੧੪. ਅਸਮ੍ਪਦਾਨਵਗ੍ਗੋ

੧੩੧. ਅਸਮ੍ਪਦਾਨੇਨਿਤਰੀਤਰਸ੍ਸ, ਬਾਲਸ੍ਸ ਮਿਤ੍ਤਾਨਿ ਕਲੀ ਭਵਨ੍ਤਿ;

ਤਸ੍ਮਾ ਹਰਾਮਿ ਭੁਸਂ ਅਡ੍ਢਮਾਨਂ, ਮਾ ਮੇ ਮਿਤ੍ਤਿ ਜੀਯਿਤ੍ਥ ਸਸ੍ਸਤਾਯਨ੍ਤਿ.

ਅਸਮ੍ਪਦਾਨਜਾਤਕਂ ਪਠਮਂ.

੧੩੨. ਕੁਸਲੂਪਦੇਸੇ ਧਿਤਿਯਾ ਦਲ਼੍ਹਾਯ ਚ, ਅਨਿਵਤ੍ਤਿਤਤ੍ਤਾਭਯਭੀਰੁਤਾਯ [ਅਵਤ੍ਥਿਤਤ੍ਤਾਭਯਭੀਰੁਤਾਯ (ਸੀ. ਸ੍ਯਾ. ਪੀ.)] ਚ;

ਨ ਰਕ੍ਖਸੀਨਂ ਵਸਮਾਗਮਿਮ੍ਹਸੇ, ਸ ਸੋਤ੍ਥਿਭਾਵੋ ਮਹਤਾ ਭਯੇਨ ਮੇਤਿ.

ਭੀਰੁਕ [ਪਞ੍ਚਗਰੁਕ (ਸੀ. ਪੀ.), ਪਞ੍ਚਭੀਰੁਕ (ਸ੍ਯਾ.), ਅਭਯਭੀਰੁਤ§(?)] ਜਾਤਕਂ ਦੁਤਿਯਂ.

੧੩੩. ਖੇਮਂ ਯਹਿਂ ਤਤ੍ਥ ਅਰੀ ਉਦੀਰਿਤੋ [ਅਰਿ ਉਦ੍ਧਰਿਤੋ (ਕ.)], ਦਕਸ੍ਸ ਮਜ੍ਝੇ ਜਲਤੇ ਘਤਾਸਨੋ;

ਨ ਅਜ੍ਜ ਵਾਸੋ ਮਹਿਯਾ ਮਹੀਰੁਹੇ, ਦਿਸਾ ਭਜਵ੍ਹੋ ਸਰਣਾਜ੍ਜ ਨੋ ਭਯਨ੍ਤਿ.

ਘਤਾਸਨਜਾਤਕਂ ਤਤਿਯਂ.

੧੩੪. ਯੇ ਸਞ੍ਞਿਨੋ ਤੇਪਿ ਦੁਗ੍ਗਤਾ, ਯੇਪਿ ਅਸਞ੍ਞਿਨੋ ਤੇਪਿ ਦੁਗ੍ਗਤਾ;

ਏਤਂ ਉਭਯਂ ਵਿਵਜ੍ਜਯ, ਤਂ ਸਮਾਪਤ੍ਤਿਸੁਖਂ ਅਨਙ੍ਗਣਨ੍ਤਿ.

ਝਾਨਸੋਧਨਜਾਤਕਂ ਚਤੁਤ੍ਥਂ.

੧੩੫. ਚਨ੍ਦਾਭਂ ਸੂਰਿਯਾਭਞ੍ਚ, ਯੋਧ ਪਞ੍ਞਾਯ ਗਾਧਤਿ.

ਅਵਿਤਕ੍ਕੇਨ ਝਾਨੇਨ, ਹੋਤਿ ਆਭਸ੍ਸਰੂਪਗੋਤਿ.

ਚਨ੍ਦਾਭਜਾਤਕਂ ਪਞ੍ਚਮਂ.

੧੩੬. ਯਂ ਲਦ੍ਧਂ ਤੇਨ ਤੁਟ੍ਠਬ੍ਬਂ, ਅਤਿਲੋਭੋ ਹਿ ਪਾਪਕੋ;

ਹਂਸਰਾਜਂ ਗਹੇਤ੍ਵਾਨ, ਸੁਵਣ੍ਣਾ ਪਰਿਹਾਯਥਾਤਿ.

ਸੁਵਣ੍ਣਹਂਸਜਾਤਕਂ ਛਟ੍ਠਂ.

੧੩੭. ਯਤ੍ਥੇਕੋ ਲਭਤੇ ਬਬ੍ਬੁ, ਦੁਤਿਯੋ ਤਤ੍ਥ ਜਾਯਤਿ;

ਤਤਿਯੋ ਚ ਚਤੁਤ੍ਥੋ ਚ, ਇਦਂ ਤੇ ਬਬ੍ਬੁਕਾ ਬਿਲਨ੍ਤਿ.

ਬਬ੍ਬੁਜਾਤਕਂ ਸਤ੍ਤਮਂ.

੧੩੮. ਕਿਂ ਤੇ ਜਟਾਹਿ ਦੁਮ੍ਮੇਧ, ਕਿਂ ਤੇ ਅਜਿਨਸਾਟਿਯਾ;

ਅਬ੍ਭਨ੍ਤਰਂ ਤੇ ਗਹਨਂ, ਬਾਹਿਰਂ ਪਰਿਮਜ੍ਜਸੀਤਿ.

ਗੋਧਜਾਤਕਂ ਅਟ੍ਠਮਂ.

੧੩੯. ਅਕ੍ਖੀ ਭਿਨ੍ਨਾ ਪਟੋ ਨਟ੍ਠੋ, ਸਖਿਗੇਹੇ ਚ ਭਣ੍ਡਨਂ;

ਉਭਤੋ ਪਦੁਟ੍ਠਾ ਕਮ੍ਮਨ੍ਤਾ [ਪਦੁਟ੍ਠਕਮ੍ਮਨ੍ਤੋ (ਸੀ.), ਪਦੁਟ੍ਠੋ ਕਮ੍ਮਨ੍ਤੋ (ਪੀ.)], ਉਦਕਮ੍ਹਿ ਥਲਮ੍ਹਿ ਚਾਤਿ.

ਉਭਤੋਭਟ੍ਠਜਾਤਕਂ ਨਵਮਂ.

੧੪੦. ਨਿਚ੍ਚਂ ਉਬ੍ਬਿਗ੍ਗਹਦਯਾ, ਸਬ੍ਬਲੋਕਵਿਹੇਸਕਾ;

ਤਸ੍ਮਾ ਨੇਸਂ ਵਸਾ ਨਤ੍ਥਿ, ਕਾਕਾਨਮ੍ਹਾਕ [ਕਾਕਾਨਸ੍ਮਾਕ (ਸੀ. ਸ੍ਯਾ. ਪੀ.)] ਞਾਤਿਨਨ੍ਤਿ.

ਕਾਕਜਾਤਕਂ ਦਸਮਂ.

ਅਸਮ੍ਪਦਾਨਵਗ੍ਗੋ ਚੁਦ੍ਦਸਮੋ.

ਤਸ੍ਸੁਦ੍ਦਾਨਂ –

ਇਤਰੀਤਰ ਰਕ੍ਖਸਿ ਖੇਮਿਯੋ ਚ, ਪਰੋਸਤਪਞ੍ਹੇਨ ਆਭਸ੍ਸਰੋ ਪੁਨ;

ਅਥ ਹਂਸਵਰੁਤ੍ਤਮਬਬ੍ਬੁਜਟਂ, ਪਟਨਟ੍ਠਕ ਕਾਕਵਰੇਨ ਦਸਾਤਿ.