੪੪੫. ਨਿਗ੍ਰੋਧਜਾਤਕਂ (੭)

੭੨. ਨ ਵਾਹਮੇਤਂ [ਨ ਚਾਹਮੇਤਂ (ਸੀ.)] ਜਾਨਾਮਿ, ਕੋ ਵਾਯਂ ਕਸ੍ਸ ਵਾਤਿ ਵਾ [ਚਾਤਿ ਵਾ (ਸੀ.)];

ਯਥਾ ਸਾਖੋ ਚਰਿ [ਵਦੀ (ਸੀ. ਸ੍ਯਾ. ਪੀ.)] ਏਵਂ, ਨਿਗ੍ਰੋਧ ਕਿਨ੍ਤਿ ਮਞ੍ਞਸਿ.

੭੩. ਤਤੋ ਗਲਵਿਨੀਤੇਨ, ਪੁਰਿਸਾ ਨੀਹਰਿਂਸੁ ਮਂ;

ਦਤ੍ਵਾ ਮੁਖਪਹਾਰਾਨਿ, ਸਾਖਸ੍ਸ ਵਚਨਂਕਰਾ.

੭੪. ਏਤਾਦਿਸਂ ਦੁਮ੍ਮਤਿਨਾ, ਅਕਤਞ੍ਞੁਨ ਦੁਬ੍ਭਿਨਾ;

ਕਤਂ ਅਨਰਿਯਂ ਸਾਖੇਨ, ਸਖਿਨਾ ਤੇ ਜਨਾਧਿਪ.

੭੫. ਨ ਵਾਹਮੇਤਂ ਜਾਨਾਮਿ, ਨਪਿ ਮੇ ਕੋਚਿ ਸਂਸਤਿ;

ਯਂ ਮੇ ਤ੍ਵਂ ਸਮ੍ਮ ਅਕ੍ਖਾਸਿ, ਸਾਖੇਨ ਕਾਰਣਂ [ਕਡ੍ਢਨਂ (ਸੀ. ਸ੍ਯਾ.)] ਕਤਂ.

੭੬. ਸਖੀਨਂ ਸਾਜੀਵਕਰੋ, ਮਮ ਸਾਖਸ੍ਸ ਚੂਭਯਂ;

ਤ੍ਵਂ ਨੋਸਿਸ੍ਸਰਿਯਂ ਦਾਤਾ, ਮਨੁਸ੍ਸੇਸੁ ਮਹਨ੍ਤਤਂ;

ਤਯਾਮਾ ਲਬ੍ਭਿਤਾ ਇਦ੍ਧੀ, ਏਤ੍ਥ ਮੇ ਨਤ੍ਥਿ ਸਂਸਯੋ.

੭੭. ਯਥਾਪਿ ਬੀਜਮਗ੍ਗਿਮ੍ਹਿ, ਡਯ੍ਹਤਿ ਨ ਵਿਰੂਹਤਿ;

ਏਵਂ ਕਤਂ ਅਸਪ੍ਪੁਰਿਸੇ, ਨਸ੍ਸਤਿ ਨ ਵਿਰੂਹਤਿ.

੭੮. ਕਤਞ੍ਞੁਮ੍ਹਿ ਚ ਪੋਸਮ੍ਹਿ, ਸੀਲਵਨ੍ਤੇ ਅਰਿਯਵੁਤ੍ਤਿਨੇ;

ਸੁਖੇਤ੍ਤੇ ਵਿਯ ਬੀਜਾਨਿ, ਕਤਂ ਤਮ੍ਹਿ ਨ ਨਸ੍ਸਤਿ.

੭੯. ਇਮਂ ਜਮ੍ਮਂ ਨੇਕਤਿਕਂ, ਅਸਪ੍ਪੁਰਿਸਚਿਨ੍ਤਕਂ;

ਹਨਨ੍ਤੁ ਸਾਖਂ ਸਤ੍ਤੀਹਿ, ਨਾਸ੍ਸ ਇਚ੍ਛਾਮਿ ਜੀਵਿਤਂ.

੮੦. ਖਮਤਸ੍ਸ ਮਹਾਰਾਜ, ਪਾਣਾ ਨ ਪਟਿਆਨਯਾ [ਦੁਪ੍ਪਟਿਆਨਯਾ (ਸੀ. ਸ੍ਯਾ. ਪੀ.)];

ਖਮ ਦੇਵ ਅਸਪ੍ਪੁਰਿਸਸ੍ਸ, ਨਾਸ੍ਸ ਇਚ੍ਛਾਮਹਂ ਵਧਂ.

੮੧. ਨਿਗ੍ਰੋਧਮੇਵ ਸੇਵੇਯ੍ਯ, ਨ ਸਾਖਮੁਪਸਂਵਸੇ;

ਨਿਗ੍ਰੋਧਸ੍ਮਿਂ ਮਤਂ ਸੇਯ੍ਯੋ, ਯਞ੍ਚੇ ਸਾਖਸ੍ਮਿ ਜੀਵਿਤਨ੍ਤਿ.

ਨਿਗ੍ਰੋਧਜਾਤਕਂ ਸਤ੍ਤਮਂ.