੪੫੩. ਮਹਾਮਙ੍ਗਲਜਾਤਕਂ (੧੫)

੧੫੫. ਕਿਂਸੁ ਨਰੋ ਜਪ੍ਪਮਧਿਚ੍ਚਕਾਲੇ, ਕਂ ਵਾ ਵਿਜ੍ਜਂ ਕਤਮਂ ਵਾ ਸੁਤਾਨਂ;

ਸੋ ਮਚ੍ਚੋ ਅਸ੍ਮਿਞ੍ਚ [ਅਸ੍ਮਿਂਵ (ਪੀ.)] ਪਰਮ੍ਹਿ ਲੋਕੇ, ਕਥਂ ਕਰੋ ਸੋਤ੍ਥਾਨੇਨ ਗੁਤ੍ਤੋ.

੧੫੬. ਯਸ੍ਸ ਦੇਵਾ ਪਿਤਰੋ ਚ ਸਬ੍ਬੇ, ਸਰੀਸਪਾ [ਸਿਰਿਂਸਪਾ (ਸੀ. ਸ੍ਯਾ. ਪੀ.)] ਸਬ੍ਬਭੂਤਾਨਿ ਚਾਪਿ;

ਮੇਤ੍ਤਾਯ ਨਿਚ੍ਚਂ ਅਪਚਿਤਾਨਿ ਹੋਨ੍ਤਿ, ਭੂਤੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੫੭. ਯੋ ਸਬ੍ਬਲੋਕਸ੍ਸ ਨਿਵਾਤਵੁਤ੍ਤਿ, ਇਤ੍ਥੀਪੁਮਾਨਂ ਸਹਦਾਰਕਾਨਂ;

ਖਨ੍ਤਾ ਦੁਰੁਤ੍ਤਾਨਮਪ੍ਪਟਿਕੂਲਵਾਦੀ, ਅਧਿਵਾਸਨਂ ਸੋਤ੍ਥਾਨਂ ਤਦਾਹੁ.

੧੫੮. ਯੋ ਨਾਵਜਾਨਾਤਿ ਸਹਾਯਮਿਤ੍ਤੇ [ਸਹਾਯਮਤ੍ਤੇ (ਸੀ. ਪੀ.)], ਸਿਪ੍ਪੇਨ ਕੁਲ੍ਯਾਹਿ ਧਨੇਨ ਜਚ੍ਚਾ;

ਰੁਚਿਪਞ੍ਞੋ ਅਤ੍ਥਕਾਲੇ ਮਤੀਮਾ [ਮੁਤੀਮਾ (ਸੀ. ਪੀ.)], ਸਹਾਯੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੫੯. ਮਿਤ੍ਤਾਨਿ ਵੇ ਯਸ੍ਸ ਭਵਨ੍ਤਿ ਸਨ੍ਤੋ, ਸਂਵਿਸ੍ਸਤ੍ਥਾ ਅਵਿਸਂਵਾਦਕਸ੍ਸ;

ਨ ਮਿਤ੍ਤਦੁਬ੍ਭੀ ਸਂਵਿਭਾਗੀ ਧਨੇਨ, ਮਿਤ੍ਤੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੬੦. ਯਸ੍ਸ ਭਰਿਯਾ ਤੁਲ੍ਯਵਯਾ ਸਮਗ੍ਗਾ, ਅਨੁਬ੍ਬਤਾ ਧਮ੍ਮਕਾਮਾ ਪਜਾਤਾ [ਸਜਾਤਾ (ਕ.)];

ਕੋਲਿਨਿਯਾ ਸੀਲਵਤੀ ਪਤਿਬ੍ਬਤਾ, ਦਾਰੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੬੧. ਯਸ੍ਸ ਰਾਜਾ ਭੂਤਪਤਿ [ਭੂਤਪਤੀ (ਸੀ. ਸ੍ਯਾ. ਪੀ.)] ਯਸਸ੍ਸੀ, ਜਾਨਾਤਿ ਸੋਚੇਯ੍ਯਂ ਪਰਕ੍ਕਮਞ੍ਚ;

ਅਦ੍ਵੇਜ੍ਝਤਾ ਸੁਹਦਯਂ ਮਮਨ੍ਤਿ, ਰਾਜੂਸੁ ਵੇ ਸੋਤ੍ਥਾਨਂ ਤਦਾਹੁ.

੧੬੨. ਅਨ੍ਨਞ੍ਚ ਪਾਨਞ੍ਚ ਦਦਾਤਿ ਸਦ੍ਧੋ, ਮਾਲਞ੍ਚ ਗਨ੍ਧਞ੍ਚ ਵਿਲੇਪਨਞ੍ਚ;

ਪਸਨ੍ਨਚਿਤ੍ਤੋ ਅਨੁਮੋਦਮਾਨੋ, ਸਗ੍ਗੇਸੁ ਵੇ ਸੋਤ੍ਥਾਨਂ ਤਦਾਹੁ.

੧੬੩. ਯਮਰਿਯਧਮ੍ਮੇਨ ਪੁਨਨ੍ਤਿ ਵੁਦ੍ਧਾ, ਆਰਾਧਿਤਾ ਸਮਚਰਿਯਾਯ ਸਨ੍ਤੋ;

ਬਹੁਸ੍ਸੁਤਾ ਇਸਯੋ ਸੀਲਵਨ੍ਤੋ, ਅਰਹਨ੍ਤਮਜ੍ਝੇ ਸੋਤ੍ਥਾਨਂ ਤਦਾਹੁ.

੧੬੪. ਏਤਾਨਿ ਖੋ ਸੋਤ੍ਥਾਨਾਨਿ ਲੋਕੇ, ਵਿਞ੍ਞੁਪ੍ਪਸਤ੍ਥਾਨਿ ਸੁਖੁਦ੍ਰਯਾਨਿ [ਸੁਖਿਨ੍ਦ੍ਰਿਯਾਨਿ (ਪੀ.)];

ਤਾਨੀਧ ਸੇਵੇਥ ਨਰੋ ਸਪਞ੍ਞੋ, ਨ ਹਿ ਮਙ੍ਗਲੇ ਕਿਞ੍ਚਨਮਤ੍ਥਿ ਸਚ੍ਚਨ੍ਤਿ.

ਮਹਾਮਙ੍ਗਲਜਾਤਕਂ ਪਨ੍ਨਰਸਮਂ.