੨੫. ਭਿਕ੍ਖੁਵਗ੍ਗੋ
੩੬੦. ਚਕ੍ਖੁਨਾ ਸਂਵਰੋ ਸਾਧੁ, ਸਾਧੁ ਸੋਤੇਨ ਸਂਵਰੋ;
ਘਾਨੇਨ ਸਂਵਰੋ ਸਾਧੁ, ਸਾਧੁ ਜਿਵ੍ਹਾਯ ਸਂਵਰੋ.
੩੬੧. ਕਾਯੇਨ ਸਂਵਰੋ ਸਾਧੁ, ਸਾਧੁ ਵਾਚਾਯ ਸਂਵਰੋ;
ਮਨਸਾ ਸਂਵਰੋ ਸਾਧੁ, ਸਾਧੁ ਸਬ੍ਬਤ੍ਥ ਸਂਵਰੋ;
ਸਬ੍ਬਤ੍ਥ ਸਂਵੁਤੋ ਭਿਕ੍ਖੁ, ਸਬ੍ਬਦੁਕ੍ਖਾ ਪਮੁਚ੍ਚਤਿ.
੩੬੨. ਹਤ੍ਥਸਂਯਤੋ ਪਾਦਸਂਯਤੋ, ਵਾਚਾਸਂਯਤੋ ਸਂਯਤੁਤ੍ਤਮੋ;
ਅਜ੍ਝਤ੍ਤਰਤੋ ਸਮਾਹਿਤੋ, ਏਕੋ ਸਨ੍ਤੁਸਿਤੋ ਤਮਾਹੁ ਭਿਕ੍ਖੁਂ.
੩੬੩. ਯੋ ਮੁਖਸਂਯਤੋ ਭਿਕ੍ਖੁ, ਮਨ੍ਤਭਾਣੀ ਅਨੁਦ੍ਧਤੋ;
ਅਤ੍ਥਂ ਧਮ੍ਮਞ੍ਚ ਦੀਪੇਤਿ, ਮਧੁਰਂ ਤਸ੍ਸ ਭਾਸਿਤਂ.
੩੬੪. ਧਮ੍ਮਾਰਾਮੋ ਧਮ੍ਮਰਤੋ, ਧਮ੍ਮਂ ਅਨੁਵਿਚਿਨ੍ਤਯਂ;
ਧਮ੍ਮਂ ਅਨੁਸ੍ਸਰਂ ਭਿਕ੍ਖੁ, ਸਦ੍ਧਮ੍ਮਾ ਨ ਪਰਿਹਾਯਤਿ.
੩੬੫. ਸਲਾਭਂ ਨਾਤਿਮਞ੍ਞੇਯ੍ਯ, ਨਾਞ੍ਞੇਸਂ ਪਿਹਯਂ ਚਰੇ;
ਅਞ੍ਞੇਸਂ ਪਿਹਯਂ ਭਿਕ੍ਖੁ, ਸਮਾਧਿਂ ਨਾਧਿਗਚ੍ਛਤਿ.
੩੬੬. ਅਪ੍ਪਲਾਭੋਪਿ ਚੇ ਭਿਕ੍ਖੁ, ਸਲਾਭਂ ਨਾਤਿਮਞ੍ਞਤਿ;
ਤਂ ਵੇ ਦੇਵਾ ਪਸਂਸਨ੍ਤਿ, ਸੁਦ੍ਧਾਜੀਵਿਂ ਅਤਨ੍ਦਿਤਂ.
੩੬੭. ਸਬ੍ਬਸੋ ਨਾਮਰੂਪਸ੍ਮਿਂ, ਯਸ੍ਸ ਨਤ੍ਥਿ ਮਮਾਯਿਤਂ;
ਅਸਤਾ ਚ ਨ ਸੋਚਤਿ, ਸ ਵੇ ‘‘ਭਿਕ੍ਖੂ’’ਤਿ ਵੁਚ੍ਚਤਿ.
੩੬੮. ਮੇਤ੍ਤਾਵਿਹਾਰੀ ਯੋ ਭਿਕ੍ਖੁ, ਪਸਨ੍ਨੋ ਬੁਦ੍ਧਸਾਸਨੇ;
ਅਧਿਗਚ੍ਛੇ ਪਦਂ ਸਨ੍ਤਂ, ਸਙ੍ਖਾਰੂਪਸਮਂ ਸੁਖਂ.
੩੬੯. ਸਿਞ੍ਚ ਭਿਕ੍ਖੁ ਇਮਂ ਨਾਵਂ, ਸਿਤ੍ਤਾ ਤੇ ਲਹੁਮੇਸ੍ਸਤਿ;
ਛੇਤ੍ਵਾ ਰਾਗਞ੍ਚ ਦੋਸਞ੍ਚ, ਤਤੋ ਨਿਬ੍ਬਾਨਮੇਹਿਸਿ.
੩੭੦. ਪਞ੍ਚ ਛਿਨ੍ਦੇ ਪਞ੍ਚ ਜਹੇ, ਪਞ੍ਚ ਚੁਤ੍ਤਰਿ ਭਾਵਯੇ;
ਪਞ੍ਚ ਸਙ੍ਗਾਤਿਗੋ ਭਿਕ੍ਖੁ, ‘‘ਓਘਤਿਣ੍ਣੋ’’ਤਿ ਵੁਚ੍ਚਤਿ.
੩੭੧. ਝਾਯ ਭਿਕ੍ਖੁ [ਝਾਯ ਤੁਵਂ ਭਿਕ੍ਖੁ (?)] ਮਾ ਪਮਾਦੋ [ਮਾ ਚ ਪਮਾਦੋ (ਸੀ. ਸ੍ਯਾ. ਪੀ.)], ਮਾ ਤੇ ਕਾਮਗੁਣੇ ਰਮੇਸ੍ਸੁ [ਭਮਸ੍ਸੁ (ਸੀ. ਪੀ.), ਭਵਸ੍ਸੁ (ਸ੍ਯਾ.), ਰਮਸ੍ਸੁ (ਕ.)] ਚਿਤ੍ਤਂ;
ਮਾ ਲੋਹਗੁਲ਼ਂ ਗਿਲੀ ਪਮਤ੍ਤੋ, ਮਾ ਕਨ੍ਦਿ ‘‘ਦੁਕ੍ਖਮਿਦ’’ਨ੍ਤਿ ਡਯ੍ਹਮਾਨੋ.
੩੭੨. ਨਤ੍ਥਿ ਝਾਨਂ ਅਪਞ੍ਞਸ੍ਸ, ਪਞ੍ਞਾ ਨਤ੍ਥਿ ਅਝਾਯਤੋ [ਅਜ੍ਝਾਯਿਨੋ (ਕ.)];
ਯਮ੍ਹਿ ਝਾਨਞ੍ਚ ਪਞ੍ਞਾ ਚ, ਸ ਵੇ ਨਿਬ੍ਬਾਨਸਨ੍ਤਿਕੇ.
੩੭੩. ਸੁਞ੍ਞਾਗਾਰਂ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;
ਅਮਾਨੁਸੀ ਰਤਿ ਹੋਤਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.
੩੭੪. ਯਤੋ ਯਤੋ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;
ਲਭਤੀ [ਲਭਤਿ (ਪੀ.), ਲਭਤੇ (ਕ.)] ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤਂ.
੩੭੫. ਤਤ੍ਰਾਯਮਾਦਿ ਭਵਤਿ, ਇਧ ਪਞ੍ਞਸ੍ਸ ਭਿਕ੍ਖੁਨੋ;
ਇਨ੍ਦ੍ਰਿਯਗੁਤ੍ਤਿ ਸਨ੍ਤੁਟ੍ਠਿ, ਪਾਤਿਮੋਕ੍ਖੇ ਚ ਸਂਵਰੋ.
੩੭੬. ਮਿਤ੍ਤੇ ਭਜਸ੍ਸੁ ਕਲ੍ਯਾਣੇ, ਸੁਦ੍ਧਾਜੀਵੇ ਅਤਨ੍ਦਿਤੇ;
ਪਟਿਸਨ੍ਥਾਰਵੁਤ੍ਯਸ੍ਸ [ਪਟਿਸਨ੍ਧਾਰਵੁਤ੍ਯਸ੍ਸ (ਕ.)], ਆਚਾਰਕੁਸਲੋ ਸਿਯਾ;
ਤਤੋ ਪਾਮੋਜ੍ਜਬਹੁਲੋ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤਿ.
੩੭੭. ਵਸ੍ਸਿਕਾ ਵਿਯ ਪੁਪ੍ਫਾਨਿ, ਮਦ੍ਦਵਾਨਿ [ਮਜ੍ਜਵਾਨਿ (ਕ. ਟੀਕਾ) ਪਚ੍ਚਵਾਨਿ (ਕ. ਅਟ੍ਠ.)] ਪਮੁਞ੍ਚਤਿ;
ਏਵਂ ਰਾਗਞ੍ਚ ਦੋਸਞ੍ਚ, ਵਿਪ੍ਪਮੁਞ੍ਚੇਥ ਭਿਕ੍ਖਵੋ.
੩੭੮. ਸਨ੍ਤਕਾਯੋ ਸਨ੍ਤਵਾਚੋ, ਸਨ੍ਤਵਾ ਸੁਸਮਾਹਿਤੋ [ਸਨ੍ਤਮਨੋ ਸੁਸਮਾਹਿਤੋ (ਸ੍ਯਾ. ਪੀ.), ਸਨ੍ਤਮਨੋ ਸਮਾਹਿਤੋ (ਕ.)];
ਵਨ੍ਤਲੋਕਾਮਿਸੋ ਭਿਕ੍ਖੁ, ‘‘ਉਪਸਨ੍ਤੋ’’ਤਿ ਵੁਚ੍ਚਤਿ.
੩੭੯. ਅਤ੍ਤਨਾ ਚੋਦਯਤ੍ਤਾਨਂ, ਪਟਿਮਂਸੇਥ ਅਤ੍ਤਨਾ [ਪਟਿਮਾਸੇ ਅਤ੍ਤਮਤ੍ਤਨਾ (ਸੀ. ਪੀ.), ਪਟਿਮਂਸੇ ਤਮਤ੍ਤਨਾ (ਸ੍ਯਾ.)];
ਸੋ ਅਤ੍ਤਗੁਤ੍ਤੋ ਸਤਿਮਾ, ਸੁਖਂ ਭਿਕ੍ਖੁ ਵਿਹਾਹਿਸਿ.
੩੮੦. ਅਤ੍ਤਾ ਹਿ ਅਤ੍ਤਨੋ ਨਾਥੋ, (ਕੋ ਹਿ ਨਾਥੋ ਪਰੋ ਸਿਯਾ) [( ) ਵਿਦੇਸਪੋਤ੍ਥਕੇਸੁ ਨਤ੍ਥਿ]
ਅਤ੍ਤਾ ਹਿ ਅਤ੍ਤਨੋ ਗਤਿ;
ਤਸ੍ਮਾ ਸਂਯਮਮਤ੍ਤਾਨਂ [ਸਂਯਮਯ’ਤ੍ਤਾਨਂ (ਸੀ. ਪੀ.)], ਅਸ੍ਸਂ ਭਦ੍ਰਂਵ ਵਾਣਿਜੋ.
੩੮੧. ਪਾਮੋਜ੍ਜਬਹੁਲੋ ਭਿਕ੍ਖੁ, ਪਸਨ੍ਨੋ ਬੁਦ੍ਧਸਾਸਨੇ;
ਅਧਿਗਚ੍ਛੇ ਪਦਂ ਸਨ੍ਤਂ, ਸਙ੍ਖਾਰੂਪਸਮਂ ਸੁਖਂ.
੩੮੨. ਯੋ ਹਵੇ ਦਹਰੋ ਭਿਕ੍ਖੁ, ਯੁਞ੍ਜਤਿ ਬੁਦ੍ਧਸਾਸਨੇ;
ਸੋਮਂ [ਸੋ ਇਮਂ (ਸੀ. ਸ੍ਯਾ. ਕਂ. ਪੀ.)] ਲੋਕਂ ਪਭਾਸੇਤਿ, ਅਬ੍ਭਾ ਮੁਤ੍ਤੋਵ ਚਨ੍ਦਿਮਾ.
ਭਿਕ੍ਖੁਵਗ੍ਗੋ ਪਞ੍ਚਵੀਸਤਿਮੋ ਨਿਟ੍ਠਿਤੋ.