੬. ਆਸੀਸਵਗ੍ਗੋ

੫੧. ਆਸੀਸੇਥੇਵ [ਆਸਿਂਸੇਥੇਵ (ਸੀ. ਸ੍ਯਾ. ਪੀ.)] ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਯਥਾ ਇਚ੍ਛਿਂ ਤਥਾ ਅਹੂਤਿ.

ਮਹਾਸੀਲਵਜਾਤਕਂ ਪਠਮਂ.

੫੨. ਵਾਯਮੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਉਦਕਾ ਥਲਮੁਬ੍ਭਤਨ੍ਤਿ.

ਚੂਲ਼ਜਨਕਜਾਤਕਂ ਦੁਤਿਯਂ.

੫੩. ਤਥੇਵ ਪੁਣ੍ਣਾ ਪਾਤਿਯੋ, ਅਞ੍ਞਾਯਂ ਵਤ੍ਤਤੇ ਕਥਾ;

ਆਕਾਰਣੇਨ [ਆਕਾਰਕੇਨ (ਸੀ. ਸ੍ਯਾ. ਪੀ.)] ਜਾਨਾਮਿ, ਨ ਚਾਯਂ ਭਦ੍ਦਿਕਾ ਸੁਰਾਤਿ.

ਪੁਣ੍ਣਪਾਤਿਜਾਤਕਂ ਤਤਿਯਂ.

੫੪. ਨਾਯਂ ਰੁਕ੍ਖੋ ਦੁਰਾਰੁਹੋ, ਨਪਿ ਗਾਮਤੋ ਆਰਕਾ;

ਆਕਾਰਣੇਨ ਜਾਨਾਮਿ, ਨਾਯਂ ਸਾਦੁਫਲੋ ਦੁਮੋਤਿ.

ਕਿਂਫਲਜਾਤਕਂ ਚਤੁਤ੍ਥਂ.

੫੫. ਯੋ ਅਲੀਨੇਨ ਚਿਤ੍ਤੇਨ, ਅਲੀਨਮਨਸੋ ਨਰੋ;

ਭਾਵੇਤਿ ਕੁਸਲਂ ਧਮ੍ਮਂ, ਯੋਗਕ੍ਖੇਮਸ੍ਸ ਪਤ੍ਤਿਯਾ;

ਪਾਪੁਣੇ ਅਨੁਪੁਬ੍ਬੇਨ, ਸਬ੍ਬਸਂਯੋਜਨਕ੍ਖਯਨ੍ਤਿ.

ਪਞ੍ਚਾਵੁਧਜਾਤਕਂ ਪਞ੍ਚਮਂ.

੫੬. ਯੋ ਪਹਟ੍ਠੇਨ ਚਿਤ੍ਤੇਨ, ਪਹਟ੍ਠਮਨਸੋ ਨਰੋ;

ਭਾਵੇਤਿ ਕੁਸਲਂ ਧਮ੍ਮਂ, ਯੋਗਕ੍ਖੇਮਸ੍ਸ ਪਤ੍ਤਿਯਾ;

ਪਾਪੁਣੇ ਅਨੁਪੁਬ੍ਬੇਨ, ਸਬ੍ਬਸਂਯੋਜਨਕ੍ਖਯਨ੍ਤਿ.

ਕਞ੍ਚਨਕ੍ਖਨ੍ਧਜਾਤਕਂ ਛਟ੍ਠਂ.

੫੭. ਯਸ੍ਸੇਤੇ ਚਤੁਰੋ ਧਮ੍ਮਾ, ਵਾਨਰਿਨ੍ਦ ਯਥਾ ਤਵ;

ਸਚ੍ਚਂ ਧਮ੍ਮੋ ਧਿਤਿ [ਧਿਤੀ (ਸੀ. ਪੀ.)] ਚਾਗੋ, ਦਿਟ੍ਠਂ ਸੋ ਅਤਿਵਤ੍ਤਤੀਤਿ.

ਵਾਨਰਿਨ੍ਦਜਾਤਕਂ ਸਤ੍ਤਮਂ.

੫੮. ਯਸ੍ਸੇਤੇ ਚ [ਯਸ੍ਸ ਏਤੇ (ਸੀ. ਪੀ.)] ਤਯੋ ਧਮ੍ਮਾ, ਵਾਨਰਿਨ੍ਦ ਯਥਾ ਤਵ;

ਦਕ੍ਖਿਯਂ ਸੂਰਿਯਂ ਪਞ੍ਞਾ, ਦਿਟ੍ਠਂ ਸੋ ਅਤਿਵਤ੍ਤਤੀਤਿ.

ਤਯੋਧਮ੍ਮਜਾਤਕਂ ਅਟ੍ਠਮਂ.

੫੯. ਧਮੇ ਧਮੇ ਨਾਤਿਧਮੇ, ਅਤਿਧਨ੍ਤਞ੍ਹਿ ਪਾਪਕਂ;

ਧਨ੍ਤੇਨ ਹਿ ਸਤਂ ਲਦ੍ਧਂ, ਅਤਿਧਨ੍ਤੇਨ ਨਾਸਿਤਨ੍ਤਿ.

ਭੇਰਿਵਾਦਕਜਾਤਕਂ ਨਵਮਂ.

੬੦. ਧਮੇ ਧਮੇ ਨਾਤਿਧਮੇ, ਅਤਿਧਨ੍ਤਞ੍ਹਿ ਪਾਪਕਂ;

ਧਨ੍ਤੇਨਾਧਿਗਤਾ ਭੋਗਾ, ਤੇ ਤਾਤੋ ਵਿਧਮੀ ਧਮਨ੍ਤਿ.

ਸਙ੍ਖਧਮਜਾਤਕਂ ਦਸਮਂ.

ਆਸੀਸਵਗ੍ਗੋ ਛਟ੍ਠੋ.

ਤਸ੍ਸੁਦ੍ਦਾਨਂ –

ਯਥਾ ਇਚ੍ਛਿਂ ਤਥਾਹੁਦਕਾ ਥਲਾ, ਸੁਰ ਸਾਦੁਫਲੋ ਚ ਅਲੀਨਮਨੋ;

ਸਮ੍ਪਹਟ੍ਠਮਨੋ ਚਤੁਰੋ ਚ ਤਯੋ, ਸਤਲਦ੍ਧਕ ਭੋਗਧਨੇਨ ਦਸਾਤਿ.