੪੪੩. ਚੂਲ਼ਬੋਧਿਜਾਤਕਂ (੫)

੪੯. ਯੋ ਤੇ ਇਮਂ ਵਿਸਾਲਕ੍ਖਿਂ, ਪਿਯਂ ਸਮ੍ਹਿਤਭਾਸਿਨਿਂ [ਸਮ੍ਮਿਲ੍ਲਭਾਸਿਨਿਂ (ਸੀ. ਪੀ.), ਸਮ੍ਮਿਲ੍ਲਹਾਸਿਨਿਂ (ਸ੍ਯਾ.)];

ਆਦਾਯ ਬਲਾ ਗਚ੍ਛੇਯ੍ਯ, ਕਿਂ ਨੁ ਕਯਿਰਾਸਿ ਬ੍ਰਾਹ੍ਮਣ.

੫੦. ਉਪ੍ਪਜ੍ਜੇ [ਉਪ੍ਪਜ੍ਜ (ਸੀ. ਪੀ.)] ਮੇ ਨ ਮੁਚ੍ਚੇਯ੍ਯ, ਨ ਮੇ ਮੁਚ੍ਚੇਯ੍ਯ ਜੀਵਤੋ;

ਰਜਂਵ ਵਿਪੁਲਾ ਵੁਟ੍ਠਿ, ਖਿਪ੍ਪਮੇਵ ਨਿਵਾਰਯੇ [ਨਿਵਾਰਯਿਂ (ਕ.)].

੫੧. ਯਂ ਨੁ ਪੁਬ੍ਬੇ ਵਿਕਤ੍ਥਿਤ੍ਥੋ [ਵਿਕਤ੍ਥਿਤੋ (ਕ. ਸੀ. ਸ੍ਯਾ. ਕ.)], ਬਲਮ੍ਹਿਵ ਅਪਸ੍ਸਿਤੋ;

ਸ੍ਵਜ੍ਜ ਤੁਣ੍ਹਿਕਤੋ [ਤੁਣ੍ਹਿਕਤੋ (ਸੀ.), ਤੁਣ੍ਹਿਕ੍ਖਕੋ (ਪੀ.)] ਦਾਨਿ, ਸਙ੍ਘਾਟਿਂ ਸਿਬ੍ਬਮਚ੍ਛਸਿ.

੫੨. ਉਪ੍ਪਜ੍ਜਿ ਮੇ ਨ ਮੁਚ੍ਚਿਤ੍ਥ, ਨ ਮੇ ਮੁਚ੍ਚਿਤ੍ਥ ਜੀਵਤੋ;

ਰਜਂਵ ਵਿਪੁਲਾ ਵੁਟ੍ਠਿ, ਖਿਪ੍ਪਮੇਵ ਨਿਵਾਰਯਿਂ.

੫੩. ਕਿਂ ਤੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕਿਂ ਤੇ ਨ ਮੁਚ੍ਚਿ ਜੀਵਤੋ;

ਰਜਂਵ ਵਿਪੁਲਾ ਵੁਟ੍ਠਿ, ਕਤਮਂ ਤ੍ਵਂ ਨਿਵਾਰਯਿ.

੫੪. ਯਮ੍ਹਿ ਜਾਤੇ ਨ ਪਸ੍ਸਤਿ, ਅਜਾਤੇ ਸਾਧੁ ਪਸ੍ਸਤਿ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

੫੫. ਯੇਨ ਜਾਤੇਨ ਨਨ੍ਦਨ੍ਤਿ, ਅਮਿਤ੍ਤਾ ਦੁਕ੍ਖਮੇਸਿਨੋ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

੫੬. ਯਸ੍ਮਿਞ੍ਚ ਜਾਯਮਾਨਮ੍ਹਿ, ਸਦਤ੍ਥਂ ਨਾਵਬੁਜ੍ਝਤਿ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

੫੭. ਯੇਨਾਭਿਭੂਤੋ ਕੁਸਲਂ ਜਹਾਤਿ, ਪਰਕ੍ਕਰੇ ਵਿਪੁਲਞ੍ਚਾਪਿ ਅਤ੍ਥਂ;

ਸ ਭੀਮਸੇਨੋ ਬਲਵਾ ਪਮਦ੍ਦੀ, ਕੋਧੋ ਮਹਾਰਾਜ ਨ ਮੇ ਅਮੁਚ੍ਚਥ.

੫੮. ਕਟ੍ਠਸ੍ਮਿਂ ਮਤ੍ਥਮਾਨਸ੍ਮਿਂ [ਮਨ੍ਥਮਾਨਸ੍ਮਿਂ (ਪੀ.), ਮਦ੍ਦਮਾਨਸ੍ਮਿਂ (ਕ.)], ਪਾਵਕੋ ਨਾਮ ਜਾਯਤਿ;

ਤਮੇਵ ਕਟ੍ਠਂ ਡਹਤਿ, ਯਸ੍ਮਾ ਸੋ ਜਾਯਤੇ ਗਿਨਿ.

੫੯. ਏਵਂ ਮਨ੍ਦਸ੍ਸ ਪੋਸਸ੍ਸ, ਬਾਲਸ੍ਸ ਅਵਿਜਾਨਤੋ;

ਸਾਰਮ੍ਭਾ [ਸਾਰਬ੍ਭਾ (ਕ.)] ਜਾਯਤੇ ਕੋਧੋ, ਸੋਪਿ ਤੇਨੇਵ ਡਯ੍ਹਤਿ.

੬੦. ਅਗ੍ਗੀਵ ਤਿਣਕਟ੍ਠਸ੍ਮਿਂ, ਕੋਧੋ ਯਸ੍ਸ ਪਵਡ੍ਢਤਿ;

ਨਿਹੀਯਤਿ ਤਸ੍ਸ ਯਸੋ, ਕਾਲ਼ਪਕ੍ਖੇਵ ਚਨ੍ਦਿਮਾ.

੬੧. ਅਨੇਧੋ [ਅਨਿਨ੍ਧੋ (ਸੀ. ਕ.), ਅਨਿਨ੍ਦੋ (ਸ੍ਯਾ.)] ਧੂਮਕੇਤੂਵ, ਕੋਧੋ ਯਸ੍ਸੂਪਸਮ੍ਮਤਿ;

ਆਪੂਰਤਿ ਤਸ੍ਸ ਯਸੋ, ਸੁਕ੍ਕਪਕ੍ਖੇਵ ਚਨ੍ਦਿਮਾਤਿ.

ਚੂਲ਼ਬੋਧਿਜਾਤਕਂ ਪਞ੍ਚਮਂ.