੪੫੧. ਚਕ੍ਕਵਾਕਜਾਤਕਂ (੧੩)

੧੩੫. ਵਣ੍ਣਵਾ ਅਭਿਰੂਪੋਸਿ, ਘਨੋ ਸਞ੍ਜਾਤਰੋਹਿਤੋ;

ਚਕ੍ਕਵਾਕ ਸੁਰੂਪੋਸਿ, ਵਿਪ੍ਪਸਨ੍ਨਮੁਖਿਨ੍ਦ੍ਰਿਯੋ.

੧੩੬. ਪਾਠੀਨਂ ਪਾਵੁਸਂ ਮਚ੍ਛਂ, ਬਲਜਂ [ਵਾਲਜਂ (ਸੀ. ਪੀ.), ਬਲਜ੍ਜਂ (ਸ੍ਯਾ.)] ਮੁਞ੍ਜਰੋਹਿਤਂ;

ਗਙ੍ਗਾਯ ਤੀਰੇ ਨਿਸਿਨ੍ਨੋ [ਗਙ੍ਗਾਤੀਰੇ ਨਿਸਿਨ੍ਨੋਸਿ (ਸ੍ਯਾ. ਕ.)], ਏਵਂ ਭੁਞ੍ਜਸਿ ਭੋਜਨਂ.

੧੩੭. ਨ ਵਾਹਮੇਤਂ [ਸਬ੍ਬਤ੍ਥਪਿ ਸਮਾਨਂ] ਭੁਞ੍ਜਾਮਿ, ਜਙ੍ਗਲਾਨੋਦਕਾਨਿ ਵਾ;

ਅਞ੍ਞਤ੍ਰ ਸੇਵਾਲਪਣਕਾ, ਏਤਂ [ਅਞ੍ਞਂ (ਸ੍ਯਾ.)] ਮੇ ਸਮ੍ਮ ਭੋਜਨਂ.

੧੩੮. ਨ ਵਾਹਮੇਤਂ ਸਦ੍ਦਹਾਮਿ, ਚਕ੍ਕਵਾਕਸ੍ਸ ਭੋਜਨਂ;

ਅਹਮ੍ਪਿ ਸਮ੍ਮ ਭੁਞ੍ਜਾਮਿ, ਗਾਮੇ ਲੋਣਿਯਤੇਲਿਯਂ.

੧੩੯. ਮਨੁਸ੍ਸੇਸੁ ਕਤਂ ਭਤ੍ਤਂ, ਸੁਚਿਂ ਮਂਸੂਪਸੇਚਨਂ;

ਨ ਚ ਮੇ ਤਾਦਿਸੋ ਵਣ੍ਣੋ, ਚਕ੍ਕਵਾਕ ਯਥਾ ਤੁਵਂ.

੧੪੦. ਸਮ੍ਪਸ੍ਸਂ ਅਤ੍ਤਨਿ ਵੇਰਂ, ਹਿਂਸਯਂ [ਹਿਂਸਾਯ (ਸ੍ਯਾ. ਪੀ. ਕ.)] ਮਾਨੁਸਿਂ ਪਜਂ;

ਉਤ੍ਰਸ੍ਤੋ ਘਸਸੀ ਭੀਤੋ, ਤੇਨ ਵਣ੍ਣੋ ਤਵੇਦਿਸੋ.

੧੪੧. ਸਬ੍ਬਲੋਕਵਿਰੁਦ੍ਧੋਸਿ, ਧਙ੍ਕ ਪਾਪੇਨ ਕਮ੍ਮੁਨਾ;

ਲਦ੍ਧੋ ਪਿਣ੍ਡੋ ਨ ਪੀਣੇਤਿ, ਤੇਨ ਵਣ੍ਣੋ ਤਵੇਦਿਸੋ.

੧੪੨. ਅਹਮ੍ਪਿ [ਅਹਞ੍ਚ (?)] ਸਮ੍ਮ ਭੁਞ੍ਜਾਮਿ, ਅਹਿਂਸਂ ਸਬ੍ਬਪਾਣਿਨਂ;

ਅਪ੍ਪੋਸ੍ਸੁਕ੍ਕੋ ਨਿਰਾਸਙ੍ਕੀ, ਅਸੋਕੋ ਅਕੁਤੋਭਯੋ.

੧੪੩. ਸੋ ਕਰਸ੍ਸੁ ਆਨੁਭਾਵਂ, ਵੀਤਿਵਤ੍ਤਸ੍ਸੁ ਸੀਲਿਯਂ;

ਅਹਿਂਸਾਯ ਚਰ ਲੋਕੇ, ਪਿਯੋ ਹੋਹਿਸਿ ਮਂਮਿਵ.

੧੪੪. ਯੋ ਨ ਹਨ੍ਤਿ ਨ ਘਾਤੇਤਿ, ਨ ਜਿਨਾਤਿ ਨ ਜਾਪਯੇ;

ਮੇਤ੍ਤਂਸੋ ਸਬ੍ਬਭੂਤੇਸੁ, ਵੇਰਂ ਤਸ੍ਸ ਨ ਕੇਨਚੀਤਿ.

ਚਕ੍ਕਵਾਕਜਾਤਕਂ ਤੇਰਸਮਂ.