੮. ਵਰੁਣਵਗ੍ਗੋ

੭੧. ਯੋ ਪੁਬ੍ਬੇ ਕਰਣੀਯਾਨਿ, ਪਚ੍ਛਾ ਸੋ ਕਾਤੁਮਿਚ੍ਛਤਿ;

ਵਰੁਣਕਟ੍ਠ [ਵਰਣਕਟ੍ਠ (ਸੀ. ਪੀ.)] ਭਞ੍ਜੋਵ, ਸ ਪਚ੍ਛਾ ਮਨੁਤਪ੍ਪਤੀਤਿ.

ਵਰੁਣਜਾਤਕਂ ਪਠਮਂ.

੭੨. ਅਕਤਞ੍ਞੁਸ੍ਸ ਪੋਸਸ੍ਸ, ਨਿਚ੍ਚਂ ਵਿਵਰਦਸ੍ਸਿਨੋ;

ਸਬ੍ਬਂ ਚੇ ਪਥਵਿਂ [ਪਠਵਿਂ (ਸੀ. ਸ੍ਯਾ. ਪੀ.)] ਦਜ੍ਜਾ, ਨੇਵ ਨਂ ਅਭਿਰਾਧਯੇਤਿ.

ਸੀਲਵਹਤ੍ਥਿਜਾਤਕਂ ਦੁਤਿਯਂ.

੭੩. ਸਚ੍ਚਂ ਕਿਰੇਵਮਾਹਂਸੁ, ਨਰਾ ਏਕਚ੍ਚਿਯਾ ਇਧ;

ਕਟ੍ਠਂ ਨਿਪ੍ਲਵਿਤਂ [ਵਿਪ੍ਲਾਵਿਤਂ (ਸੀ. ਪੀ.)] ਸੇਯ੍ਯੋ, ਨ ਤ੍ਵੇਵੇਕਚ੍ਚਿਯੋ ਨਰੋਤਿ.

ਸਚ੍ਚਂਕਿਰਜਾਤਕਂ ਤਤਿਯਂ.

੭੪. ਸਾਧੂ ਸਮ੍ਬਹੁਲਾ ਞਾਤੀ, ਅਪਿ ਰੁਕ੍ਖਾ ਅਰਞ੍ਞਜਾ;

ਵਾਤੋ ਵਹਤਿ ਏਕਟ੍ਠਂ, ਬ੍ਰਹਨ੍ਤਮ੍ਪਿ ਵਨਪ੍ਪਤਿਨ੍ਤਿ.

ਰੁਕ੍ਖਧਮ੍ਮਜਾਤਕਂ ਚਤੁਤ੍ਥਂ.

੭੫. ਅਭਿਤ੍ਥਨਯ ਪਜ੍ਜੁਨ੍ਨ, ਨਿਧਿਂ ਕਾਕਸ੍ਸ ਨਾਸਯ;

ਕਾਕਂ ਸੋਕਾਯ ਰਨ੍ਧੇਹਿ, ਮਞ੍ਚ ਸੋਕਾ ਪਮੋਚਯਾਤਿ.

ਮਚ੍ਛਜਾਤਕਂ ਪਞ੍ਚਮਂ.

੭੬. ਅਸਙ੍ਕਿਯੋਮ੍ਹਿ ਗਾਮਮ੍ਹਿ, ਅਰਞ੍ਞੇ ਨਤ੍ਥਿ ਮੇ ਭਯਂ;

ਉਜੁਂ ਮਗ੍ਗਂ ਸਮਾਰੂਲ਼੍ਹੋ, ਮੇਤ੍ਤਾਯ ਕਰੁਣਾਯ ਚਾਤਿ.

ਅਸਙ੍ਕਿਯਜਾਤਕਂ ਛਟ੍ਠਂ.

੭੭. ਉਸਭਾ ਰੁਕ੍ਖਾ ਗਾਵਿਯੋ ਗਵਾ ਚ, ਅਸ੍ਸੋ ਕਂਸੋ ਸਿਙ੍ਗਾਲੀ [ਸਿਗਾਸੀ (ਸੀ. ਸ੍ਯਾ. ਪੀ.)] ਚ ਕੁਮ੍ਭੋ;

ਪੋਕ੍ਖਰਣੀ ਚ ਅਪਾਕਚਨ੍ਦਨਂ, ਲਾਬੂਨਿ ਸੀਦਨ੍ਤਿ ਸਿਲਾ ਪ੍ਲਵਨ੍ਤਿ.

ਮਣ੍ਡੂਕਿਯੋ ਕਣ੍ਹਸਪ੍ਪੇ ਗਿਲਨ੍ਤਿ, ਕਾਕਂ ਸੁਪਣ੍ਣਾ ਪਰਿਵਾਰਯਨ੍ਤਿ;

ਤਸਾ ਵਕਾ ਏਲ਼ਕਾਨਂ ਭਯਾਹਿ, ਵਿਪਰਿਯਾਸੋ [ਵਿਪਰਿਯਾਯੋ (ਸ੍ਯਾ. ਕ.)] ਵਤ੍ਤਤਿ ਨਯਿਧ ਮਤ੍ਥੀਤਿ.

ਮਹਾਸੁਪਿਨਜਾਤਕਂ ਸਤ੍ਤਮਂ.

੭੮. ਉਭੋ ਖਞ੍ਜਾ ਉਭੋ ਕੁਣੀ, ਉਭੋ ਵਿਸਮਚਕ੍ਖੁਕਾ [ਚਕ੍ਖੁਲਾ (ਸੀ. ਪੀ.)];

ਉਭਿਨ੍ਨਂ ਪਿਲ਼ਕਾ [ਪੀਲ਼ਕਾ (ਸ੍ਯਾ.)] ਜਾਤਾ, ਨਾਹਂ ਪਸ੍ਸਾਮਿ ਇਲ੍ਲਿਸਨ੍ਤਿ.

ਇਲ੍ਲਿਸਜਾਤਕਂ ਅਟ੍ਠਮਂ.

੭੯. ਯਤੋ ਵਿਲੁਤ੍ਤਾ ਚ ਹਤਾ ਚ ਗਾਵੋ, ਦਡ੍ਢਾਨਿ ਗੇਹਾਨਿ ਜਨੋ ਚ ਨੀਤੋ;

ਅਥਾਗਮਾ ਪੁਤ੍ਤਹਤਾਯ ਪੁਤ੍ਤੋ, ਖਰਸ੍ਸਰਂ ਡਿਣ੍ਡਿਮਂ [ਦੇਣ੍ਡਿਮਂ (ਸੀ. ਸ੍ਯਾ. ਪੀ.), ਡਿਨ੍ਦਿਮਂ (ਕ.)] ਵਾਦਯਨ੍ਤੋਤਿ.

ਖਰਸ੍ਸਰਜਾਤਕਂ ਨਵਮਂ.

੮੦. ਯਂ ਤੇ ਪਵਿਕਤ੍ਥਿਤਂ ਪੁਰੇ, ਅਥ ਤੇ ਪੂਤਿਸਰਾ ਸਜਨ੍ਤਿ ਪਚ੍ਛਾ;

ਉਭਯਂ ਨ ਸਮੇਤਿ ਭੀਮਸੇਨ, ਯੁਦ੍ਧਕਥਾ ਚ ਇਦਞ੍ਚ ਤੇ ਵਿਹਞ੍ਞਨ੍ਤਿ.

ਭੀਮਸੇਨਜਾਤਕਂ ਦਸਮਂ.

ਵਰੁਣਵਗ੍ਗੋ [ਵਰਣਵਗ੍ਗੋ (ਸੀ. ਪੀ.)] ਅਟ੍ਠਮੋ.

ਤਸ੍ਸੁਦ੍ਦਾਨਂ –

ਵਰੁਣਾ ਅਕਤਞ੍ਞੂਵਰੇ ਤੁ ਸਚ੍ਚਵਰਂ, ਸਵਨਪ੍ਪਤਿਨਾ ਚ ਅਭਿਤ੍ਥਨਯ;

ਕਰੁਣਾਯ ਸਿਲਾਪ੍ਲਵ ਇਲ੍ਲਿਸਤੋ, ਪੁਨ ਡਿਣ੍ਡਿਮਪੂਤਿਸਰੇਨ ਦਸਾਤਿ.