੧੩. ਕੁਸਨਾਲ਼ਿਵਗ੍ਗੋ

੧੨੧. ਕਰੇ ਸਰਿਕ੍ਖੋ ਅਥ ਵਾਪਿ ਸੇਟ੍ਠੋ, ਨਿਹੀਨਕੋ ਵਾਪਿ ਕਰੇਯ੍ਯ ਏਕੋ;

ਕਰੇਯ੍ਯੁਮੇਤੇ [ਕਰੇਯ੍ਯੁਂ ਤੇ (ਸੀ. ਪੀ.)] ਬ੍ਯਸਨੇ ਉਤ੍ਤਮਤ੍ਥਂ, ਯਥਾ ਅਹਂ ਕੁਸਨਾਲ਼ਿ ਰੁਚਾਯਨ੍ਤਿ.

ਕੁਸਨਾਲ਼ਿਜਾਤਕਂ ਪਠਮਂ.

੧੨੨. ਯਸਂ ਲਦ੍ਧਾਨ ਦੁਮ੍ਮੇਧੋ, ਅਨਤ੍ਥਂ ਚਰਤਿ ਅਤ੍ਤਨੋ;

ਅਤ੍ਤਨੋ ਚ ਪਰੇਸਞ੍ਚ, ਹਿਂਸਾਯ ਪਟਿਪਜ੍ਜਤੀਤਿ.

ਦੁਮ੍ਮੇਧਜਾਤਕਂ ਦੁਤਿਯਂ.

੧੨੩. ਅਸਬ੍ਬਤ੍ਥਗਾਮਿਂ ਵਾਚਂ, ਬਾਲੋ ਸਬ੍ਬਤ੍ਥ ਭਾਸਤਿ;

ਨਾਯਂ ਦਧਿਂ ਵੇਦਿ ਨ [ਨ ਵੇਦਿ (ਕ.)] ਨਙ੍ਗਲੀਸਂ, ਦਧਿਪ੍ਪਯਂ [ਦਧਿਮ੍ਪਯਂ (ਸੀ. ਪੀ.)] ਮਞ੍ਞਤਿ ਨਙ੍ਗਲੀਸਨ੍ਤਿ.

ਨਙ੍ਗਲੀਸਜਾਤਕਂ ਤਤਿਯਂ.

੧੨੪. ਵਾਯਮੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਵਾਯਾਮਸ੍ਸ ਫਲਂ ਪਸ੍ਸ, ਭੁਤ੍ਤਾ ਅਮ੍ਬਾ ਅਨੀਤਿਹਨ੍ਤਿ.

ਅਮ੍ਬਜਾਤਕਂ ਚਤੁਤ੍ਥਂ.

੧੨੫. ਬਹੁਮ੍ਪਿ ਸੋ ਵਿਕਤ੍ਥੇਯ੍ਯ, ਅਞ੍ਞਂ ਜਨਪਦਂ ਗਤੋ;

ਅਨ੍ਵਾਗਨ੍ਤ੍ਵਾਨ ਦੂਸੇਯ੍ਯ, ਭੁਞ੍ਜ ਭੋਗੇ ਕਟਾਹਕਾਤਿ.

ਕਟਾਹਕਜਾਤਕਂ ਪਞ੍ਚਮਂ.

੧੨੬. ਤਦੇਵੇਕਸ੍ਸ [ਤਥੇਵੇਕਸ੍ਸ (ਸੀ. ਸ੍ਯਾ. ਪੀ. ਅਟ੍ਠ. ਮੂਲਪਾਠੋ)] ਕਲ੍ਯਾਣਂ, ਤਦੇਵੇਕਸ੍ਸ ਪਾਪਕਂ;

ਤਸ੍ਮਾ ਸਬ੍ਬਂ ਨ ਕਲ੍ਯਾਣਂ, ਸਬ੍ਬਂ ਵਾਪਿ ਨ ਪਾਪਕਨ੍ਤਿ.

ਅਸਿਲਕ੍ਖਣਜਾਤਕਂ ਛਟ੍ਠਂ.

੧੨੭. ਤੇ ਦੇਸਾ ਤਾਨਿ ਵਤ੍ਥੂਨਿ, ਅਹਞ੍ਚ ਵਨਗੋਚਰੋ;

ਅਨੁਵਿਚ੍ਚ ਖੋ ਤਂ ਗਣ੍ਹੇਯ੍ਯੁਂ, ਪਿਵ [ਪਿਪ (ਸੀ. ਪੀ.)] ਖੀਰਂ ਕਲਣ੍ਡੁਕਾਤਿ.

ਕਲਣ੍ਡੁਕਜਾਤਕਂ ਸਤ੍ਤਮਂ.

੧੨੮. ਯੋ ਵੇ ਧਮ੍ਮਂ ਧਜਂ [ਧਮ੍ਮਧਜਂ (ਸ੍ਯਾ. ਪੀ. ਕ.)] ਕਤ੍ਵਾ, ਨਿਗੂਲ਼੍ਹੋ ਪਾਪਮਾਚਰੇ;

ਵਿਸ੍ਸਾਸਯਿਤ੍ਵਾ ਭੂਤਾਨਿ, ਬਿਲ਼ਾਰਂ ਨਾਮ ਤਂ ਵਤਨ੍ਤਿ.

ਬਿਲ਼ਾਰਵਤਜਾਤਕਂ ਅਟ੍ਠਮਂ.

੧੨੯. ਨਾਯਂ ਸਿਖਾ ਪੁਞ੍ਞਹੇਤੁ, ਘਾਸਹੇਤੁ ਅਯਂ ਸਿਖਾ;

ਨਾਙ੍ਗੁਟ੍ਠਗਣਨਂ ਯਾਤਿ, ਅਲਂ ਤੇ ਹੋਤੁ ਅਗ੍ਗਿਕਾਤਿ.

ਅਗ੍ਗਿਕਭਾਰਦ੍ਵਾਜਜਾਤਕਂ ਨਵਮਂ.

੧੩੦. ਯਥਾ ਵਾਚਾ ਚ ਭੁਞ੍ਜਸ੍ਸੁ, ਯਥਾ ਭੁਤ੍ਤਞ੍ਚ ਬ੍ਯਾਹਰ;

ਉਭਯਂ ਤੇ ਨ ਸਮੇਤਿ, ਵਾਚਾ ਭੁਤ੍ਤਞ੍ਚ ਕੋਸਿਯੇਤਿ.

ਕੋਸਿਯਜਾਤਕਂ ਦਸਮਂ.

ਕੁਸਨਾਲ਼ਿਵਗ੍ਗੋ [ਸਰਿਕ੍ਖਵਗ੍ਗੋ (ਕ.)] ਤੇਰਸਮੋ.

ਤਸ੍ਸੁਦ੍ਦਾਨਂ –

ਕੁਸਨਾਲ਼ਿਸਿਰਿਵ੍ਹਯਨੋ ਚ ਯਸਂ, ਦਧਿ ਮਮ੍ਬ ਕਟਾਹਕਪਞ੍ਚਮਕੋ;

ਅਥ ਪਾਪਕ ਖੀਰ ਬਿਲ਼ਾਰਵਤਂ, ਸਿਖਿ ਕੋਸਿਯਸਵ੍ਹਯਨੇਨ ਦਸਾਤਿ.