੪੪੮. ਕੁਕ੍ਕੁਟਜਾਤਕਂ (੧੦)

੧੦੪. ਨਾਸ੍ਮਸੇ ਕਤਪਾਪਮ੍ਹਿ, ਨਾਸ੍ਮਸੇ ਅਲਿਕਵਾਦਿਨੇ;

ਨਾਸ੍ਮਸੇ ਅਤ੍ਤਤ੍ਥਪਞ੍ਞਮ੍ਹਿ, ਅਤਿਸਨ੍ਤੇਪਿ ਨਾਸ੍ਮਸੇ.

੧੦੫. ਭਵਨ੍ਤਿ ਹੇਕੇ ਪੁਰਿਸਾ, ਗੋਪਿਪਾਸਿਕਜਾਤਿਕਾ [ਗੋਪਿਪਾਸਕਜਾਤਿਕਾ (ਸੀ. ਸ੍ਯਾ. ਪੀ.)];

ਘਸਨ੍ਤਿ ਮਞ੍ਞੇ ਮਿਤ੍ਤਾਨਿ, ਵਾਚਾਯ ਨ ਚ ਕਮ੍ਮੁਨਾ.

੧੦੬. ਸੁਕ੍ਖਞ੍ਜਲਿਪਗ੍ਗਹਿਤਾ, ਵਾਚਾਯ ਪਲਿਗੁਣ੍ਠਿਤਾ;

ਮਨੁਸ੍ਸਫੇਗ੍ਗੂ ਨਾਸੀਦੇ, ਯਸ੍ਮਿਂ ਨਤ੍ਥਿ ਕਤਞ੍ਞੁਤਾ.

੧੦੭. ਨ ਹਿ ਅਞ੍ਞਞ੍ਞਚਿਤ੍ਤਾਨਂ, ਇਤ੍ਥੀਨਂ ਪੁਰਿਸਾਨ ਵਾ;

ਨਾਨਾਵਿਕਤ੍ਵਾ [ਨਾਨਾਵ ਕਤ੍ਵਾ (ਸੀ. ਪੀ.)] ਸਂਸਗ੍ਗਂ, ਤਾਦਿਸਮ੍ਪਿ ਚ ਨਾਸ੍ਮਸੇ [ਤਾਦਿਸਮ੍ਪਿ ਨ ਵਿਸ੍ਸਸੇ (ਸ੍ਯਾ.)].

੧੦੮. ਅਨਰਿਯਕਮ੍ਮਮੋਕ੍ਕਨ੍ਤਂ, ਅਥੇਤਂ [ਅਤ੍ਥੇਤਂ (ਸੀ. ਸ੍ਯਾ. ਪੀ.)] ਸਬ੍ਬਘਾਤਿਨਂ;

ਨਿਸਿਤਂਵ ਪਟਿਚ੍ਛਨ੍ਨਂ, ਤਾਦਿਸਮ੍ਪਿ ਚ ਨਾਸ੍ਮਸੇ.

੧੦੯. ਮਿਤ੍ਤਰੂਪੇਨਿਧੇਕਚ੍ਚੇ, ਸਾਖਲ੍ਯੇਨ ਅਚੇਤਸਾ;

ਵਿਵਿਧੇਹਿ ਉਪਾਯਨ੍ਤਿ, ਤਾਦਿਸਮ੍ਪਿ ਚ ਨਾਸ੍ਮਸੇ.

੧੧੦. ਆਮਿਸਂ ਵਾ ਧਨਂ ਵਾਪਿ, ਯਤ੍ਥ ਪਸ੍ਸਤਿ ਤਾਦਿਸੋ;

ਦੁਬ੍ਭਿਂ ਕਰੋਤਿ ਦੁਮ੍ਮੇਧੋ, ਤਞ੍ਚ ਹਨ੍ਤ੍ਵਾਨ [ਝਾਤ੍ਵਾਨ (ਸੀ. ਪੀ.), ਹਿਤ੍ਵਾਨ (ਸ੍ਯਾ.)] ਗਚ੍ਛਤਿ.

੧੧੧. ਮਿਤ੍ਤਰੂਪੇਨ ਬਹਵੋ, ਛਨ੍ਨਾ ਸੇਵਨ੍ਤਿ ਸਤ੍ਤਵੋ;

ਜਹੇ ਕਾਪੁਰਿਸੇ ਹੇਤੇ, ਕੁਕ੍ਕੁਟੋ ਵਿਯ ਸੇਨਕਂ.

੧੧੨. ਯੋ ਚ [ਯੋਧ (ਜਾ. ੧.੮.੨੫ ਸੁਲਸਾਜਾਤਕੇ)] ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਅਮਿਤ੍ਤਵਸਮਨ੍ਵੇਤਿ, ਪਚ੍ਛਾ ਚ ਅਨੁਤਪ੍ਪਤਿ.

੧੧੩. ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;

ਮੁਚ੍ਚਤੇ ਸਤ੍ਤੁਸਮ੍ਬਾਧਾ, ਕੁਕ੍ਕੁਟੋ ਵਿਯ ਸੇਨਕਾ;

੧੧੪. ਤਂ ਤਾਦਿਸਂ ਕੂਟਮਿਵੋਡ੍ਡਿਤਂ ਵਨੇ, ਅਧਮ੍ਮਿਕਂ ਨਿਚ੍ਚਵਿਧਂਸਕਾਰਿਨਂ;

ਆਰਾ ਵਿਵਜ੍ਜੇਯ੍ਯ ਨਰੋ ਵਿਚਕ੍ਖਣੋ, ਸੇਨਂ ਯਥਾ ਕੁਕ੍ਕੁਟੋ ਵਂਸਕਾਨਨੇਤਿ.

ਕੁਕ੍ਕੁਟਜਾਤਕਂ ਦਸਮਂ.