੪੮੪. ਸਾਲਿਕੇਦਾਰਜਾਤਕਂ (੧)

੧. ਸਮ੍ਪਨ੍ਨਂ ਸਾਲਿਕੇਦਾਰਂ, ਸੁਵਾ ਭੁਞ੍ਜਨ੍ਤਿ ਕੋਸਿਯ;

ਪਟਿਵੇਦੇਮਿ ਤੇ ਬ੍ਰਹ੍ਮੇ, ਨ ਨੇ [ਤੇ (ਸੀ. ਸ੍ਯਾ.), ਨਂ (ਸੀ. ਸ੍ਯਾ. ਪੀ. ਅਟ੍ਠ.), ਤਂ (ਕ. ਅਟ੍ਠ.)] ਵਾਰੇਤੁਮੁਸ੍ਸਹੇ.

੨. ਏਕੋ ਚ ਤਤ੍ਥ ਸਕੁਣੋ, ਯੋ ਨੇਸਂ [ਤੇਸਂ (ਸੀ. ਅਟ੍ਠ.)] ਸਬ੍ਬਸੁਨ੍ਦਰੋ;

ਭੁਤ੍ਵਾ ਸਾਲਿਂ ਯਥਾਕਾਮਂ, ਤੁਣ੍ਡੇਨਾਦਾਯ ਗਚ੍ਛਤਿ.

੩. ਓਡ੍ਡੇਨ੍ਤੁ [ਉਜ੍ਝੁਨ੍ਤੁ (ਸ੍ਯਾ. ਕ.) ਅਙ੍ਗੁਤ੍ਤਰਨਿਕਾਯੇ ਪਸ੍ਸਿਤਬ੍ਬਂ] ਵਾਲ਼ਪਾਸਾਨਿ, ਯਥਾ ਵਜ੍ਝੇਥ ਸੋ ਦਿਜੋ;

ਜੀਵਞ੍ਚ ਨਂ ਗਹੇਤ੍ਵਾਨ, ਆਨਯੇਹਿ [ਆਨਯੇਥ (ਸੀ. ਪੀ.)] ਮਮਨ੍ਤਿਕੇ.

੪. ਏਤੇ ਭੁਤ੍ਵਾ ਪਿਵਿਤ੍ਵਾ ਚ [ਭੁਤ੍ਵਾ ਚ ਪਿਤ੍ਵਾ ਚ (ਪੀ.)], ਪਕ੍ਕਮਨ੍ਤਿ ਵਿਹਙ੍ਗਮਾ;

ਏਕੋ ਬਦ੍ਧੋਸ੍ਮਿ ਪਾਸੇਨ, ਕਿਂ ਪਾਪਂ ਪਕਤਂ ਮਯਾ.

੫. ਉਦਰਂ ਨੂਨ ਅਞ੍ਞੇਸਂ, ਸੁਵ ਅਚ੍ਚੋਦਰਂ ਤਵ;

ਭੁਤ੍ਵਾ ਸਾਲਿਂ ਯਥਾਕਾਮਂ, ਤੁਣ੍ਡੇਨਾਦਾਯ ਗਚ੍ਛਸਿ.

੬. ਕੋਟ੍ਠਂ ਨੁ ਤਤ੍ਥ ਪੂਰੇਸਿ, ਸੁਵ ਵੇਰਂ ਨੁ ਤੇ ਮਯਾ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕੁਹਿਂ ਸਾਲਿਂ ਨਿਦਾਹਸਿ [ਨਿਧੀਯਸਿ (ਪੀ.)].

੭. ਨ ਮੇ ਵੇਰਂ ਤਯਾ ਸਦ੍ਧਿਂ, ਕੋਟ੍ਠੋ ਮਯ੍ਹਂ ਨ ਵਿਜ੍ਜਤਿ;

ਇਣਂ ਮੁਞ੍ਚਾਮਿਣਂ ਦਮ੍ਮਿ, ਸਮ੍ਪਤ੍ਤੋ ਕੋਟਸਿਮ੍ਬਲਿਂ;

ਨਿਧਿਮ੍ਪਿ ਤਤ੍ਥ ਨਿਦਹਾਮਿ, ਏਵਂ ਜਾਨਾਹਿ ਕੋਸਿਯ.

੮. ਕੀਦਿਸਂ ਤੇ ਇਣਦਾਨਂ, ਇਣਮੋਕ੍ਖੋ ਚ ਕੀਦਿਸੋ;

ਨਿਧਿਨਿਧਾਨਮਕ੍ਖਾਹਿ, ਅਥ ਪਾਸਾ ਪਮੋਕ੍ਖਸਿ.

੯. ਅਜਾਤਪਕ੍ਖਾ ਤਰੁਣਾ, ਪੁਤ੍ਤਕਾ ਮਯ੍ਹ ਕੋਸਿਯ;

ਤੇ ਮਂ ਭਤਾ ਭਰਿਸ੍ਸਨ੍ਤਿ, ਤਸ੍ਮਾ ਤੇਸਂ ਇਣਂ ਦਦੇ.

੧੦. ਮਾਤਾ ਪਿਤਾ ਚ ਮੇ ਵੁਦ੍ਧਾ, ਜਿਣ੍ਣਕਾ ਗਤਯੋਬ੍ਬਨਾ;

ਤੇਸਂ ਤੁਣ੍ਡੇਨ ਹਾਤੂਨ, ਮੁਞ੍ਚੇ ਪੁਬ੍ਬਕਤਂ [ਪੁਬ੍ਬੇ ਕਤਂ (ਸੀ.)] ਇਣਂ.

੧੧. ਅਞ੍ਞੇਪਿ ਤਤ੍ਥ ਸਕੁਣਾ, ਖੀਣਪਕ੍ਖਾ ਸੁਦੁਬ੍ਬਲਾ;

ਤੇਸਂ ਪੁਞ੍ਞਤ੍ਥਿਕੋ ਦਮ੍ਮਿ, ਤਂ ਨਿਧਿਂ ਆਹੁ ਪਣ੍ਡਿਤਾ.

੧੨. ਈਦਿਸਂ [ਏਦਿਸਂ (ਸੀ. ਪੀ.)] ਮੇ ਇਣਦਾਨਂ, ਇਣਮੋਕ੍ਖੋ ਚ ਈਦਿਸੋ;

ਨਿਧਿਨਿਧਾਨਮਕ੍ਖਾਮਿ [ਨਿਧਿਂ ਨਿਧਾਨਂ ਅਕ੍ਖਾਤਂ (ਸੀ. ਪੀ.)], ਏਵਂ ਜਾਨਾਹਿ ਕੋਸਿਯ.

੧੩. ਭਦ੍ਦਕੋ ਵਤਯਂ ਪਕ੍ਖੀ, ਦਿਜੋ ਪਰਮਧਮ੍ਮਿਕੋ;

ਏਕਚ੍ਚੇਸੁ ਮਨੁਸ੍ਸੇਸੁ, ਅਯਂ ਧਮ੍ਮੋ ਨ ਵਿਜ੍ਜਤਿ.

੧੪. ਭੁਞ੍ਜ ਸਾਲਿਂ ਯਥਾਕਾਮਂ, ਸਹ ਸਬ੍ਬੇਹਿ ਞਾਤਿਭਿ;

ਪੁਨਾਪਿ ਸੁਵ ਪਸ੍ਸੇਮੁ, ਪਿਯਂ ਮੇ ਤਵ ਦਸ੍ਸਨਂ.

੧੫. ਭੁਤ੍ਤਞ੍ਚ ਪੀਤਞ੍ਚ ਤਵਸ੍ਸਮਮ੍ਹਿ [ਤਵਸ੍ਸਬ੍ਯਮ੍ਹਿ (ਕ.)], ਰਤ੍ਤਿਞ੍ਚ [ਰਤੀ ਚ (ਸੀ. ਪੀ.)] ਨੋ ਕੋਸਿਯ ਤੇ ਸਕਾਸੇ;

ਨਿਕ੍ਖਿਤ੍ਤਦਣ੍ਡੇਸੁ ਦਦਾਹਿ ਦਾਨਂ, ਜਿਣ੍ਣੇ ਚ ਮਾਤਾਪਿਤਰੋ ਭਰਸ੍ਸੁ.

੧੬. ਲਕ੍ਖੀ ਵਤ ਮੇ ਉਦਪਾਦਿ ਅਜ੍ਜ, ਯੋ ਅਦ੍ਦਸਾਸਿਂ ਪਵਰਂ [ਯੋਹਂ ਅਦਸ੍ਸਂ ਪਰਮਂ (ਸ੍ਯਾ. ਕ.)] ਦਿਜਾਨਂ;

ਸੁਵਸ੍ਸ ਸੁਤ੍ਵਾਨ ਸੁਭਾਸਿਤਾਨਿ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨਿ.

੧੭. ਸੋ ਕੋਸਿਯੋ ਅਤ੍ਤਮਨੋ ਉਦਗ੍ਗੋ, ਅਨ੍ਨਞ੍ਚ ਪਾਨਞ੍ਚਭਿਸਙ੍ਖਰਿਤ੍ਵਾ [ਅਨ੍ਨਞ੍ਚ ਪਾਨਂ ਅਭਿਸਂਹਰਿਤ੍ਵਾ (ਕ.)];

ਅਨ੍ਨੇਨ ਪਾਨੇਨ ਪਸਨ੍ਨਚਿਤ੍ਤੋ, ਸਨ੍ਤਪ੍ਪਯਿ ਸਮਣਬ੍ਰਾਹ੍ਮਣੇ ਚਾਤਿ.

ਸਾਲਿਕੇਦਾਰਜਾਤਕਂ [ਕੇਦਾਰਜਾਤਕਂ (ਕ.)] ਪਠਮਂ.