੫੧੧. ਕਿਂਛਨ੍ਦਜਾਤਕਂ (੧)

੧. ਕਿਂਛਨ੍ਦੋ ਕਿਮਧਿਪ੍ਪਾਯੋ, ਏਕੋ ਸਮ੍ਮਸਿ ਘਮ੍ਮਨਿ;

ਕਿਂ ਪਤ੍ਥਯਾਨੋ ਕਿਂ ਏਸਂ, ਕੇਨ ਅਤ੍ਥੇਨ ਬ੍ਰਾਹ੍ਮਣ.

੨. ਯਥਾ ਮਹਾ ਵਾਰਿਧਰੋ, ਕੁਮ੍ਭੋ ਸੁਪਰਿਣਾਹਵਾ [ਸੁਪਰਿਣਾਮਵਾ (ਕ.)];

ਤਥੂਪਮਂ ਅਮ੍ਬਪਕ੍ਕਂ, ਵਣ੍ਣਗਨ੍ਧਰਸੁਤ੍ਤਮਂ.

੩. ਤਂ ਵੁਯ੍ਹਮਾਨਂ ਸੋਤੇਨ, ਦਿਸ੍ਵਾਨਾਮਲਮਜ੍ਝਿਮੇ;

ਪਾਣੀਹਿ ਨਂ ਗਹੇਤ੍ਵਾਨ, ਅਗ੍ਯਾਯਤਨਮਾਹਰਿਂ.

੪. ਤਤੋ ਕਦਲਿਪਤ੍ਤੇਸੁ, ਨਿਕ੍ਖਿਪਿਤ੍ਵਾ ਸਯਂ ਅਹਂ;

ਸਤ੍ਥੇਨ ਨਂ ਵਿਕਪ੍ਪੇਤ੍ਵਾ, ਖੁਪ੍ਪਿਪਾਸਂ ਅਹਾਸਿ ਮੇ.

੫. ਸੋਹਂ ਅਪੇਤਦਰਥੋ, ਬ੍ਯਨ੍ਤੀਭੂਤੋ [ਬ੍ਯਨ੍ਤਿਭੂਤੋ (ਸੀ. ਪੀ. ਕ.)] ਦੁਖਕ੍ਖਮੋ;

ਅਸ੍ਸਾਦਂ ਨਾਧਿਗਚ੍ਛਾਮਿ, ਫਲੇਸ੍ਵਞ੍ਞੇਸੁ ਕੇਸੁਚਿ [ਕੇਸੁਪਿ (ਕ. ਸੀ.)].

੬. ਸੋਸੇਤ੍ਵਾ ਨੂਨ ਮਰਣਂ, ਤਂ ਮਮਂ ਆਵਹਿਸ੍ਸਤਿ;

ਅਮ੍ਬਂ ਯਸ੍ਸ ਫਲਂ ਸਾਦੁ, ਮਧੁਰਗ੍ਗਂ ਮਨੋਰਮਂ;

ਯਮੁਦ੍ਧਰਿਂ ਵੁਯ੍ਹਮਾਨਂ, ਉਦਧਿਸ੍ਮਾ ਮਹਣ੍ਣਵੇ.

੭. ਅਕ੍ਖਾਤਂ ਤੇ ਮਯਾ ਸਬ੍ਬਂ, ਯਸ੍ਮਾ ਉਪਵਸਾਮਹਂ;

ਰਮ੍ਮਂ ਪਤਿ ਨਿਸਿਨ੍ਨੋਸ੍ਮਿ, ਪੁਥੁਲੋਮਾਯੁਤਾ ਪੁਥੁ.

੮. ਤ੍ਵਞ੍ਚ ਖੋ ਮੇਵ [ਮੇ (ਸੀ.), ਮਮ (?)] ਅਕ੍ਖਾਹਿ, ਅਤ੍ਤਾਨਮਪਲਾਯਿਨਿ;

ਕਾ ਵਾ ਤ੍ਵਮਸਿ ਕਲ੍ਯਾਣਿ, ਕਿਸ੍ਸ ਵਾ ਤ੍ਵਂ ਸੁਮਜ੍ਝਿਮੇ.

੯. ਰੁਪ੍ਪਪਟ੍ਟਪਲਿਮਟ੍ਠੀਵ [ਰੁਪ੍ਪਪਟ੍ਟਪ੍ਲਮਟ੍ਠੀਵ (ਸ੍ਯਾ.), ਰੂਪਪਟ੍ਟਪਮਟ੍ਠੀਵ (ਕ.)], ਬ੍ਯਗ੍ਘੀਵ ਗਿਰਿਸਾਨੁਜਾ;

ਯਾ ਸਨ੍ਤਿ ਨਾਰਿਯੋ ਦੇਵੇਸੁ, ਦੇਵਾਨਂ ਪਰਿਚਾਰਿਕਾ.

੧੦. ਯਾ ਚ ਮਨੁਸ੍ਸਲੋਕਸ੍ਮਿਂ, ਰੂਪੇਨਾਨ੍ਵਾਗਤਿਤ੍ਥਿਯੋ;

ਰੂਪੇਨ ਤੇ ਸਦਿਸੀ ਨਤ੍ਥਿ, ਦੇਵੇਸੁ ਗਨ੍ਧਬ੍ਬਮਨੁਸ੍ਸਲੋਕੇ [ਦੇਵਗਨ੍ਧਬ੍ਬਮਾਨੁਸੇ (ਸ੍ਯਾ.)];

ਪੁਟ੍ਠਾਸਿ ਮੇ ਚਾਰੁਪੁਬ੍ਬਙ੍ਗਿ, ਬ੍ਰੂਹਿ ਨਾਮਞ੍ਚ ਬਨ੍ਧਵੇ.

੧੧. ਯਂ ਤ੍ਵਂ ਪਤਿ ਨਿਸਿਨ੍ਨੋਸਿ, ਰਮ੍ਮਂ ਬ੍ਰਾਹ੍ਮਣ ਕੋਸਿਕਿਂ;

ਸਾਹਂ ਭੁਸਾਲਯਾ ਵੁਤ੍ਥਾ, ਵਰਵਾਰਿਵਹੋਘਸਾ.

੧੨. ਨਾਨਾਦੁਮਗਣਾਕਿਣ੍ਣਾ, ਬਹੁਕਾ ਗਿਰਿਕਨ੍ਦਰਾ;

ਮਮੇਵ ਪਮੁਖਾ ਹੋਨ੍ਤਿ, ਅਭਿਸਨ੍ਦਨ੍ਤਿ ਪਾਵੁਸੇ.

੧੩. ਅਥੋ ਬਹੂ ਵਨਤੋਦਾ, ਨੀਲਵਾਰਿਵਹਿਨ੍ਧਰਾ;

ਬਹੁਕਾ ਨਾਗਵਿਤ੍ਤੋਦਾ, ਅਭਿਸਨ੍ਦਨ੍ਤਿ ਵਾਰਿਨਾ.

੧੪. ਤਾ ਅਮ੍ਬਜਮ੍ਬੁਲਬੁਜਾ, ਨੀਪਾ ਤਾਲਾ ਚੁਦੁਮ੍ਬਰਾ [ਤਾਲਮੁਦੁਮ੍ਬਰਾ (ਸ੍ਯਾ. ਕ.)];

ਬਹੂਨਿ ਫਲਜਾਤਾਨਿ, ਆਵਹਨ੍ਤਿ ਅਭਿਣ੍ਹਸੋ.

੧੫. ਯਂ ਕਿਞ੍ਚਿ ਉਭਤੋ ਤੀਰੇ, ਫਲਂ ਪਤਤਿ ਅਮ੍ਬੁਨਿ;

ਅਸਂਸਯਂ ਤਂ ਸੋਤਸ੍ਸ, ਫਲਂ ਹੋਤਿ ਵਸਾਨੁਗਂ.

੧੬. ਏਤਦਞ੍ਞਾਯ ਮੇਧਾਵਿ, ਪੁਥੁਪਞ੍ਞ ਸੁਣੋਹਿ ਮੇ;

ਮਾ ਰੋਚਯ ਮਭਿਸਙ੍ਗਂ, ਪਟਿਸੇਧ ਜਨਾਧਿਪ.

੧੭. ਨ ਵਾਹਂ ਵਡ੍ਢਵਂ [ਵਦ੍ਧਵਂ (ਸੀ. ਪੀ.)] ਮਞ੍ਞੇ, ਯਂ ਤ੍ਵਂ ਰਟ੍ਠਾਭਿਵਡ੍ਢਨ;

ਆਚੇਯ੍ਯਮਾਨੋ ਰਾਜਿਸਿ, ਮਰਣਂ ਅਭਿਕਙ੍ਖਸਿ.

੧੮. ਤਸ੍ਸ ਜਾਨਨ੍ਤਿ ਪਿਤਰੋ, ਗਨ੍ਧਬ੍ਬਾ ਚ ਸਦੇਵਕਾ;

ਯੇ ਚਾਪਿ ਇਸਯੋ ਲੋਕੇ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਅਸਂਸਯਂ ਤੇਪਿ [ਤੇ (ਸੀ. ਪੀ.)] ਜਾਨਨ੍ਤਿ, ਪਟ੍ਠਭੂਤਾ [ਵਦ੍ਧਭੂਤਾ (ਸੀ. ਪੀ.)] ਯਸਸ੍ਸਿਨੋ.

੧੯. ਏਵਂ ਵਿਦਿਤ੍ਵਾ ਵਿਦੂ ਸਬ੍ਬਧਮ੍ਮਂ, ਵਿਦ੍ਧਂਸਨਂ ਚਵਨਂ ਜੀਵਿਤਸ੍ਸ;

ਨ ਚੀਯਤੀ ਤਸ੍ਸ ਨਰਸ੍ਸ ਪਾਪਂ, ਸਚੇ ਨ ਚੇਤੇਤਿ ਵਧਾਯ ਤਸ੍ਸ.

੨੦. ਇਸਿਪੂਗਸਮਞ੍ਞਾਤੇ, ਏਵਂ ਲੋਕ੍ਯਾ ਵਿਦਿਤਾ ਸਤਿ [ਪਤਿ (ਕ. ਸ੍ਯਾ. ਕ.)];

ਅਨਰਿਯਪਰਿਸਮ੍ਭਾਸੇ, ਪਾਪਕਮ੍ਮਂ ਜਿਗੀਸਸਿ [ਜਿਗਿਂਸਸਿ (ਸੀ. ਸ੍ਯਾ. ਪੀ.)].

੨੧. ਸਚੇ ਅਹਂ ਮਰਿਸ੍ਸਾਮਿ, ਤੀਰੇ ਤੇ ਪੁਥੁਸੁਸ੍ਸੋਣਿ;

ਅਸਂਸਯਂ ਤਂ ਅਸਿਲੋਕੋ, ਮਯਿ ਪੇਤੇ ਆਗਮਿਸ੍ਸਤਿ.

੨੨. ਤਸ੍ਮਾ ਹਿ ਪਾਪਕਂ ਕਮ੍ਮਂ, ਰਕ੍ਖਸ੍ਸੇਵ [ਰਕ੍ਖਸ੍ਸੁ ਚ (ਸ੍ਯਾ.)] ਸੁਮਜ੍ਝਿਮੇ;

ਮਾ ਤਂ ਸਬ੍ਬੋ ਜਨੋ ਪਚ੍ਛਾ, ਪਕੁਟ੍ਠਾਯਿ [ਪਕਤ੍ਥਾਸਿ (ਸੀ. ਪੀ.), ਪਤ੍ਵਕ੍ਖਾਸਿ (ਸ੍ਯਾ.)] ਮਯਿ ਮਤੇ.

੨੩. ਅਞ੍ਞਾਤਮੇਤਂ ਅਵਿਸਯ੍ਹਸਾਹਿ, ਅਤ੍ਤਾਨਮਮ੍ਬਞ੍ਚ ਦਦਾਮਿ ਤੇ ਤਂ;

ਸੋ ਦੁਚ੍ਚਜੇ ਕਾਮਗੁਣੇ ਪਹਾਯ, ਸਨ੍ਤਿਞ੍ਚ ਧਮ੍ਮਞ੍ਚ ਅਧਿਟ੍ਠਿਤੋਸਿ.

੨੪. ਯੋ ਹਿਤ੍ਵਾ ਪੁਬ੍ਬਸਞ੍ਞੋਗਂ, ਪਚ੍ਛਾ ਸਂਯੋਜਨੇ ਠਿਤੋ;

ਅਧਮ੍ਮਞ੍ਚੇਵ ਚਰਤਿ, ਪਾਪਞ੍ਚਸ੍ਸ ਪਵਡ੍ਢਤਿ.

੨੫. ਏਹਿ ਤਂ ਪਾਪਯਿਸ੍ਸਾਮਿ, ਕਾਮਂ ਅਪ੍ਪੋਸ੍ਸੁਕੋ ਭਵ;

ਉਪਾਨਯਾਮਿ ਸੀਤਸ੍ਮਿਂ, ਵਿਹਰਾਹਿ ਅਨੁਸ੍ਸੁਕੋ.

੨੬. ਤਂ ਪੁਪ੍ਫਰਸਮਤ੍ਤੇਭਿ, ਵਕ੍ਕਙ੍ਗੇਹਿ ਅਰਿਨ੍ਦਮ;

ਕੋਞ੍ਚਾ ਮਯੂਰਾ ਦਿਵਿਯਾ, ਕੋਲਟ੍ਠਿਮਧੁਸਾਲ਼ਿਕਾ;

ਕੂਜਿਤਾ ਹਂਸਪੂਗੇਹਿ, ਕੋਕਿਲੇਤ੍ਥ ਪਬੋਧਰੇ.

੨੭. ਅਮ੍ਬੇਤ੍ਥ ਵਿਪ੍ਪਸਾਖਗ੍ਗਾ [ਵਿਪ੍ਪਸੂਨਗ੍ਗਾ (ਸੀ. ਸ੍ਯਾ. ਪੀ.), ਵਿਪ੍ਪਓਨਗ੍ਗਾ (ਕ.)], ਪਲਾਲਖਲਸਨ੍ਨਿਭਾ;

ਕੋਸਮ੍ਬਸਲ਼ਲਾ [ਕੋਸੁਮ੍ਭਸਲਲਾ (ਸੀ. ਸ੍ਯਾ. ਪੀ.)] ਨੀਪਾ, ਪਕ੍ਕਤਾਲਵਿਲਮ੍ਬਿਨੋ.

੨੮. ਮਾਲੀ ਤਿਰਿਟੀ ਕਾਯੂਰੀ, ਅਙ੍ਗਦੀ ਚਨ੍ਦਨੁਸ੍ਸਦੋ [ਚਨ੍ਦਨਸ੍ਸਦੋ (ਸੀ.)];

ਰਤ੍ਤਿਂ ਤ੍ਵਂ ਪਰਿਚਾਰੇਸਿ, ਦਿਵਾ ਵੇਦੇਸਿ ਵੇਦਨਂ.

੨੯. ਸੋਲ਼ਸਿਤ੍ਥਿਸਹਸ੍ਸਾਨਿ, ਯਾ ਤੇਮਾ ਪਰਿਚਾਰਿਕਾ;

ਏਵਂ ਮਹਾਨੁਭਾਵੋਸਿ, ਅਬ੍ਭੁਤੋ ਲੋਮਹਂਸਨੋ.

੩੦. ਕਿਂ ਕਮ੍ਮਮਕਰੀ ਪੁਬ੍ਬੇ, ਪਾਪਂ ਅਤ੍ਤਦੁਖਾਵਹਂ;

ਯਂ ਕਰਿਤ੍ਵਾ ਮਨੁਸ੍ਸੇਸੁ, ਪਿਟ੍ਠਿਮਂਸਾਨਿ ਖਾਦਸਿ.

੩੧. ਅਜ੍ਝੇਨਾਨਿ ਪਟਿਗ੍ਗਯ੍ਹ, ਕਾਮੇਸੁ ਗਧਿਤੋ [ਗਥਿਤੋ (ਸੀ. ਪੀ.), ਗਿਦ੍ਧਿਤੋ (ਸ੍ਯਾ. ਕ.), ਗਿਦ੍ਧਿਕੋ (ਕ. ਅਟ੍ਠ.)] ਅਹਂ;

ਅਚਰਿਂ ਦੀਘਮਦ੍ਧਾਨਂ, ਪਰੇਸਂ ਅਹਿਤਾਯਹਂ.

੩੨. ਯੋ ਪਿਟ੍ਠਿਮਂਸਿਕੋ ਹੋਤਿ, ਏਵਂ ਉਕ੍ਕਚ੍ਚ ਖਾਦਤਿ;

ਯਥਾਹਂ ਅਜ੍ਜ ਖਾਦਾਮਿ, ਪਿਟ੍ਠਿਮਂਸਾਨਿ ਅਤ੍ਤਨੋਤਿ.

ਕਿਂਛਨ੍ਦਜਾਤਕਂ ਪਠਮਂ.