੨. ਸਨ੍ਥਵਵਗ੍ਗੋ

੧੬੧. ਇਨ੍ਦਸਮਾਨਗੋਤ੍ਤਜਾਤਕਂ (੨-੨-੧)

੨੧. ਨ ਸਨ੍ਥਵਂ [ਸਨ੍ਧਵਂ (ਕ.)] ਕਾਪੁਰਿਸੇਨ ਕਯਿਰਾ, ਅਰਿਯੋ ਅਨਰਿਯੇਨ ਪਜਾਨਮਤ੍ਥਂ;

ਚਿਰਾਨੁਵੁਤ੍ਥੋਪਿ ਕਰੋਤਿ ਪਾਪਂ, ਗਜੋ ਯਥਾ ਇਨ੍ਦਸਮਾਨਗੋਤ੍ਤਂ.

੨੨. ਯਂ ਤ੍ਵੇਵ ਜਞ੍ਞਾ ਸਦਿਸੋ ਮਮਨ੍ਤਿ, ਸੀਲੇਨ ਪਞ੍ਞਾਯ ਸੁਤੇਨ ਚਾਪਿ;

ਤੇਨੇਵ ਮੇਤ੍ਤਿਂ ਕਯਿਰਾਥ ਸਦ੍ਧਿਂ, ਸੁਖੋ ਹਵੇ ਸਪ੍ਪੁਰਿਸੇਨ ਸਙ੍ਗਮੋਤਿ.

ਇਨ੍ਦਸਮਾਨਗੋਤ੍ਤਜਾਤਕਂ ਪਠਮਂ.

੧੬੨. ਸਨ੍ਥਵਜਾਤਕਂ (੨-੨-੨)

੨੩. ਨ ਸਨ੍ਥਵਸ੍ਮਾ ਪਰਮਤ੍ਥਿ ਪਾਪਿਯੋ, ਯੋ ਸਨ੍ਥਵੋ [ਸਨ੍ਧਵੋ (ਕ.)] ਕਾਪੁਰਿਸੇਨ ਹੋਤਿ;

ਸਨ੍ਤਪ੍ਪਿਤੋ ਸਪ੍ਪਿਨਾ ਪਾਯਸੇਨ [ਪਾਯਾਸੇਨ (ਕ.)], ਕਿਚ੍ਛਾਕਤਂ ਪਣ੍ਣਕੁਟਿਂ ਅਦਯ੍ਹਿ [ਅਦਡ੍ਢਹਿ (ਸੀ. ਸ੍ਯਾ.), ਅਦਟ੍ਠਹਿ (ਪੀ.), ਅਦਦ੍ਦਹਿ (?)].

੨੪. ਨ ਸਨ੍ਥਵਸ੍ਮਾ ਪਰਮਤ੍ਥਿ ਸੇਯ੍ਯੋ, ਯੋ ਸਨ੍ਥਵੋ ਸਪ੍ਪੁਰਿਸੇਨ ਹੋਤਿ;

ਸੀਹਸ੍ਸ ਬ੍ਯਗ੍ਘਸ੍ਸ ਚ ਦੀਪਿਨੋ ਚ, ਸਾਮਾ ਮੁਖਂ ਲੇਹਤਿ ਸਨ੍ਥਵੇਨਾਤਿ.

ਸਨ੍ਥਵਜਾਤਕਂ ਦੁਤਿਯਂ.

੧੬੩. ਸੁਸੀਮਜਾਤਕਂ (੨-੨-੩)

੨੫. ਕਾਲ਼ਾ ਮਿਗਾ ਸੇਤਦਨ੍ਤਾ ਤਵੀਮੇ [ਤਵ ਇਮੇ (ਸੀ. ਸ੍ਯਾ. ਪੀ.)], ਪਰੋਸਤਂ ਹੇਮਜਾਲਾਭਿਛਨ੍ਨਾ [ਹੇਮਜਾਲਾਭਿਸਞ੍ਛਨ੍ਨਾ (ਸੀ.)];

ਤੇ ਤੇ ਦਦਾਮੀਤਿ ਸੁਸੀਮ ਬ੍ਰੂਸਿ, ਅਨੁਸ੍ਸਰਂ ਪੇਤ੍ਤਿਪਿਤਾਮਹਾਨਂ.

੨੬. ਕਾਲ਼ਾ ਮਿਗਾ ਸੇਤਦਨ੍ਤਾ ਮਮੀਮੇ [ਮਮ ਇਮੇ (ਸੀ. ਪੀ.)], ਪਰੋਸਤਂ ਹੇਮਜਾਲਾਭਿਚ੍ਛਨ੍ਨਾ;

ਤੇ ਤੇ ਦਦਾਮੀਤਿ ਵਦਾਮਿ ਮਾਣਵ, ਅਨੁਸ੍ਸਰਂ ਪੇਤ੍ਤਿਪਿਤਾਮਹਾਨਨ੍ਤਿ.

ਸੁਸੀਮਜਾਤਕਂ ਤਤਿਯਂ.

੧੬੪. ਗਿਜ੍ਝਜਾਤਕਂ (੨-੨-੪)

੨੭. ਯਂ ਨੁ ਗਿਜ੍ਝੋ ਯੋਜਨਸਤਂ, ਕੁਣਪਾਨਿ ਅਵੇਕ੍ਖਤਿ;

ਕਸ੍ਮਾ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਸਿ.

੨੮. ਯਦਾ ਪਰਾਭਵੋ ਹੋਤਿ, ਪੋਸੋ ਜੀਵਿਤਸਙ੍ਖਯੇ;

ਅਥ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਤੀਤਿ.

ਗਿਜ੍ਝਜਾਤਕਂ ਚਤੁਤ੍ਥਂ.

੧੬੫. ਨਕੁਲਜਾਤਕਂ (੨-੨-੫)

੨੯. ਸਨ੍ਧਿਂ ਕਤ੍ਵਾ ਅਮਿਤ੍ਤੇਨ, ਅਣ੍ਡਜੇਨ ਜਲਾਬੁਜ;

ਵਿਵਰਿਯ ਦਾਠਂ ਸੇਸਿ [ਸਯਸਿ (ਸੀ. ਸ੍ਯਾ. ਪੀ.)], ਕੁਤੋ ਤੇ ਭਯਮਾਗਤਂ.

੩੦. ਸਙ੍ਕੇਥੇਵ [ਸਙ੍ਕਤੇਵ (ਕ.)] ਅਮਿਤ੍ਤਸ੍ਮਿਂ, ਮਿਤ੍ਤਸ੍ਮਿਮ੍ਪਿ ਨ ਵਿਸ੍ਸਸੇ;

ਅਭਯਾ ਭਯਮੁਪ੍ਪਨ੍ਨਂ, ਅਪਿ ਮੂਲਾਨਿ ਕਨ੍ਤਤੀਤਿ [ਮੂਲਂ ਨਿਕਨ੍ਤਤੀਤਿ (ਸੀ.)].

ਨਕੁਲਜਾਤਕਂ ਪਞ੍ਚਮਂ.

੧੬੬. ਉਪਸਾਲ਼ਕਜਾਤਕਂ (੨-੨-੬)

੩੧. ਉਪਸਾਲ਼ਕਨਾਮਾਨਿ [ਉਪਸਾਲ਼੍ਹਕਨਾਮਾਨਂ (ਸੀ. ਸ੍ਯਾ. ਪੀ.)], ਸਹਸ੍ਸਾਨਿ ਚਤੁਦ੍ਦਸ;

ਅਸ੍ਮਿਂ ਪਦੇਸੇ ਦਡ੍ਢਾਨਿ, ਨਤ੍ਥਿ ਲੋਕੇ ਅਨਾਮਤਂ.

੩੨. ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਏਤਂ ਅਰਿਯਾ ਸੇਵਨ੍ਤਿ, ਏਤਂ ਲੋਕੇ ਅਨਾਮਤਨ੍ਤਿ.

ਉਪਸਾਲ਼ਕਜਾਤਕਂ ਛਟ੍ਠਂ.

੧੬੭. ਸਮਿਦ੍ਧਿਜਾਤਕਂ (੨-੨-੭)

੩੩. ਅਭੁਤ੍ਵਾ ਭਿਕ੍ਖਸਿ ਭਿਕ੍ਖੁ, ਨ ਹਿ ਭੁਤ੍ਵਾਨ ਭਿਕ੍ਖਸਿ;

ਭੁਤ੍ਵਾਨ ਭਿਕ੍ਖੁ ਭਿਕ੍ਖਸ੍ਸੁ, ਮਾ ਤਂ ਕਾਲੋ ਉਪਚ੍ਚਗਾ.

੩੪. ਕਾਲਂ ਵੋਹਂ ਨ ਜਾਨਾਮਿ, ਛਨ੍ਨੋ ਕਾਲੋ ਨ ਦਿਸ੍ਸਤਿ;

ਤਸ੍ਮਾ ਅਭੁਤ੍ਵਾ ਭਿਕ੍ਖਾਮਿ, ਮਾ ਮਂ ਕਾਲੋ ਉਪਚ੍ਚਗਾਤਿ.

ਸਮਿਦ੍ਧਿਜਾਤਕਂ ਸਤ੍ਤਮਂ.

੧੬੮. ਸਕੁਣਗ੍ਘਿਜਾਤਕਂ (੨-੨-੮)

੩੫. ਸੇਨੋ ਬਲਸਾ ਪਤਮਾਨੋ, ਲਾਪਂ ਗੋਚਰਠਾਯਿਨਂ;

ਸਹਸਾ ਅਜ੍ਝਪ੍ਪਤ੍ਤੋਵ, ਮਰਣਂ ਤੇਨੁਪਾਗਮਿ.

੩੬. ਸੋਹਂ ਨਯੇਨ ਸਮ੍ਪਨ੍ਨੋ, ਪੇਤ੍ਤਿਕੇ ਗੋਚਰੇ ਰਤੋ;

ਅਪੇਤਸਤ੍ਤੁ ਮੋਦਾਮਿ, ਸਮ੍ਪਸ੍ਸਂ ਅਤ੍ਥਮਤ੍ਤਨੋਤਿ.

ਸਕੁਣਗ੍ਘਿਜਾਤਕਂ ਅਟ੍ਠਮਂ.

੧੬੯. ਅਰਕਜਾਤਕਂ (੨-੨-੯)

੩੭. ਯੋ ਵੇ ਮੇਤ੍ਤੇਨ ਚਿਤ੍ਤੇਨ, ਸਬ੍ਬਲੋਕਾਨੁਕਮ੍ਪਤਿ;

ਉਦ੍ਧਂ ਅਧੋ ਚ ਤਿਰਿਯਂ, ਅਪ੍ਪਮਾਣੇਨ ਸਬ੍ਬਸੋ.

੩੮. ਅਪ੍ਪਮਾਣਂ ਹਿਤਂ ਚਿਤ੍ਤਂ, ਪਰਿਪੁਣ੍ਣਂ ਸੁਭਾਵਿਤਂ;

ਯਂ ਪਮਾਣਕਤਂ ਕਮ੍ਮਂ, ਨ ਤਂ ਤਤ੍ਰਾਵਸਿਸ੍ਸਤੀਤਿ.

ਅਰਕਜਾਤਕਂ ਨਵਮਂ.

੧੭੦. ਕਕਣ੍ਟਕਜਾਤਕਂ (੨-੨-੧੦)

੩੯. ਨਾਯਂ ਪੁਰੇ ਉਣ੍ਣਮਤਿ [ਉਨ੍ਨਮਤਿ (ਸ੍ਯਾ.)], ਤੋਰਣਗ੍ਗੇ ਕਕਣ੍ਟਕੋ;

ਮਹੋਸਧ ਵਿਜਾਨਾਹਿ, ਕੇਨ ਥਦ੍ਧੋ ਕਕਣ੍ਟਕੋ.

੪੦. ਅਲਦ੍ਧਪੁਬ੍ਬਂ ਲਦ੍ਧਾਨ, ਅਡ੍ਢਮਾਸਂ ਕਕਣ੍ਟਕੋ;

ਅਤਿਮਞ੍ਞਤਿ ਰਾਜਾਨਂ, ਵੇਦੇਹਂ ਮਿਥਿਲਗ੍ਗਹਨ੍ਤਿ.

ਕਕਣ੍ਟਕਜਾਤਕਂ ਦਸਮਂ.

ਸਨ੍ਥਵਵਗ੍ਗੋ ਦੁਤਿਯੋ.

ਤਸ੍ਸੁਦ੍ਦਾਨਂ –

ਅਥ ਇਨ੍ਦਸਮਾਨ ਸਪਣ੍ਣਕੁਟਿ, ਸੁਸਿਮੁਤ੍ਤਮ ਗਿਜ੍ਝ ਜਲਾਬੁਜਕੋ;

ਉਪਸਾਲ਼ਕ ਭਿਕ੍ਖੁ ਸਲਾਪਵਰੋ, ਅਥ ਮੇਤ੍ਤਵਰੋ ਦਸਪੁਣ੍ਣਮਤੀਤਿ.