੩. ਤਪਨੀਯਸੁਤ੍ਤਂ

੩੦. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਦ੍ਵੇਮੇ, ਭਿਕ੍ਖਵੇ, ਧਮ੍ਮਾ ਤਪਨੀਯਾ. ਕਤਮੇ ਦ੍ਵੇ? ਇਧ, ਭਿਕ੍ਖਵੇ, ਏਕਚ੍ਚੋ ਅਕਤਕਲ੍ਯਾਣੋ ਹੋਤਿ, ਅਕਤਕੁਸਲੋ, ਅਕਤਭੀਰੁਤ੍ਤਾਣੋ, ਕਤਪਾਪੋ, ਕਤਲੁਦ੍ਦੋ, ਕਤਕਿਬ੍ਬਿਸੋ. ਸੋ ‘ਅਕਤਂ ਮੇ ਕਲ੍ਯਾਣ’ਨ੍ਤਿਪਿ ਤਪ੍ਪਤਿ, ‘ਕਤਂ ਮੇ ਪਾਪ’ਨ੍ਤਿਪਿ ਤਪ੍ਪਤਿ. ਇਮੇ ਖੋ, ਭਿਕ੍ਖਵੇ, ਦ੍ਵੇ ਧਮ੍ਮਾ ਤਪਨੀਯਾ’’ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਕਾਯਦੁਚ੍ਚਰਿਤਂ ਕਤ੍ਵਾ, ਵਚੀਦੁਚ੍ਚਰਿਤਾਨਿ ਚ;

ਮਨੋਦੁਚ੍ਚਰਿਤਂ ਕਤ੍ਵਾ, ਯਞ੍ਚਞ੍ਞਂ ਦੋਸਸਞ੍ਹਿਤਂ.

‘‘ਅਕਤ੍ਵਾ ਕੁਸਲਂ ਕਮ੍ਮਂ, ਕਤ੍ਵਾਨਾਕੁਸਲਂ ਬਹੁਂ;

ਕਾਯਸ੍ਸ ਭੇਦਾ ਦੁਪ੍ਪਞ੍ਞੋ, ਨਿਰਯਂ ਸੋਪਪਜ੍ਜਤੀ’’ਤਿ [ਨਿਰਯਂ ਸੋ ਉਪਪਜ੍ਜਤੀਤਿ (ਸੀ. ਸ੍ਯਾ. ਕਂ. ਪੀ.)].

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਤਤਿਯਂ.