੪੪੪. ਕਣ੍ਹਦੀਪਾਯਨਜਾਤਕਂ (੬)

੬੨. ਸਤ੍ਤਾਹਮੇਵਾਹਂ ਪਸਨ੍ਨਚਿਤ੍ਤੋ, ਪੁਞ੍ਞਤ੍ਥਿਕੋ ਆਚਰਿਂ [ਅਚਰਿਂ (ਸੀ. ਸ੍ਯਾ. ਪੀ.)] ਬ੍ਰਹ੍ਮਚਰਿਯਂ;

ਅਥਾਪਰਂ ਯਂ ਚਰਿਤਂ ਮਮੇਦਂ [ਮਮ ਯਿਦਂ (ਸ੍ਯਾ.), ਮਮਾਯਿਦਂ (ਪੀ.)], ਵਸ੍ਸਾਨਿ ਪਞ੍ਞਾਸ ਸਮਾਧਿਕਾਨਿ;

ਅਕਾਮਕੋ ਵਾਪਿ [ਵਾਹਿ (ਪੀ. ਕ.)] ਅਹਂ ਚਰਾਮਿ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ;

ਹਤਂ ਵਿਸਂ ਜੀਵਤੁ ਯਞ੍ਞਦਤ੍ਤੋ.

੬੩. ਯਸ੍ਮਾ ਦਾਨਂ ਨਾਭਿਨਨ੍ਦਿਂ ਕਦਾਚਿ, ਦਿਸ੍ਵਾਨਹਂ ਅਤਿਥਿਂ ਵਾਸਕਾਲੇ;

ਨ ਚਾਪਿ ਮੇ ਅਪ੍ਪਿਯਤਂ ਅਵੇਦੁਂ, ਬਹੁਸ੍ਸੁਤਾ ਸਮਣਬ੍ਰਾਹ੍ਮਣਾ ਚ.

ਅਕਾਮਕੋ ਵਾਪਿ ਅਹਂ ਦਦਾਮਿ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ;

ਹਤਂ ਵਿਸਂ ਜੀਵਤੁ ਯਞ੍ਞਦਤ੍ਤੋ.

੬੪. ਆਸੀਵਿਸੋ ਤਾਤ ਪਹੂਤਤੇਜੋ, ਯੋ ਤਂ ਅਦਂਸੀ [ਅਡਂਸੀ (ਸ੍ਯਾ.)] ਸਚਰਾ [ਬਿਲਰਾ (ਸੀ.), ਪਿਲ਼ਾਰਾ (ਸ੍ਯਾ.), ਪਤਰਾ (ਪੀ.)] ਉਦਿਚ੍ਚ;

ਤਸ੍ਮਿਞ੍ਚ ਮੇ ਅਪ੍ਪਿਯਤਾਯ ਅਜ੍ਜ, ਪਿਤਰਿ ਚ ਤੇ ਨਤ੍ਥਿ ਕੋਚਿ ਵਿਸੇਸੋ;

ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ, ਹਤਂ ਵਿਸਂ ਜੀਵਤੁ ਯਞ੍ਞਦਤ੍ਤੋ.

੬੫. ਸਨ੍ਤਾ ਦਨ੍ਤਾਯੇਵ [ਦਨ੍ਤਾ ਸਨ੍ਤਾ ਯੇ ਚ (ਸ੍ਯਾ. ਕ.)] ਪਰਿਬ੍ਬਜਨ੍ਤਿ, ਅਞ੍ਞਤ੍ਰ ਕਣ੍ਹਾ ਨਤ੍ਥਾਕਾਮਰੂਪਾ [ਅਨਕਾਮਰੂਪਾ (ਸੀ. ਸ੍ਯਾ. ਪੀ.)];

ਦੀਪਾਯਨ ਕਿਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਚਰਸਿ ਬ੍ਰਹ੍ਮਚਰਿਯਂ.

੬੬. ਸਦ੍ਧਾਯ ਨਿਕ੍ਖਮ੍ਮ ਪੁਨਂ ਨਿਵਤ੍ਤੋ, ਸੋ ਏਲ਼ਮੂਗੋਵ ਬਾਲੋ [ਏਲ਼ਮੂਗੋ ਚਪਲੋ (ਸ੍ਯਾ. ਕ.)] ਵਤਾਯਂ;

ਏਤਸ੍ਸ ਵਾਦਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਚਰਾਮਿ ਬ੍ਰਹ੍ਮਚਰਿਯਂ;

ਵਿਞ੍ਞੁਪ੍ਪਸਤ੍ਥਞ੍ਚ ਸਤਞ੍ਚ ਠਾਨਂ [ਵਿਞ੍ਞੂਪਸਤ੍ਥਂ ਵਸਿਤਂ ਚ ਠਾਨਂ (ਕ.)], ਏਵਮ੍ਪਹਂ ਪੁਞ੍ਞਕਰੋ ਭਵਾਮਿ.

੬੭. ਸਮਣੇ ਤੁਵਂ ਬ੍ਰਾਹ੍ਮਣੇ ਅਦ੍ਧਿਕੇ ਚ, ਸਨ੍ਤਪ੍ਪਯਾਸਿ ਅਨ੍ਨਪਾਨੇਨ ਭਿਕ੍ਖਂ;

ਓਪਾਨਭੂਤਂਵ ਘਰਂ ਤਵ ਯਿਦਂ, ਅਨ੍ਨੇਨ ਪਾਨੇਨ ਉਪੇਤਰੂਪਂ;

ਅਥ ਕਿਸ੍ਸ ਵਾਦਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਦਾਨਮਿਮਂ ਦਦਾਸਿ.

੬੮. ਪਿਤਰੋ ਚ ਮੇ ਆਸੁਂ ਪਿਤਾਮਹਾ ਚ, ਸਦ੍ਧਾ ਅਹੁਂ ਦਾਨਪਤੀ ਵਦਞ੍ਞੂ;

ਤਂ ਕੁਲ੍ਲਵਤ੍ਤਂ ਅਨੁਵਤ੍ਤਮਾਨੋ, ਮਾਹਂ ਕੁਲੇ ਅਨ੍ਤਿਮਗਨ੍ਧਨੋ [ਗਨ੍ਧਿਨੋ (ਸ੍ਯਾ. ਪੀ. ਕ.), ਗਨ੍ਧਿਨੀ (ਸੀ.)] ਅਹੁਂ;

ਏਤਸ੍ਸ ਵਾਦਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਦਾਨਮਿਮਂ ਦਦਾਮਿ.

੬੯. ਦਹਰਿਂ ਕੁਮਾਰਿਂ ਅਸਮਤ੍ਥਪਞ੍ਞਂ, ਯਂ ਤਾਨਯਿਂ ਞਾਤਿਕੁਲਾ ਸੁਗਤ੍ਤੇ;

ਨ ਚਾਪਿ ਮੇ ਅਪ੍ਪਿਯਤਂ ਅਵੇਦਿ, ਅਞ੍ਞਤ੍ਰ ਕਾਮਾ ਪਰਿਚਾਰਯਨ੍ਤਾ [ਪਰਿਚਾਰਯਨ੍ਤੀ (ਸੀ. ਪੀ.)];

ਅਥ ਕੇਨ ਵਣ੍ਣੇਨ ਮਯਾ ਤੇ ਭੋਤਿ, ਸਂਵਾਸਧਮ੍ਮੋ ਅਹੁ ਏਵਰੂਪੋ.

੭੦. ਆਰਾ ਦੂਰੇ ਨਯਿਧ ਕਦਾਚਿ ਅਤ੍ਥਿ, ਪਰਮ੍ਪਰਾ ਨਾਮ ਕੁਲੇ ਇਮਸ੍ਮਿਂ;

ਤਂ ਕੁਲ੍ਲਵਤ੍ਤਂ ਅਨੁਵਤ੍ਤਮਾਨਾ, ਮਾਹਂ ਕੁਲੇ ਅਨ੍ਤਿਮਗਨ੍ਧਿਨੀ ਅਹੁਂ;

ਏਤਸ੍ਸ ਵਾਦਸ੍ਸ ਜਿਗੁਚ੍ਛਮਾਨਾ, ਅਕਾਮਿਕਾ ਪਦ੍ਧਚਰਾਮ੍ਹਿ [ਪਟ੍ਠਚਰਾਮ੍ਹਿ (ਸ੍ਯਾ. ਕ.)] ਤੁਯ੍ਹਂ.

੭੧. ਮਣ੍ਡਬ੍ਯ ਭਾਸਿਂ ਯਮਭਾਸਨੇਯ੍ਯਂ [ਭਾਸਿਸ੍ਸਂ ਅਭਾਸਨੇਯ੍ਯਂ (ਸੀ. ਸ੍ਯਾ. ਪੀ.), ਭਾਸਿਸ੍ਸ’ਮਭਾਸਨੇਯ੍ਯਂ (?)], ਤਂ ਖਮ੍ਯਤਂ ਪੁਤ੍ਤਕਹੇਤੁ ਮਜ੍ਜ;

ਪੁਤ੍ਤਪੇਮਾ ਨ ਇਧ ਪਰਤ੍ਥਿ ਕਿਞ੍ਚਿ, ਸੋ ਨੋ ਅਯਂ ਜੀਵਤਿ ਯਞ੍ਞਦਤ੍ਤੋਤਿ.

ਕਣ੍ਹਦੀਪਾਯਨਜਾਤਕਂ [ਮਣ੍ਡਬ੍ਯਜਾਤਕਂ (ਸ੍ਯਾ. ਕ.)] ਛਟ੍ਠਂ.