੪੬੬. ਸਮੁਦ੍ਦਵਾਣਿਜਜਾਤਕਂ (੩)

੨੫. ਕਸਨ੍ਤਿ ਵਪਨ੍ਤਿ ਤੇ ਜਨਾ, ਮਨੁਜਾ ਕਮ੍ਮਫਲੂਪਜੀਵਿਨੋ;

ਨਯਿਮਸ੍ਸ ਦੀਪਕਸ੍ਸ ਭਾਗਿਨੋ, ਜਮ੍ਬੁਦੀਪਾ ਇਦਮੇਵ ਨੋ ਵਰਂ.

੨੬. ਤਿਪਞ੍ਚਰਤ੍ਤੂਪਗਤਮ੍ਹਿ ਚਨ੍ਦੇ, ਵੇਗੋ ਮਹਾ ਹੇਹਿਤਿ ਸਾਗਰਸ੍ਸ;

ਉਪ੍ਲਵਿਸ੍ਸਂ ਦੀਪਮਿਮਂ ਉਲ਼ਾਰਂ, ਮਾ ਵੋ ਵਧੀ ਗਚ੍ਛਥ ਲੇਣਮਞ੍ਞਂ.

੨੭. ਨ ਜਾਤੁਯਂ ਸਾਗਰਵਾਰਿਵੇਗੋ, ਉਪ੍ਲਵਿਸ੍ਸਂ ਦੀਪਮਿਮਂ ਉਲ਼ਾਰਂ;

ਤਂ ਮੇ ਨਿਮਿਤ੍ਤੇਹਿ ਬਹੂਹਿ ਦਿਟ੍ਠਂ, ਮਾ ਭੇਥ ਕਿਂ ਸੋਚਥ ਮੋਦਥਵ੍ਹੋ [ਮੋਦਥ ਵੋ (ਕ.) ੬.੩੮ ਮੋਗ੍ਗਲ੍ਲਾਨਸੁਤ੍ਤਂ ਪਸ੍ਸਿਤਬ੍ਬਂ].

੨੮. ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਪਤ੍ਤਤ੍ਥ ਆਵਾਸਮਿਮਂ ਉਲ਼ਾਰਂ;

ਨ ਵੋ ਭਯਂ ਪਟਿਪਸ੍ਸਾਮਿ ਕਿਞ੍ਚਿ, ਆਪੁਤ੍ਤਪੁਤ੍ਤੇਹਿ ਪਮੋਦਥਵ੍ਹੋ.

੨੯. ਯੋ ਦੇਵੋਯਂ ਦਕ੍ਖਿਣਾਯਂ [ਦਕ੍ਖਿਣਸ੍ਸਂ (ਸੀ.)] ਦਿਸਾਯਂ, ਖੇਮਨ੍ਤਿ ਪਕ੍ਕੋਸਤਿ ਤਸ੍ਸ ਸਚ੍ਚਂ;

ਨ ਉਤ੍ਤਰੋ ਵੇਦਿ ਭਯਾਭਯਸ੍ਸ, ਮਾ ਭੇਥ ਕਿਂ ਸੋਚਥ ਮੋਦਥਵ੍ਹੋ.

੩੦. ਯਥਾ ਇਮੇ ਵਿਪ੍ਪਵਦਨ੍ਤਿ ਯਕ੍ਖਾ, ਏਕੋ ਭਯਂ ਸਂਸਤਿ ਖੇਮਮੇਕੋ;

ਤਦਿਙ੍ਘ ਮਯ੍ਹਂ ਵਚਨਂ ਸੁਣਾਥ, ਖਿਪ੍ਪਂ ਲਹੁਂ ਮਾ ਵਿਨਸ੍ਸਿਮ੍ਹ ਸਬ੍ਬੇ.

੩੧. ਸਬ੍ਬੇ ਸਮਾਗਮ੍ਮ ਕਰੋਮ ਨਾਵਂ, ਦੋਣਿਂ ਦਲ਼੍ਹਂ ਸਬ੍ਬਯਨ੍ਤੂਪਪਨ੍ਨਂ;

ਸਚੇ ਅਯਂ ਦਕ੍ਖਿਣੋ ਸਚ੍ਚਮਾਹ, ਮੋਘਂ ਪਟਿਕ੍ਕੋਸਤਿ ਉਤ੍ਤਰੋਯਂ;

ਸਾ ਚੇਵ ਨੋ ਹੇਹਿਤਿ ਆਪਦਤ੍ਥਾ, ਇਮਞ੍ਚ ਦੀਪਂ ਨ ਪਰਿਚ੍ਚਜੇਮ.

੩੨. ਸਚੇ ਚ ਖੋ ਉਤ੍ਤਰੋ ਸਚ੍ਚਮਾਹ, ਮੋਘਂ ਪਟਿਕ੍ਕੋਸਤਿ ਦਕ੍ਖਿਣੋਯਂ;

ਤਮੇਵ ਨਾਵਂ ਅਭਿਰੁਯ੍ਹ ਸਬ੍ਬੇ, ਏਵਂ ਮਯਂ ਸੋਤ੍ਥਿ ਤਰੇਮੁ ਪਾਰਂ.

੩੩. ਨ ਵੇ ਸੁਗਣ੍ਹਂ ਪਠਮੇਨ ਸੇਟ੍ਠਂ, ਕਨਿਟ੍ਠਮਾਪਾਥਗਤਂ ਗਹੇਤ੍ਵਾ;

ਯੋ ਚੀਧ ਤਚ੍ਛਂ [ਮਜ੍ਝਂ (ਸੀ. ਸ੍ਯਾ. ਪੀ.)] ਪਵਿਚੇਯ੍ਯ ਗਣ੍ਹਤਿ [ਗਣ੍ਹਿ (ਕ.)], ਸ ਵੇ ਨਰੋ ਸੇਟ੍ਠਮੁਪੇਤਿ ਠਾਨਂ.

੩੪. ਯਥਾਪਿ ਤੇ ਸਾਗਰਵਾਰਿਮਜ੍ਝੇ, ਸਕਮ੍ਮੁਨਾ ਸੋਤ੍ਥਿ ਵਹਿਂਸੁ ਵਾਣਿਜਾ;

ਅਨਾਗਤਤ੍ਥਂ ਪਟਿਵਿਜ੍ਝਿਯਾਨ, ਅਪ੍ਪਮ੍ਪਿ ਨਾਚ੍ਚੇਤਿ ਸ ਭੂਰਿਪਞ੍ਞੋ.

੩੫. ਬਾਲਾ ਚ ਮੋਹੇਨ ਰਸਾਨੁਗਿਦ੍ਧਾ, ਅਨਾਗਤਂ ਅਪ੍ਪਟਿਵਿਜ੍ਝਿਯਤ੍ਥਂ;

ਪਚ੍ਚੁਪ੍ਪਨ੍ਨੇ ਸੀਦਨ੍ਤਿ ਅਤ੍ਥਜਾਤੇ, ਸਮੁਦ੍ਦਮਜ੍ਝੇ ਯਥਾ ਤੇ ਮਨੁਸ੍ਸਾ.

੩੬. ਅਨਾਗਤਂ ਪਟਿਕਯਿਰਾਥ ਕਿਚ੍ਚਂ, ‘‘ਮਾ ਮਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਸਿ’’;

ਤਂ ਤਾਦਿਸਂ ਪਟਿਕਤ [ਪਟਿਕਤਂ (ਕ.), ਪਟਿਗਤ (ਸੀ. ਅਟ੍ਠ.), ਪਟਿਕਚ੍ਚ (?)] ਕਿਚ੍ਚਕਾਰਿਂ, ਨ ਤਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਤੀਤਿ.

ਸਮੁਦ੍ਦਵਾਣਿਜਜਾਤਕਂ ਤਤਿਯਂ.