੧੨. ਸੁਤਸੋਮਚਰਿਯਾ

੧੦੫. ‘‘ਪੁਨਾਪਰਂ ਯਦਾ ਹੋਮਿ, ਸੁਤਸੋਮੋ ਮਹੀਪਤਿ;

ਗਹਿਤੋ ਪੋਰਿਸਾਦੇਨ, ਬ੍ਰਾਹ੍ਮਣੇ ਸਙ੍ਗਰਂ ਸਰਿਂ.

੧੦੬. ‘‘ਖਤ੍ਤਿਯਾਨਂ ਏਕਸਤਂ, ਆਵੁਣਿਤ੍ਵਾ ਕਰਤ੍ਤਲੇ;

ਏਤੇਸਂ ਪਮਿਲਾਪੇਤ੍ਵਾ, ਯਞ੍ਞਤ੍ਥੇ ਉਪਨਯੀ ਮਮਂ.

੧੦੭. ‘‘ਅਪੁਚ੍ਛਿ ਮਂ ਪੋਰਿਸਾਦੋ, ‘ਕਿਂ ਤ੍ਵਂ ਇਚ੍ਛਸਿ ਨਿਸ੍ਸਜਂ;

ਯਥਾਮਤਿ ਤੇ ਕਾਹਾਮਿ, ਯਦਿ ਮੇ ਤ੍ਵਂ ਪੁਨੇਹਿਸਿ’.

੧੦੮. ‘‘ਤਸ੍ਸ ਪਟਿਸ੍ਸੁਣਿਤ੍ਵਾਨ, ਪਣ੍ਹੇ ਆਗਮਨਂ ਮਮ;

ਉਪਗਨ੍ਤ੍ਵਾ ਪੁਰਂ ਰਮ੍ਮਂ, ਰਜ੍ਜਂ ਨਿਯ੍ਯਾਦਯਿਂ ਤਦਾ.

੧੦੯. ‘‘ਅਨੁਸ੍ਸਰਿਤ੍ਵਾ ਸਤਂ ਧਮ੍ਮਂ, ਪੁਬ੍ਬਕਂ ਜਿਨਸੇਵਿਤਂ;

ਬ੍ਰਾਹ੍ਮਣਸ੍ਸ ਧਨਂ ਦਤ੍ਵਾ, ਪੋਰਿਸਾਦਂ ਉਪਾਗਮਿਂ.

੧੧੦. ‘‘ਨਤ੍ਥਿ ਮੇ ਸਂਸਯੋ ਤਤ੍ਥ, ਘਾਤਯਿਸ੍ਸਤਿ ਵਾ ਨ ਵਾ;

ਸਚ੍ਚਵਾਚਾਨੁਰਕ੍ਖਨ੍ਤੋ, ਜੀਵਿਤਂ ਚਜਿਤੁਮੁਪਾਗਮਿਂ;

ਸਚ੍ਚੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਸਚ੍ਚਪਾਰਮੀ’’ਤਿ.

ਸੁਤਸੋਮਚਰਿਯਂ ਦ੍ਵਾਦਸਮਂ.