੪੪੯. ਮਟ੍ਠਕੁਣ੍ਡਲੀਜਾਤਕਂ (੧੧)

੧੧੫. ਅਲਙ੍ਕਤੋ ਮਟ੍ਠਕੁਣ੍ਡਲੀ [ਮਟ੍ਟਕੁਣ੍ਡਲੀ (ਸੀ. ਪੀ.)], ਮਾਲਧਾਰੀ [ਮਾਲਭਾਰੀ (ਸੀ. ਪੀ.)] ਹਰਿਚਨ੍ਦਨੁਸ੍ਸਦੋ;

ਬਾਹਾ ਪਗ੍ਗਯ੍ਹ ਕਨ੍ਦਸਿ, ਵਨਮਜ੍ਝੇ ਕਿਂ ਦੁਕ੍ਖਿਤੋ ਤੁਵਂ.

੧੧੬. ਸੋਵਣ੍ਣਮਯੋ ਪਭਸ੍ਸਰੋ, ਉਪ੍ਪਨ੍ਨੋ ਰਥਪਞ੍ਜਰੋ ਮਮ;

ਤਸ੍ਸ ਚਕ੍ਕਯੁਗਂ ਨ ਵਿਨ੍ਦਾਮਿ, ਤੇਨ ਦੁਕ੍ਖੇਨ ਜਹਾਮਿ ਜੀਵਿਤਂ.

੧੧੭. ਸੋਵਣ੍ਣਮਯਂ ਮਣੀਮਯਂ, ਲੋਹਮਯਂ ਅਥ ਰੂਪਿਯਾਮਯਂ;

[ਆਚਿਕ੍ਖ ਮੇ ਭਦ੍ਦਮਾਣਵ (ਵਿ. ਵ. ੧੨੦੯)] ਪਾਵਦ ਰਥਂ ਕਰਿਸ੍ਸਾਮਿ [ਕਾਰਯਾਮਿ (ਸੀ. ਪੀ.)] ਤੇ [ਆਚਿਕ੍ਖ ਮੇ ਭਦ੍ਦਮਾਣਵ (ਵਿ. ਵ. ੧੨੦੯)], ਚਕ੍ਕਯੁਗਂ ਪਟਿਪਾਦਯਾਮਿ ਤਂ.

੧੧੮. ਸੋ [ਅਥ (ਸ੍ਯਾ.)] ਮਾਣਵੋ ਤਸ੍ਸ ਪਾਵਦਿ, ਚਨ੍ਦਿਮਸੂਰਿਯਾ [ਚਨ੍ਦਿਮਸੂਰਿਯਾ (ਸ੍ਯਾ.)] ਉਭਯੇਤ੍ਥ ਭਾਤਰੋ [ਦਿਸ੍ਸਰੇ (ਵਿ. ਵ. ੧੨੧੦)];

ਸੋਵਣ੍ਣਮਯੋ ਰਥੋ ਮਮ, ਤੇਨ ਚਕ੍ਕਯੁਗੇਨ ਸੋਭਤਿ.

੧੧੯. ਬਾਲੋ ਖੋ ਤ੍ਵਂਸਿ ਮਾਣਵ, ਯੋ ਤ੍ਵਂ ਪਤ੍ਥਯਸੇ ਅਪਤ੍ਥਿਯਂ;

ਮਞ੍ਞਾਮਿ ਤੁਵਂ ਮਰਿਸ੍ਸਸਿ, ਨ ਹਿ ਤ੍ਵਂ ਲਚ੍ਛਸਿ ਚਨ੍ਦਸੂਰਿਯੇ.

੧੨੦. ਗਮਨਾਗਮਨਮ੍ਪਿ ਦਿਸ੍ਸਤਿ, ਵਣ੍ਣਧਾਤੁ ਉਭਯੇਤ੍ਥ ਵੀਥਿਯੋ;

ਪੇਤੋ ਪਨ ਨੇਵ ਦਿਸ੍ਸਤਿ, ਕੋ ਨੁ ਖੋ [ਕੋ ਨਿਧ (ਵਿ. ਵ. ੧੨੧੨)] ਕਨ੍ਦਤਂ ਬਾਲ੍ਯਤਰੋ.

੧੨੧. ਸਚ੍ਚਂ ਖੋ ਵਦੇਸਿ ਮਾਣਵ, ਅਹਮੇਵ ਕਨ੍ਦਤਂ ਬਾਲ੍ਯਤਰੋ;

ਚਨ੍ਦਂ ਵਿਯ ਦਾਰਕੋ ਰੁਦਂ, ਪੇਤਂ ਕਾਲਕਤਾਭਿਪਤ੍ਥਯੇ.

੧੨੨. ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੧੨੩. ਅਬ੍ਬਹੀ [ਅਬ੍ਬੁਹਿ (ਸ੍ਯਾ.), ਅਬ੍ਭੁਲ਼੍ਹਂ (ਕ.)] ਵਤ ਮੇ ਸਲ੍ਲਂ, ਯਮਾਸਿ ਹਦਯਸ੍ਸਿਤਂ [ਸੋਕਂ ਹਦਯਨਿਸ੍ਸਿਤਂ (ਵਿ. ਵ. ੧੨੧੫)];

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੧੨੪. ਸੋਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਵੀਤਸੋਕੋ ਅਨਾਵਿਲੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਮਾਣਵਾਤਿ.

ਮਟ੍ਠਕੁਣ੍ਡਲੀਜਾਤਕਂ ਏਕਾਦਸਮਂ.