੪੪੬. ਤਕ੍ਕਲਜਾਤਕਂ (੮)

੮੨. ਨ ਤਕ੍ਕਲਾ ਸਨ੍ਤਿ ਨ ਆਲੁਵਾਨਿ [ਆਲੁਪਾਨਿ (ਸੀ. ਸ੍ਯਾ. ਪੀ.)], ਨ ਬਿਲ਼ਾਲਿਯੋ ਨ ਕਲ਼ਮ੍ਬਾਨਿ ਤਾਤ;

ਏਕੋ ਅਰਞ੍ਞਮ੍ਹਿ ਸੁਸਾਨਮਜ੍ਝੇ, ਕਿਮਤ੍ਥਿਕੋ ਤਾਤ ਖਣਾਸਿ ਕਾਸੁਂ.

੮੩. ਪਿਤਾਮਹੋ ਤਾਤ ਸੁਦੁਬ੍ਬਲੋ ਤੇ, ਅਨੇਕਬ੍ਯਾਧੀਹਿ ਦੁਖੇਨ ਫੁਟ੍ਠੋ;

ਤਮਜ੍ਜਹਂ ਨਿਖਣਿਸ੍ਸਾਮਿ ਸੋਬ੍ਭੇ, ਨ ਹਿਸ੍ਸ ਤਂ ਜੀਵਿਤਂ ਰੋਚਯਾਮਿ.

੮੪. ਸਙ੍ਕਪ੍ਪਮੇਤਂ ਪਟਿਲਦ੍ਧ ਪਾਪਕਂ, ਅਚ੍ਚਾਹਿਤਂ ਕਮ੍ਮ ਕਰੋਸਿ ਲੁਦ੍ਦਂ;

ਮਯਾਪਿ ਤਾਤ ਪਟਿਲਚ੍ਛਸੇ ਤੁਵਂ, ਏਤਾਦਿਸਂ ਕਮ੍ਮ ਜਰੂਪਨੀਤੋ;

ਤਂ ਕੁਲ੍ਲਵਤ੍ਤਂ ਅਨੁਵਤ੍ਤਮਾਨੋ, ਅਹਮ੍ਪਿ ਤਂ ਨਿਖਣਿਸ੍ਸਾਮਿ ਸੋਬ੍ਭੇ.

੮੫. ਫਰੁਸਾਹਿ ਵਾਚਾਹਿ ਪਕੁਬ੍ਬਮਾਨੋ, ਆਸਜ੍ਜ ਮਂ ਤ੍ਵਂ ਵਦਸੇ ਕੁਮਾਰ;

ਪੁਤ੍ਤੋ ਮਮਂ ਓਰਸਕੋ ਸਮਾਨੋ, ਅਹਿਤਾਨੁਕਮ੍ਪੀ ਮਮ ਤ੍ਵਂਸਿ ਪੁਤ੍ਤ.

੮੬. ਨ ਤਾਹਂ [ਤ੍ਯਾਹਂ (ਸ੍ਯਾ.)] ਤਾਤ ਅਹਿਤਾਨੁਕਮ੍ਪੀ, ਹਿਤਾਨੁਕਮ੍ਪੀ ਤੇ ਅਹਮ੍ਪਿ [ਅਹਞ੍ਹਿ (ਸ੍ਯਾ.)] ਤਾਤ;

ਪਾਪਞ੍ਚ ਤਂ ਕਮ੍ਮ ਪਕੁਬ੍ਬਮਾਨਂ, ਅਰਹਾਮਿ ਨੋ ਵਾਰਯਿਤੁਂ ਤਤੋ.

੮੭. ਯੋ ਮਾਤਰਂ ਵਾ ਪਿਤਰਂ ਸਵਿਟ੍ਠ [ਮਾਤਰਂ ਪਿਤਰਂ ਵਾ ਵਸਿਟ੍ਠ (ਸੀ. ਪੀ.)], ਅਦੂਸਕੇ ਹਿਂਸਤਿ ਪਾਪਧਮ੍ਮੋ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਅਸਂਸਯਂ ਸੋ ਨਿਰਯਂ ਉਪੇਤਿ [ਪਰੇਤਿ (ਸੀ. ਪੀ.)].

੮੮. ਯੋ ਮਾਤਰਂ ਵਾ ਪਿਤਰਂ ਸਵਿਟ੍ਠ, ਅਨ੍ਨੇਨ ਪਾਨੇਨ ਉਪਟ੍ਠਹਾਤਿ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਅਸਂਸਯਂ ਸੋ ਸੁਗਤਿਂ ਉਪੇਤਿ.

੮੯. ਨ ਮੇ ਤ੍ਵਂ ਪੁਤ੍ਤ ਅਹਿਤਾਨੁਕਮ੍ਪੀ, ਹਿਤਾਨੁਕਮ੍ਪੀ ਮੇ [ਮਮ (?)] ਤ੍ਵਂਸਿ ਪੁਤ੍ਤ;

ਅਹਞ੍ਚ ਤਂ ਮਾਤਰਾ ਵੁਚ੍ਚਮਾਨੋ, ਏਤਾਦਿਸਂ ਕਮ੍ਮ ਕਰੋਮਿ ਲੁਦ੍ਦਂ.

੯੦. ਯਾ ਤੇ ਸਾ ਭਰਿਯਾ ਅਨਰਿਯਰੂਪਾ, ਮਾਤਾ ਮਮੇਸਾ ਸਕਿਯਾ ਜਨੇਤ੍ਤਿ;

ਨਿਦ੍ਧਾਪਯੇ [ਨਿਦ੍ਧਾਮਸੇ (ਪੀ.)] ਤਞ੍ਚ ਸਕਾ ਅਗਾਰਾ, ਅਞ੍ਞਮ੍ਪਿ ਤੇ ਸਾ ਦੁਖਮਾਵਹੇਯ੍ਯ.

੯੧. ਯਾ ਤੇ ਸਾ ਭਰਿਯਾ ਅਨਰਿਯਰੂਪਾ, ਮਾਤਾ ਮਮੇਸਾ ਸਕਿਯਾ ਜਨੇਤ੍ਤਿ;

ਦਨ੍ਤਾ ਕਰੇਣੂਵ ਵਸੂਪਨੀਤਾ, ਸਾ ਪਾਪਧਮ੍ਮਾ ਪੁਨਰਾਵਜਾਤੂਤਿ.

ਤਕ੍ਕਲਜਾਤਕਂ ਅਟ੍ਠਮਂ.