੫. ਰੁਹਕਵਗ੍ਗੋ

੧੯੧. ਰੁਹਕਜਾਤਕਂ (੨-੫-੧)

੮੧. ਅਪਿ [ਅਮ੍ਭੋ (ਸ੍ਯਾ. ਕ. ਸੀ.)] ਰੁਹਕ ਛਿਨ੍ਨਾਪਿ, ਜਿਯਾ ਸਨ੍ਧੀਯਤੇ ਪੁਨ;

ਸਨ੍ਧੀਯਸ੍ਸੁ ਪੁਰਾਣਿਯਾ, ਮਾ ਕੋਧਸ੍ਸ ਵਸਂ ਗਮਿ.

੮੨. ਵਿਜ੍ਜਮਾਨੇਸੁ ਵਾਕੇਸੁ [ਵਿਜ੍ਜਮਾਨਾਸੁ ਮਰੁਵਾਸੁ (ਸੀ.), ਵਿਜ੍ਜਮਾਨਾਸੁ ਮਰੂਦ੍ਵਾਸੁ (ਪੀ.)], ਵਿਜ੍ਜਮਾਨੇਸੁ ਕਾਰਿਸੁ;

ਅਞ੍ਞਂ ਜਿਯਂ ਕਰਿਸ੍ਸਾਮਿ, ਅਲਞ੍ਞੇਵ ਪੁਰਾਣਿਯਾਤਿ.

ਰੁਹਕਜਾਤਕਂ ਪਠਮਂ.

੧੯੨. ਸਿਰਿਕਾਲ਼ਕਣ੍ਣਿਜਾਤਕਂ (੨-੫-੨)

੮੩. ਇਤ੍ਥੀ ਸਿਯਾ ਰੂਪਵਤੀ, ਸਾ ਚ ਸੀਲਵਤੀ ਸਿਯਾ;

ਪੁਰਿਸੋ ਤਂ ਨ ਇਚ੍ਛੇਯ੍ਯ, ਸਦ੍ਦਹਾਸਿ ਮਹੋਸਧ.

੮੪. ਸਦ੍ਦਹਾਮਿ ਮਹਾਰਾਜ, ਪੁਰਿਸੋ ਦੁਬ੍ਭਗੋ ਸਿਯਾ;

ਸਿਰੀ ਚ ਕਾਲ਼ਕਣ੍ਣੀ ਚ, ਨ ਸਮੇਨ੍ਤਿ ਕੁਦਾਚਨਨ੍ਤਿ.

ਸਿਰਿਕਾਲ਼ਕਣ੍ਣਿਜਾਤਕਂ ਦੁਤਿਯਂ.

੧੯੩. ਚੂਲ਼ਪਦੁਮਜਾਤਕਂ (੨-੫-੩)

੮੫. ਅਯਮੇਵ ਸਾ ਅਹਮਪਿ [ਅਹਮ੍ਪਿ (ਸੀ. ਸ੍ਯਾ. ਪੀ.), ਅਹਸ੍ਮਿ (ਕ.)] ਸੋ ਅਨਞ੍ਞੋ, ਅਯਮੇਵ ਸੋ ਹਤ੍ਥਚ੍ਛਿਨ੍ਨੋ ਅਨਞ੍ਞੋ;

ਯਮਾਹ ‘‘ਕੋਮਾਰਪਤੀ ਮਮ’’ਨ੍ਤਿ, ਵਜ੍ਝਿਤ੍ਥਿਯੋ ਨਤ੍ਥਿ ਇਤ੍ਥੀਸੁ ਸਚ੍ਚਂ.

੮੬. ਇਮਞ੍ਚ ਜਮ੍ਮਂ ਮੁਸਲੇਨ ਹਨ੍ਤ੍ਵਾ, ਲੁਦ੍ਦਂ ਛਵਂ ਪਰਦਾਰੂਪਸੇਵਿਂ;

ਇਮਿਸ੍ਸਾ ਚ ਨਂ ਪਾਪਪਤਿਬ੍ਬਤਾਯ, ਜੀਵਨ੍ਤਿਯਾ ਛਿਨ੍ਦਥ ਕਣ੍ਣਨਾਸਨ੍ਤਿ.

ਚੂਲ਼ਪਦੁਮਜਾਤਕਂ ਤਤਿਯਂ.

੧੯੪. ਮਣਿਚੋਰਜਾਤਕਂ (੨-੫-੪)

੮੭. ਨ ਸਨ੍ਤਿ ਦੇਵਾ ਪਵਸਨ੍ਤਿ ਨੂਨ, ਨ ਹਿ ਨੂਨ ਸਨ੍ਤਿ ਇਧ ਲੋਕਪਾਲਾ;

ਸਹਸਾ ਕਰੋਨ੍ਤਾਨਮਸਞ੍ਞਤਾਨਂ, ਨ ਹਿ ਨੂਨ ਸਨ੍ਤੀ ਪਟਿਸੇਧਿਤਾਰੋ.

੮੮. ਅਕਾਲੇ ਵਸ੍ਸਤੀ ਤਸ੍ਸ, ਕਾਲੇ ਤਸ੍ਸ ਨ ਵਸ੍ਸਤਿ;

ਸਗ੍ਗਾ ਚ ਚਵਤਿ ਠਾਨਾ, ਨਨੁ ਸੋ ਤਾਵਤਾ ਹਤੋਤਿ.

ਮਣਿਚੋਰਜਾਤਕਂ ਚਤੁਤ੍ਥਂ.

੧੯੫. ਪਬ੍ਬਤੂਪਤ੍ਥਰਜਾਤਕਂ (੨-੫-੫)

੮੯. ਪਬ੍ਬਤੂਪਤ੍ਥਰੇ [ਪਬ੍ਬਤਪਤ੍ਥਰੇ (ਸੀ. ਸ੍ਯਾ. ਪੀ.)] ਰਮ੍ਮੇ, ਜਾਤਾ ਪੋਕ੍ਖਰਣੀ ਸਿਵਾ;

ਤਂ ਸਿਙ੍ਗਾਲੋ ਅਪਾਪਾਯਿ [ਅਪਾਪਾਸਿ (ਸੀ. ਸ੍ਯਾ. ਪੀ.)], ਜਾਨਂ ਸੀਹੇਨ ਰਕ੍ਖਿਤਂ.

੯੦. ਪਿਵਨ੍ਤਿ ਚੇ [ਪਿਵਨ੍ਤਿ ਵੇ (ਸੀ.), ਪਿਵਨ੍ਤਿਵ (ਪੀ.), ਪਿਵਨ੍ਤੇਵ (?)] ਮਹਾਰਾਜ, ਸਾਪਦਾਨਿ ਮਹਾਨਦਿਂ;

ਨ ਤੇਨ ਅਨਦੀ ਹੋਤਿ, ਖਮਸ੍ਸੁ ਯਦਿ ਤੇ ਪਿਯਾਤਿ.

ਪਬ੍ਬਤੂਪਤ੍ਥਰ [ਪਬ੍ਬਤਪਤ੍ਥਰ (ਸੀ. ਸ੍ਯਾ. ਪੀ.)] ਜਾਤਕਂ ਪਞ੍ਚਮਂ.

੧੯੬. ਵਲਾਹਕਸ੍ਸਜਾਤਕਂ (੨-੫-੬)

੯੧. ਯੇ ਨ ਕਾਹਨ੍ਤਿ ਓਵਾਦਂ, ਨਰਾ ਬੁਦ੍ਧੇਨ ਦੇਸਿਤਂ;

ਬ੍ਯਸਨਂ ਤੇ ਗਮਿਸ੍ਸਨ੍ਤਿ, ਰਕ੍ਖਸੀਹਿਵ ਵਾਣਿਜਾ.

੯੨. ਯੇ ਚ ਕਾਹਨ੍ਤਿ ਓਵਾਦਂ, ਨਰਾ ਬੁਦ੍ਧੇਨ ਦੇਸਿਤਂ;

ਸੋਤ੍ਥਿਂ ਪਾਰਂ ਗਮਿਸ੍ਸਨ੍ਤਿ, ਵਲਾਹੇਨੇਵ [ਵਾਲਾਹੇਨੇਵ (ਸੀ. ਪੀ.)] ਵਾਣਿਜਾਤਿ.

ਵਲਾਹਕਸ੍ਸ [ਵਾਲਾਹਸ੍ਸ (ਸੀ. ਪੀ.)] ਜਾਤਕਂ ਛਟ੍ਠਂ.

੧੯੭. ਮਿਤ੍ਤਾਮਿਤ੍ਤਜਾਤਕਂ (੨-੫-੭)

੯੩. ਨ ਨਂ ਉਮ੍ਹਯਤੇ ਦਿਸ੍ਵਾ, ਨ ਚ ਨਂ ਪਟਿਨਨ੍ਦਤਿ;

ਚਕ੍ਖੂਨਿ ਚਸ੍ਸ ਨ ਦਦਾਤਿ, ਪਟਿਲੋਮਞ੍ਚ ਵਤ੍ਤਤਿ.

੯੪. ਏਤੇ ਭਵਨ੍ਤਿ ਆਕਾਰਾ, ਅਮਿਤ੍ਤਸ੍ਮਿਂ ਪਤਿਟ੍ਠਿਤਾ;

ਯੇਹਿ ਅਮਿਤ੍ਤਂ ਜਾਨੇਯ੍ਯ, ਦਿਸ੍ਵਾ ਸੁਤ੍ਵਾ ਚ ਪਣ੍ਡਿਤੋਤਿ.

ਮਿਤ੍ਤਾਮਿਤ੍ਤਜਾਤਕਂ ਸਤ੍ਤਮਂ.

੧੯੮. ਰਾਧਜਾਤਕਂ (੨-੫-੮)

੯੫. ਪਵਾਸਾ ਆਗਤੋ ਤਾਤ, ਇਦਾਨਿ ਨਚਿਰਾਗਤੋ;

ਕਚ੍ਚਿਨ੍ਨੁ ਤਾਤ ਤੇ ਮਾਤਾ, ਨ ਅਞ੍ਞਮੁਪਸੇਵਤਿ.

੯੬. ਨ ਖੋ ਪਨੇਤਂ ਸੁਭਣਂ, ਗਿਰਂ ਸਚ੍ਚੁਪਸਂਹਿਤਂ;

ਸਯੇਥ ਪੋਟ੍ਠਪਾਦੋਵ, ਮੁਮ੍ਮੁਰੇ [ਮੁਮ੍ਮੁਰੇ (ਸ੍ਯਾ.), ਮਂ ਪੁਰੇ (ਕ.) ਮੁਮ੍ਮੁਰਸਦ੍ਦੋ ਥੁਸਗ੍ਗਿਮ੍ਹਿ ਕੁਕ੍ਕੁਲ਼ੇ ਚ ਵਤ੍ਤਤੀਤਿ ਸਕ੍ਕਤਾਭਿਧਾਨੇਸੁ] ਉਪਕੂਥਿਤੋਤਿ [ਉਪਕੂਸਿਤੋਤਿ (ਸੀ. ਸ੍ਯਾ. ਪੀ.), ਉਪਕੂਲਿਤੋ (ਕ.)].

ਰਾਧਜਾਤਕਂ ਅਟ੍ਠਮਂ.

੧੯੯. ਗਹਪਤਿਜਾਤਕਂ (੨-੫-੯)

੯੭. ਉਭਯਂ ਮੇ ਨ ਖਮਤਿ, ਉਭਯਂ ਮੇ ਨ ਰੁਚ੍ਚਤਿ;

ਯਾਚਾਯਂ ਕੋਟ੍ਠਮੋਤਿਣ੍ਣਾ, ਨਾਦ੍ਦਸਂ ਇਤਿ ਭਾਸਤਿ.

੯੮. ਤਂ ਤਂ ਗਾਮਪਤਿ ਬ੍ਰੂਮਿ, ਕਦਰੇ ਅਪ੍ਪਸ੍ਮਿ ਜੀਵਿਤੇ;

ਦ੍ਵੇ ਮਾਸੇ ਸਙ੍ਗਰਂ ਕਤ੍ਵਾ [ਕਾਰਂ ਕਤ੍ਵਾਨ (ਸੀ. ਪੀ.), ਸਂਕਰਂ ਕਤ੍ਵਾ (ਕ.)], ਮਂਸਂ ਜਰਗ੍ਗਵਂ ਕਿਸਂ;

ਅਪ੍ਪਤ੍ਤਕਾਲੇ ਚੋਦੇਸਿ, ਤਮ੍ਪਿ ਮਯ੍ਹਂ ਨ ਰੁਚ੍ਚਤੀਤਿ.

ਗਹਪਤਿਜਾਤਕਂ ਨਵਮਂ.

੨੦੦. ਸਾਧੁਸੀਲਜਾਤਕਂ (੨-੫-੧੦)

੯੯. ਸਰੀਰਦਬ੍ਯਂ ਵੁਡ੍ਢਬ੍ਯਂ [ਵਦ੍ਧਬ੍ਯਂ (ਸੀ. ਪੀ.)], ਸੋਜਚ੍ਚਂ ਸਾਧੁਸੀਲਿਯਂ;

ਬ੍ਰਾਹ੍ਮਣਂ ਤੇਵ ਪੁਚ੍ਛਾਮ, ਕਨ੍ਨੁ ਤੇਸਂ ਵਨਿਮ੍ਹਸੇ [ਵਣਿਮ੍ਹਸੇ (ਸੀ. ਪੀ.)].

੧੦੦. ਅਤ੍ਥੋ ਅਤ੍ਥਿ ਸਰੀਰਸ੍ਮਿਂ, ਵੁਡ੍ਢਬ੍ਯਸ੍ਸ ਨਮੋ ਕਰੇ;

ਅਤ੍ਥੋ ਅਤ੍ਥਿ ਸੁਜਾਤਸ੍ਮਿਂ, ਸੀਲਂ ਅਸ੍ਮਾਕ ਰੁਚ੍ਚਤੀਤਿ.

ਸਾਧੁਸੀਲਜਾਤਕਂ ਦਸਮਂ.

ਰੁਹਕਵਗ੍ਗੋ ਪਞ੍ਚਮੋ.

ਤਸ੍ਸੁਦ੍ਦਾਨਂ –

ਅਪਿਰੁਹਕ ਰੂਪਵਤੀ ਮੁਸਲੋ, ਪਵਸਨ੍ਤਿ ਸਪਞ੍ਚਮਪੋਕ੍ਖਰਣੀ;

ਅਥ ਮੁਤ੍ਤਿਮਵਾਣਿਜ ਉਮ੍ਹਯਤੇ, ਚਿਰਆਗਤ ਕੋਟ੍ਠ ਸਰੀਰ ਦਸਾਤਿ.