੧੨. ਹਂਚਿਵਗ੍ਗੋ

੧੧੧. ਹਂਚਿ [ਹਂਸਿ (ਸੀ. ਸ੍ਯਾ.), ਹਞ੍ਚਿ (?)] ਤੁਵਂ ਏਵਮਞ੍ਞਸਿ ਸੇਯ੍ਯੋ, ਪੁਤ੍ਤੇਨ ਪਿਤਾਤਿ ਰਾਜਸੇਟ੍ਠ;

ਹਨ੍ਦਸ੍ਸਤਰਸ੍ਸ ਤੇ ਅਯਂ, ਅਸ੍ਸਤਰਸ੍ਸ ਹਿ ਗਦ੍ਰਭੋ ਪਿਤਾਤਿ.

ਗਦ੍ਰਭਪਞ੍ਹਜਾਤਕਂ ਪਠਮਂ.

੧੧੨. ਯੇਨ ਸਤ੍ਤੁਬਿਲਙ੍ਗਾ ਚ, ਦਿਗੁਣਪਲਾਸੋ ਚ ਪੁਪ੍ਫਿਤੋ;

ਯੇਨ ਦਦਾਮਿ [ਯੇਨਾ’ਦਾਮਿ (ਸੀ. ਸ੍ਯਾ.)] ਤੇਨ ਵਦਾਮਿ, ਯੇਨ ਨ ਦਦਾਮਿ [ਯੇਨ ਨਾ’ਦਾਮਿ (ਸੀ. ਸ੍ਯਾ.)] ਨ ਤੇਨ ਵਦਾਮਿ;

ਏਸ ਮਗ੍ਗੋ ਯਵਮਜ੍ਝਕਸ੍ਸ, ਏਤਂ ਛਨ੍ਨਪਥਂ ਵਿਜਾਨਾਹੀਤਿ.

ਅਮਰਾਦੇਵੀਪਞ੍ਹਜਾਤਕਂ ਦੁਤਿਯਂ.

੧੧੩. ਸਦ੍ਦਹਾਸਿ ਸਿਙ੍ਗਾਲਸ੍ਸ [ਸਿਗਾਲਸ੍ਸ (ਸੀ. ਸ੍ਯਾ. ਪੀ.)], ਸੁਰਾਪੀਤਸ੍ਸ ਬ੍ਰਾਹ੍ਮਣ;

ਸਿਪ੍ਪਿਕਾਨਂ ਸਤਂ ਨਤ੍ਥਿ, ਕੁਤੋ ਕਂਸਸਤਾ ਦੁਵੇਤਿ.

ਸਿਙ੍ਗਾਲਜਾਤਕਂ ਤਤਿਯਂ.

੧੧੪. ਬਹੁਚਿਨ੍ਤੀ ਅਪ੍ਪਚਿਨ੍ਤੀ, ਉਭੋ ਜਾਲੇ ਅਬਜ੍ਝਰੇ;

ਮਿਤਚਿਨ੍ਤੀ ਪਮੋਚੇਸੀ, ਉਭੋ ਤਤ੍ਥ ਸਮਾਗਤਾਤਿ.

ਮਿਤਚਿਨ੍ਤਿਜਾਤਕਂ ਚਤੁਤ੍ਥਂ.

੧੧੫. ਯਾਯਞ੍ਞ [ਯਾਯਞ੍ਞੇ (ਕ.)] ਮਨੁਸਾਸਤਿ, ਸਯਂ ਲੋਲੁਪ੍ਪਚਾਰਿਨੀ;

ਸਾਯਂ ਵਿਪਕ੍ਖਿਕਾ ਸੇਤਿ, ਹਤਾ ਚਕ੍ਕੇਨ ਸਾਸਿਕਾਤਿ [ਸਾਲਿਕਾਤਿ (ਸੀ. ਸ੍ਯਾ. ਪੀ.)].

ਅਨੁਸਾਸਿਕਜਾਤਕਂ ਪਞ੍ਚਮਂ.

੧੧੬. ਅਤਿਕਰਮਕਰਾਚਰਿਯ, ਮਯ੍ਹਮ੍ਪੇਤਂ ਨ ਰੁਚ੍ਚਤਿ;

ਚਤੁਤ੍ਥੇ ਲਙ੍ਘਯਿਤ੍ਵਾਨ, ਪਞ੍ਚਮਾਯਸਿ ਆਵੁਤੋਤਿ.

ਦੁਬ੍ਬਚਜਾਤਕਂ ਛਟ੍ਠਂ.

੧੧੭. ਅਚ੍ਚੁਗ੍ਗਤਾਤਿਲਪਤਾ [ਅਤਿਬਲਤਾ (ਸੀ. ਸ੍ਯਾ. ਪੀ.), ਅਤਿਲਪਕਾ (ਕਤ੍ਥਚਿ)], ਅਤਿਵੇਲਂ ਪਭਾਸਿਤਾ;

ਵਾਚਾ ਹਨਤਿ ਦੁਮ੍ਮੇਧਂ, ਤਿਤ੍ਤਿਰਂਵਾਤਿਵਸ੍ਸਿਤਨ੍ਤਿ.

ਤਿਤ੍ਤਿਰਜਾਤਕਂ ਸਤ੍ਤਮਂ.

੧੧੮. ਨਾਚਿਨ੍ਤਯਨ੍ਤੋ ਪੁਰਿਸੋ, ਵਿਸੇਸਮਧਿਗਚ੍ਛਤਿ;

ਚਿਨ੍ਤਿਤਸ੍ਸ ਫਲਂ ਪਸ੍ਸ, ਮੁਤ੍ਤੋਸ੍ਮਿ ਵਧਬਨ੍ਧਨਾਤਿ.

ਵਟ੍ਟਕਜਾਤਕਂ ਅਟ੍ਠਮਂ.

੧੧੯. ਅਮਾਤਾਪਿਤਰਸਂਵਦ੍ਧੋ [ਪਿਤਰਿ (ਸੀ. ਪੀ.), ਪਿਤੁ (ਸ੍ਯਾ.)], ਅਨਾਚੇਰਕੁਲੇ ਵਸਂ;

ਨਾਯਂ ਕਾਲਂ ਅਕਾਲਂ ਵਾ, ਅਭਿਜਾਨਾਤਿ ਕੁਕ੍ਕੁਟੋਤਿ.

ਅਕਾਲਰਾਵਿਜਾਤਕਂ ਨਵਮਂ.

੧੨੦. ਅਬਦ੍ਧਾ ਤਤ੍ਥ ਬਜ੍ਝਨ੍ਤਿ, ਯਤ੍ਥ ਬਾਲਾ ਪਭਾਸਰੇ;

ਬਦ੍ਧਾਪਿ ਤਤ੍ਥ ਮੁਚ੍ਚਨ੍ਤਿ, ਯਤ੍ਥ ਧੀਰਾ ਪਭਾਸਰੇਤਿ.

ਬਨ੍ਧਨਮੋਕ੍ਖਜਾਤਕਂ ਦਸਮਂ.

ਹਂਚਿਵਗ੍ਗੋ [ਹਂਸਿਵਗ੍ਗੋ (ਸੀ. ਸ੍ਯਾ.)] ਦ੍ਵਾਦਸਮੋ.

ਤਸ੍ਸੁਦ੍ਦਾਨਂ –

ਅਥ ਗਦ੍ਰਭ ਸਤ੍ਤੁਵ ਕਂਸਸਤਂ, ਬਹੁਚਿਨ੍ਤਿ ਸਾਸਿਕਾਯਾਤਿਕਰ;

ਅਤਿਵੇਲ ਵਿਸੇਸਮਨਾਚਰਿਯੋਵ, ਧੀਰਾਪਭਾਸਰਤੇਨ ਦਸਾਤਿ.