੪੫੦. ਬਿਲਾਰਕੋਸਿਯਜਾਤਕਂ (੧੨)

੧੨੫. ਅਪਚਨ੍ਤਾਪਿ ਦਿਚ੍ਛਨ੍ਤਿ, ਸਨ੍ਤੋ ਲਦ੍ਧਾਨ ਭੋਜਨਂ;

ਕਿਮੇਵ ਤ੍ਵਂ ਪਚਮਾਨੋ, ਯਂ ਨ ਦਜ੍ਜਾ ਨ ਤਂ ਸਮਂ.

੧੨੬. ਮਚ੍ਛੇਰਾ ਚ ਪਮਾਦਾ ਚ, ਏਵਂ ਦਾਨਂ ਨ ਦਿਯ੍ਯਤਿ;

ਪੁਞ੍ਞਂ ਆਕਙ੍ਖਮਾਨੇਨ, ਦੇਯ੍ਯਂ ਹੋਤਿ ਵਿਜਾਨਤਾ.

੧੨੭. ਯਸ੍ਸੇਵ ਭੀਤੋ ਨ ਦਦਾਤਿ ਮਚ੍ਛਰੀ, ਤਦੇਵਾਦਦਤੋ ਭਯਂ;

ਜਿਘਚ੍ਛਾ ਚ ਪਿਪਾਸਾ ਚ, ਯਸ੍ਸ ਭਾਯਤਿ ਮਚ੍ਛਰੀ;

ਤਮੇਵ ਬਾਲਂ ਫੁਸਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

੧੨੮. ਤਸ੍ਮਾ ਵਿਨੇਯ੍ਯ ਮਚ੍ਛੇਰਂ, ਦਜ੍ਜਾ ਦਾਨਂ ਮਲਾਭਿਭੂ;

ਪੁਞ੍ਞਾਨਿ ਪਰਲੋਕਸ੍ਮਿਂ, ਪਤਿਟ੍ਠਾ ਹੋਨ੍ਤਿ ਪਾਣਿਨਂ.

੧੨੯. ਦੁਦ੍ਦਦਂ ਦਦਮਾਨਾਨਂ, ਦੁਕ੍ਕਰਂ ਕਮ੍ਮ ਕੁਬ੍ਬਤਂ;

ਅਸਨ੍ਤੋ ਨਾਨੁਕੁਬ੍ਬਨ੍ਤਿ, ਸਤਂ ਧਮ੍ਮੋ ਦੁਰਨ੍ਨਯੋ.

੧੩੦. ਤਸ੍ਮਾ ਸਤਞ੍ਚ ਅਸਤਂ [ਅਸਤਞ੍ਚ (ਸੀ. ਸ੍ਯਾ. ਪੀ.)], ਨਾਨਾ ਹੋਤਿ ਇਤੋ ਗਤਿ;

ਅਸਨ੍ਤੋ ਨਿਰਯਂ ਯਨ੍ਤਿ, ਸਨ੍ਤੋ ਸਗ੍ਗਪਰਾਯਨਾ.

੧੩੧. ਅਪ੍ਪਸ੍ਮੇਕੇ [ਅਪ੍ਪਮ੍ਪੇਕੇ (ਸ੍ਯਾ.)] ਪਵੇਚ੍ਛਨ੍ਤਿ, ਬਹੁਨੇਕੇ ਨ ਦਿਚ੍ਛਰੇ;

ਅਪ੍ਪਸ੍ਮਾ ਦਕ੍ਖਿਣਾ ਦਿਨ੍ਨਾ, ਸਹਸ੍ਸੇਨ ਸਮਂ ਮਿਤਾ.

੧੩੨. ਧਮ੍ਮਂ ਚਰੇ ਯੋਪਿ ਸਮੁਞ੍ਛਕਂ ਚਰੇ, ਦਾਰਞ੍ਚ ਪੋਸਂ ਦਦਮਪ੍ਪਕਸ੍ਮਿਂ [ਦਦਂ ਅਪ੍ਪਕਸ੍ਮਿਪਿ (ਪੀ.)];

ਸਤਂ ਸਹਸ੍ਸਾਨਂ ਸਹਸ੍ਸਯਾਗਿਨਂ, ਕਲਮ੍ਪਿ ਨਾਗ੍ਘਨ੍ਤਿ ਤਥਾਵਿਧਸ੍ਸ ਤੇ.

੧੩੩. ਕੇਨੇਸ ਯਞ੍ਞੋ ਵਿਪੁਲੋ ਮਹਗ੍ਘਤੋ [ਮਹਗ੍ਗਤੋ (ਸਂ. ਨਿ. ੧.੩੨)], ਸਮੇਨ ਦਿਨ੍ਨਸ੍ਸ ਨ ਅਗ੍ਘਮੇਤਿ;

ਕਥਂ ਸਤਂ ਸਹਸ੍ਸਾਨਂ [ਕਥਂ ਸਹਸ੍ਸਾਨਂ (ਸੀ. ਸ੍ਯਾ. ਪੀ.)] ਸਹਸ੍ਸਯਾਗਿਨਂ, ਕਲਮ੍ਪਿ ਨਾਗ੍ਘਨ੍ਤਿ ਤਥਾਵਿਧਸ੍ਸ ਤੇ.

੧੩੪. ਦਦਨ੍ਤਿ ਹੇਕੇ ਵਿਸਮੇ ਨਿਵਿਟ੍ਠਾ, ਛੇਤ੍ਵਾ [ਝਤ੍ਵਾ (ਸੀ. ਪੀ.), ਘਤ੍ਵਾ (ਸ੍ਯਾ.)] ਵਧਿਤ੍ਵਾ ਅਥ ਸੋਚਯਿਤ੍ਵਾ;

ਸਾ ਦਕ੍ਖਿਣਾ ਅਸ੍ਸੁਮੁਖਾ ਸਦਣ੍ਡਾ, ਸਮੇਨ ਦਿਨ੍ਨਸ੍ਸ ਨ ਅਗ੍ਘਮੇਤਿ;

ਏਵਂ ਸਤਂ ਸਹਸ੍ਸਾਨਂ [ਏਵਂ ਸਹਸ੍ਸਾਨਂ (ਸੀ. ਸ੍ਯਾ. ਪੀ.)] ਸਹਸ੍ਸਯਾਗਿਨਂ, ਕਲਮ੍ਪਿ ਨਾਗ੍ਘਨ੍ਤਿ ਤਥਾਵਿਧਸ੍ਸ ਤੇਤਿ.

ਬਿਲਾਰਕੋਸਿਯਜਾਤਕਂ ਦ੍ਵਾਦਸਮਂ.