੬. ਰੁਰੁਰਾਜਚਰਿਯਾ

੪੮. ‘‘ਪੁਨਾਪਰਂ ਯਦਾ ਹੋਮਿ, ਸੁਤਤ੍ਤਕਨਕਸਨ੍ਨਿਭੋ;

ਮਿਗਰਾਜਾ ਰੁਰੁਨਾਮ, ਪਰਮਸੀਲਸਮਾਹਿਤੋ.

੪੯. ‘‘ਰਮ੍ਮੇ ਪਦੇਸੇ ਰਮਣੀਯੇ, ਵਿਵਿਤ੍ਤੇ ਅਮਨੁਸ੍ਸਕੇ;

ਤਤ੍ਥ ਵਾਸਂ ਉਪਗਞ੍ਛਿਂ, ਗਙ੍ਗਾਕੂਲੇ ਮਨੋਰਮੇ.

੫੦. ‘‘ਅਥ ਉਪਰਿ ਗਙ੍ਗਾਯ, ਧਨਿਕੇਹਿ ਪਰਿਪੀਲ਼ਿਤੋ;

ਪੁਰਿਸੋ ਗਙ੍ਗਾਯ ਪਪਤਿ, ‘ਜੀਵਾਮਿ ਵਾ ਮਰਾਮਿ ਵਾ’.

੫੧. ‘‘ਰਤ੍ਤਿਨ੍ਦਿਵਂ ਸੋ ਗਙ੍ਗਾਯ, ਵੁਯ੍ਹਮਾਨੋ ਮਹੋਦਕੇ;

ਰਵਨ੍ਤੋ ਕਰੁਣਂ ਰਵਂ, ਮਜ੍ਝੇ ਗਙ੍ਗਾਯ ਗਚ੍ਛਤਿ.

੫੨. ‘‘ਤਸ੍ਸਾਹਂ ਸਦ੍ਦਂ ਸੁਤ੍ਵਾਨ, ਕਰੁਣਂ ਪਰਿਦੇਵਤੋ;

ਗਙ੍ਗਾਯ ਤੀਰੇ ਠਤ੍ਵਾਨ, ਅਪੁਚ੍ਛਿਂ ‘ਕੋਸਿ ਤ੍ਵਂ ਨਰੋ’.

੫੩. ‘‘ਸੋ ਮੇ ਪੁਟ੍ਠੋ ਚ ਬ੍ਯਾਕਾਸਿ, ਅਤ੍ਤਨੋ ਕਰਣਂ ਤਦਾ;

‘ਧਨਿਕੇਹਿ ਭੀਤੋ ਤਸਿਤੋ, ਪਕ੍ਖਨ੍ਦੋਹਂ ਮਹਾਨਦਿਂ’.

੫੪. ‘‘ਤਸ੍ਸ ਕਤ੍ਵਾਨ ਕਾਰੁਞ੍ਞਂ, ਚਜਿਤ੍ਵਾ ਮਮ ਜੀਵਿਤਂ;

ਪਵਿਸਿਤ੍ਵਾ ਨੀਹਰਿਂ ਤਸ੍ਸ, ਅਨ੍ਧਕਾਰਮ੍ਹਿ ਰਤ੍ਤਿਯਾ.

੫੫. ‘‘ਅਸ੍ਸਤ੍ਥਕਾਲਮਞ੍ਞਾਯ, ਤਸ੍ਸਾਹਂ ਇਦਮਬ੍ਰਵਿਂ;

‘ਏਕਂ ਤਂ ਵਰਂ ਯਾਚਾਮਿ, ਮਾ ਮਂ ਕਸ੍ਸਚਿ ਪਾਵਦ’.

੫੬. ‘‘ਨਗਰਂ ਗਨ੍ਤ੍ਵਾਨ ਆਚਿਕ੍ਖਿ, ਪੁਚ੍ਛਿਤੋ ਧਨਹੇਤੁਕੋ;

ਰਾਜਾਨਂ ਸੋ ਗਹੇਤ੍ਵਾਨ, ਉਪਗਞ੍ਛਿ ਮਮਨ੍ਤਿਕਂ.

੫੭. ‘‘ਯਾਵਤਾ ਕਰਣਂ ਸਬ੍ਬਂ, ਰਞ੍ਞੋ ਆਰੋਚਿਤਂ ਮਯਾ;

ਰਾਜਾ ਸੁਤ੍ਵਾਨ ਵਚਨਂ, ਉਸੁਂ ਤਸ੍ਸ ਪਕਪ੍ਪਯਿ;

‘ਇਧੇਵ ਘਾਤਯਿਸ੍ਸਾਮਿ, ਮਿਤ੍ਤਦੁਬ੍ਭਿਂ [ਮਿਤ੍ਤਦੂਭਿਂ (ਸੀ.)] ਅਨਾਰਿਯਂ’.

੫੮. ‘‘ਤਮਹਂ ਅਨੁਰਕ੍ਖਨ੍ਤੋ, ਨਿਮ੍ਮਿਨਿਂ ਮਮ ਅਤ੍ਤਨਾ;

‘ਤਿਟ੍ਠਤੇਸੋ ਮਹਾਰਾਜ, ਕਾਮਕਾਰੋ ਭਵਾਮਿ ਤੇ’.

੫੯. ‘‘ਅਨੁਰਕ੍ਖਿਂ ਮਮ ਸੀਲਂ, ਨਾਰਕ੍ਖਿਂ ਮਮ ਜੀਵਿਤਂ;

ਸੀਲਵਾ ਹਿ ਤਦਾ ਆਸਿਂ, ਬੋਧਿਯਾਯੇਵ ਕਾਰਣਾ’’ਤਿ.

ਰੁਰੁਰਾਜਚਰਿਯਂ ਛਟ੍ਠਂ.