੭. ਇਤ੍ਥਿਵਗ੍ਗੋ

੬੧. ਅਸਾ ਲੋਕਿਤ੍ਥਿਯੋ ਨਾਮ, ਵੇਲਾ ਤਾਸਂ ਨ ਵਿਜ੍ਜਤਿ;

ਸਾਰਤ੍ਤਾ ਚ ਪਗਬ੍ਭਾ ਚ, ਸਿਖੀ ਸਬ੍ਬਘਸੋ ਯਥਾ;

ਤਾ ਹਿਤ੍ਵਾ ਪਬ੍ਬਜਿਸ੍ਸਾਮਿ, ਵਿਵੇਕਮਨੁਬ੍ਰੂਹਯਨ੍ਤਿ.

ਅਸਾਤਮਨ੍ਤਜਾਤਕਂ ਪਠਮਂ.

੬੨. ਯਂ ਬ੍ਰਾਹ੍ਮਣੋ ਅਵਾਦੇਸਿ, ਵੀਣਂ ਸਮੁਖਵੇਠਿਤੋ;

ਅਣ੍ਡਭੂਤਾ ਭਤਾ ਭਰਿਯਾ, ਤਾਸੁ ਕੋ ਜਾਤੁ ਵਿਸ੍ਸਸੇਤਿ.

ਅਣ੍ਡਭੂਤਜਾਤਕਂ ਦੁਤਿਯਂ.

੬੩. ਕੋਧਨਾ ਅਕਤਞ੍ਞੂ ਚ, ਪਿਸੁਣਾ ਮਿਤ੍ਤਭੇਦਿਕਾ [ਪਿਸੁਣਾ ਚ ਵਿਭੇਦਿਕਾ (ਸੀ. ਸ੍ਯਾ. ਪੀ.)];

ਬ੍ਰਹ੍ਮਚਰਿਯਂ ਚਰ ਭਿਕ੍ਖੁ, ਸੋ ਸੁਖਂ ਨ ਵਿਹਾਹਸੀਤਿ [ਪਿਹਾਹਿਸੀਤਿ (ਸੀ. ਸ੍ਯਾ. ਪੀ.), ਵਿਹਾਯਸਿ (ਕ.)].

ਤਕ੍ਕਪਣ੍ਡਿਤਜਾਤਕਂ [ਤਕ੍ਕਜਾਤਕਂ (ਸੀ. ਸ੍ਯਾ. ਪੀ. ਅਟ੍ਠ.)] ਤਤਿਯਂ.

੬੪. ਮਾ ਸੁ ਨਨ੍ਦਿ ਇਚ੍ਛਤਿ ਮਂ, ਮਾ ਸੁ ਸੋਚਿ ਨ ਮਿਚ੍ਛਤਿ [ਨ ਇਚ੍ਛਤਿ (ਸੀ. ਸ੍ਯਾ. ਪੀ.)];

ਥੀਨਂ ਭਾਵੋ ਦੁਰਾਜਾਨੋ, ਮਚ੍ਛਸ੍ਸੇਵੋਦਕੇ ਗਤਨ੍ਤਿ.

ਦੁਰਾਜਾਨਜਾਤਕਂ ਚਤੁਤ੍ਥਂ.

੬੫. ਯਥਾ ਨਦੀ ਚ ਪਨ੍ਥੋ ਚ, ਪਾਨਾਗਾਰਂ ਸਭਾ ਪਪਾ;

ਏਵਂ ਲੋਕਿਤ੍ਥਿਯੋ ਨਾਮ, ਨਾਸਂ ਕੁਜ੍ਝਨ੍ਤਿ ਪਣ੍ਡਿਤਾਤਿ.

ਅਨਭਿਰਤਿਜਾਤਕਂ ਪਞ੍ਚਮਂ.

੬੬. ਏਕਾ ਇਚ੍ਛਾ ਪੁਰੇ ਆਸਿ, ਅਲਦ੍ਧਾ ਮੁਦੁਲਕ੍ਖਣਂ;

ਯਤੋ ਲਦ੍ਧਾ ਅਲ਼ਾਰਕ੍ਖੀ, ਇਚ੍ਛਾ ਇਚ੍ਛਂ ਵਿਜਾਯਥਾਤਿ.

ਮੁਦੁਲਕ੍ਖਣਜਾਤਕਂ ਛਟ੍ਠਂ.

੬੭. ਉਚ੍ਛਙ੍ਗੇ ਦੇਵ ਮੇ ਪੁਤ੍ਤੋ, ਪਥੇ ਧਾਵਨ੍ਤਿਯਾ ਪਤਿ;

ਤਞ੍ਚ ਦੇਸਂ ਨ ਪਸ੍ਸਾਮਿ, ਯਤੋ ਸੋਦਰਿਯਮਾਨਯੇਤਿ [ਸੋਦਰਿਯਂ ਨਯੇ (ਕ.)].

ਉਚ੍ਛਙ੍ਗਜਾਤਕਂ ਸਤ੍ਤਮਂ.

੬੮. ਯਸ੍ਮਿਂ ਮਨੋ ਨਿਵਿਸਤਿ, ਚਿਤ੍ਤਞ੍ਚਾਪਿ [ਚਿਤ੍ਤਂ ਵਾਪਿ (ਕਤ੍ਥਚਿ)] ਪਸੀਦਤਿ;

ਅਦਿਟ੍ਠਪੁਬ੍ਬਕੇ ਪੋਸੇ, ਕਾਮਂ ਤਸ੍ਮਿਮ੍ਪਿ ਵਿਸ੍ਸਸੇਤਿ.

ਸਾਕੇਤਜਾਤਕਂ ਅਟ੍ਠਮਂ.

੬੯. ਧਿਰਤ੍ਥੁ ਤਂ ਵਿਸਂ ਵਨ੍ਤਂ, ਯਮਹਂ ਜੀਵਿਤਕਾਰਣਾ;

ਵਨ੍ਤਂ ਪਚ੍ਚਾਵਮਿਸ੍ਸਾਮਿ [ਪਚ੍ਚਾਹਰਿਸ੍ਸਾਮਿ (ਕ.)], ਮਤਂ ਮੇ ਜੀਵਿਤਾ ਵਰਨ੍ਤਿ.

ਵਿਸਵਨ੍ਤਜਾਤਕਂ ਨਵਮਂ.

੭੦. ਨ ਤਂ ਜਿਤਂ ਸਾਧੁ ਜਿਤਂ, ਯਂ ਜਿਤਂ ਅਵਜੀਯਤਿ;

ਤਂ ਖੋ ਜਿਤਂ ਸਾਧੁ ਜਿਤਂ, ਯਂ ਜਿਤਂ ਨਾਵਜੀਯਤੀਤਿ.

ਕੁਦ੍ਦਾਲਜਾਤਕਂ ਦਸਮਂ.

ਇਤ੍ਥਿਵਗ੍ਗੋ ਸਤ੍ਤਮੋ.

ਤਸ੍ਸੁਦ੍ਦਾਨਂ –

ਸਿਖੀਸਬ੍ਬਘਸੋਪਿ ਚ ਵੀਣਵਰੋ, ਪਿਸੁਣਾ ਮਿਤ੍ਤਭੇਦਿਕਾ ਨਨ੍ਦੀ ਨਦੀ;

ਮੁਦੁਲਕ੍ਖਣ ਸੋਦਰਿਯਾ ਚ ਮਨੋ, ਵਿਸ ਸਾਧੁਜਿਤੇਨ ਭਵਨ੍ਤਿ ਦਸਾਤਿ.