੧. ਦਲ਼੍ਹਵਗ੍ਗੋ
੧੫੧. ਰਾਜੋਵਾਦਜਾਤਕਂ (੨-੧-੧)
੧. ਦਲ਼੍ਹਂ ਦਲ਼੍ਹਸ੍ਸ ਖਿਪਤਿ, ਬਲ੍ਲਿਕੋ [ਮਲ੍ਲਿਕੋ (ਸੀ. ਪੀ.)] ਮੁਦੁਨਾ ਮੁਦੁਂ;
ਸਾਧੁਮ੍ਪਿ ਸਾਧੁਨਾ ਜੇਤਿ, ਅਸਾਧੁਮ੍ਪਿ ਅਸਾਧੁਨਾ;
ਏਤਾਦਿਸੋ ਅਯਂ ਰਾਜਾ, ਮਗ੍ਗਾ ਉਯ੍ਯਾਹਿ ਸਾਰਥਿ.
੨. ਅਕ੍ਕੋਧੇਨ ਜਿਨੇ ਕੋਧਂ, ਅਸਾਧੁਂ ਸਾਧੁਨਾ ਜਿਨੇ;
ਜਿਨੇ ਕਦਰਿਯਂ ਦਾਨੇਨ, ਸਚ੍ਚੇਨਾਲਿਕਵਾਦਿਨਂ;
ਏਤਾਦਿਸੋ ਅਯਂ ਰਾਜਾ, ਮਗ੍ਗਾ ਉਯ੍ਯਾਹਿ ਸਾਰਥੀਤਿ.
ਰਾਜੋਵਾਦਜਾਤਕਂ ਪਠਮਂ.
੧੫੨. ਅਸਮੇਕ੍ਖਿਤਕਮ੍ਮਨ੍ਤਂ, ਤੁਰਿਤਾਭਿਨਿਪਾਤਿਨਂ.
ਸਾਨਿ ਕਮ੍ਮਾਨਿ ਤਪ੍ਪੇਨ੍ਤਿ, ਉਣ੍ਹਂਵਜ੍ਝੋਹਿਤਂ ਮੁਖੇ.
੪. ਸੀਹੋ ਚ ਸੀਹਨਾਦੇਨ, ਦਦ੍ਦਰਂ ਅਭਿਨਾਦਯਿ;
ਸੁਤ੍ਵਾ ਸੀਹਸ੍ਸ ਨਿਗ੍ਘੋਸਂ, ਸਿਙ੍ਗਾਲੋ [ਸਿਗਾਲੋ (ਸੀ. ਸ੍ਯਾ. ਪੀ.)] ਦਦ੍ਦਰੇ ਵਸਂ;
ਭੀਤੋ ਸਨ੍ਤਾਸਮਾਪਾਦਿ, ਹਦਯਞ੍ਚਸ੍ਸ ਅਪ੍ਫਲੀਤਿ.
ਸਿਙ੍ਗਾਲਜਾਤਕਂ [ਸਿਗਾਲਜਾਤਕਂ (ਸੀ. ਸ੍ਯਾ. ਪੀ.)] ਦੁਤਿਯਂ.
੧੫੩. ਸੂਕਰਜਾਤਕਂ (੨-੧-੩)
੫. ਚਤੁਪ੍ਪਦੋ ਅਹਂ ਸਮ੍ਮ, ਤ੍ਵਮ੍ਪਿ ਸਮ੍ਮ ਚਤੁਪ੍ਪਦੋ;
ਏਹਿ ਸਮ੍ਮ [ਸੀਹ (ਸੀ. ਪੀ.)] ਨਿਵਤ੍ਤਸ੍ਸੁ, ਕਿਂ ਨੁ ਭੀਤੋ ਪਲਾਯਸਿ.
੬. ਅਸੁਚਿ ਪੂਤਿਲੋਮੋਸਿ, ਦੁਗ੍ਗਨ੍ਧੋ ਵਾਸਿ ਸੂਕਰ;
ਸਚੇ ਯੁਜ੍ਝਿਤੁਕਾਮੋਸਿ, ਜਯਂ ਸਮ੍ਮ ਦਦਾਮਿ ਤੇਤਿ.
ਸੂਕਰਜਾਤਕਂ ਤਤਿਯਂ.
੧੫੪. ਉਰਗਜਾਤਕ (੨-੧-੪)
੭. ਇਧੂਰਗਾਨਂ ਪਵਰੋ ਪਵਿਟ੍ਠੋ, ਸੇਲਸ੍ਸ ਵਣ੍ਣੇਨ ਪਮੋਕ੍ਖਮਿਚ੍ਛਂ;
ਬ੍ਰਹ੍ਮਞ੍ਚ ਵਣ੍ਣਂ [ਵਕ੍ਕਂ (ਕ.)] ਅਪਚਾਯਮਾਨੋ, ਬੁਭੁਕ੍ਖਿਤੋ ਨੋ ਵਿਤਰਾਮਿ [ਵਿਸਹਾਮਿ (ਕ. ਸਿ. ਸ੍ਯਾ. ਪੀ.)] ਭੋਤ੍ਤੁਂ.
੮. ਸੋ ਬ੍ਰਹ੍ਮਗੁਤ੍ਤੋ ਚਿਰਮੇਵ ਜੀਵ, ਦਿਬ੍ਯਾ ਚ ਤੇ ਪਾਤੁਭਵਨ੍ਤੁ ਭਕ੍ਖਾ;
ਯੋ ਬ੍ਰਹ੍ਮਵਣ੍ਣਂ ਅਪਚਾਯਮਾਨੋ, ਬੁਭੁਕ੍ਖਿਤੋ ਨੋ ਵਿਤਰਾਸਿ [ਸਬ੍ਬਤ੍ਥਪਿ ਸਮਾਨਂ] ਭੋਤ੍ਤੁਨ੍ਤਿ.
ਉਰਗਜਾਤਕਂ ਚਤੁਤ੍ਥਂ.
੧੫੫. ਭਗ੍ਗਜਾਤਕਂ (੨-੧-੫)
੯. ਜੀਵ ਵਸ੍ਸਸਤਂ ਭਗ੍ਗ [ਗਗ੍ਗ (ਸੀ. ਪੀ.)], ਅਪਰਾਨਿ ਚ ਵੀਸਤਿਂ [ਵੀਸਤਿ (ਸ੍ਯਾ. ਕ.)];
ਮਾ ਮਂ ਪਿਸਾਚਾ ਖਾਦਨ੍ਤੁ, ਜੀਵ ਤ੍ਵਂ ਸਰਦੋ ਸਤਂ.
੧੦. ਤ੍ਵਮ੍ਪਿ ਵਸ੍ਸਸਤਂ ਜੀਵ, ਅਪਰਾਨਿ ਚ ਵੀਸਤਿਂ;
ਵਿਸਂ ਪਿਸਾਚਾ ਖਾਦਨ੍ਤੁ, ਜੀਵ ਤ੍ਵਂ ਸਰਦੋ ਸਤਨ੍ਤਿ.
ਭਗ੍ਗਜਾਤਕਂ ਪਞ੍ਚਮਂ.
੧੫੬. ਅਲੀਨਚਿਤ੍ਤਜਾਤਕਂ (੨-੧-੬)
੧੧. ਅਲੀਨਚਿਤ੍ਤਂ ਨਿਸ੍ਸਾਯ, ਪਹਟ੍ਠਾ ਮਹਤੀ ਚਮੂ;
ਕੋਸਲਂ ਸੇਨਾਸਨ੍ਤੁਟ੍ਠਂ, ਜੀਵਗ੍ਗਾਹਂ ਅਗਾਹਯਿ.
੧੨. ਏਵਂ ਨਿਸ੍ਸਯਸਮ੍ਪਨ੍ਨੋ, ਭਿਕ੍ਖੁ ਆਰਦ੍ਧਵੀਰਿਯੋ;
ਭਾਵਯਂ ਕੁਸਲਂ ਧਮ੍ਮਂ, ਯੋਗਕ੍ਖੇਮਸ੍ਸ ਪਤ੍ਤਿਯਾ;
ਪਾਪੁਣੇ ਅਨੁਪੁਬ੍ਬੇਨ, ਸਬ੍ਬਸਂਯੋਜਨਕ੍ਖਯਨ੍ਤਿ.
ਅਲੀਨਚਿਤ੍ਤਜਾਤਕਂ ਛਟ੍ਠਂ.
੧੫੭. ਗੁਣਜਾਤਕਂ (੨-੧-੭)
੧੩. ਯੇਨ ਕਾਮਂ ਪਣਾਮੇਤਿ, ਧਮ੍ਮੋ ਬਲਵਤਂ ਮਿਗੀ;
ਉਨ੍ਨਦਨ੍ਤੀ ਵਿਜਾਨਾਹਿ, ਜਾਤਂ ਸਰਣਤੋ ਭਯਂ.
੧੪. ਅਪਿ ਚੇਪਿ ਦੁਬ੍ਬਲੋ ਮਿਤ੍ਤੋ, ਮਿਤ੍ਤਧਮ੍ਮੇਸੁ ਤਿਟ੍ਠਤਿ;
ਸੋ ਞਾਤਕੋ ਚ ਬਨ੍ਧੁ ਚ, ਸੋ ਮਿਤ੍ਤੋ ਸੋ ਚ ਮੇ ਸਖਾ;
ਦਾਠਿਨਿ ਮਾਤਿਮਞ੍ਞਿਤ੍ਥੋ [ਮਞ੍ਞਿਵੋ (ਸ੍ਯਾ.), ਮਞ੍ਞਵ੍ਹੋ (ਕ.)], ਸਿਙ੍ਗਾਲੋ ਮਮ ਪਾਣਦੋਤਿ.
ਗੁਣਜਾਤਕਂ ਸਤ੍ਤਮਂ.
੧੫੮. ਸੁਹਨੁਜਾਤਕਂ (੨-੧-੮)
੧੫. ਨਯਿਦਂ ਵਿਸਮਸੀਲੇਨ, ਸੋਣੇਨ ਸੁਹਨੂ ਸਹ;
ਸੁਹਨੂਪਿ ਤਾਦਿਸੋਯੇਵ, ਯੋ ਸੋਣਸ੍ਸ ਸਗੋਚਰੋ.
੧੬. ਪਕ੍ਖਨ੍ਦਿਨਾ ਪਗਬ੍ਭੇਨ, ਨਿਚ੍ਚਂ ਸਨ੍ਦਾਨਖਾਦਿਨਾ;
ਸਮੇਤਿ ਪਾਪਂ ਪਾਪੇਨ, ਸਮੇਤਿ ਅਸਤਾ ਅਸਨ੍ਤਿ.
ਸੁਹਨੁਜਾਤਕਂ ਅਟ੍ਠਮਂ.
੧੫੯. ਮੋਰਜਾਤਕਂ (੨-੧-੯)
੧੭. ਉਦੇਤਯਂ ਚਕ੍ਖੁਮਾ ਏਕਰਾਜਾ, ਹਰਿਸ੍ਸਵਣ੍ਣੋ ਪਥਵਿਪ੍ਪਭਾਸੋ [ਪਠਵਿਪ੍ਪਭਾਸੋ (ਸੀ. ਸ੍ਯਾ. ਪੀ.)];
ਤਂ ਤਂ ਨਮਸ੍ਸਾਮਿ ਹਰਿਸ੍ਸਵਣ੍ਣਂ ਪਥਵਿਪ੍ਪਭਾਸਂ, ਤਯਾਜ੍ਜ ਗੁਤ੍ਤਾ ਵਿਹਰੇਮੁ ਦਿਵਸਂ.
ਯੇ ਬ੍ਰਾਹ੍ਮਣਾ ਵੇਦਗੂ ਸਬ੍ਬਧਮ੍ਮੇ, ਤੇ ਮੇ ਨਮੋ ਤੇ ਚ ਮਂ ਪਾਲਯਨ੍ਤੁ;
ਨਮਤ੍ਥੁ ਬੁਦ੍ਧਾਨਂ [ਬੁਦ੍ਧਾਨ (?)] ਨਮਤ੍ਥੁ ਬੋਧਿਯਾ, ਨਮੋ ਵਿਮੁਤ੍ਤਾਨਂ [ਵਿਮੁਤ੍ਤਾਨ (?)] ਨਮੋ ਵਿਮੁਤ੍ਤਿਯਾ;
ਇਮਂ ਸੋ ਪਰਿਤ੍ਤਂ ਕਤ੍ਵਾ, ਮੋਰੋ ਚਰਤਿ ਏਸਨਾ.
੧੮. ਅਪੇਤਯਂ ਚਕ੍ਖੁਮਾ ਏਕਰਾਜਾ, ਹਰਿਸ੍ਸਵਣ੍ਣੋ ਪਥਵਿਪ੍ਪਭਾਸੋ;
ਤਂ ਤਂ ਨਮ੍ਮਸ੍ਸਾਮਿ ਹਰਿਸ੍ਸਵਣ੍ਣਂ ਪਥਵਿਪ੍ਪਭਾਸਂ, ਤਯਾਜ੍ਜ ਗੁਤ੍ਤਾ ਵਿਹਰੇਮੁ ਰਤ੍ਤਿਂ.
ਯੇ ਬ੍ਰਾਹ੍ਮਣਾ ਵੇਦਗੂ ਸਬ੍ਬਧਮ੍ਮੇ, ਤੇ ਮੇ ਨਮੋ ਤੇ ਚ ਮਂ ਪਾਲਯਨ੍ਤੁ;
ਨਮਤ੍ਥੁ ਬੁਦ੍ਧਾਨਂ ਨਮਤ੍ਥੁ ਬੋਧਿਯਾ, ਨਮੋ ਵਿਮੁਤ੍ਤਾਨਂ ਨਮੋ ਵਿਮੁਤ੍ਤਿਯਾ;
ਇਮਂ ਸੋ ਪਰਿਤ੍ਤਂ ਕਤ੍ਵਾ, ਮੋਰੋ ਵਾਸਮਕਪ੍ਪਯੀਤਿ.
ਮੋਰਜਾਤਕਂ ਨਵਮਂ.
੧੬੦. ਵਿਨੀਲਜਾਤਕਂ (੨-੧-੧੦)
੧੯. ਏਵਮੇਵ ਨੂਨ [ਨੁ (ਕ.)] ਰਾਜਾਨਂ, ਵੇਦੇਹਂ ਮਿਥਿਲਗ੍ਗਹਂ;
ਅਸ੍ਸਾ ਵਹਨ੍ਤਿ ਆਜਞ੍ਞਾ, ਯਥਾ ਹਂਸਾ ਵਿਨੀਲਕਂ.
੨੦. ਵਿਨੀਲ ਦੁਗ੍ਗਂ ਭਜਸਿ, ਅਭੂਮਿਂ ਤਾਤ ਸੇਵਸਿ;
ਗਾਮਨ੍ਤਕਾਨਿ [ਗਾਮਨ੍ਤਿਕਾਨਿ (ਸੀ.), ਗਾਮਨ੍ਤਰਾਨਿ (ਕ.)] ਸੇਵਸ੍ਸੁ, ਏਤਂ ਮਾਤਾਲਯਂ ਤਵਾਤਿ.
ਵਿਨੀਲਜਾਤਕਂ ਦਸਮਂ.
ਦਲ਼੍ਹਵਗ੍ਗੋ ਪਠਮੋ.
ਤਸ੍ਸੁਦ੍ਦਾਨਂ –
ਵਰਬਲ੍ਲਿਕ ਦਦ੍ਦਰ ਸੂਕਰਕੋ, ਉਰਗੂਤ੍ਤਮ ਪਞ੍ਚਮਭਗ੍ਗਵਰੋ;
ਮਹਤੀਚਮੁ ਯਾਵ ਸਿਙ੍ਗਾਲਵਰੋ, ਸੁਹਨੁਤ੍ਤਮ ਮੋਰ ਵਿਨੀਲਂ ਦਸਾਤਿ.