੨੪. ਤਣ੍ਹਾਵਗ੍ਗੋ

੩੩੪. ਮਨੁਜਸ੍ਸ ਪਮਤ੍ਤਚਾਰਿਨੋ, ਤਣ੍ਹਾ ਵਡ੍ਢਤਿ ਮਾਲੁਵਾ ਵਿਯ;

ਸੋ ਪ੍ਲਵਤੀ [ਪ੍ਲਵਤਿ (ਸੀ. ਪੀ.), ਪਲਵੇਤੀ (ਕ.), ਉਪ੍ਲਵਤਿ (?)] ਹੁਰਾ ਹੁਰਂ, ਫਲਮਿਚ੍ਛਂਵ ਵਨਸ੍ਮਿ ਵਾਨਰੋ.

੩੩੫. ਯਂ ਏਸਾ ਸਹਤੇ ਜਮ੍ਮੀ, ਤਣ੍ਹਾ ਲੋਕੇ ਵਿਸਤ੍ਤਿਕਾ;

ਸੋਕਾ ਤਸ੍ਸ ਪਵਡ੍ਢਨ੍ਤਿ, ਅਭਿਵਟ੍ਠਂਵ [ਅਭਿਵਡ੍ਢਂਵ (ਸ੍ਯਾ.), ਅਭਿਵਟ੍ਟਂਵ (ਪੀ.), ਅਭਿਵੁਡ੍ਢਂਵ (ਕ.)] ਬੀਰਣਂ.

੩੩੬. ਯੋ ਚੇਤਂ ਸਹਤੇ ਜਮ੍ਮਿਂ, ਤਣ੍ਹਂ ਲੋਕੇ ਦੁਰਚ੍ਚਯਂ;

ਸੋਕਾ ਤਮ੍ਹਾ ਪਪਤਨ੍ਤਿ, ਉਦਬਿਨ੍ਦੁਵ ਪੋਕ੍ਖਰਾ.

੩੩੭. ਤਂ ਵੋ ਵਦਾਮਿ ਭਦ੍ਦਂ ਵੋ, ਯਾਵਨ੍ਤੇਤ੍ਥ ਸਮਾਗਤਾ;

ਤਣ੍ਹਾਯ ਮੂਲਂ ਖਣਥ, ਉਸੀਰਤ੍ਥੋਵ ਬੀਰਣਂ;

ਮਾ ਵੋ ਨਲ਼ਂਵ ਸੋਤੋਵ, ਮਾਰੋ ਭਞ੍ਜਿ ਪੁਨਪ੍ਪੁਨਂ.

੩੩੮. ਯਥਾਪਿ ਮੂਲੇ ਅਨੁਪਦ੍ਦਵੇ ਦਲ਼੍ਹੇ, ਛਿਨ੍ਨੋਪਿ ਰੁਕ੍ਖੋ ਪੁਨਰੇਵ ਰੂਹਤਿ;

ਏਵਮ੍ਪਿ ਤਣ੍ਹਾਨੁਸਯੇ ਅਨੂਹਤੇ, ਨਿਬ੍ਬਤ੍ਤਤੀ ਦੁਕ੍ਖਮਿਦਂ ਪੁਨਪ੍ਪੁਨਂ.

੩੩੯. ਯਸ੍ਸ ਛਤ੍ਤਿਂਸਤਿ ਸੋਤਾ, ਮਨਾਪਸਵਨਾ ਭੁਸਾ;

ਮਾਹਾ [ਵਾਹਾ (ਸੀ. ਸ੍ਯਾ. ਪੀ.)] ਵਹਨ੍ਤਿ ਦੁਦ੍ਦਿਟ੍ਠਿਂ, ਸਙ੍ਕਪ੍ਪਾ ਰਾਗਨਿਸ੍ਸਿਤਾ.

੩੪੦. ਸਵਨ੍ਤਿ ਸਬ੍ਬਧਿ ਸੋਤਾ, ਲਤਾ ਉਪ੍ਪਜ੍ਜ [ਉਬ੍ਭਿਜ੍ਜ (ਸੀ. ਸ੍ਯਾ. ਕਂ. ਪੀ.)] ਤਿਟ੍ਠਤਿ;

ਤਞ੍ਚ ਦਿਸ੍ਵਾ ਲਤਂ ਜਾਤਂ, ਮੂਲਂ ਪਞ੍ਞਾਯ ਛਿਨ੍ਦਥ.

੩੪੧. ਸਰਿਤਾਨਿ ਸਿਨੇਹਿਤਾਨਿ ਚ, ਸੋਮਨਸ੍ਸਾਨਿ ਭਵਨ੍ਤਿ ਜਨ੍ਤੁਨੋ;

ਤੇ ਸਾਤਸਿਤਾ ਸੁਖੇਸਿਨੋ, ਤੇ ਵੇ ਜਾਤਿਜਰੂਪਗਾ ਨਰਾ.

੩੪੨. ਤਸਿਣਾਯ ਪੁਰਕ੍ਖਤਾ ਪਜਾ, ਪਰਿਸਪ੍ਪਨ੍ਤਿ ਸਸੋਵ ਬਨ੍ਧਿਤੋ [ਬਾਧਿਤੋ (ਬਹੂਸੁ)];

ਸਂਯੋਜਨਸਙ੍ਗਸਤ੍ਤਕਾ, ਦੁਕ੍ਖਮੁਪੇਨ੍ਤਿ ਪੁਨਪ੍ਪੁਨਂ ਚਿਰਾਯ.

੩੪੩. ਤਸਿਣਾਯ ਪੁਰਕ੍ਖਤਾ ਪਜਾ, ਪਰਿਸਪ੍ਪਨ੍ਤਿ ਸਸੋਵ ਬਨ੍ਧਿਤੋ;

ਤਸ੍ਮਾ ਤਸਿਣਂ ਵਿਨੋਦਯੇ, ਆਕਙ੍ਖਨ੍ਤ [ਭਿਕ੍ਖੂ ਆਕਙ੍ਖੀ (ਸੀ.), ਭਿਕ੍ਖੁ ਆਕਙ੍ਖਂ (ਸ੍ਯਾ.)] ਵਿਰਾਗਮਤ੍ਤਨੋ.

੩੪੪. ਯੋ ਨਿਬ੍ਬਨਥੋ ਵਨਾਧਿਮੁਤ੍ਤੋ, ਵਨਮੁਤ੍ਤੋ ਵਨਮੇਵ ਧਾਵਤਿ;

ਤਂ ਪੁਗ੍ਗਲਮੇਥ ਪਸ੍ਸਥ, ਮੁਤ੍ਤੋ ਬਨ੍ਧਨਮੇਵ ਧਾਵਤਿ.

੩੪੫. ਨ ਤਂ ਦਲ਼੍ਹਂ ਬਨ੍ਧਨਮਾਹੁ ਧੀਰਾ, ਯਦਾਯਸਂ ਦਾਰੁਜਪਬ੍ਬਜਞ੍ਚ [ਦਾਰੂਜਂ ਬਬ੍ਬਜਞ੍ਚ (ਸੀ. ਪੀ.)];

ਸਾਰਤ੍ਤਰਤ੍ਤਾ ਮਣਿਕੁਣ੍ਡਲੇਸੁ, ਪੁਤ੍ਤੇਸੁ ਦਾਰੇਸੁ ਚ ਯਾ ਅਪੇਕ੍ਖਾ.

੩੪੬. ਏਤਂ ਦਲ਼੍ਹਂ ਬਨ੍ਧਨਮਾਹੁ ਧੀਰਾ, ਓਹਾਰਿਨਂ ਸਿਥਿਲਂ ਦੁਪ੍ਪਮੁਞ੍ਚਂ;

ਏਤਮ੍ਪਿ ਛੇਤ੍ਵਾਨ ਪਰਿਬ੍ਬਜਨ੍ਤਿ, ਅਨਪੇਕ੍ਖਿਨੋ ਕਾਮਸੁਖਂ ਪਹਾਯ.

੩੪੭. ਯੇ ਰਾਗਰਤ੍ਤਾਨੁਪਤਨ੍ਤਿ ਸੋਤਂ, ਸਯਂਕਤਂ ਮਕ੍ਕਟਕੋਵ ਜਾਲਂ;

ਏਤਮ੍ਪਿ ਛੇਤ੍ਵਾਨ ਵਜਨ੍ਤਿ ਧੀਰਾ, ਅਨਪੇਕ੍ਖਿਨੋ ਸਬ੍ਬਦੁਕ੍ਖਂ ਪਹਾਯ.

੩੪੮. ਮੁਞ੍ਚ ਪੁਰੇ ਮੁਞ੍ਚ ਪਚ੍ਛਤੋ, ਮਜ੍ਝੇ ਮੁਞ੍ਚ ਭਵਸ੍ਸ ਪਾਰਗੂ;

ਸਬ੍ਬਤ੍ਥ ਵਿਮੁਤ੍ਤਮਾਨਸੋ, ਨ ਪੁਨਂ ਜਾਤਿਜਰਂ ਉਪੇਹਿਸਿ.

੩੪੯. ਵਿਤਕ੍ਕਮਥਿਤਸ੍ਸ ਜਨ੍ਤੁਨੋ, ਤਿਬ੍ਬਰਾਗਸ੍ਸ ਸੁਭਾਨੁਪਸ੍ਸਿਨੋ;

ਭਿਯ੍ਯੋ ਤਣ੍ਹਾ ਪਵਡ੍ਢਤਿ, ਏਸ ਖੋ ਦਲ਼੍ਹਂ [ਏਸ ਗਾਲ਼੍ਹਂ (ਕ.)] ਕਰੋਤਿ ਬਨ੍ਧਨਂ.

੩੫੦. ਵਿਤਕ੍ਕੂਪਸਮੇ ਚ [ਵਿਤਕ੍ਕੂਪਸਮੇਵ (ਕ.)] ਯੋ ਰਤੋ, ਅਸੁਭਂ ਭਾਵਯਤੇ ਸਦਾ ਸਤੋ;

ਏਸ [ਏਸੋ (?)] ਖੋ ਬ੍ਯਨ੍ਤਿ ਕਾਹਿਤਿ, ਏਸ [ਏਸੋ (?)] ਛੇਚ੍ਛਤਿ ਮਾਰਬਨ੍ਧਨਂ.

੩੫੧. ਨਿਟ੍ਠਙ੍ਗਤੋ ਅਸਨ੍ਤਾਸੀ, ਵੀਤਤਣ੍ਹੋ ਅਨਙ੍ਗਣੋ;

ਅਚ੍ਛਿਨ੍ਦਿ ਭਵਸਲ੍ਲਾਨਿ, ਅਨ੍ਤਿਮੋਯਂ ਸਮੁਸ੍ਸਯੋ.

੩੫੨. ਵੀਤਤਣ੍ਹੋ ਅਨਾਦਾਨੋ, ਨਿਰੁਤ੍ਤਿਪਦਕੋਵਿਦੋ;

ਅਕ੍ਖਰਾਨਂ ਸਨ੍ਨਿਪਾਤਂ, ਜਞ੍ਞਾ ਪੁਬ੍ਬਾਪਰਾਨਿ ਚ;

ਸ ਵੇ ‘‘ਅਨ੍ਤਿਮਸਾਰੀਰੋ, ਮਹਾਪਞ੍ਞੋ ਮਹਾਪੁਰਿਸੋ’’ਤਿ ਵੁਚ੍ਚਤਿ.

੩੫੩. ਸਬ੍ਬਾਭਿਭੂ ਸਬ੍ਬਵਿਦੂਹਮਸ੍ਮਿ, ਸਬ੍ਬੇਸੁ ਧਮ੍ਮੇਸੁ ਅਨੂਪਲਿਤ੍ਤੋ;

ਸਬ੍ਬਞ੍ਜਹੋ ਤਣ੍ਹਕ੍ਖਯੇ ਵਿਮੁਤ੍ਤੋ, ਸਯਂ ਅਭਿਞ੍ਞਾਯ ਕਮੁਦ੍ਦਿਸੇਯ੍ਯਂ.

੩੫੪. ਸਬ੍ਬਦਾਨਂ ਧਮ੍ਮਦਾਨਂ ਜਿਨਾਤਿ, ਸਬ੍ਬਰਸਂ ਧਮ੍ਮਰਸੋ ਜਿਨਾਤਿ;

ਸਬ੍ਬਰਤਿਂ ਧਮ੍ਮਰਤਿ ਜਿਨਾਤਿ, ਤਣ੍ਹਕ੍ਖਯੋ ਸਬ੍ਬਦੁਕ੍ਖਂ ਜਿਨਾਤਿ.

੩੫੫. ਹਨਨ੍ਤਿ ਭੋਗਾ ਦੁਮ੍ਮੇਧਂ, ਨੋ ਚ ਪਾਰਗਵੇਸਿਨੋ;

ਭੋਗਤਣ੍ਹਾਯ ਦੁਮ੍ਮੇਧੋ, ਹਨ੍ਤਿ ਅਞ੍ਞੇਵ ਅਤ੍ਤਨਂ.

੩੫੬. ਤਿਣਦੋਸਾਨਿ ਖੇਤ੍ਤਾਨਿ, ਰਾਗਦੋਸਾ ਅਯਂ ਪਜਾ;

ਤਸ੍ਮਾ ਹਿ ਵੀਤਰਾਗੇਸੁ, ਦਿਨ੍ਨਂ ਹੋਤਿ ਮਹਪ੍ਫਲਂ.

੩੫੭. ਤਿਣਦੋਸਾਨਿ ਖੇਤ੍ਤਾਨਿ, ਦੋਸਦੋਸਾ ਅਯਂ ਪਜਾ;

ਤਸ੍ਮਾ ਹਿ ਵੀਤਦੋਸੇਸੁ, ਦਿਨ੍ਨਂ ਹੋਤਿ ਮਹਪ੍ਫਲਂ.

੩੫੮. ਤਿਣਦੋਸਾਨਿ ਖੇਤ੍ਤਾਨਿ, ਮੋਹਦੋਸਾ ਅਯਂ ਪਜਾ;

ਤਸ੍ਮਾ ਹਿ ਵੀਤਮੋਹੇਸੁ, ਦਿਨ੍ਨਂ ਹੋਤਿ ਮਹਪ੍ਫਲਂ.

੩੫੯. (ਤਿਣਦੋਸਾਨਿ ਖੇਤ੍ਤਾਨਿ, ਇਚ੍ਛਾਦੋਸਾ ਅਯਂ ਪਜਾ;

ਤਸ੍ਮਾ ਹਿ ਵਿਗਤਿਚ੍ਛੇਸੁ, ਦਿਨ੍ਨਂ ਹੋਤਿ ਮਹਪ੍ਫਲਂ.) [( ) ਵਿਦੇਸਪੋਤ੍ਥਕੇਸੁ ਨਤ੍ਥਿ, ਅਟ੍ਠਕਥਾਯਮ੍ਪਿ ਨ ਦਿਸ੍ਸਤਿ]

ਤਿਣਦੋਸਾਨਿ ਖੇਤ੍ਤਾਨਿ, ਤਣ੍ਹਾਦੋਸਾ ਅਯਂ ਪਜਾ;

ਤਸ੍ਮਾ ਹਿ ਵੀਤਤਣ੍ਹੇਸੁ, ਦਿਨ੍ਨਂ ਹੋਤਿ ਮਹਪ੍ਫਲਂ.

ਤਣ੍ਹਾਵਗ੍ਗੋ ਚਤੁਵੀਸਤਿਮੋ ਨਿਟ੍ਠਿਤੋ.