੧੦. ਲਿਤ੍ਤਵਗ੍ਗੋ

੯੧. ਲਿਤ੍ਤਂ ਪਰਮੇਨ ਤੇਜਸਾ, ਗਿਲਮਕ੍ਖਂ ਪੁਰਿਸੋ ਨ ਬੁਜ੍ਝਤਿ;

ਗਿਲ ਰੇ ਗਿਲ ਪਾਪਧੁਤ੍ਤਕ, ਪਚ੍ਛਾ ਤੇ ਕਟੁਕਂ ਭਵਿਸ੍ਸਤੀਤਿ.

ਲਿਤ੍ਤਜਾਤਕਂ ਪਠਮਂ.

੯੨. ਉਕ੍ਕਟ੍ਠੇ ਸੂਰਮਿਚ੍ਛਨ੍ਤਿ, ਮਨ੍ਤੀਸੁ ਅਕੁਤੂਹਲਂ;

ਪਿਯਞ੍ਚ ਅਨ੍ਨਪਾਨਮ੍ਹਿ, ਅਤ੍ਥੇ ਜਾਤੇ ਚ ਪਣ੍ਡਿਤਨ੍ਤਿ.

ਮਹਾਸਾਰਜਾਤਕਂ ਦੁਤਿਯਂ.

੯੩. ਨ ਵਿਸ੍ਸਸੇ ਅਵਿਸ੍ਸਤ੍ਥੇ, ਵਿਸ੍ਸਤ੍ਥੇਪਿ ਨ ਵਿਸ੍ਸਸੇ;

ਵਿਸ੍ਸਾਸਾ ਭਯਮਨ੍ਵੇਤਿ, ਸੀਹਂਵ ਮਿਗਮਾਤੁਕਾਤਿ [ਮਿਗਮਾਤੁਯਾ (ਕ.)].

ਵਿਸਾਸਭੋਜਨਜਾਤਕਂ ਤਤਿਯਂ.

੯੪. ਸੋਤਤ੍ਤੋ ਸੋਸਿਨ੍ਦੋ [ਸੋਸੀਤੋ (ਸੀ. ਸ੍ਯਾ. ਪੀ.), ਸੋਸਿਨੋ (ਕ.)] ਚੇਵ, ਏਕੋ ਭਿਂਸਨਕੇ ਵਨੇ;

ਨਗ੍ਗੋ ਨ ਚਗ੍ਗਿਮਾਸੀਨੋ, ਏਸਨਾਪਸੁਤੋ ਮੁਨੀਤਿ.

ਲੋਮਹਂਸਜਾਤਕਂ ਚਤੁਤ੍ਥਂ.

੯੫. ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋਤਿ.

ਮਹਾਸੁਦਸ੍ਸਨਜਾਤਕਂ ਪਞ੍ਚਮਂ.

੯੬. ਸਮਤਿਤ੍ਤਿਕਂ ਅਨਵਸੇਕਂ, ਤੇਲਪਤ੍ਤਂ ਯਥਾ ਪਰਿਹਰੇਯ੍ਯ;

ਏਵਂ ਸਚਿਤ੍ਤਮਨੁਰਕ੍ਖੇ, ਪਤ੍ਥਯਾਨੋ ਦਿਸਂ ਅਗਤਪੁਬ੍ਬਨ੍ਤਿ.

ਤੇਲਪਤ੍ਤਜਾਤਕਂ ਛਟ੍ਠਂ.

੯੭. ਜੀਵਕਞ੍ਚ ਮਤਂ ਦਿਸ੍ਵਾ, ਧਨਪਾਲਿਞ੍ਚ ਦੁਗ੍ਗਤਂ;

ਪਨ੍ਥਕਞ੍ਚ ਵਨੇ ਮੂਲ਼੍ਹਂ, ਪਾਪਕੋ ਪੁਨਰਾਗਤੋਤਿ.

ਨਾਮਸਿਦ੍ਧਿਜਾਤਕਂ ਸਤ੍ਤਮਂ.

੯੮. ਸਾਧੁ ਖੋ ਪਣ੍ਡਿਤੋ ਨਾਮ, ਨ ਤ੍ਵੇਵ ਅਤਿਪਣ੍ਡਿਤੋ;

ਅਤਿਪਣ੍ਡਿਤੇਨ ਪੁਤ੍ਤੇਨ, ਮਨਮ੍ਹਿ ਉਪਕੂਲ਼ਿਤੋਤਿ [ਉਪਕੂਲਿਤੋਤਿ (ਸੀ.), ਉਪਕੁਟ੍ਠਿਤੋਤਿ (ਸ੍ਯਾ.), ਉਪਕੁਟਿਤੋ (ਕ.)].

ਕੂਟਵਾਣਿਜਜਾਤਕਂ ਅਟ੍ਠਮਂ.

੯੯. ਪਰੋਸਹਸ੍ਸਮ੍ਪਿ ਸਮਾਗਤਾਨਂ, ਕਨ੍ਦੇਯ੍ਯੁਂ ਤੇ ਵਸ੍ਸਸਤਂ ਅਪਞ੍ਞਾ;

ਏਕੋਵ ਸੇਯ੍ਯੋ ਪੁਰਿਸੋ ਸਪਞ੍ਞੋ, ਯੋ ਭਾਸਿਤਸ੍ਸ ਵਿਜਾਨਾਤਿ ਅਤ੍ਥਨ੍ਤਿ.

ਪਰੋਸਹਸ੍ਸਜਾਤਕਂ ਨਵਮਂ.

੧੦੦. ਅਸਾਤਂ ਸਾਤਰੂਪੇਨ, ਪਿਯਰੂਪੇਨ ਅਪ੍ਪਿਯਂ;

ਦੁਕ੍ਖਂ ਸੁਖਸ੍ਸ ਰੂਪੇਨ, ਪਮਤ੍ਤਮਤਿਵਤ੍ਤਤੀਤਿ.

ਅਸਾਤਰੂਪਜਾਤਕਂ ਦਸਮਂ.

ਲਿਤ੍ਤਵਗ੍ਗੋ ਦਸਮੋ.

ਤਸ੍ਸੁਦ੍ਦਾਨਂ –

ਗਿਲਮਕ੍ਖਕੁਤੂਹਲ ਮਾਤੁਕਸ੍ਸਾ, ਮੁਨਿਨਾ ਚ ਅਨਿਚ੍ਚਤ ਪਤ੍ਤਵਰਂ;

ਧਨਪਾਲਿਵਰੋ ਅਤਿਪਣ੍ਡਿਤਕੋ, ਸਪਰੋਸਹਸ੍ਸਅਸਾਤਦਸਾਤਿ.

ਮਜ੍ਝਿਮੋ ਪਣ੍ਣਾਸਕੋ.