੮. ਸੋਭਿਤਬੁਦ੍ਧਵਂਸੋ
੧. ਰੇਵਤਸ੍ਸ ਅਪਰੇਨ, ਸੋਭਿਤੋ ਨਾਮ ਨਾਯਕੋ;
ਸਮਾਹਿਤੋ ਸਨ੍ਤਚਿਤ੍ਤੋ, ਅਸਮੋ ਅਪ੍ਪਟਿਪੁਗ੍ਗਲੋ.
੨. ਸੋ ਜਿਨੋ ਸਕਗੇਹਮ੍ਹਿ, ਮਾਨਸਂ ਵਿਨਿਵਤ੍ਤਯਿ;
ਪਤ੍ਵਾਨ ਕੇਵਲਂ ਬੋਧਿਂ, ਧਮ੍ਮਚਕ੍ਕਂ ਪਵਤ੍ਤਯਿ.
੩. ਯਾਵ ਹੇਟ੍ਠਾ ਅਵੀਚਿਤੋ, ਭਵਗ੍ਗਾ ਚਾਪਿ ਉਦ੍ਧਤੋ;
ਏਤ੍ਥਨ੍ਤਰੇ ਏਕਪਰਿਸਾ, ਅਹੋਸਿ ਧਮ੍ਮਦੇਸਨੇ.
੪. ਤਾਯ ਪਰਿਸਾਯ ਸਮ੍ਬੁਦ੍ਧੋ, ਧਮ੍ਮਚਕ੍ਕਂ ਪਵਤ੍ਤਯਿ;
ਗਣਨਾਯ ਨ ਵਤ੍ਤਬ੍ਬੋ, ਪਠਮਾਭਿਸਮਯੋ ਅਹੁ.
੫. ਤਤੋ ਪਰਮ੍ਪਿ ਦੇਸੇਨ੍ਤੇ, ਮਰੂਨਞ੍ਚ ਸਮਾਗਮੇ;
ਨਵੁਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.
੬. ਪੁਨਾਪਰਂ ਰਾਜਪੁਤ੍ਤੋ, ਜਯਸੇਨੋ ਨਾਮ ਖਤ੍ਤਿਯੋ;
ਆਰਾਮਂ ਰੋਪਯਿਤ੍ਵਾਨ, ਬੁਦ੍ਧੇ ਨਿਯ੍ਯਾਦਯੀ ਤਦਾ.
੭. ਤਸ੍ਸ ਯਾਗਂ ਪਕਿਤ੍ਤੇਨ੍ਤੋ, ਧਮ੍ਮਂ ਦੇਸੇਸਿ ਚਕ੍ਖੁਮਾ;
ਤਦਾ ਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੁ.
੮. ਸਨ੍ਨਿਪਾਤਾ ਤਯੋ ਆਸੁਂ, ਸੋਭਿਤਸ੍ਸ ਮਹੇਸਿਨੋ;
ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.
੯. ਉਗ੍ਗਤੋ ਨਾਮ ਸੋ ਰਾਜਾ, ਦਾਨਂ ਦੇਤਿ ਨਰੁਤ੍ਤਮੇ;
ਤਮ੍ਹਿ ਦਾਨੇ ਸਮਾਗਞ੍ਛੁਂ, ਅਰਹਨ੍ਤਾ [ਅਰਹਤਂ (ਕ.)] ਸਤਕੋਟਿਯੋ.
੧੦. ਪੁਨਾਪਰਂ ਪੁਰਗਣੋ [ਪੁਗਗਣੋ (ਕ.)], ਦੇਤਿ ਦਾਨਂ ਨਰੁਤ੍ਤਮੇ;
ਤਦਾ ਨਵੁਤਿਕੋਟੀਨਂ, ਦੁਤਿਯੋ ਆਸਿ ਸਮਾਗਮੋ.
੧੧. ਦੇਵਲੋਕੇ ਵਸਿਤ੍ਵਾਨ, ਯਦਾ ਓਰੋਹਤੀ ਜਿਨੋ;
ਤਦਾ ਅਸੀਤਿਕੋਟੀਨਂ, ਤਤਿਯੋ ਆਸਿ ਸਮਾਗਮੋ.
੧੨. ਅਹਂ ਤੇਨ ਸਮਯੇਨ, ਸੁਜਾਤੋ ਨਾਮ ਬ੍ਰਾਹ੍ਮਣੋ;
ਤਦਾ ਸਸਾਵਕਂ ਬੁਦ੍ਧਂ, ਅਨ੍ਨਪਾਨੇਨ ਤਪ੍ਪਯਿਂ.
੧੩. ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸੋਭਿਤੋ ਲੋਕਨਾਯਕੋ;
‘‘ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.
੧੪. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.
੧੫. ਤਸ੍ਸਾਪਿ ਵਚਨਂ ਸੁਤ੍ਵਾ, ਹਟ੍ਠੋ ਸਂਵਿਗ੍ਗਮਾਨਸੋ;
ਤਮੇਵਤ੍ਥਮਨੁਪ੍ਪਤ੍ਤਿਯਾ, ਉਗ੍ਗਂ ਧਿਤਿਮਕਾਸਹਂ.
੧੬. ਸੁਧਮ੍ਮਂ ਨਾਮ ਨਗਰਂ, ਸੁਧਮ੍ਮੋ ਨਾਮ ਖਤ੍ਤਿਯੋ;
ਸੁਧਮ੍ਮਾ ਨਾਮ ਜਨਿਕਾ, ਸੋਭਿਤਸ੍ਸ ਮਹੇਸਿਨੋ.
੧੭. ਨਵਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;
ਕੁਮੁਦੋ ਨਾਲ਼ਿਨੋ ਪਦੁਮੋ, ਤਯੋ ਪਾਸਾਦਮੁਤ੍ਤਮਾ.
੧੮. ਸਤ੍ਤਤਿਂਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;
ਮਣਿਲਾ [ਮਖਿਲਾ (ਅਟ੍ਠ.), ਸਮਙ੍ਗੀ (ਸੀ.), ਮਕਿਲਾ (ਸ੍ਯਾ. ਕਂ.)] ਨਾਮ ਸਾ ਨਾਰੀ, ਸੀਹੋ ਨਾਮਾਸਿ ਅਤ੍ਰਜੋ.
੧੯. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਪਾਸਾਦੇਨਾਭਿਨਿਕ੍ਖਮਿ;
ਸਤ੍ਤਾਹਂ ਪਧਾਨਚਾਰਂ, ਚਰਿਤ੍ਵਾ ਪੁਰਿਸੁਤ੍ਤਮੋ.
੨੦. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਸੋਭਿਤੋ ਲੋਕਨਾਯਕੋ;
ਵਤ੍ਤਿ ਚਕ੍ਕਂ ਮਹਾਵੀਰੋ, ਸੁਧਮ੍ਮੁਯ੍ਯਾਨਮੁਤ੍ਤਮੇ.
੨੧. ਅਸਮੋ ਚ ਸੁਨੇਤ੍ਤੋ ਚ, ਅਹੇਸੁਂ ਅਗ੍ਗਸਾਵਕਾ;
ਅਨੋਮੋ ਨਾਮੁਪਟ੍ਠਾਕੋ, ਸੋਭਿਤਸ੍ਸ ਮਹੇਸਿਨੋ.
੨੨. ਨਕੁਲਾ ਚ ਸੁਜਾਤਾ ਚ, ਅਹੇਸੁਂ ਅਗ੍ਗਸਾਵਿਕਾ;
ਬੁਜ੍ਝਮਾਨੋ ਚ ਸੋ ਬੁਦ੍ਧੋ, ਨਾਗਮੂਲੇ ਅਬੁਜ੍ਝਥ.
੨੩. ਰਮ੍ਮੋ ਚੇਵ ਸੁਦਤ੍ਤੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;
ਨਕੁਲਾ ਚੇਵ ਚਿਤ੍ਤਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.
੨੪. ਅਟ੍ਠਪਣ੍ਣਾਸਰਤਨਂ, ਅਚ੍ਚੁਗ੍ਗਤੋ ਮਹਾਮੁਨਿ;
ਓਭਾਸੇਤਿ ਦਿਸਾ ਸਬ੍ਬਾ, ਸਤਰਂਸੀਵ ਉਗ੍ਗਤੋ.
੨੫. ਯਥਾ ਸੁਫੁਲ੍ਲਂ ਪਵਨਂ, ਨਾਨਾਗਨ੍ਧੇਹਿ ਧੂਪਿਤਂ;
ਤਥੇਵ ਤਸ੍ਸ ਪਾਵਚਨਂ, ਸੀਲਗਨ੍ਧੇਹਿ ਧੂਪਿਤਂ.
੨੬. ਯਥਾਪਿ ਸਾਗਰੋ ਨਾਮ, ਦਸ੍ਸਨੇਨ ਅਤਪ੍ਪਿਯੋ;
ਤਥੇਵ ਤਸ੍ਸ ਪਾਵਚਨਂ, ਸਵਣੇਨ ਅਤਪ੍ਪਿਯਂ.
੨੭. ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;
ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.
੨੮. ਓਵਾਦਂ ਅਨੁਸਿਟ੍ਠਿਞ੍ਚ, ਦਤ੍ਵਾਨ ਸੇਸਕੇ ਜਨੇ;
ਹੁਤਾਸਨੋਵ ਤਾਪੇਤ੍ਵਾ, ਨਿਬ੍ਬੁਤੋ ਸੋ ਸਸਾਵਕੋ.
੨੯. ਸੋ ਚ ਬੁਦ੍ਧੋ ਅਸਮਸਮੋ, ਤੇਪਿ ਸਾਵਕਾ ਬਲਪ੍ਪਤ੍ਤਾ;
ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.
੩੦. ਸੋਭਿਤੋ ਵਰਸਮ੍ਬੁਦ੍ਧੋ, ਸੀਹਾਰਾਮਮ੍ਹਿ ਨਿਬ੍ਬੁਤੋ;
ਧਾਤੁਵਿਤ੍ਥਾਰਿਕਂ ਆਸਿ, ਤੇਸੁ ਤੇਸੁ ਪਦੇਸਤੋਤਿ.
ਸੋਭਿਤਸ੍ਸ ਭਗਵਤੋ ਵਂਸੋ ਛਟ੍ਠੋ.