੩. ਕਲ੍ਯਾਣਵਗ੍ਗੋ
੧੭੧. ਕਲ੍ਯਾਣਧਮ੍ਮਜਾਤਕਂ (੨-੩-੧)
੪੧. ਕਲ੍ਯਾਣਧਮ੍ਮੋਤਿ ਯਦਾ ਜਨਿਨ੍ਦ, ਲੋਕੇ ਸਮਞ੍ਞਂ ਅਨੁਪਾਪੁਣਾਤਿ;
ਤਸ੍ਮਾ ਨ ਹਿਯ੍ਯੇਥ [ਹੀਯੇਥ (ਸੀ.)] ਨਰੋ ਸਪਞ੍ਞੋ, ਹਿਰਿਯਾਪਿ ਸਨ੍ਤੋ ਧੁਰਮਾਦਿਯਨ੍ਤਿ.
੪੨. ਸਾਯਂ ਸਮਞ੍ਞਾ ਇਧ ਮਜ੍ਜ ਪਤ੍ਤਾ, ਕਲ੍ਯਾਣਧਮ੍ਮੋਤਿ ਜਨਿਨ੍ਦ ਲੋਕੇ;
ਤਾਹਂ ਸਮੇਕ੍ਖਂ ਇਧ ਪਬ੍ਬਜਿਸ੍ਸਂ, ਨ ਹਿ ਮਤ੍ਥਿ ਛਨ੍ਦੋ ਇਧ ਕਾਮਭੋਗੇਤਿ.
ਕਲ੍ਯਾਣਧਮ੍ਮਜਾਤਕਂ ਪਠਮਂ.
੧੭੨. ਦਦ੍ਦਰਜਾਤਕਂ (੨-੩-੨)
੪੩. ਕੋ ਨੁ ਸਦ੍ਦੇਨ ਮਹਤਾ, ਅਭਿਨਾਦੇਤਿ ਦਦ੍ਦਰਂ;
ਤਂ ਸੀਹਾ ਨਪ੍ਪਟਿਨਦਨ੍ਤਿ [ਕਿਂ ਸੀਹਾ ਨਪ੍ਪਟਿਨਦਨ੍ਤਿ (ਸੀ. ਪੀ.), ਨ ਸੀਹਾ ਪਟਿਨਦਨ੍ਤਿ (ਕ.)], ਕੋ ਨਾਮੇਸੋ ਮਿਗਾਧਿਭੂ.
੪੪. ਅਧਮੋ ਮਿਗਜਾਤਾਨਂ, ਸਿਙ੍ਗਾਲੋ ਤਾਤ ਵਸ੍ਸਤਿ;
ਜਾਤਿਮਸ੍ਸ ਜਿਗੁਚ੍ਛਨ੍ਤਾ, ਤੁਣ੍ਹੀ ਸੀਹਾ ਸਮਚ੍ਛਰੇਤਿ.
ਦਦ੍ਦਰਜਾਤਕਂ ਦੁਤਿਯਂ.
੧੭੩. ਮਕ੍ਕਟਜਾਤਕਂ (੨-੩-੩)
੪੫. ਤਾਤ ਮਾਣਵਕੋ ਏਸੋ, ਤਾਲਮੂਲਂ ਅਪਸ੍ਸਿਤੋ;
ਅਗਾਰਕਞ੍ਚਿਦਂ ਅਤ੍ਥਿ, ਹਨ੍ਦ ਦੇਮਸ੍ਸਗਾਰਕਂ.
੪੬. ਮਾ ਖੋ ਤ੍ਵਂ ਤਾਤ ਪਕ੍ਕੋਸਿ, ਦੂਸੇਯ੍ਯ ਨੋ ਅਗਾਰਕਂ;
ਨੇਤਾਦਿਸਂ ਮੁਖਂ ਹੋਤਿ, ਬ੍ਰਾਹ੍ਮਣਸ੍ਸ ਸੁਸੀਲਿਨੋਤਿ.
ਮਕ੍ਕਟਜਾਤਕਂ ਤਤਿਯਂ.
੧੭੪. ਦੁਬ੍ਭਿਯਮਕ੍ਕਟਜਾਤਕਂ (੨-੩-੪)
੪੭. ਅਦਮ੍ਹ ਤੇ ਵਾਰਿ ਪਹੂਤਰੂਪਂ, ਘਮ੍ਮਾਭਿਤਤ੍ਤਸ੍ਸ ਪਿਪਾਸਿਤਸ੍ਸ;
ਸੋ ਦਾਨਿ ਪਿਤ੍ਵਾਨ [ਪੀਤ੍ਵਾਨ (ਸੀ. ਪੀ.)] ਕਿਰਿਙ੍ਕਰੋਸਿ [ਕਿਕਿਂਕਰੋਸਿ (ਸੀ. ਸ੍ਯਾ. ਪੀ.)], ਅਸਙ੍ਗਮੋ ਪਾਪਜਨੇਨ ਸੇਯ੍ਯੋ.
੪੮. ਕੋ ਤੇ ਸੁਤੋ ਵਾ ਦਿਟ੍ਠੋ ਵਾ, ਸੀਲਵਾ ਨਾਮ ਮਕ੍ਕਟੋ;
ਇਦਾਨਿ ਖੋ ਤਂ ਓਹਚ੍ਛਂ [ਊਹਚ੍ਚ (ਸੀ. ਪੀ.), ਓਹਚ੍ਚਂ (ਸ੍ਯਾ.), ਉਹਜ੍ਜਂ (ਕ.)], ਏਸਾ ਅਸ੍ਮਾਕ ਧਮ੍ਮਤਾਤਿ.
ਦੁਬ੍ਭਿਯਮਕ੍ਕਟਜਾਤਕਂ ਚਤੁਤ੍ਥਂ.
੧੭੫. ਆਦਿਚ੍ਚੁਪਟ੍ਠਾਨਜਾਤਕਂ (੨-੩-੫)
੪੯. ਸਬ੍ਬੇਸੁ ਕਿਰ ਭੂਤੇਸੁ, ਸਨ੍ਤਿ ਸੀਲਸਮਾਹਿਤਾ;
ਪਸ੍ਸ ਸਾਖਾਮਿਗਂ ਜਮ੍ਮਂ, ਆਦਿਚ੍ਚਮੁਪਤਿਟ੍ਠਤਿ.
੫੦. ਨਾਸ੍ਸ ਸੀਲਂ ਵਿਜਾਨਾਥ, ਅਨਞ੍ਞਾਯ ਪਸਂਸਥ;
ਅਗ੍ਗਿਹੁਤ੍ਤਞ੍ਚ ਉਹਨ੍ਨਂ [ਊਹਨ੍ਤਂ (ਸੀ.), ਊਹਨਂ (ਸ੍ਯਾ.), ਊਹਨ੍ਤਿ (ਪੀ.), ਉਹਦਂ (ਕ.)], ਦ੍ਵੇ ਚ ਭਿਨ੍ਨਾ ਕਮਣ੍ਡਲੂਤਿ.
ਆਦਿਚ੍ਚੁਪਟ੍ਠਾਨਜਾਤਕਂ ਪਞ੍ਚਮਂ.
੧੭੬. ਕਲ਼ਾਯਮੁਟ੍ਠਿਜਾਤਕਂ (੨-੩-੬)
੫੧. ਬਾਲੋ ਵਤਾਯਂ ਦੁਮਸਾਖਗੋਚਰੋ, ਪਞ੍ਞਾ ਜਨਿਨ੍ਦ ਨਯਿਮਸ੍ਸ ਵਿਜ੍ਜਤਿ;
ਕਲ਼ਾਯਮੁਟ੍ਠਿਂ [ਕਲਾਯਮੁਟ੍ਠਿਂ (ਸੀ. ਪੀ.)] ਅਵਕਿਰਿਯ ਕੇਵਲਂ, ਏਕਂ ਕਲ਼ਾਯਂ ਪਤਿਤਂ ਗਵੇਸਤਿ.
੫੨. ਏਵਮੇਵ ਮਯਂ ਰਾਜ, ਯੇ ਚਞ੍ਞੇ ਅਤਿਲੋਭਿਨੋ;
ਅਪ੍ਪੇਨ ਬਹੁਂ ਜਿਯ੍ਯਾਮ, ਕਲ਼ਾਯੇਨੇਵ ਵਾਨਰੋਤਿ.
ਕਲ਼ਾਯਮੁਟ੍ਠਿਜਾਤਕਂ ਛਟ੍ਠਂ.
੧੭੭. ਤਿਨ੍ਦੁਕਜਾਤਕਂ (੨-੩-੭)
੫੩. ਧਨੁਹਤ੍ਥਕਲਾਪੇਹਿ, ਨੇਤ੍ਤਿਂ ਸਵਰਧਾਰਿਭਿ;
ਸਮਨ੍ਤਾ ਪਰਿਕਿਣ੍ਣਮ੍ਹ, ਕਥਂ ਮੋਕ੍ਖੋ ਭਵਿਸ੍ਸਤਿ.
੫੪. ਅਪ੍ਪੇਵ ਬਹੁਕਿਚ੍ਚਾਨਂ, ਅਤ੍ਥੋ ਜਾਯੇਥ ਕੋਚਿ ਨਂ;
ਅਤ੍ਥਿ ਰੁਕ੍ਖਸ੍ਸ ਅਚ੍ਛਿਨ੍ਨਂ, ਖਜ੍ਜਥਞ੍ਞੇਵ ਤਿਨ੍ਦੁਕਨ੍ਤਿ.
ਤਿਨ੍ਦੁਕਜਾਤਕਂ ਸਤ੍ਤਮਂ.
੧੭੮. ਕਚ੍ਛਪਜਾਤਕਂ (੨-੩-੮)
੫੫. ਜਨਿਤ੍ਤਂ ਮੇ ਭਵਿਤ੍ਤਂ ਮੇ, ਇਤਿ ਪਙ੍ਕੇ ਅਵਸ੍ਸਯਿਂ;
ਤਂ ਮਂ ਪਙ੍ਕੋ ਅਜ੍ਝਭਵਿ, ਯਥਾ ਦੁਬ੍ਬਲਕਂ ਤਥਾ;
ਤਂ ਤਂ ਵਦਾਮਿ ਭਗ੍ਗਵ, ਸੁਣੋਹਿ ਵਚਨਂ ਮਮ.
੫੬. ਗਾਮੇ ਵਾ ਯਦਿ ਵਾ ਰਞ੍ਞੇ, ਸੁਖਂ ਯਤ੍ਰਾਧਿਗਚ੍ਛਤਿ;
ਤਂ ਜਨਿਤ੍ਤਂ ਭਵਿਤ੍ਤਞ੍ਚ, ਪੁਰਿਸਸ੍ਸ ਪਜਾਨਤੋ;
ਯਮ੍ਹਿ ਜੀਵੇ ਤਮ੍ਹਿ ਗਚ੍ਛੇ, ਨ ਨਿਕੇਤਹਤੋ ਸਿਯਾਤਿ.
ਕਚ੍ਛਪਜਾਤਕਂ ਅਟ੍ਠਮਂ.
੧੭੯. ਸਤਧਮ੍ਮਜਾਤਕਂ (੨-੩-੯)
੫੭. ਤਞ੍ਚ ਅਪ੍ਪਞ੍ਚ ਉਚ੍ਛਿਟ੍ਠਂ, ਤਞ੍ਚ ਕਿਚ੍ਛੇਨ ਨੋ ਅਦਾ;
ਸੋਹਂ ਬ੍ਰਾਹ੍ਮਣਜਾਤਿਕੋ, ਯਂ ਭੁਤ੍ਤਂ ਤਮ੍ਪਿ ਉਗ੍ਗਤਂ.
੫੮. ਏਵਂ ਧਮ੍ਮਂ ਨਿਰਂਕਤ੍ਵਾ [ਨਿਰਾਕਤ੍ਵਾ (?) ਨਿ + ਆ + ਕਰ + ਤ੍ਵਾ], ਯੋ ਅਧਮ੍ਮੇਨ ਜੀਵਤਿ;
ਸਤਧਮ੍ਮੋਵ ਲਾਭੇਨ, ਲਦ੍ਧੇਨਪਿ ਨ ਨਨ੍ਦਤੀਤਿ.
ਸਤਧਮ੍ਮਜਾਤਕਂ ਨਵਮਂ.
੧੮੦. ਦੁਦ੍ਦਦਜਾਤਕਂ (੨-੩-੧੦)
੫੯. ਦੁਦ੍ਦਦਂ ਦਦਮਾਨਾਨਂ, ਦੁਕ੍ਕਰਂ ਕਮ੍ਮ ਕੁਬ੍ਬਤਂ;
ਅਸਨ੍ਤੋ ਨਾਨੁਕੁਬ੍ਬਨ੍ਤਿ, ਸਤਂ ਧਮ੍ਮੋ ਦੁਰਨ੍ਨਯੋ.
੬੦. ਤਸ੍ਮਾ ਸਤਞ੍ਚ ਅਸਤਂ, ਨਾਨਾ ਹੋਤਿ ਇਤੋ ਗਤਿ;
ਅਸਨ੍ਤੋ ਨਿਰਯਂ ਯਨ੍ਤਿ, ਸਨ੍ਤੋ ਸਗ੍ਗਪਰਾਯਣਾਤਿ [ਪਰਾਯਨਾ (ਸ੍ਯਾ. ਕ.)].
ਦੁਦ੍ਦਦਜਾਤਕਂ ਦਸਮਂ.
ਕਲ੍ਯਾਣਵਗ੍ਗੋ ਤਤਿਯੋ.
ਤਸ੍ਸੁਦ੍ਦਾਨਂ –
ਸੁਸਮਞ੍ਞਮਿਗਾਧਿਭੂ ਮਾਣਵਕੋ, ਵਾਰਿਪਹੂਤਰੂਪਾਦਿਚ੍ਚੁਪਟ੍ਠਾਨਾ;
ਸਕਲ਼ਾਯਸਤਿਨ੍ਦੁਕਪਙ੍ਕ ਪੁਨ, ਸਤਧਮ੍ਮ ਸੁਦੁਦ੍ਦਦਕੇਨ ਦਸਾਤਿ.