੪੪੨. ਸਙ੍ਖਜਾਤਕਂ (੪)

੩੯. ਬਹੁਸ੍ਸੁਤੋ ਸੁਤਧਮ੍ਮੋਸਿ ਸਙ੍ਖ, ਦਿਟ੍ਠਾ ਤਯਾ ਸਮਣਬ੍ਰਾਹ੍ਮਣਾ ਚ;

ਅਥਕ੍ਖਣੇ ਦਸ੍ਸਯਸੇ ਵਿਲਾਪਂ, ਅਞ੍ਞੋ ਨੁ ਕੋ ਤੇ ਪਟਿਮਨ੍ਤਕੋ ਮਯਾ.

੪੦. ਸੁਬ੍ਭੂ [ਸੁਬ੍ਭਾ (ਸ੍ਯਾ.), ਸੁਮ੍ਭਾ, ਸੁਭ੍ਮਾ (ਕ.)] ਸੁਭਾ ਸੁਪ੍ਪਟਿਮੁਕ੍ਕਕਮ੍ਬੁ, ਪਗ੍ਗਯ੍ਹ ਸੋਵਣ੍ਣਮਯਾਯ ਪਾਤਿਯਾ;

‘‘ਭੁਞ੍ਜਸ੍ਸੁ ਭਤ੍ਤਂ’’ ਇਤਿ ਮਂ ਵਦੇਤਿ, ਸਦ੍ਧਾਵਿਤ੍ਤਾ [ਸਦ੍ਧਾਚਿਤ੍ਤਾ (ਸੀ. ਪੀ. ਕ.)], ਤਮਹਂ ਨੋਤਿ ਬ੍ਰੂਮਿ.

੪੧. ਏਤਾਦਿਸਂ ਬ੍ਰਾਹ੍ਮਣ ਦਿਸ੍ਵਾਨ [ਦਿਸ੍ਵ (ਸੀ. ਪੀ.)] ਯਕ੍ਖਂ, ਪੁਚ੍ਛੇਯ੍ਯ ਪੋਸੋ ਸੁਖਮਾਸਿਸਾਨੋ [ਸੁਖਮਾਸਸਾਨੋ (ਸ੍ਯਾ.), ਸੁਖਮਾਸਿਸਮਾਨੋ (ਕ.)];

ਉਟ੍ਠੇਹਿ ਨਂ ਪਞ੍ਜਲਿਕਾਭਿਪੁਚ੍ਛ, ਦੇਵੀ ਨੁਸਿ ਤ੍ਵਂ ਉਦ ਮਾਨੁਸੀ ਨੁ.

੪੨. ਯਂ ਤ੍ਵਂ ਸੁਖੇਨਾਭਿਸਮੇਕ੍ਖਸੇ ਮਂ, ਭੁਞ੍ਜਸ੍ਸੁ ਭਤ੍ਤਂ ਇਤਿ ਮਂ ਵਦੇਸਿ;

ਪੁਚ੍ਛਾਮਿ ਤਂ ਨਾਰਿ ਮਹਾਨੁਭਾਵੇ, ਦੇਵੀ ਨੁਸਿ ਤ੍ਵਂ ਉਦ ਮਾਨੁਸੀ ਨੁ.

੪੩. ਦੇਵੀ ਅਹਂ ਸਙ੍ਖ ਮਹਾਨੁਭਾਵਾ, ਇਧਾਗਤਾ ਸਾਗਰਵਾਰਿਮਜ੍ਝੇ;

ਅਨੁਕਮ੍ਪਿਕਾ ਨੋ ਚ ਪਦੁਟ੍ਠਚਿਤ੍ਤਾ, ਤਵੇਵ ਅਤ੍ਥਾਯ ਇਧਾਗਤਾਸ੍ਮਿ.

੪੪. ਇਧਨ੍ਨਪਾਨਂ ਸਯਨਾਸਨਞ੍ਚ, ਯਾਨਾਨਿ ਨਾਨਾਵਿਵਿਧਾਨਿ ਸਙ੍ਖ;

ਸਬ੍ਬਸ੍ਸ ਤ੍ਯਾਹਂ ਪਟਿਪਾਦਯਾਮਿ, ਯਂ ਕਿਞ੍ਚਿ ਤੁਯ੍ਹਂ ਮਨਸਾਭਿਪਤ੍ਥਿਤਂ.

੪੫. ਯਂ ਕਿਞ੍ਚਿ ਯਿਟ੍ਠਞ੍ਚ ਹੁਤਞ੍ਚ [ਯਿਟ੍ਠਂਵ ਹੁਤਂਵ (ਸੀ. ਪੀ.)] ਮਯ੍ਹਂ, ਸਬ੍ਬਸ੍ਸ ਨੋ ਇਸ੍ਸਰਾ ਤ੍ਵਂ ਸੁਗਤ੍ਤੇ;

ਸੁਸੋਣਿ ਸੁਬ੍ਭਮੁ [ਸੁਬ੍ਭੁ (ਸੀ.), ਸੁਬ੍ਭਾ (ਸ੍ਯਾ.)] ਸੁਵਿਲਗ੍ਗਮਜ੍ਝੇ [ਸੁਵਿਲਾਕਮਜ੍ਝੇ (ਸ੍ਯਾ. ਪੀ. ਸੀ. ਅਟ੍ਠ.), ਸੁਵਿਲਾਤਮਜ੍ਝੇ (ਕ.)], ਕਿਸ੍ਸ ਮੇ ਕਮ੍ਮਸ੍ਸ ਅਯਂ ਵਿਪਾਕੋ.

੪੬. ਘਮ੍ਮੇ ਪਥੇ ਬ੍ਰਾਹ੍ਮਣ ਏਕਭਿਕ੍ਖੁਂ, ਉਗ੍ਘਟ੍ਟਪਾਦਂ ਤਸਿਤਂ ਕਿਲਨ੍ਤਂ;

ਪਟਿਪਾਦਯੀ ਸਙ੍ਖ ਉਪਾਹਨਾਨਿ [ਉਪਾਹਨਾਹਿ (ਸੀ. ਪੀ.)], ਸਾ ਦਕ੍ਖਿਣਾ ਕਾਮਦੁਹਾ ਤਵਜ੍ਜ.

੪੭. ਸਾ ਹੋਤੁ ਨਾਵਾ ਫਲਕੂਪਪਨ੍ਨਾ, ਅਨਵਸ੍ਸੁਤਾ ਏਰਕਵਾਤਯੁਤ੍ਤਾ;

ਅਞ੍ਞਸ੍ਸ ਯਾਨਸ੍ਸ ਨ ਹੇਤ੍ਥ [ਨ ਹਤ੍ਥਿ (ਪੀ.)] ਭੂਮਿ, ਅਜ੍ਜੇਵ ਮਂ ਮੋਲ਼ਿਨਿਂ ਪਾਪਯਸ੍ਸੁ.

੪੮. ਸਾ ਤਤ੍ਥ ਵਿਤ੍ਤਾ ਸੁਮਨਾ ਪਤੀਤਾ, ਨਾਵਂ ਸੁਚਿਤ੍ਤਂ ਅਭਿਨਿਮ੍ਮਿਨਿਤ੍ਵਾ;

ਆਦਾਯ ਸਙ੍ਖਂ ਪੁਰਿਸੇਨ ਸਦ੍ਧਿਂ, ਉਪਾਨਯੀ ਨਗਰਂ ਸਾਧੁਰਮ੍ਮਨ੍ਤਿ.

ਸਙ੍ਖਜਾਤਕਂ ਚਤੁਤ੍ਥਂ.