੪੬੪. ਚੂਲ਼ਕੁਣਾਲਜਾਤਕਂ (੧)
੧. ਲੁਦ੍ਧਾਨਂ [ਖੁਦ੍ਦਾਨਂ (ਸੀ. ਸ੍ਯਾ. ਪੀ.)] ਲਹੁਚਿਤ੍ਤਾਨਂ, ਅਕਤਞ੍ਞੂਨ ਦੁਬ੍ਭਿਨਂ;
ਨਾਦੇਵਸਤ੍ਤੋ ਪੁਰਿਸੋ, ਥੀਨਂ ਸਦ੍ਧਾਤੁਮਰਹਤਿ.
੨. ਨ ਤਾ ਪਜਾਨਨ੍ਤਿ ਕਤਂ ਨ ਕਿਚ੍ਚਂ, ਨ ਮਾਤਰਂ ਪਿਤਰਂ ਭਾਤਰਂ ਵਾ;
ਅਨਰਿਯਾ ਸਮਤਿਕ੍ਕਨ੍ਤਧਮ੍ਮਾ, ਸਸ੍ਸੇਵ ਚਿਤ੍ਤਸ੍ਸ ਵਸਂ ਵਜਨ੍ਤਿ.
੩. ਚਿਰਾਨੁਵੁਟ੍ਠਮ੍ਪਿ [ਚਿਰਾਨੁਵੁਤ੍ਥਮ੍ਪਿ (ਸੀ. ਪੀ.)] ਪਿਯਂ ਮਨਾਪਂ, ਅਨੁਕਮ੍ਪਕਂ ਪਾਣਸਮਮ੍ਪਿ ਭਤ੍ਤੁਂ [ਸਨ੍ਤਂ (ਸੀ. ਸ੍ਯਾ. ਪੀ.)];
ਆਵਾਸੁ ਕਿਚ੍ਚੇਸੁ ਚ ਨਂ ਜਹਨ੍ਤਿ, ਤਸ੍ਮਾਹਮਿਤ੍ਥੀਨਂ ਨ ਵਿਸ੍ਸਸਾਮਿ.
੪. ਥੀਨਞ੍ਹਿ ਚਿਤ੍ਤਂ ਯਥਾ ਵਾਨਰਸ੍ਸ, ਕਨ੍ਨਪ੍ਪਕਨ੍ਨਂ ਯਥਾ ਰੁਕ੍ਖਛਾਯਾ;
ਚਲਾਚਲਂ ਹਦਯਮਿਤ੍ਥਿਯਾਨਂ, ਚਕ੍ਕਸ੍ਸ ਨੇਮਿ ਵਿਯ ਪਰਿਵਤ੍ਤਤਿ.
੫. ਯਦਾ ਤਾ ਪਸ੍ਸਨ੍ਤਿ ਸਮੇਕ੍ਖਮਾਨਾ, ਆਦੇਯ੍ਯਰੂਪਂ ਪੁਰਿਸਸ੍ਸ ਵਿਤ੍ਤਂ;
ਸਣ੍ਹਾਹਿ ਵਾਚਾਹਿ ਨਯਨ੍ਤਿ ਮੇਨਂ, ਕਮ੍ਬੋਜਕਾ ਜਲਜੇਨੇਵ ਅਸ੍ਸਂ.
੬. ਯਦਾ ਨ ਪਸ੍ਸਨ੍ਤਿ ਸਮੇਕ੍ਖਮਾਨਾ, ਆਦੇਯ੍ਯਰੂਪਂ ਪੁਰਿਸਸ੍ਸ ਵਿਤ੍ਤਂ;
ਸਮਨ੍ਤਤੋ ਨਂ ਪਰਿਵਜ੍ਜਯਨ੍ਤਿ, ਤਿਣ੍ਣੋ ਨਦੀਪਾਰਗਤੋਵ ਕੁਲ੍ਲਂ.
੭. ਸਿਲੇਸੂਪਮਾ ਸਿਖਿਰਿਵ ਸਬ੍ਬਭਕ੍ਖਾ, ਤਿਕ੍ਖਮਾਯਾ ਨਦੀਰਿਵ ਸੀਘਸੋਤਾ;
ਸੇਵਨ੍ਤਿ ਹੇਤਾ ਪਿਯਮਪ੍ਪਿਯਞ੍ਚ, ਨਾਵਾ ਯਥਾ ਓਰਕੂਲਂ ਪਰਞ੍ਚ.
੮. ਨ ਤਾ ਏਕਸ੍ਸ ਨ ਦ੍ਵਿਨ੍ਨਂ, ਆਪਣੋਵ ਪਸਾਰਿਤੋ;
ਯੋ ਤਾ ਮਯ੍ਹਨ੍ਤਿ ਮਞ੍ਞੇਯ੍ਯ, ਵਾਤਂ ਜਾਲੇਨ ਬਾਧਯੇ [ਬਨ੍ਧਯੇ (ਸ੍ਯਾ. ਕ.)].
੯. ਯਥਾ ਨਦੀ ਚ ਪਨ੍ਥੋ ਚ, ਪਾਨਾਗਾਰਂ ਸਭਾ ਪਪਾ;
ਏਵਂ ਲੋਕਿਤ੍ਥਿਯੋ ਨਾਮ, ਵੇਲਾ ਤਾਸਂ ਨ ਵਿਜ੍ਜਤਿ [ਇਮਿਸ੍ਸਾ ਗਾਥਾਯ ਪੁਬ੍ਬਦ੍ਧਾਪਰਦ੍ਧਂ ਵਿਪਰਿਯਾਯੇਨ ਦਿਸ੍ਸਤਿ (ਕ.)].
੧੦. ਘਤਾਸਨਸਮਾ ਏਤਾ, ਕਣ੍ਹਸਪ੍ਪਸਿਰੂਪਮਾ;
ਗਾਵੋ ਬਹਿਤਿਣਸ੍ਸੇਵ, ਓਮਸਨ੍ਤਿ ਵਰਂ ਵਰਂ.
੧੧. ਘਤਾਸਨਂ ਕੁਞ੍ਜਰਂ ਕਣ੍ਹਸਪ੍ਪਂ, ਮੁਦ੍ਧਾਭਿਸਿਤ੍ਤਂ ਪਮਦਾ ਚ ਸਬ੍ਬਾ;
ਏਤੇ ਨਰੋ ਨਿਚ੍ਚਯਤੋ [ਨਿਚ੍ਚਯਤ੍ਤੋ (ਸੀ. ਪੀ.)] ਭਜੇਥ, ਤੇਸਂ ਹਵੇ ਦੁਬ੍ਬਿਦੁ ਸਬ੍ਬਭਾਵੋ [ਸਚ੍ਚਭਾਵੋ (ਸ੍ਯਾ.)].
੧੨. ਨਚ੍ਚਨ੍ਤਵਣ੍ਣਾ ਨ ਬਹੂਨਂ ਕਨ੍ਤਾ, ਨ ਦਕ੍ਖਿਣਾ ਪਮਦਾ ਸੇਵਿਤਬ੍ਬਾ;
ਨ ਪਰਸ੍ਸ ਭਰਿਯਾ ਨ ਧਨਸ੍ਸ ਹੇਤੁ, ਏਤਿਤ੍ਥਿਯੋ ਪਞ੍ਚ ਨ ਸੇਵਿਤਬ੍ਬਾਤਿ.
ਚੂਲ਼ਕੁਣਾਲਜਾਤਕਂ ਪਠਮਂ.