੯. ਅਪਾਯਿਮ੍ਹਵਗ੍ਗੋ

੮੧. ਅਪਾਯਿਮ੍ਹ ਅਨਚ੍ਚਿਮ੍ਹ, ਅਗਾਯਿਮ੍ਹ ਰੁਦਿਮ੍ਹ ਚ;

ਵਿਸਞ੍ਞਿਕਰਣਿਂ ਪਿਤ੍ਵਾ [ਪੀਤ੍ਵਾ (ਸੀ. ਸ੍ਯਾ. ਪੀ.)], ਦਿਟ੍ਠਾ ਨਾਹੁਮ੍ਹ ਵਾਨਰਾਤਿ.

ਸੁਰਾਪਾਨਜਾਤਕਂ ਪਠਮਂ.

੮੨. ਅਤਿਕ੍ਕਮ੍ਮ ਰਮਣਕਂ, ਸਦਾਮਤ੍ਤਞ੍ਚ ਦੂਭਕਂ;

ਸ੍ਵਾਸਿ ਪਾਸਾਣਮਾਸੀਨੋ, ਯਸ੍ਮਾ ਜੀਵਂ ਨ ਮੋਕ੍ਖਸੀਤਿ.

ਮਿਤ੍ਤਵਿਨ੍ਦਕਜਾਤਕਂ ਦੁਤਿਯਂ.

੮੩. ਮਿਤ੍ਤੋ ਹਵੇ ਸਤ੍ਤਪਦੇਨ ਹੋਤਿ, ਸਹਾਯੋ ਪਨ ਦ੍ਵਾਦਸਕੇਨ ਹੋਤਿ;

ਮਾਸਡ੍ਢਮਾਸੇਨ ਚ ਞਾਤਿ ਹੋਤਿ, ਤਤੁਤ੍ਤਰਿਂ ਅਤ੍ਤਸਮੋਪਿ ਹੋਤਿ;

ਸੋਹਂ ਕਥਂ ਅਤ੍ਤਸੁਖਸ੍ਸ ਹੇਤੁ, ਚਿਰਸਨ੍ਥੁਤਂ [ਚਿਰਸਨ੍ਧਵਂ (ਕ.), ਚਿਰਸਤ੍ਥੁਨਂ (ਪੀ.)] ਕਾਲ਼ਕਣ੍ਣਿਂ ਜਹੇਯ੍ਯਨ੍ਤਿ.

ਕਾਲਕਣ੍ਣਿਜਾਤਕਂ ਤਤਿਯਂ.

੮੪. ਆਰੋਗ੍ਯਮਿਚ੍ਛੇ ਪਰਮਞ੍ਚ ਲਾਭਂ, ਸੀਲਞ੍ਚ ਵੁਦ੍ਧਾਨੁਮਤਂ ਸੁਤਞ੍ਚ;

ਧਮ੍ਮਾਨੁਵਤ੍ਤੀ ਚ ਅਲੀਨਤਾ ਚ, ਅਤ੍ਥਸ੍ਸ ਦ੍ਵਾਰਾ ਪਮੁਖਾ ਛਲ਼ੇਤੇਤਿ.

ਅਤ੍ਥਸ੍ਸਦ੍ਵਾਰਜਾਤਕਂ ਚਤੁਤ੍ਥਂ.

੮੫. ਆਯਤਿਂ ਦੋਸਂ ਨਾਞ੍ਞਾਯ, ਯੋ ਕਾਮੇ ਪਟਿਸੇਵਤਿ;

ਵਿਪਾਕਨ੍ਤੇ ਹਨਨ੍ਤਿ ਨਂ, ਕਿਂਪਕ੍ਕਮਿਵ ਭਕ੍ਖਿਤਨ੍ਤਿ.

ਕਿਂਪਕ੍ਕਜਾਤਕਂ ਪਞ੍ਚਮਂ.

੮੬. ਸੀਲਂ ਕਿਰੇਵ ਕਲ੍ਯਾਣਂ, ਸੀਲਂ ਲੋਕੇ ਅਨੁਤ੍ਤਰਂ;

ਪਸ੍ਸ ਘੋਰਵਿਸੋ ਨਾਗੋ, ਸੀਲਵਾਤਿ ਨ ਹਞ੍ਞਤੀਤਿ.

ਸੀਲਵੀਮਂਸਕਜਾਤਕਂ ਛਟ੍ਠਂ.

੮੭. ਯਸ੍ਸ ਮਙ੍ਗਲਾ ਸਮੂਹਤਾਸੇ [ਸਮੂਹਤਾ (ਸੀ. ਸ੍ਯਾ. ਪੀ. ਸੁ. ਨਿ. ੩੬੨], ਉਪ੍ਪਾਤਾ [ਉਪ੍ਪਾਦਾ (ਪੀ.)] ਸੁਪਿਨਾ ਚ ਲਕ੍ਖਣਾ ਚ;

ਸੋ [ਸ (ਸੀ. ਪੀ. ਕ.)] ਮਙ੍ਗਲਦੋਸਵੀਤਿਵਤ੍ਤੋ, ਯੁਗਯੋਗਾਧਿਗਤੋ ਨ ਜਾਤੁਮੇਤੀਤਿ.

ਮਙ੍ਗਲਜਾਤਕਂ ਸਤ੍ਤਮਂ.

੮੮. ਕਲ੍ਯਾਣਿਮੇਵ ਮੁਞ੍ਚੇਯ੍ਯ, ਨ ਹਿ ਮੁਞ੍ਚੇਯ੍ਯ ਪਾਪਿਕਂ;

ਮੋਕ੍ਖੋ ਕਲ੍ਯਾਣਿਯਾ ਸਾਧੁ, ਮੁਤ੍ਵਾ ਤਪ੍ਪਤਿ ਪਾਪਿਕਨ੍ਤਿ.

ਸਾਰਮ੍ਭਜਾਤਕਂ ਅਟ੍ਠਮਂ.

੮੯. ਵਾਚਾਵ ਕਿਰ ਤੇ ਆਸਿ, ਸਣ੍ਹਾ ਸਖਿਲਭਾਣਿਨੋ;

ਤਿਣਮਤ੍ਤੇ ਅਸਜ੍ਜਿਤ੍ਥੋ, ਨੋ ਚ ਨਿਕ੍ਖਸਤਂ ਹਰਨ੍ਤਿ.

ਕੁਹਕਜਾਤਕਂ ਨਵਮਂ.

੯੦. ਯੋ ਪੁਬ੍ਬੇ ਕਤਕਲ੍ਯਾਣੋ, ਕਤਤ੍ਥੋ ਨਾਵਬੁਜ੍ਝਤਿ;

ਪਚ੍ਛਾ ਕਿਚ੍ਚੇ ਸਮੁਪ੍ਪਨ੍ਨੇ, ਕਤ੍ਤਾਰਂ ਨਾਧਿਗਚ੍ਛਤੀਤਿ.

ਅਕਤਞ੍ਞੁਜਾਤਕਂ ਦਸਮਂ.

ਅਪਾਯਿਮ੍ਹਵਗ੍ਗੋ ਨਵਮੋ.

ਤਸ੍ਸੁਦ੍ਦਾਨਂ –

ਅਪਾਯਿਮ੍ਹ ਚ ਦੂਭਕਂ ਸਤ੍ਤਪਦਂ, ਛਲ਼ਦ੍ਵਰ ਚ ਆਯਤਿਨਾ ਚ ਪੁਨ;

ਅਹਿਸੀਲਵ ਮਙ੍ਗਲਿ ਪਾਪਿਕਸ੍ਸਾ, ਸਤਂਨਿਕ੍ਖ ਕਤਤ੍ਥਵਰੇਨ ਦਸਾਤਿ.