੫. ਅਤ੍ਥਕਾਮਵਗ੍ਗੋ

੪੧. ਯੋ ਅਤ੍ਥਕਾਮਸ੍ਸ ਹਿਤਾਨੁਕਮ੍ਪਿਨੋ, ਓਵਜ੍ਜਮਾਨੋ ਨ ਕਰੋਤਿ ਸਾਸਨਂ;

ਅਜਿਯਾ ਪਾਦਮੋਲਮ੍ਬ [ਪਾਦਮੋਲੁਮ੍ਬ (ਸੀ. ਸ੍ਯਾ. ਪੀ.)], ਮਿਤ੍ਤਕੋ ਵਿਯ ਸੋਚਤੀਤਿ.

ਲੋਸਕਜਾਤਕਂ ਪਠਮਂ.

੪੨. ਯੋ ਅਤ੍ਥਕਾਮਸ੍ਸ ਹਿਤਾਨੁਕਮ੍ਪਿਨੋ, ਓਵਜ੍ਜਮਾਨੋ ਨ ਕਰੋਤਿ ਸਾਸਨਂ;

ਕਪੋਤਕਸ੍ਸ ਵਚਨਂ ਅਕਤ੍ਵਾ, ਅਮਿਤ੍ਤਹਤ੍ਥਤ੍ਥਗਤੋਵ ਸੇਤੀਤਿ.

ਕਪੋਤਜਾਤਕਂ ਦੁਤਿਯਂ.

੪੩. ਯੋ ਅਤ੍ਥਕਾਮਸ੍ਸ ਹਿਤਾਨੁਕਮ੍ਪਿਨੋ, ਓਵਜ੍ਜਮਾਨੋ ਨ ਕਰੋਤਿ ਸਾਸਨਂ;

ਏਵਂ ਸੋ ਨਿਹਤੋ ਸੇਤਿ, ਵੇਲ਼ੁਕਸ੍ਸ ਯਥਾ ਪਿਤਾਤਿ.

ਵੇਲ਼ੁਕਜਾਤਕਂ ਤਤਿਯਂ.

੪੪. ਸੇਯ੍ਯੋ ਅਮਿਤ੍ਤੋ ਮਤਿਯਾ ਉਪੇਤੋ, ਨ ਤ੍ਵੇਵ ਮਿਤ੍ਤੋ ਮਤਿਵਿਪ੍ਪਹੀਨੋ;

ਮਕਸਂ ਵਧਿਸ੍ਸਨ੍ਤਿ ਹਿ ਏਲ਼ਮੂਗੋ, ਪੁਤ੍ਤੋ ਪਿਤੁ ਅਬ੍ਭਿਦਾ ਉਤ੍ਤਮਙ੍ਗਨ੍ਤਿ.

ਮਕਸਜਾਤਕਂ ਚਤੁਤ੍ਥਂ.

੪੫. ਸੇਯ੍ਯੋ ਅਮਿਤ੍ਤੋ ਮੇਧਾਵੀ, ਯਞ੍ਚੇ ਬਾਲਾਨੁਕਮ੍ਪਕੋ;

ਪਸ੍ਸ ਰੋਹਿਣਿਕਂ ਜਮ੍ਮਿਂ, ਮਾਤਰਂ ਹਨ੍ਤ੍ਵਾਨ ਸੋਚਤੀਤਿ.

ਰੋਹਿਣਿਜਾਤਕਂ ਪਞ੍ਚਮਂ.

੪੬. ਨ ਵੇ ਅਨਤ੍ਥਕੁਸਲੇਨ, ਅਤ੍ਥਚਰਿਯਾ ਸੁਖਾਵਹਾ;

ਹਾਪੇਤਿ ਅਤ੍ਥਂ ਦੁਮ੍ਮੇਧੋ, ਕਪਿ ਆਰਾਮਿਕੋ ਯਥਾਤਿ.

ਆਰਾਮਦੂਸਕਜਾਤਕਂ ਛਟ੍ਠਂ.

੪੭. ਨ ਵੇ ਅਨਤ੍ਥਕੁਸਲੇਨ, ਅਤ੍ਥਚਰਿਯਾ ਸੁਖਾਵਹਾ;

ਹਾਪੇਤਿ ਅਤ੍ਥਂ ਦੁਮ੍ਮੇਧੋ, ਕੋਣ੍ਡਞ੍ਞੋ ਵਾਰੁਣਿਂ ਯਥਾਤਿ.

ਵਾਰੁਣਿਦੂਸਕਜਾਤਕਂ ਸਤ੍ਤਮਂ.

੪੮. ਅਨੁਪਾਯੇਨ ਯੋ ਅਤ੍ਥਂ, ਇਚ੍ਛਤਿ ਸੋ ਵਿਹਞ੍ਞਤਿ;

ਚੇਤਾ ਹਨਿਂਸੁ ਵੇਦਬ੍ਬਂ [ਵੇਦਬ੍ਭਂ (ਸੀ. ਪੀ.)], ਸਬ੍ਬੇ ਤੇ ਬ੍ਯਸਨਮਜ੍ਝਗੂਤਿ.

ਵੇਦਬ੍ਬ [ਵੇਦਬ੍ਭ (ਸੀ. ਪੀ.)] ਜਾਤਕਂ ਅਟ੍ਠਮਂ.

੪੯. ਨਕ੍ਖਤ੍ਤਂ ਪਟਿਮਾਨੇਨ੍ਤਂ, ਅਤ੍ਥੋ ਬਾਲਂ ਉਪਚ੍ਚਗਾ;

ਅਤ੍ਥੋ ਅਤ੍ਥਸ੍ਸ ਨਕ੍ਖਤ੍ਤਂ, ਕਿਂ ਕਰਿਸ੍ਸਨ੍ਤਿ ਤਾਰਕਾਤਿ.

ਨਕ੍ਖਤ੍ਤਜਾਤਕਂ ਨਵਮਂ.

੫੦. ਦੁਮ੍ਮੇਧਾਨਂ ਸਹਸ੍ਸੇਨ, ਯਞ੍ਞੋ ਮੇ ਉਪਯਾਚਿਤੋ;

ਇਦਾਨਿ ਖੋਹਂ ਯਜਿਸ੍ਸਾਮਿ, ਬਹੁ [ਬਹੂ (ਸੀ. ਪੀ.), ਬਹੁਂ (ਕ.)] ਅਧਮ੍ਮਿਕੋ ਜਨੋਤਿ.

ਦੁਮ੍ਮੇਧਜਾਤਕਂ ਦਸਮਂ.

ਅਤ੍ਥਕਾਮਵਗ੍ਗੋ ਪਞ੍ਚਮੋ.

ਤਸ੍ਸੁਦ੍ਦਾਨਂ –

ਅਥ ਮਿਤ੍ਤਕ ਮਾਤੁ ਕਪੋਤਵਰੋ, ਤਥਾ ਵੇਲ਼ੂਕ ਏਲ਼ਮੂਗੋ ਰੋਹਿਣੀ;

ਕਪਿ ਵਾਰੁਣਿ ਚੇਤਚਰਾ ਚ ਪੁਨ, ਤਥਾ ਤਾਰਕ ਯਞ੍ਞਵਰੇਨ ਦਸਾਤਿ.

ਪਠਮੋ ਪਣ੍ਣਾਸਕੋ.