੪੫੨. ਭੂਰਿਪਞ੍ਞਜਾਤਕਂ (੧੪)

੧੪੫. ਸਚ੍ਚਂ ਕਿਰ ਤ੍ਵਂ ਅਪਿ [ਤ੍ਵਮ੍ਪਿ (ਸੀ.), ਤੁਵਮ੍ਪਿ (ਸ੍ਯਾ.), ਤ੍ਵਂ ਅਸਿ (ਕ.)] ਭੂਰਿਪਞ੍ਞ, ਯਾ ਤਾਦਿਸੀ ਸੀਰਿ ਧਿਤੀ ਮਤੀ ਚ;

ਨ ਤਾਯਤੇਭਾਵਵਸੂਪਨਿਤਂ, ਯੋ ਯਵਕਂ ਭੁਞ੍ਜਸਿ ਅਪ੍ਪਸੂਪਂ.

੧੪੬. ਸੁਖਂ ਦੁਕ੍ਖੇਨ ਪਰਿਪਾਚਯਨ੍ਤੋ, ਕਾਲਾ ਕਾਲਂ ਵਿਚਿਨਂ ਛਨ੍ਦਛਨ੍ਨੋ;

ਅਤ੍ਥਸ੍ਸ ਦ੍ਵਾਰਾਨਿ ਅਵਾਪੁਰਨ੍ਤੋ, ਤੇਨਾਹਂ ਤੁਸ੍ਸਾਮਿ ਯਵੋਦਨੇਨ.

੧੪੭. ਕਾਲਞ੍ਚ ਞਤ੍ਵਾ ਅਭਿਜੀਹਨਾਯ, ਮਨ੍ਤੇਹਿ ਅਤ੍ਥਂ ਪਰਿਪਾਚਯਿਤ੍ਵਾ;

ਵਿਜਮ੍ਭਿਸ੍ਸਂ ਸੀਹਵਿਜਮ੍ਭਿਤਾਨਿ, ਤਾਯਿਦ੍ਧਿਯਾ ਦਕ੍ਖਸਿ ਮਂ ਪੁਨਾਪਿ.

੧੪੮. ਸੁਖੀਪਿ ਹੇਕੇ [ਸੁਖੀ ਹਿ ਏਕੇ (ਸੀ.), ਸੁਖੀਤਿ ਹੇਕੇ (?)] ਨ ਕਰੋਨ੍ਤਿ ਪਾਪਂ, ਅਵਣ੍ਣਸਂਸਗ੍ਗਭਯਾ ਪੁਨੇਕੇ;

ਪਹੂ ਸਮਾਨੋ ਵਿਪੁਲਤ੍ਥਚਿਨ੍ਤੀ, ਕਿਂਕਾਰਣਾ ਮੇ ਨ ਕਰੋਸਿ ਦੁਕ੍ਖਂ.

੧੪੯. ਨ ਪਣ੍ਡਿਤਾ ਅਤ੍ਤਸੁਖਸ੍ਸ ਹੇਤੁ, ਪਾਪਾਨਿ ਕਮ੍ਮਾਨਿ ਸਮਾਚਰਨ੍ਤਿ;

ਦੁਕ੍ਖੇਨ ਫੁਟ੍ਠਾ ਖਲਿਤਾਪਿ ਸਨ੍ਤਾ, ਛਨ੍ਦਾ ਚ ਦੋਸਾ ਨ ਜਹਨ੍ਤਿ ਧਮ੍ਮਂ.

੧੫੦. ਯੇਨ ਕੇਨਚਿ ਵਣ੍ਣੇਨ, ਮੁਦੁਨਾ ਦਾਰੁਣੇਨ ਵਾ;

ਉਦ੍ਧਰੇ ਦੀਨਮਤ੍ਤਾਨਂ, ਪਚ੍ਛਾ ਧਮ੍ਮਂ ਸਮਾਚਰੇ.

੧੫੧. ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਨ ਤਸ੍ਸ ਸਾਖਂ ਭਞ੍ਜੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ.

੧੫੨. ਯਸ੍ਸਾਪਿ [ਯਸ੍ਸ ਹਿ (ਸੀ. ਕ.)] ਧਮ੍ਮਂ ਪੁਰਿਸੋ [ਮਨੁਜੋ (ਸੀ.)] ਵਿਜਞ੍ਞਾ, ਯੇ ਚਸ੍ਸ ਕਙ੍ਖਂ ਵਿਨਯਨ੍ਤਿ ਸਨ੍ਤੋ;

ਤਂ ਹਿਸ੍ਸ ਦੀਪਞ੍ਚ ਪਰਾਯਨਞ੍ਚ, ਨ ਤੇਨ ਮੇਤ੍ਤਿਂ ਜਰਯੇਥ ਪਞ੍ਞੋ.

੧੫੩. ਅਲਸੋ ਗਿਹੀ ਕਾਮਭੋਗੀ ਨ ਸਾਧੁ, ਅਸਞ੍ਞਤੋ ਪਬ੍ਬਜਿਤੋ ਨ ਸਾਧੁ;

ਰਾਜਾ ਨ ਸਾਧੁ ਅਨਿਸਮ੍ਮਕਾਰੀ, ਯੋ ਪਣ੍ਡਿਤੋ ਕੋਧਨੋ ਤਂ ਨ ਸਾਧੁ.

੧੫੪. ਨਿਸਮ੍ਮ ਖਤ੍ਤਿਯੋ ਕਯਿਰਾ, ਨਾਨਿਸਮ੍ਮ ਦਿਸਮ੍ਪਤਿ;

ਨਿਸਮ੍ਮਕਾਰਿਨੋ ਰਾਜ, ਯਸੋ ਕਿਤ੍ਤਿ ਚ ਵਡ੍ਢਤੀਤਿ.

ਭੂਰਿਪਞ੍ਞਜਾਤਕਂ ਚੁਦ੍ਦਸਮਂ.