੪੪੭. ਮਹਾਧਮ੍ਮਪਾਲਜਾਤਕਂ (੯)

੯੨. ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਅਕ੍ਖਾਹਿ ਮੇ ਬ੍ਰਾਹ੍ਮਣ ਏਤਮਤ੍ਥਂ, ਕਸ੍ਮਾ ਨੁ ਤੁਮ੍ਹਂ ਦਹਰਾ ਨ ਮਿਯ੍ਯਰੇ [ਮੀਯਰੇ (ਸੀ. ਪੀ.)].

੯੩. ਧਮ੍ਮਂ ਚਰਾਮ ਨ ਮੁਸਾ ਭਣਾਮ, ਪਾਪਾਨਿ ਕਮ੍ਮਾਨਿ ਪਰਿਵਜ੍ਜਯਾਮ [ਵਿਵਜ੍ਜਯਾਮ (ਸੀ. ਸ੍ਯਾ. ਪੀ.)];

ਅਨਰਿਯਂ ਪਰਿਵਜ੍ਜੇਮੁ ਸਬ੍ਬਂ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੯੪. ਸੁਣੋਮ ਧਮ੍ਮਂ ਅਸਤਂ ਸਤਞ੍ਚ, ਨ ਚਾਪਿ ਧਮ੍ਮਂ ਅਸਤਂ ਰੋਚਯਾਮ;

ਹਿਤ੍ਵਾ ਅਸਨ੍ਤੇ ਨ ਜਹਾਮ ਸਨ੍ਤੇ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੯੫. ਪੁਬ੍ਬੇਵ ਦਾਨਾ ਸੁਮਨਾ ਭਵਾਮ, ਦਦਮ੍ਪਿ ਵੇ ਅਤ੍ਤਮਨਾ ਭਵਾਮ;

ਦਤ੍ਵਾਪਿ ਵੇ ਨਾਨੁਤਪ੍ਪਾਮ ਪਚ੍ਛਾ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੯੬. ਸਮਣੇ ਮਯਂ ਬ੍ਰਾਹ੍ਮਣੇ ਅਦ੍ਧਿਕੇ ਚ, ਵਨਿਬ੍ਬਕੇ ਯਾਚਨਕੇ ਦਲਿਦ੍ਦੇ;

ਅਨ੍ਨੇਨ ਪਾਨੇਨ ਅਭਿਤਪ੍ਪਯਾਮ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੯੭. ਮਯਞ੍ਚ ਭਰਿਯਂ ਨਾਤਿਕ੍ਕਮਾਮ, ਅਮ੍ਹੇ ਚ ਭਰਿਯਾ ਨਾਤਿਕ੍ਕਮਨ੍ਤਿ;

ਅਞ੍ਞਤ੍ਰ ਤਾਹਿ ਬ੍ਰਹ੍ਮਚਰਿਯਂ ਚਰਾਮ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੯੮. ਪਾਣਾਤਿਪਾਤਾ ਵਿਰਮਾਮ ਸਬ੍ਬੇ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਾਮ;

ਅਮਜ੍ਜਪਾ ਨੋਪਿ ਮੁਸਾ ਭਣਾਮ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੯੯. ਏਤਾਸੁ ਵੇ ਜਾਯਰੇ ਸੁਤ੍ਤਮਾਸੁ, ਮੇਧਾਵਿਨੋ ਹੋਨ੍ਤਿ ਪਹੂਤਪਞ੍ਞਾ;

ਬਹੁਸ੍ਸੁਤਾ ਵੇਦਗੁਨੋ [ਵੇਦਗੁਣਾ (ਸ੍ਯਾ. ਕ.)] ਚ ਹੋਨ੍ਤਿ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੧੦੦. ਮਾਤਾ ਪਿਤਾ ਚ [ਮਾਤਾ ਚ ਪਿਤਾ (ਕ.), ਮਾਤਾਪਿਤਰਾ (ਸ੍ਯਾ.)] ਭਗਿਨੀ ਭਾਤਰੋ ਚ, ਪੁਤ੍ਤਾ ਚ ਦਾਰਾ ਚ ਮਯਞ੍ਚ ਸਬ੍ਬੇ;

ਧਮ੍ਮਂ ਚਰਾਮ ਪਰਲੋਕਹੇਤੁ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੧੦੧. ਦਾਸਾ ਚ ਦਾਸ੍ਯੋ [ਦਾਸ੍ਸੋ (ਸੀ. ਪੀ.), ਦਾਸੀ (ਸ੍ਯਾ.)] ਅਨੁਜੀਵਿਨੋ ਚ, ਪਰਿਚਾਰਕਾ ਕਮ੍ਮਕਰਾ ਚ ਸਬ੍ਬੇ;

ਧਮ੍ਮਂ ਚਰਨ੍ਤਿ ਪਰਲੋਕਹੇਤੁ, ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੧੦੨. ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ, ਧਮ੍ਮੋ ਸੁਚਿਣ੍ਣੋ ਸੁਖਮਾਵਹਾਤਿ;

ਏਸਾਨਿਸਂਸੋ ਧਮ੍ਮੇ ਸੁਚਿਣ੍ਣੇ, ਨ ਦੁਗ੍ਗਤਿਂ ਗਚ੍ਛਤਿ ਧਮ੍ਮਚਾਰੀ.

੧੦੩. ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ, ਛਤ੍ਤਂ ਮਹਨ੍ਤਂ ਵਿਯ ਵਸ੍ਸਕਾਲੇ;

ਧਮ੍ਮੇਨ ਗੁਤ੍ਤੋ ਮਮ ਧਮ੍ਮਪਾਲੋ, ਅਞ੍ਞਸ੍ਸ ਅਟ੍ਠੀਨਿ ਸੁਖੀ ਕੁਮਾਰੋਤਿ.

ਮਹਾਧਮ੍ਮਪਾਲਜਾਤਕਂ ਨਵਮਂ.