੪. ਅਸਦਿਸਵਗ੍ਗੋ

੧੮੧. ਅਸਦਿਸਜਾਤਕਂ (੨-੪-੧)

੬੧. ਧਨੁਗ੍ਗਹੋ ਅਸਦਿਸੋ, ਰਾਜਪੁਤ੍ਤੋ ਮਹਬ੍ਬਲੋ;

ਦੂਰੇਪਾਤੀ ਅਕ੍ਖਣਵੇਧੀ, ਮਹਾਕਾਯਪ੍ਪਦਾਲਨੋ.

੬੨. ਸਬ੍ਬਾਮਿਤ੍ਤੇ ਰਣਂ ਕਤ੍ਵਾ, ਨ ਚ ਕਞ੍ਚਿ ਵਿਹੇਠਯਿ;

ਭਾਤਰਂ ਸੋਤ੍ਥਿਂ ਕਤ੍ਵਾਨ, ਸਂਯਮਂ ਅਜ੍ਝੁਪਾਗਮੀਤਿ.

ਅਸਦਿਸਜਾਤਕਂ ਪਠਮਂ.

੧੮੨. ਸਙ੍ਗਾਮਾਵਚਰਜਾਤਕਂ (੨-੪-੨)

੬੩. ਸਙ੍ਗਾਮਾਵਚਰੋ ਸੂਰੋ, ਬਲਵਾ ਇਤਿ ਵਿਸ੍ਸੁਤੋ;

ਕਿਂ ਨੁ ਤੋਰਣਮਾਸਜ੍ਜ, ਪਟਿਕ੍ਕਮਸਿ ਕੁਞ੍ਜਰ.

੬੪. ਓਮਦ੍ਦ ਖਿਪ੍ਪਂ ਪਲਿਘਂ, ਏਸਿਕਾਨਿ ਚ ਅਬ੍ਬਹ [ਉਬ੍ਬਹ (ਸ੍ਯਾ.), ਅਬ੍ਭੁਹ (ਕ.)];

ਤੋਰਣਾਨਿ ਚ ਮਦ੍ਦਿਤ੍ਵਾ, ਖਿਪ੍ਪਂ ਪਵਿਸ ਕੁਞ੍ਜਰਾਤਿ.

ਸਙ੍ਗਾਮਾਵਚਰਜਾਤਕਂ ਦੁਤਿਯਂ.

੧੮੩. ਵਾਲੋਦਕਜਾਤਕਂ (੨-੪-੩)

੬੫. ਵਾਲੋਦਕਂ ਅਪ੍ਪਰਸਂ ਨਿਹੀਨਂ, ਪਿਤ੍ਵਾ [ਪੀਤ੍ਵਾ (ਸੀ. ਪੀ.)] ਮਦੋ ਜਾਯਤਿ ਗਦ੍ਰਭਾਨਂ;

ਇਮਞ੍ਚ ਪਿਤ੍ਵਾਨ ਰਸਂ ਪਣੀਤਂ, ਮਦੋ ਨ ਸਞ੍ਜਾਯਤਿ ਸਿਨ੍ਧਵਾਨਂ.

੬੬. ਅਪ੍ਪਂ ਪਿਵਿਤ੍ਵਾਨ ਨਿਹੀਨਜਚ੍ਚੋ, ਸੋ ਮਜ੍ਜਤੀ ਤੇਨ ਜਨਿਨ੍ਦ ਪੁਟ੍ਠੋ [ਫੁਟ੍ਠੋ (ਸੀ. ਸ੍ਯਾ.), ਮੁਟ੍ਠੋ (ਕ.)];

ਧੋਰਯ੍ਹਸੀਲੀ ਚ ਕੁਲਮ੍ਹਿ ਜਾਤੋ, ਨ ਮਜ੍ਜਤੀ ਅਗ੍ਗਰਸਂ ਪਿਵਿਤ੍ਵਾਤਿ.

ਵਾਲੋਦਕਜਾਤਕਂ ਤਤਿਯਂ.

੧੮੪. ਗਿਰਿਦਤ੍ਤਜਾਤਕਂ (੨-੪-੪)

੬੭. ਦੂਸਿਤੋ ਗਿਰਿਦਤ੍ਤੇਨ [ਗਿਰਿਦਨ੍ਤੇਨ (ਪੀ.)], ਹਯੋ ਸਾਮਸ੍ਸ ਪਣ੍ਡਵੋ;

ਪੋਰਾਣਂ ਪਕਤਿਂ ਹਿਤ੍ਵਾ, ਤਸ੍ਸੇਵਾਨੁਵਿਧਿਯ੍ਯਤਿ [ਨੁਵਿਧੀਯਤਿ (ਸੀ. ਪੀ.)].

੬੮. ਸਚੇ ਚ ਤਨੁਜੋ ਪੋਸੋ, ਸਿਖਰਾਕਾਰ [ਸਿਙ੍ਗਾਰਾਕਾਰ (ਸ੍ਯਾ.)] ਕਪ੍ਪਿਤੋ;

ਆਨਨੇ ਨਂ [ਤਂ (ਸੀ. ਸ੍ਯਾ. ਪੀ.)] ਗਹੇਤ੍ਵਾਨ, ਮਣ੍ਡਲੇ ਪਰਿਵਤ੍ਤਯੇ;

ਖਿਪ੍ਪਮੇਵ ਪਹਨ੍ਤ੍ਵਾਨ, ਤਸ੍ਸੇਵਾਨੁਵਿਧਿਯ੍ਯਤੀਤਿ.

ਗਿਰਿਦਤ੍ਤਜਾਤਕਂ ਚਤੁਤ੍ਥਂ.

੧੮੫. ਅਨਭਿਰਤਿਜਾਤਕਂ (੨-੪-੫)

੬੯. ਯਥੋਦਕੇ ਆਵਿਲੇ ਅਪ੍ਪਸਨ੍ਨੇ, ਨ ਪਸ੍ਸਤਿ ਸਿਪ੍ਪਿਕਸਮ੍ਬੁਕਞ੍ਚ;

ਸਕ੍ਖਰਂ ਵਾਲੁਕਂ ਮਚ੍ਛਗੁਮ੍ਬਂ, ਏਵਂ ਆਵਿਲਮ੍ਹਿ [ਆਵਿਲੇ ਹਿ (ਸੀ.)] ਚਿਤ੍ਤੇ;

ਨ ਪਸ੍ਸਤਿ ਅਤ੍ਤਦਤ੍ਥਂ ਪਰਤ੍ਥਂ.

੭੦. ਯਥੋਦਕੇ ਅਚ੍ਛੇ ਵਿਪ੍ਪਸਨ੍ਨੇ, ਸੋ ਪਸ੍ਸਤਿ ਸਿਪ੍ਪਿਕਸਮ੍ਬੁਕਞ੍ਚ;

ਸਕ੍ਖਰਂ ਵਾਲੁਕਂ ਮਚ੍ਛਗੁਮ੍ਬਂ, ਏਵਂ ਅਨਾਵਿਲਮ੍ਹਿ ਚਿਤ੍ਤੇ;

ਸੋ ਪਸ੍ਸਤਿ ਅਤ੍ਤਦਤ੍ਥਂ ਪਰਤ੍ਥਨ੍ਤਿ.

ਅਨਭਿਰਤਿਜਾਤਕਂ ਪਞ੍ਚਮਂ.

੧੮੬. ਦਧਿਵਾਹਨਜਾਤਕਂ (੨-੪-੬)

੭੧. ਵਣ੍ਣਗਨ੍ਧਰਸੂਪੇਤੋ, ਅਮ੍ਬੋਯਂ ਅਹੁਵਾ ਪੁਰੇ;

ਤਮੇਵ ਪੂਜਂ ਲਭਮਾਨੋ, ਕੇਨਮ੍ਬੋ ਕਟੁਕਪ੍ਫਲੋ.

੭੨. ਪੁਚਿਮਨ੍ਦਪਰਿਵਾਰੋ, ਅਮ੍ਬੋ ਤੇ ਦਧਿਵਾਹਨ;

ਮੂਲਂ ਮੂਲੇਨ ਸਂਸਟ੍ਠਂ, ਸਾਖਾ ਸਾਖਾ [ਸਾਖਂ (ਸ੍ਯਾ. ਕ.)] ਨਿਸੇਵਰੇ [ਨਿਵੀਸਰੇ (ਕ.)];

ਅਸਾਤਸਨ੍ਨਿਵਾਸੇਨ, ਤੇਨਮ੍ਬੋ ਕਟੁਕਪ੍ਫਲੋਤਿ.

ਦਧਿਵਾਹਨਜਾਤਕਂ ਛਟ੍ਠਂ.

੧੮੭. ਚਤੁਮਟ੍ਠਜਾਤਕਂ (੨-੪-੭)

੭੩. ਉਚ੍ਚੇ ਵਿਟਭਿਮਾਰੁਯ੍ਹ, ਮਨ੍ਤਯਵ੍ਹੋ ਰਹੋਗਤਾ;

ਨੀਚੇ ਓਰੁਯ੍ਹ ਮਨ੍ਤਵ੍ਹੋ, ਮਿਗਰਾਜਾਪਿ ਸੋਸ੍ਸਤਿ.

੭੪. ਯਂ ਸੁਵਣ੍ਣੋ ਸੁਵਣ੍ਣੇਨ [ਯਂ ਸੁਪਣ੍ਣੋ ਸੁਪਣ੍ਣੇਨ (ਸੀ. ਸ੍ਯਾ. ਪੀ.)], ਦੇਵੋ ਦੇਵੇਨ ਮਨ੍ਤਯੇ;

ਕਿਂ ਤੇਤ੍ਥ ਚਤੁਮਟ੍ਠਸ੍ਸ, ਬਿਲਂ ਪਵਿਸ ਜਮ੍ਬੁਕਾਤਿ.

ਚਤੁਮਟ੍ਠਜਾਤਕਂ ਸਤ੍ਤਮਂ.

੧੮੮. ਸੀਹਕੋਤ੍ਥੁਜਾਤਕਂ (੨-੪-੮)

੭੫. ਸੀਹਙ੍ਗੁਲੀ ਸੀਹਨਖੋ, ਸੀਹਪਾਦਪਤਿਟ੍ਠਿਤੋ;

ਸੋ ਸੀਹੋ ਸੀਹਸਙ੍ਘਮ੍ਹਿ, ਏਕੋ ਨਦਤਿ ਅਞ੍ਞਥਾ.

੭੬. ਮਾ ਤ੍ਵਂ ਨਦਿ ਰਾਜਪੁਤ੍ਤ, ਅਪ੍ਪਸਦ੍ਦੋ ਵਨੇ ਵਸ;

ਸਰੇਨ ਖੋ [ਮਾ (ਕ.)] ਤਂ ਜਾਨੇਯ੍ਯੁਂ, ਨ ਹਿ ਤੇ ਪੇਤ੍ਤਿਕੋ ਸਰੋਤਿ.

ਸੀਹਕੋਤ੍ਥੁਜਾਤਕਂ ਅਟ੍ਠਮਂ.

੧੮੯. ਸੀਹਚਮ੍ਮਜਾਤਕਂ (੨-੪-੯)

੭੭. ਨੇਤਂ ਸੀਹਸ੍ਸ ਨਦਿਤਂ, ਨ ਬ੍ਯਗ੍ਘਸ੍ਸ ਨ [ਬ੍ਯਗ੍ਘਸ੍ਸ ਨ ਚ (ਕ.)] ਦੀਪਿਨੋ;

ਪਾਰੁਤੋ ਸੀਹਚਮ੍ਮੇਨ, ਜਮ੍ਮੋ ਨਦਤਿ ਗਦ੍ਰਭੋ.

੭੮. ਚਿਰਮ੍ਪਿ ਖੋ ਤਂ ਖਾਦੇਯ੍ਯ, ਗਦ੍ਰਭੋ ਹਰਿਤਂ ਯਵਂ;

ਪਾਰੁਤੋ ਸੀਹਚਮ੍ਮੇਨ, ਰਵਮਾਨੋਵ ਦੂਸਯੀਤਿ.

ਸੀਹਚਮ੍ਮਜਾਤਕਂ ਨਵਮਂ.

੧੯੦. ਸੀਲਾਨਿਸਂਸਜਾਤਕਂ (੨-੪-੧੦)

੭੯. ਪਸ੍ਸ ਸਦ੍ਧਾਯ ਸੀਲਸ੍ਸ, ਚਾਗਸ੍ਸ ਚ ਅਯਂ ਫਲਂ;

ਨਾਗੋ ਨਾਵਾਯ ਵਣ੍ਣੇਨ, ਸਦ੍ਧਂ ਵਹਤੁਪਾਸਕਂ.

੮੦. ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਤਞ੍ਹਿ ਸਨ੍ਨਿਵਾਸੇਨ, ਸੋਤ੍ਥਿਂ ਗਚ੍ਛਤਿ ਨ੍ਹਾਪਿਤੋਤਿ.

ਸੀਲਾਨਿਸਂਸਜਾਤਕਂ ਦਸਮਂ.

ਅਸਦਿਸਵਗ੍ਗੋ ਚਤੁਤ੍ਥੋ.

ਤਸ੍ਸੁਦ੍ਦਾਨਂ –

ਧਨੁਗ੍ਗਹ ਕੁਞ੍ਜਰ ਅਪ੍ਪਰਸੋ, ਗਿਰਿਦਤ੍ਤਮਨਾਵਿਲਚਿਤ੍ਤਵਰਂ;

ਦਧਿਵਾਹਨ ਜਮ੍ਬੂਕ ਸੀਹਨਖੋ, ਹਰਿਤਯਵ ਨਾਗਵਰੇਨ ਦਸਾਤਿ.