੪੪੧. ਚਤੁਪੋਸਥਿਯਜਾਤਕਂ (੩)

੨੪. ਯੋ ਕੋਪਨੇਯ੍ਯੇ ਨ ਕਰੋਤਿ ਕੋਪਂ, ਨ ਕੁਜ੍ਝਤਿ ਸਪ੍ਪੁਰਿਸੋ ਕਦਾਚਿ;

ਕੁਦ੍ਧੋਪਿ ਸੋ ਨਾਵਿਕਰੋਤਿ ਕੋਪਂ, ਤਂ ਵੇ ਨਰਂ ਸਮਣਮਾਹੁ [ਸਮਣਂ ਆਹੁ (ਸੀ.)] ਲੋਕੇ.

੨੫. ਊਨੂਦਰੋ ਯੋ ਸਹਤੇ ਜਿਘਚ੍ਛਂ, ਦਨ੍ਤੋ ਤਪਸ੍ਸੀ ਮਿਤਪਾਨਭੋਜਨੋ;

ਆਹਾਰਹੇਤੁ ਨ ਕਰੋਤਿ ਪਾਪਂ, ਤਂ ਵੇ ਨਰਂ ਸਮਣਮਾਹੁ ਲੋਕੇ.

੨੬. ਖਿਡ੍ਡਂ ਰਤਿਂ ਵਿਪ੍ਪਜਹਿਤ੍ਵਾਨ ਸਬ੍ਬਂ, ਨ ਚਾਲਿਕਂ ਭਾਸਸਿ ਕਿਞ੍ਚਿ ਲੋਕੇ;

ਵਿਭੂਸਟ੍ਠਾਨਾ ਵਿਰਤੋ ਮੇਥੁਨਸ੍ਮਾ, ਤਂ ਵੇ ਨਰਂ ਸਮਣਮਾਹੁ ਲੋਕੇ.

੨੭. ਪਰਿਗ੍ਗਹਂ ਲੋਭਧਮ੍ਮਞ੍ਚ ਸਬ੍ਬਂ, ਯੋ ਵੇ ਪਰਿਞ੍ਞਾਯ ਪਰਿਚ੍ਚਜੇਤਿ;

ਦਨ੍ਤਂ ਠਿਤਤ੍ਤਂ ਅਮਮਂ ਨਿਰਾਸਂ, ਤਂ ਵੇ ਨਰਂ ਸਮਣਮਾਹੁ ਲੋਕੇ.

੨੮. ਪੁਚ੍ਛਾਮ ਕਤ੍ਤਾਰਮਨੋਮਪਞ੍ਞਂ [ਮਨੋਮਪਞ੍ਞ (ਸ੍ਯਾ. ਕ.)], ਕਥਾਸੁ ਨੋ ਵਿਗ੍ਗਹੋ ਅਤ੍ਥਿ ਜਾਤੋ;

ਛਿਨ੍ਦਜ੍ਜ ਕਙ੍ਖਂ ਵਿਚਿਕਿਚ੍ਛਿਤਾਨਿ, ਤਦਜ੍ਜ [ਤਯਾਜ੍ਜ (ਸੀ.)] ਕਙ੍ਖਂ ਵਿਤਰੇਮੁ ਸਬ੍ਬੇ.

੨੯. ਯੇ ਪਣ੍ਡਿਤਾ ਅਤ੍ਥਦਸਾ ਭਵਨ੍ਤਿ, ਭਾਸਨ੍ਤਿ ਤੇ ਯੋਨਿਸੋ ਤਤ੍ਥ ਕਾਲੇ;

ਕਥਂ ਨੁ ਕਥਾਨਂ ਅਭਾਸਿਤਾਨਂ, ਅਤ੍ਥਂ ਨਯੇਯ੍ਯੁਂ ਕੁਸਲਾ ਜਨਿਨ੍ਦਾ.

੩੦. ਕਥਂ ਹਵੇ ਭਾਸਤਿ ਨਾਗਰਾਜਾ, ਗਰੁਲ਼ੋ ਪਨ ਵੇਨਤੇਯ੍ਯੋ ਕਿਮਾਹ;

ਗਨ੍ਧਬ੍ਬਰਾਜਾ ਪਨ ਕਿਂ ਵਦੇਸਿ, ਕਥਂ ਪਨ ਕੁਰੂਨਂ ਰਾਜਸੇਟ੍ਠੋ.

੩੧. ਖਨ੍ਤਿਂ ਹਵੇ ਭਾਸਤਿ ਨਾਗਰਾਜਾ, ਅਪ੍ਪਾਹਾਰਂ ਗਰੁਲ਼ੋ ਵੇਨਤੇਯ੍ਯੋ;

ਗਨ੍ਧਬ੍ਬਰਾਜਾ ਰਤਿਵਿਪ੍ਪਹਾਨਂ, ਅਕਿਞ੍ਚਨਂ ਕੁਰੂਨਂ ਰਾਜਸੇਟ੍ਠੋ.

੩੨. ਸਬ੍ਬਾਨਿ ਏਤਾਨਿ ਸੁਭਾਸਿਤਾਨਿ, ਨ ਹੇਤ੍ਥ ਦੁਬ੍ਭਾਸਿਤਮਤ੍ਥਿ ਕਿਞ੍ਚਿ;

ਯਸ੍ਮਿਞ੍ਚ ਏਤਾਨਿ ਪਤਿਟ੍ਠਿਤਾਨਿ, ਅਰਾਵ ਨਾਭ੍ਯਾ ਸੁਸਮੋਹਿਤਾਨਿ;

ਚਤੁਬ੍ਭਿ ਧਮ੍ਮੇਹਿ ਸਮਙ੍ਗਿਭੂਤਂ, ਤਂ ਵੇ ਨਰਂ ਸਮਣਮਾਹੁ ਲੋਕੇ.

੩੩. ਤੁਵਞ੍ਹਿ [ਤੁਵਂ ਨੁ (ਸੀ. ਪੀ.)] ਸੇਟ੍ਠੋ ਤ੍ਵਮਨੁਤ੍ਤਰੋਸਿ, ਤ੍ਵਂ ਧਮ੍ਮਗੂ ਧਮ੍ਮਵਿਦੂ ਸੁਮੇਧੋ;

ਪਞ੍ਞਾਯ ਪਞ੍ਹਂ ਸਮਧਿਗ੍ਗਹੇਤ੍ਵਾ, ਅਚ੍ਛੇਚ੍ਛਿ ਧੀਰੋ ਵਿਚਿਕਿਚ੍ਛਿਤਾਨਿ;

ਅਚ੍ਛੇਚ੍ਛਿ ਕਙ੍ਖਂ ਵਿਚਿਕਿਚ੍ਛਿਤਾਨਿ, ਚੁਨ੍ਦੋ ਯਥਾ ਨਾਗਦਨ੍ਤਂ ਖਰੇਨ.

੩੪. ਨੀਲੁਪ੍ਪਲਾਭਂ ਵਿਮਲਂ ਅਨਗ੍ਘਂ, ਵਤ੍ਥਂ ਇਦਂ ਧੂਮਸਮਾਨਵਣ੍ਣਂ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਧਮ੍ਮਪੂਜਾਯ ਧੀਰ.

੩੫. ਸੁਵਣ੍ਣਮਾਲਂ ਸਤਪਤ੍ਤਫੁਲ੍ਲਿਤਂ, ਸਕੇਸਰਂ ਰਤ੍ਨਸਹਸ੍ਸਮਣ੍ਡਿਤਂ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਧਮ੍ਮਪੂਜਾਯ ਧੀਰ.

੩੬. ਮਣਿਂ ਅਨਗ੍ਘਂ ਰੁਚਿਰਂ ਪਭਸ੍ਸਰਂ, ਕਣ੍ਠਾਵਸਤ੍ਤਂ [ਵਸਿਤਂ (ਕ.)] ਮਣਿਭੂਸਿਤਂ ਮੇ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਧਮ੍ਮਪੂਜਾਯ ਧੀਰ.

੩੭. ਗਵਂ ਸਹਸ੍ਸਂ ਉਸਭਞ੍ਚ ਨਾਗਂ, ਆਜਞ੍ਞਯੁਤ੍ਤੇ ਚ ਰਥੇ ਦਸ ਇਮੇ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਗਾਮਵਰਾਨਿ ਸੋਲ਼ਸ.

੩੮. ਸਾਰਿਪੁਤ੍ਤੋ ਤਦਾ ਨਾਗੋ, ਸੁਪਣ੍ਣੋ ਪਨ ਕੋਲਿਤੋ;

ਗਨ੍ਧਬ੍ਬਰਾਜਾ ਅਨੁਰੁਦ੍ਧੋ, ਰਾਜਾ ਆਨਨ੍ਦ ਪਣ੍ਡਿਤੋ;

ਵਿਧੁਰੋ ਬੋਧਿਸਤ੍ਤੋ ਚ, ਏਵਂ ਧਾਰੇਥ ਜਾਤਕਨ੍ਤਿ.

ਚਤੁਪੋਸਥਿਯਜਾਤਕਂ ਤਤਿਯਂ.