੬. ਕਾਮੂਪਪਤ੍ਤਿਸੁਤ੍ਤਂ

੯੫. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਤਿਸ੍ਸੋ ਇਮਾ, ਭਿਕ੍ਖਵੇ, ਕਾਮੂਪਪਤ੍ਤਿਯੋ [ਕਾਮੁਪ੍ਪਤ੍ਤਿਯੋ (ਸੀ.)]. ਕਤਮਾ ਤਿਸ੍ਸੋ? ਪਚ੍ਚੁਪਟ੍ਠਿਤਕਾਮਾ, ਨਿਮ੍ਮਾਨਰਤਿਨੋ, ਪਰਨਿਮ੍ਮਿਤਵਸਵਤ੍ਤਿਨੋ – ਇਮਾ ਖੋ, ਭਿਕ੍ਖਵੇ, ਤਿਸ੍ਸੋ ਕਾਮੂਪਪਤ੍ਤਿਯੋ’’ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਪਚ੍ਚੁਪਟ੍ਠਿਤਕਾਮਾ ਚ, ਯੇ ਦੇਵਾ ਵਸਵਤ੍ਤਿਨੋ;

ਨਿਮ੍ਮਾਨਰਤਿਨੋ ਦੇਵਾ, ਯੇ ਚਞ੍ਞੇ ਕਾਮਭੋਗਿਨੋ;

ਇਤ੍ਥਭਾਵਞ੍ਞਥਾਭਾਵਂ, ਸਂਸਾਰਂ ਨਾਤਿਵਤ੍ਤਰੇ.

‘‘ਏਤਮਾਦੀਨਵਂ ਞਤ੍ਵਾ, ਕਾਮਭੋਗੇਸੁ ਪਣ੍ਡਿਤੋ;

ਸਬ੍ਬੇ ਪਰਿਚ੍ਚਜੇ ਕਾਮੇ, ਯੇ ਦਿਬ੍ਬਾ ਯੇ ਚ ਮਾਨੁਸਾ.

‘‘ਪਿਯਰੂਪਸਾਤਗਧਿਤਂ, ਛੇਤ੍ਵਾ ਸੋਤਂ ਦੁਰਚ੍ਚਯਂ;

ਅਸੇਸਂ ਪਰਿਨਿਬ੍ਬਨ੍ਤਿ, ਅਸੇਸਂ ਦੁਕ੍ਖਮਚ੍ਚਗੁਂ.

‘‘ਅਰਿਯਦ੍ਦਸਾ ਵੇਦਗੁਨੋ, ਸਮ੍ਮਦਞ੍ਞਾਯ ਪਣ੍ਡਿਤਾ;

ਜਾਤਿਕ੍ਖਯਮਭਿਞ੍ਞਾਯ, ਨਾਗਚ੍ਛਨ੍ਤਿ ਪੁਨਬ੍ਭਵ’’ਨ੍ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਛਟ੍ਠਂ.