੬. ਨਿਮਿਰਾਜਚਰਿਯਾ

੪੦. ‘‘ਪੁਨਾਪਰਂ ਯਦਾ ਹੋਮਿ, ਮਿਥਿਲਾਯਂ ਪੁਰੁਤ੍ਤਮੇ;

ਨਿਮਿ ਨਾਮ ਮਹਾਰਾਜਾ, ਪਣ੍ਡਿਤੋ ਕੁਸਲਤ੍ਥਿਕੋ.

੪੧. ‘‘ਤਦਾਹਂ ਮਾਪਯਿਤ੍ਵਾਨ, ਚਤੁਸ੍ਸਾਲਂ ਚਤੁਮ੍ਮੁਖਂ;

ਤਤ੍ਥ ਦਾਨਂ ਪਵਤ੍ਤੇਸਿਂ, ਮਿਗਪਕ੍ਖਿਨਰਾਦਿਨਂ.

੪੨. ‘‘ਅਚ੍ਛਾਦਨਞ੍ਚ ਸਯਨਂ, ਅਨ੍ਨਂ ਪਾਨਞ੍ਚ ਭੋਜਨਂ;

ਅਬ੍ਬੋਚ੍ਛਿਨ੍ਨਂ ਕਰਿਤ੍ਵਾਨ, ਮਹਾਦਾਨਂ ਪਵਤ੍ਤਯਿਂ.

੪੩. ‘‘ਯਥਾਪਿ ਸੇਵਕੋ ਸਾਮਿਂ, ਧਨਹੇਤੁਮੁਪਾਗਤੋ;

ਕਾਯੇਨ ਵਾਚਾ ਮਨਸਾ, ਆਰਾਧਨੀਯਮੇਸਤਿ.

੪੪. ‘‘ਤਥੇਵਾਹਂ ਸਬ੍ਬਭਵੇ, ਪਰਿਯੇਸਿਸ੍ਸਾਮਿ ਬੋਧਿਜਂ;

ਦਾਨੇਨ ਸਤ੍ਤੇ ਤਪ੍ਪੇਤ੍ਵਾ, ਇਚ੍ਛਾਮਿ ਬੋਧਿਮੁਤ੍ਤਮ’’ਨ੍ਤਿ.

ਨਿਮਿਰਾਜਚਰਿਯਂ ਛਟ੍ਠਂ.