੧੦. ਮਚ੍ਛਰਾਜਚਰਿਯਾ

੮੩. ‘‘ਪੁਨਾਪਰਂ ਯਦਾ ਹੋਮਿ, ਮਚ੍ਛਰਾਜਾ ਮਹਾਸਰੇ;

ਉਣ੍ਹੇ ਸੂਰਿਯਸਨ੍ਤਾਪੇ, ਸਰੇ ਉਦਕ ਖੀਯਥ.

੮੪. ‘‘ਤਤੋ ਕਾਕਾ ਚ ਗਿਜ੍ਝਾ ਚ, ਕਙ੍ਕਾ [ਬਕਾ (ਸੀ.)] ਕੁਲਲਸੇਨਕਾ;

ਭਕ੍ਖਯਨ੍ਤਿ ਦਿਵਾਰਤ੍ਤਿਂ, ਮਚ੍ਛੇ ਉਪਨਿਸੀਦਿਯ.

੮੫. ‘‘ਏਵਂ ਚਿਨ੍ਤੇਸਹਂ ਤਤ੍ਥ, ਸਹ ਞਾਤੀਹਿ ਪੀਲ਼ਿਤੋ;

‘ਕੇਨ ਨੁ ਖੋ ਉਪਾਯੇਨ, ਞਾਤੀ ਦੁਕ੍ਖਾ ਪਮੋਚਯੇ’.

੮੬. ‘‘ਵਿਚਿਨ੍ਤਯਿਤ੍ਵਾ ਧਮ੍ਮਤ੍ਥਂ, ਸਚ੍ਚਂ ਅਦ੍ਦਸ ਪਸ੍ਸਯਂ;

ਸਚ੍ਚੇ ਠਤ੍ਵਾ ਪਮੋਚੇਸਿਂ, ਞਾਤੀਨਂ ਤਂ ਅਤਿਕ੍ਖਯਂ.

੮੭. ‘‘ਅਨੁਸ੍ਸਰਿਤ੍ਵਾ ਸਤਂ ਧਮ੍ਮਂ, ਪਰਮਤ੍ਥਂ ਵਿਚਿਨ੍ਤਯਂ;

ਅਕਾਸਿ ਸਚ੍ਚਕਿਰਿਯਂ, ਯਂ ਲੋਕੇ ਧੁਵਸਸ੍ਸਤਂ.

੮੮. ‘‘‘ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤੋਸ੍ਮਿ ਵਿਞ੍ਞੁਤਂ;

ਨਾਭਿਜਾਨਾਮਿ ਸਞ੍ਚਿਚ੍ਚ, ਏਕਪਾਣਮ੍ਪਿ ਹਿਂਸਿਤਂ.

੮੯. ‘‘‘ਏਤੇਨ ਸਚ੍ਚਵਜ੍ਜੇਨ, ਪਜ੍ਜੁਨ੍ਨੋ ਅਭਿਵਸ੍ਸਤੁ;

ਅਭਿਤ੍ਥਨਯ ਪਜ੍ਜੁਨ੍ਨ, ਨਿਧਿਂ ਕਾਕਸ੍ਸ ਨਾਸਯ;

ਕਾਕਂ ਸੋਕਾਯ ਰਨ੍ਧੇਹਿ, ਮਚ੍ਛੇ ਸੋਕਾ ਪਮੋਚਯ’.

੯੦. ‘‘ਸਹਕਤੇ ਸਚ੍ਚਵਰੇ, ਪਜ੍ਜੁਨ੍ਨੋ ਅਭਿਗਜ੍ਜਿਯ;

ਥਲਂ ਨਿਨ੍ਨਞ੍ਚ ਪੂਰੇਨ੍ਤੋ, ਖਣੇਨ ਅਭਿਵਸ੍ਸਥ.

੯੧. ‘‘ਏਵਰੂਪਂ ਸਚ੍ਚਵਰਂ, ਕਤ੍ਵਾ ਵੀਰਿਯਮੁਤ੍ਤਮਂ;

ਵਸ੍ਸਾਪੇਸਿਂ ਮਹਾਮੇਘਂ, ਸਚ੍ਚਤੇਜਬਲਸ੍ਸਿਤੋ;

ਸਚ੍ਚੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਸਚ੍ਚਪਾਰਮੀ’’ਤਿ.

ਮਚ੍ਛਰਾਜਚਰਿਯਂ ਦਸਮਂ.