪਮੁਞ੍ਚਂ;

ਏਤਮ੍ਪਿ ਛੇਤ੍ਵਾਨ ਵਜਨ੍ਤਿ ਧੀਰਾ, ਅਨਪੇਕ੍ਖਿਨੋ ਕਾਮਸੁਖਂ ਪਹਾਯਾਤਿ.

ਬਨ੍ਧਨਾਗਾਰਜਾਤਕਂ ਪਠਮਂ.

੨੦੨. ਕੇਲ਼ਿਸੀਲਜਾਤਕਂ (੨-੬-੨)

੧੦੩. ਹਂਸਾ ਕੋਞ੍ਚਾ ਮਯੂਰਾ ਚ, ਹਤ੍ਥਯੋ [ਹਤ੍ਥਿਨੋ (ਸੀ.), ਹਤ੍ਥਿਯੋ (ਸ੍ਯਾ. ਪੀ.)] ਪਸਦਾ ਮਿਗਾ;

ਸਬ੍ਬੇ ਸੀਹਸ੍ਸ ਭਾਯਨ੍ਤਿ, ਨਤ੍ਥਿ ਕਾਯਸ੍ਮਿ ਤੁਲ੍ਯਤਾ.

੧੦੪. ਏਵਮੇਵ ਮਨੁਸ੍ਸੇਸੁ, ਦਹਰੋ ਚੇਪਿ ਪਞ੍ਞਵਾ;

ਸੋ ਹਿ ਤਤ੍ਥ ਮਹਾ ਹੋਤਿ, ਨੇਵ ਬਾਲੋ ਸਰੀਰਵਾਤਿ.

ਕੇਲ਼ਿਸੀਲਜਾਤਕਂ ਦੁਤਿਯਂ.

੨੦੩. ਖਣ੍ਡਜਾਤਕਂ (੨-੬-੩)

੧੦੫. ਵਿਰੂਪਕ੍ਖੇਹਿ ਮੇ ਮੇਤ੍ਤਂ, ਮੇਤ੍ਤਂ ਏਰਾਪਥੇਹਿ ਮੇ;

ਛਬ੍ਯਾਪੁਤ੍ਤੇਹਿ ਮੇ ਮੇਤ੍ਤਂ, ਮੇਤ੍ਤਂ ਕਣ੍ਹਾਗੋਤਮਕੇਹਿ ਚ.

ਅਪਾਦਕੇਹਿ ਮੇ ਮੇਤ੍ਤਂ, ਮੇਤ੍ਤਂ ਦ੍ਵਿਪਾਦਕੇਹਿ ਮੇ;

ਚਤੁਪ੍ਪਦੇਹਿ ਮੇ ਮੇਤ੍ਤਂ, ਮੇਤ੍ਤਂ ਬਹੁਪ੍ਪਦੇਹਿ ਮੇ.

ਮਾ ਮਂ ਅਪਾਦਕੋ ਹਿਂਸਿ, ਮਾ ਮਂ ਹਿਂਸਿ ਦ੍ਵਿਪਾਦਕੋ;

ਮਾ ਮਂ ਚਤੁਪ੍ਪਦੋ ਹਿਂਸਿ, ਮਾ ਮਂ ਹਿਂਸਿ ਬਹੁਪ੍ਪਦੋ.

ਸਬ੍ਬੇ ਸਤ੍ਤਾ ਸਬ੍ਬੇ ਪਾਣਾ, ਸਬ੍ਬੇ ਭੂਤਾ ਚ ਕੇਵਲਾ;

ਸਬ੍ਬੇ ਭਦ੍ਰਾਨਿ ਪਸ੍ਸਨ੍ਤੁ, ਮਾ ਕਞ੍ਚਿ [ਕਿਞ੍ਚਿ (ਸ੍ਯਾ. ਕ.)] ਪਾਪਮਾਗਮਾ.

੧੦੬. ਅਪ੍ਪਮਾਣੋ ਬੁਦ੍ਧੋ, ਅਪ੍ਪਮਾਣੋ ਧਮ੍ਮੋ;

ਅਪ੍ਪਮਾਣੋ ਸਙ੍ਘੋ, ਪਮਾਣਵਨ੍ਤਾਨਿ ਸਰੀਸਪਾਨਿ [ਸਿਰਿਸਪਾਨਿ (ਸੀ. ਸ੍ਯਾ. ਪੀ.)];

ਅਹਿਵਿਚ੍ਛਿਕਸਤਪਦੀ, ਉਣ੍ਣਨਾਭਿ [ਉਣ੍ਣਾਨਾਭਿ (ਸੀ. ਸ੍ਯਾ. ਪੀ.)] ਸਰਬੂਮੂਸਿਕਾ.

ਕਤਾ ਮੇ ਰਕ੍ਖਾ ਕਤਾ ਮੇ ਪਰਿਤ੍ਤਾ, ਪਟਿਕ੍ਕਮਨ੍ਤੁ ਭੂਤਾਨਿ;

ਸੋਹਂ ਨਮੋ ਭਗਵਤੋ, ਨਮੋ ਸਤ੍ਤਨ੍ਨਂ ਸਮ੍ਮਾਸਮ੍ਬੁਦ੍ਧਾਨਨ੍ਤਿ.

ਖਣ੍ਡਜਾਤਕਂ ਤਤਿਯਂ.

੨੦੪. ਵੀਰਕਜਾਤਕਂ (੨-੬-੪)

੧੦੭. ਅਪਿ ਵੀਰਕ ਪਸ੍ਸੇਸਿ, ਸਕੁਣਂ ਮਞ੍ਜੁਭਾਣਕਂ;

ਮਯੂਰਗੀਵਸਙ੍ਕਾਸਂ, ਪਤਿਂ ਮਯ੍ਹਂ ਸਵਿਟ੍ਠਕਂ.

੧੦੮. ਉਦਕਥਲਚਰਸ੍ਸ ਪਕ੍ਖਿਨੋ, ਨਿਚ੍ਚਂ ਆਮਕਮਚ੍ਛਭੋਜਿਨੋ;

ਤਸ੍ਸਾਨੁਕਰਂ ਸਵਿਟ੍ਠਕੋ, ਸੇਵਾਲੇ ਪਲਿਗੁਣ੍ਠਿਤੋ ਮਤੋਤਿ.

ਵੀਰਕਜਾਤਕਂ ਚਤੁਤ੍ਥਂ.

੨੦੫. ਗਙ੍ਗੇਯ੍ਯਜਾਤਕਂ (੨-੬-੫)

੧੦੯. ਸੋਭਤਿ ਮਚ੍ਛੋ ਗਙ੍ਗੇਯ੍ਯੋ, ਅਥੋ ਸੋਭਤਿ ਯਾਮੁਨੋ [ਸੋਭਨ੍ਤਿ ਮਚ੍ਛਾ ਗਙ੍ਗੇਯ੍ਯਾ, ਅਥੋ ਸੋਭਨ੍ਤਿ ਯਾਮੁਨਾ (ਸ੍ਯਾ. ਪੀ.)];

ਚਤੁਪ੍ਪਦੋਯਂ ਪੁਰਿਸੋ, ਨਿਗ੍ਰੋਧਪਰਿਮਣ੍ਡਲੋ;

ਈਸਕਾਯਤ [ਈਸਮਾਯਤ (ਕ.)] ਗੀਵੋ ਚ, ਸਬ੍ਬੇਵ ਅਤਿਰੋਚਤਿ.

੧੧੦. ਯਂ ਪੁਚ੍ਛਿਤੋ ਨ ਤਂ ਅਕ੍ਖਾਸਿ [ਅਕ੍ਖਾ (ਸੀ. ਸ੍ਯਾ. ਪੀ.)], ਅਞ੍ਞਂ ਅਕ੍ਖਾਸਿ [ਅਕ੍ਖਾਤਿ (ਸ੍ਯਾ. ਪੀ.)] ਪੁਚ੍ਛਿਤੋ;

ਅਤ੍ਤਪ੍ਪਸਂਸਕੋ ਪੋਸੋ, ਨਾਯਂ ਅਸ੍ਮਾਕ ਰੁਚ੍ਚਤੀਤਿ.

ਗਙ੍ਗੇਯ੍ਯਜਾਤਕਂ ਪਞ੍ਚਮਂ.

੨੦੬. ਕੁਰੁਙ੍ਗਮਿਗਜਾਤਕਂ (੨-੬-੬)

੧੧੧. ਇਙ੍ਘ ਵਦ੍ਧਮਯਂ [ਵਦ੍ਧਮਯਂ (ਸੀ. ਸ੍ਯਾ. ਪੀ.)] ਪਾਸਂ, ਛਿਨ੍ਦ ਦਨ੍ਤੇਹਿ ਕਚ੍ਛਪ;

ਅਹਂ ਤਥਾ ਕਰਿਸ੍ਸਾਮਿ, ਯਥਾ ਨੇਹਿਤਿ ਲੁਦ੍ਦਕੋ.

੧੧੨. ਕਚ੍ਛਪੋ ਪਾਵਿਸੀ ਵਾਰਿਂ, ਕੁਰੁਙ੍ਗੋ ਪਾਵਿਸੀ ਵਨਂ;

ਸਤਪਤ੍ਤੋ ਦੁਮਗ੍ਗਮ੍ਹਾ, ਦੂਰੇ ਪੁਤ੍ਤੇ ਅਪਾਨਯੀਤਿ.

ਕੁਰੁਙ੍ਗਮਿਗਜਾਤਕਂ ਛਟ੍ਠਂ.

੨੦੭. ਅਸ੍ਸਕਜਾਤਕਂ (੨-੬-੭)

੧੧੩. ਅਯਮਸ੍ਸਕਰਾਜੇਨ, ਦੇਸੋ ਵਿਚਰਿਤੋ ਮਯਾ;

ਅਨੁਕਾਮਯ ਕਾਮੇਨ [ਅਨੁਕਾਮਯਵਨੁਕਾਮੇਨ (ਸੀ. ਪੀ.)], ਪਿਯੇਨ ਪਤਿਨਾ ਸਹ.

੧੧੪. ਨਵੇਨ ਸੁਖਦੁਕ੍ਖੇਨ, ਪੋਰਾਣਂ ਅਪਿਧੀਯਤਿ [ਅਪਿਥੀਯਤਿ (ਸੀ. ਪੀ.), ਅਪਿਥਿਯ੍ਯਤਿ (ਸ੍ਯਾ.)];

ਤਸ੍ਮਾ ਅਸ੍ਸਕਰਞ੍ਞਾਵ, ਕੀਟੋ ਪਿਯਤਰੋ ਮਮਾਤਿ.

ਅਸ੍ਸਕਜਾਤਕਂ ਸਤ੍ਤਮਂ.

੨੦੮. ਸੁਸੁਮਾਰਜਾਤਕਂ (੨-੬-੮)

੧੧੫. ਅਲਂ ਮੇਤੇਹਿ ਅਮ੍ਬੇਹਿ, ਜਮ੍ਬੂਹਿ ਪਨਸੇਹਿ ਚ;

ਯਾਨਿ ਪਾਰਂ ਸਮੁਦ੍ਦਸ੍ਸ, ਵਰਂ ਮਯ੍ਹਂ ਉਦੁਮ੍ਬਰੋ.

੧੧੬. ਮਹਤੀ ਵਤ ਤੇ ਬੋਨ੍ਦਿ, ਨ ਚ ਪਞ੍ਞਾ ਤਦੂਪਿਕਾ;

ਸੁਸੁਮਾਰ [ਸੁਂਸੁਮਾਰ (ਸੀ. ਸ੍ਯਾ. ਪੀ.)] ਵਞ੍ਚਿਤੋ ਮੇਸਿ, ਗਚ੍ਛ ਦਾਨਿ ਯਥਾਸੁਖਨ੍ਤਿ.

ਸੁਸੁਮਾਰਜਾਤਕਂ ਅਟ੍ਠਮਂ.

੨੦੯. ਕੁਕ੍ਕੁਟਜਾਤਕਂ (੨-੬-੯)

੧੧੭. ਦਿਟ੍ਠਾ ਮਯਾ ਵਨੇ ਰੁਕ੍ਖਾ, ਅਸ੍ਸਕਣ੍ਣਾ ਵਿਭੀਟਕਾ [ਵਿਭੇਦਕਾ (ਸ੍ਯਾ. ਕ.)];

ਨ ਤਾਨਿ ਏਵਂ ਸਕ੍ਕਨ੍ਤਿ, ਯਥਾ ਤ੍ਵਂ ਰੁਕ੍ਖ ਸਕ੍ਕਸਿ.

੧੧੮. ਪੁਰਾਣਕੁਕ੍ਕੁਟੋ [ਕਕ੍ਕਰੋ (ਸੀ. ਸ੍ਯਾ. ਪੀ.)] ਅਯਂ, ਭੇਤ੍ਵਾ ਪਞ੍ਜਰਮਾਗਤੋ;

ਕੁਸਲੋ ਵਾਲ਼ਪਾਸਾਨਂ, ਅਪਕ੍ਕਮਤਿ ਭਾਸਤੀਤਿ.

ਕੁਕ੍ਕੁਟ [ਕਕ੍ਕਰ (ਸੀ. ਸ੍ਯਾ. ਪੀ.)] ਜਾਤਕਂ ਨਵਮਂ.

੨੧੦. ਕਨ੍ਦਗਲਕਜਾਤਕਂ (੨-੬-੧੦)

੧੧੯. ਅਮ੍ਭੋ ਕੋ ਨਾਮ ਯਂ ਰੁਕ੍ਖੋ, ਸਿਨ੍ਨਪਤ੍ਤੋ [ਸੀਨਪਤ੍ਤੋ (ਸੀ. ਪੀ.)] ਸਕਣ੍ਟਕੋ;

ਯਤ੍ਥ ਏਕਪ੍ਪਹਾਰੇਨ, ਉਤ੍ਤਮਙ੍ਗਂ ਵਿਭਿਜ੍ਜਿਤਂ [ਵਿਸਾਟਿਕਂ (ਸੀ. ਸ੍ਯਾ. ਪੀ.), ਵਿਘਾਟਿਤਂ (ਸੀ. ਨਿਯ੍ਯ)].

੧੨੦. ਅਚਾਰਿ ਵਤਾਯਂ ਵਿਤੁਦਂ ਵਨਾਨਿ, ਕਟ੍ਠਙ੍ਗਰੁਕ੍ਖੇਸੁ ਅਸਾਰਕੇਸੁ;

ਅਥਾਸਦਾ ਖਦਿਰਂ ਜਾਤਸਾਰਂ [ਜਾਤਿਸਾਰਂ (ਕ.)], ਯਤ੍ਥਬ੍ਭਿਦਾ ਗਰੁਲ਼ੋ ਉਤ੍ਤਮਙ੍ਗਨ੍ਤਿ.

ਕਨ੍ਦਗਲਕ [ਕਨ੍ਦਲਕ (ਕ.)] ਜਾਤਕਂ ਦਸਮਂ.

ਨਤਂਦਲ਼੍ਹਵਗ੍ਗੋ ਛਟ੍ਠੋ.

ਤਸ੍ਸੁਦ੍ਦਾਨਂ –

ਦਲ਼੍ਹਬਨ੍ਧਨ ਹਂਸਵਰੋ ਚ ਪੁਨ, ਵਿਰੂਪਕ੍ਖ ਸਵਿਟ੍ਠਕ ਮਚ੍ਛਵਰੋ;

ਸਕੁਰੁਙ੍ਗ ਸਅਸ੍ਸਕ ਅਮ੍ਬਵਰੋ, ਪੁਨ ਕੁਕ੍ਕੁਟਕੋ ਗਰੁਲ਼ੇਨ ਦਸਾਤਿ.