੪੯੭. ਮਾਤਙ੍ਗਜਾਤਕਂ (੧)

੧. ਕੁਤੋ ਨੁ ਆਗਚ੍ਛਸਿ ਦੁਮ੍ਮਵਾਸੀ [ਰੁਮ੍ਮਵਾਸੀ (ਸੀ. ਪੀ.)], ਓਤਲ੍ਲਕੋ ਪਂਸੁਪਿਸਾਚਕੋਵ;

ਸਙ੍ਕਾਰਚੋਲ਼ਂ ਪਟਿਮੁਞ੍ਚ [ਪਟਿਮੁਚ੍ਚ (ਸੀ. ਪੀ.)] ਕਣ੍ਠੇ, ਕੋ ਰੇ ਤੁਵਂ ਹੋਸਿ [ਹੋਹਿਸਿ (ਸੀ. ਪੀ.)] ਅਦਕ੍ਖਿਣੇਯ੍ਯੋ.

੨. ਅਨ੍ਨਂ ਤਵੇਦਂ [ਤਵ ਇਦਂ (ਕ. ਸੀ. ਪੀ.), ਤਵਯਿਦਂ (ਸ੍ਯਾ.)] ਪਕਤਂ ਯਸਸ੍ਸਿ, ਤਂ ਖਜ੍ਜਰੇ ਭੁਞ੍ਜਰੇ ਪਿਯ੍ਯਰੇ ਚ;

ਜਾਨਾਸਿ ਮਂ ਤ੍ਵਂ ਪਰਦਤ੍ਤੂਪਜੀਵਿਂ, ਉਤ੍ਤਿਟ੍ਠਪਿਣ੍ਡਂ ਲਭਤਂ ਸਪਾਕੋ.

੩. ਅਨ੍ਨਂ ਮਮੇਦਂ [ਮਮ ਇਦਂ (ਕ. ਸੀ. ਪੀ.), ਮਮਯਿਦਂ (ਸ੍ਯਾ.)] ਪਕਤਂ ਬ੍ਰਾਹ੍ਮਣਾਨਂ, ਅਤ੍ਤਤ੍ਥਾਯ ਸਦ੍ਦਹਤੋ ਮਮੇਦਂ [ਮਮ ਇਦਂ (ਕ. ਸੀ. ਪੀ.), ਮਮਯਿਦਂ (ਸ੍ਯਾ.)];

ਅਪੇਹਿ ਏਤ੍ਤੋ ਕਿਮਿਧਟ੍ਠਿਤੋਸਿ, ਨ ਮਾਦਿਸਾ ਤੁਯ੍ਹਂ ਦਦਨ੍ਤਿ ਜਮ੍ਮ.

੪. ਥਲੇ ਚ ਨਿਨ੍ਨੇ ਚ ਵਪਨ੍ਤਿ ਬੀਜਂ, ਅਨੂਪਖੇਤ੍ਤੇ ਫਲਮਾਸਮਾਨਾ [ਮਾਸਸਾਨਾ (ਸੀ. ਪੀ.), ਮਾਸਿਂ ਸਮਾਨਾ (ਸ੍ਯਾ.)];

ਏਤਾਯ ਸਦ੍ਧਾਯ ਦਦਾਹਿ ਦਾਨਂ, ਅਪ੍ਪੇਵ ਆਰਾਧਯੇ ਦਕ੍ਖਿਣੇਯ੍ਯੇ.

੫. ਖੇਤ੍ਤਾਨਿ ਮਯ੍ਹਂ ਵਿਦਿਤਾਨਿ ਲੋਕੇ, ਯੇਸਾਹਂ ਬੀਜਾਨਿ ਪਤਿਟ੍ਠਪੇਮਿ;

ਯੇ ਬ੍ਰਾਹ੍ਮਣਾ ਜਾਤਿਮਨ੍ਤੂਪਪਨ੍ਨਾ, ਤਾਨੀਧ ਖੇਤ੍ਤਾਨਿ ਸੁਪੇਸਲਾਨਿ.

੬. ਜਾਤਿਮਦੋ ਚ ਅਤਿਮਾਨਿਤਾ ਚ, ਲੋਭੋ ਚ ਦੋਸੋ ਚ ਮਦੋ ਚ ਮੋਹੋ;

ਏਤੇ ਅਗੁਣਾ ਯੇਸੁ ਚ ਸਨ੍ਤਿ [ਯੇਸੁ ਵਸਨ੍ਤਿ (ਸੀ. ਪੀ.)] ਸਬ੍ਬੇ, ਤਾਨੀਧ ਖੇਤ੍ਤਾਨਿ ਅਪੇਸਲਾਨਿ.

੭. ਜਾਤਿਮਦੋ ਚ ਅਤਿਮਾਨਿਤਾ ਚ, ਲੋਭੋ ਚ ਦੋਸੋ ਚ ਮਦੋ ਚ ਮੋਹੋ;

ਏਤੇ ਅਗੁਣਾ ਯੇਸੁ ਨ ਸਨ੍ਤਿ ਸਬ੍ਬੇ, ਤਾਨੀਧ ਖੇਤ੍ਤਾਨਿ ਸੁਪੇਸਲਾਨਿ.

੮. ਕ੍ਵੇਤ੍ਥ ਗਤਾ [ਕ੍ਵਤ੍ਥ ਗਤਾ (ਸ੍ਯਾ.), ਕਤ੍ਥੇਵ ਭਟ੍ਠਾ (ਪੀ.)] ਉਪਜੋਤਿਯੋ ਚ, ਉਪਜ੍ਝਾਯੋ ਚ ਅਥਵਾ ਗਣ੍ਡਕੁਚ੍ਛਿ [ਅਣ੍ਡਕੁਚ੍ਛਿ (ਸੀ. ਸ੍ਯਾ. ਪੀ.)];

ਇਮਸ੍ਸ ਦਣ੍ਡਞ੍ਚ ਵਧਞ੍ਚ ਦਤ੍ਵਾ, ਗਲੇ ਗਹੇਤ੍ਵਾ ਖਲਯਾਥ [ਗਲਯਾਥ (ਕ.)] ਜਮ੍ਮਂ.

੯. ਗਿਰਿਂ ਨਖੇਨ ਖਣਸਿ, ਅਯੋ ਦਨ੍ਤੇਹਿ [ਦਨ੍ਤੇਨ (ਸੀ. ਪੀ.)] ਖਾਦਸਿ;

ਜਾਤਵੇਦਂ ਪਦਹਸਿ, ਯੋ ਇਸਿਂ ਪਰਿਭਾਸਸਿ.

੧੦. ਇਦਂ ਵਤ੍ਵਾਨ ਮਾਤਙ੍ਗੋ, ਇਸਿ ਸਚ੍ਚਪਰਕ੍ਕਮੋ;

ਅਨ੍ਤਲਿਕ੍ਖਸ੍ਮਿਂ ਪਕ੍ਕਾਮਿ [ਪਕ੍ਕਮਿ (ਕ.)], ਬ੍ਰਾਹ੍ਮਣਾਨਂ ਉਦਿਕ੍ਖਤਂ.

੧੧. ਆਵੇਲ੍ਲਿਤਂ [ਅਵੇਠਿਤਂ (ਸੀ. ਪੀ.)] ਪਿਟ੍ਠਿਤੋ ਉਤ੍ਤਮਙ੍ਗਂ, ਬਾਹੁਂ [ਬਾਹਂ (ਸੀ. ਪੀ.)] ਪਸਾਰੇਤਿ ਅਕਮ੍ਮਨੇਯ੍ਯਂ [ਅਕਮ੍ਪਨੇਯ੍ਯਂ (ਕ.)];

ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ, ਕੋ ਮੇ ਇਮਂ ਪੁਤ੍ਤਮਕਾਸਿ ਏਵਂ.

੧੨. ਇਧਾਗਮਾ ਸਮਣੋ ਦੁਮ੍ਮਵਾਸੀ, ਓਤਲ੍ਲਕੋ ਪਂਸੁਪਿਸਾਚਕੋਵ;

ਸਙ੍ਕਾਰਚੋਲ਼ਂ ਪਟਿਮੁਞ੍ਚ ਕਣ੍ਠੇ, ਸੋ ਤੇ ਇਮਂ ਪੁਤ੍ਤਮਕਾਸਿ ਏਵਂ.

੧੩. ਕਤਮਂ ਦਿਸਂ ਅਗਮਾ ਭੂਰਿਪਞ੍ਞੋ, ਅਕ੍ਖਾਥ ਮੇ ਮਾਣਵਾ ਏਤਮਤ੍ਥਂ;

ਗਨ੍ਤ੍ਵਾਨ ਤਂ ਪਟਿਕਰੇਮੁ ਅਚ੍ਚਯਂ, ਅਪ੍ਪੇਵ ਨਂ ਪੁਤ੍ਤ ਲਭੇਮੁ ਜੀਵਿਤਂ.

੧੪. ਵੇਹਾਯਸਂ ਅਗਮਾ ਭੂਰਿਪਞ੍ਞੋ, ਪਥਦ੍ਧੁਨੋ ਪਨ੍ਨਰਸੇਵ ਚਨ੍ਦੋ;

ਅਪਿ ਚਾਪਿ ਸੋ ਪੁਰਿਮਦਿਸਂ ਅਗਚ੍ਛਿ, ਸਚ੍ਚਪ੍ਪਟਿਞ੍ਞੋ ਇਸਿ ਸਾਧੁਰੂਪੋ.

੧੫. ਆਵੇਲ੍ਲਿਤਂ ਪਿਟ੍ਠਿਤੋ ਉਤ੍ਤਮਙ੍ਗਂ, ਬਾਹੁਂ ਪਸਾਰੇਤਿ ਅਕਮ੍ਮਨੇਯ੍ਯਂ;

ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ, ਕੋ ਮੇ ਇਮਂ ਪੁਤ੍ਤਮਕਾਸਿ ਏਵਂ.

੧੬. ਯਕ੍ਖਾ ਹਵੇ ਸਨ੍ਤਿ ਮਹਾਨੁਭਾਵਾ, ਅਨ੍ਵਾਗਤਾ ਇਸਯੋ ਸਾਧੁਰੂਪਾ;

ਤੇ ਦੁਟ੍ਠਚਿਤ੍ਤਂ ਕੁਪਿਤਂ ਵਿਦਿਤ੍ਵਾ, ਯਕ੍ਖਾ ਹਿ ਤੇ ਪੁਤ੍ਤਮਕਂਸੁ ਏਵਂ.

੧੭. ਯਕ੍ਖਾ ਚ ਮੇ ਪੁਤ੍ਤਮਕਂਸੁ ਏਵਂ, ਤ੍ਵਞ੍ਞੇਵ ਮੇ ਮਾ ਕੁਦ੍ਧੋ [ਕੁਦ੍ਧ (ਕ.)] ਬ੍ਰਹ੍ਮਚਾਰਿ;

ਤੁਮ੍ਹੇਵ [ਤੁਯ੍ਹੇਵ (ਕ.)] ਪਾਦੇ ਸਰਣਂ ਗਤਾਸ੍ਮਿ, ਅਨ੍ਵਾਗਤਾ ਪੁਤ੍ਤਸੋਕੇਨ ਭਿਕ੍ਖੁ.

੧੮. ਤਦੇਵ ਹਿ ਏਤਰਹਿ ਚ ਮਯ੍ਹਂ, ਮਨੋਪਦੋਸੋ ਨ ਮਮਤ੍ਥਿ [ਮਮ ਨਤ੍ਥਿ (ਪੀ.)] ਕੋਚਿ;

ਪੁਤ੍ਤੋ ਚ ਤੇ ਵੇਦਮਦੇਨ ਮਤ੍ਤੋ, ਅਤ੍ਥਂ ਨ ਜਾਨਾਤਿ ਅਧਿਚ੍ਚ ਵੇਦੇ.

੧੯. ਅਦ੍ਧਾ ਹਵੇ ਭਿਕ੍ਖੁ ਮੁਹੁਤ੍ਤਕੇਨ, ਸਮ੍ਮੁਯ੍ਹਤੇਵ ਪੁਰਿਸਸ੍ਸ ਸਞ੍ਞਾ;

ਏਕਾਪਰਾਧਂ [ਏਤਾਪਰਾਧਂ (ਕ.)] ਖਮ ਭੂਰਿਪਞ੍ਞ, ਨ ਪਣ੍ਡਿਤਾ ਕੋਧਬਲਾ ਭਵਨ੍ਤਿ.

੨੦. ਇਦਞ੍ਚ ਮਯ੍ਹਂ ਉਤ੍ਤਿਟ੍ਠਪਿਣ੍ਡਂ, ਤਵ [ਨਤ੍ਥਿ ਸੀ. ਪੀ. ਪੋਤ੍ਥਕੇਸੁ] ਮਣ੍ਡਬ੍ਯੋ ਭੁਞ੍ਜਤੁ ਅਪ੍ਪਪਞ੍ਞੋ;

ਯਕ੍ਖਾ ਚ ਤੇ ਨਂ [ਤੇ ਪੁਤ੍ਤਂ (ਸ੍ਯਾ.)] ਨ ਵਿਹੇਠਯੇਯ੍ਯੁਂ, ਪੁਤ੍ਤੋ ਚ ਤੇ ਹੇਸ੍ਸਤਿ [ਹੋਹਿਤਿ (ਸੀ. ਪੀ.)] ਸੋ ਅਰੋਗੋ.

੨੧. ਮਣ੍ਡਬ੍ਯ ਬਾਲੋਸਿ ਪਰਿਤ੍ਤਪਞ੍ਞੋ, ਯੋ ਪੁਞ੍ਞਖੇਤ੍ਤਾਨਮਕੋਵਿਦੋਸਿ;

ਮਹਕ੍ਕਸਾਵੇਸੁ ਦਦਾਸਿ ਦਾਨਂ, ਕਿਲਿਟ੍ਠਕਮ੍ਮੇਸੁ ਅਸਞ੍ਞਤੇਸੁ.

੨੨. ਜਟਾ ਚ ਕੇਸਾ ਅਜਿਨਾ ਨਿਵਤ੍ਥਾ, ਜਰੂਦਪਾਨਂਵ ਮੁਖਂ ਪਰੂਲ਼੍ਹਂ;

ਪਜਂ ਇਮਂ ਪਸ੍ਸਥ ਦੁਮ੍ਮਰੂਪਂ [ਰੁਮ੍ਮਰੂਪਿਂ (ਸੀ. ਪੀ.)], ਨ ਜਟਾਜਿਨਂ ਤਾਯਤਿ ਅਪ੍ਪਪਞ੍ਞਂ.

੨੩. ਯੇਸਂ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;

ਖੀਣਾਸਵਾ ਅਰਹਨ੍ਤੋ, ਤੇਸੁ ਦਿਨ੍ਨਂ ਮਹਪ੍ਫਲਨ੍ਤਿ.

ਮਾਤਙ੍ਗਜਾਤਕਂ ਪਠਮਂ.