੯. ਅਨੋਮਦਸ੍ਸੀਬੁਦ੍ਧਵਂਸੋ

੧. ਸੋਭਿਤਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਅਨੋਮਦਸ੍ਸੀ ਅਮਿਤਯਸੋ, ਤੇਜਸ੍ਸੀ ਦੁਰਤਿਕ੍ਕਮੋ.

੨. ਸੋ ਛੇਤ੍ਵਾ ਬਨ੍ਧਨਂ ਸਬ੍ਬਂ, ਵਿਦ੍ਧਂਸੇਤ੍ਵਾ ਤਯੋ ਭਵੇ;

ਅਨਿਵਤ੍ਤਿਗਮਨਂ ਮਗ੍ਗਂ, ਦੇਸੇਸਿ ਦੇਵਮਾਨੁਸੇ.

੩. ਸਾਗਰੋਵ ਅਸਙ੍ਖੋਭੋ, ਪਬ੍ਬਤੋਵ ਦੁਰਾਸਦੋ;

ਆਕਾਸੋਵ ਅਨਨ੍ਤੋ ਸੋ, ਸਾਲਰਾਜਾਵ ਫੁਲ੍ਲਿਤੋ.

੪. ਦਸ੍ਸਨੇਨਪਿ ਤਂ ਬੁਦ੍ਧਂ, ਤੋਸਿਤਾ ਹੋਨ੍ਤਿ ਪਾਣਿਨੋ;

ਬ੍ਯਾਹਰਨ੍ਤਂ ਗਿਰਂ ਸੁਤ੍ਵਾ, ਅਮਤਂ ਪਾਪੁਣਨ੍ਤਿ ਤੇ.

੫. ਧਮ੍ਮਾਭਿਸਮਯੋ ਤਸ੍ਸ, ਇਦ੍ਧੋ ਫੀਤੋ ਤਦਾ ਅਹੁ;

ਕੋਟਿਸਤਾਨਿ ਅਭਿਸਮਿਂਸੁ, ਪਠਮੇ ਧਮ੍ਮਦੇਸਨੇ.

੬. ਤਤੋ ਪਰਂ ਅਭਿਸਮਯੇ, ਵਸ੍ਸਨ੍ਤੇ ਧਮ੍ਮਵੁਟ੍ਠਿਯੋ;

ਅਸੀਤਿਕੋਟਿਯੋਭਿਸਮਿਂਸੁ, ਦੁਤਿਯੇ ਧਮ੍ਮਦੇਸਨੇ.

੭. ਤਤੋਪਰਞ੍ਹਿ ਵਸ੍ਸਨ੍ਤੇ, ਤਪ੍ਪਯਨ੍ਤੇ ਚ ਪਾਣਿਨਂ;

ਅਟ੍ਠਸਤ੍ਤਤਿਕੋਟੀਨਂ, ਤਤਿਯਾਭਿਸਮਯੋ ਅਹੁ.

੮. ਸਨ੍ਨਿਪਾਤਾ ਤਯੋ ਆਸੁਂ, ਤਸ੍ਸਾਪਿ ਚ ਮਹੇਸਿਨੋ;

ਅਭਿਞ੍ਞਾਬਲਪ੍ਪਤ੍ਤਾਨਂ, ਪੁਪ੍ਫਿਤਾਨਂ ਵਿਮੁਤ੍ਤਿਯਾ.

੯. ਅਟ੍ਠਸਤਸਹਸ੍ਸਾਨਂ, ਸਨ੍ਨਿਪਾਤੋ ਤਦਾ ਅਹੁ;

ਪਹੀਨਮਦਮੋਹਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੧੦. ਸਤ੍ਤਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ;

ਅਨਙ੍ਗਣਾਨਂ ਵਿਰਜਾਨਂ, ਉਪਸਨ੍ਤਾਨ ਤਾਦਿਨਂ.

੧੧. ਛਨ੍ਨਂ ਸਤਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਅਭਿਞ੍ਞਾਬਲਪ੍ਪਤ੍ਤਾਨਂ, ਨਿਬ੍ਬੁਤਾਨਂ ਤਪਸ੍ਸਿਨਂ.

੧੨. ਅਹਂ ਤੇਨ ਸਮਯੇਨ, ਯਕ੍ਖੋ ਆਸਿਂ ਮਹਿਦ੍ਧਿਕੋ;

ਨੇਕਾਨਂ ਯਕ੍ਖਕੋਟੀਨਂ, ਵਸਵਤ੍ਤਿਮ੍ਹਿ ਇਸ੍ਸਰੋ.

੧੩. ਤਦਾਪਿ ਤਂ ਬੁਦ੍ਧਵਰਂ, ਉਪਗਨ੍ਤ੍ਵਾ ਮਹੇਸਿਨਂ;

ਅਨ੍ਨਪਾਨੇਨ ਤਪ੍ਪੇਸਿਂ, ਸਸਙ੍ਘਂ ਲੋਕਨਾਯਕਂ.

੧੪. ਸੋਪਿ ਮਂ ਤਦਾ ਬ੍ਯਾਕਾਸਿ, ਵਿਸੁਦ੍ਧਨਯਨੋ ਮੁਨਿ;

‘‘ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੫. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.

੧੬. ਤਸ੍ਸਾਪਿ ਵਚਨਂ ਸੁਤ੍ਵਾ, ਹਟ੍ਠੋ ਸਂਵਿਗ੍ਗਮਾਨਸੋ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੧੭. ਨਗਰਂ ਚਨ੍ਦਵਤੀ ਨਾਮ, ਯਸਵਾ ਨਾਮ ਖਤ੍ਤਿਯੋ;

ਮਾਤਾ ਯਸੋਧਰਾ ਨਾਮ, ਅਨੋਮਦਸ੍ਸਿਸ੍ਸ ਸਤ੍ਥੁਨੋ.

੧੮. ਦਸਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;

ਸਿਰੀ ਉਪਸਿਰੀ ਵਡ੍ਢੋ, ਤਯੋ ਪਾਸਾਦਮੁਤ੍ਤਮਾ.

੧੯. ਤੇਵੀਸਤਿਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਸਿਰਿਮਾ ਨਾਮ ਸਾ ਨਾਰੀ, ਉਪਵਾਣੋ ਨਾਮ ਅਤ੍ਰਜੋ.

੨੦. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਸਿਵਿਕਾਯਾਭਿਨਿਕ੍ਖਮਿ;

ਅਨੂਨਦਸਮਾਸਾਨਿ, ਪਧਾਨਂ ਪਦਹੀ ਜਿਨੋ.

੨੧. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਅਨੋਮਦਸ੍ਸੀ ਮਹਾਮੁਨਿ;

ਵਤ੍ਤਿ ਚਕ੍ਕਂ ਮਹਾਵੀਰੋ, ਉਯ੍ਯਾਨੇ ਸੋ ਸੁਦਸ੍ਸਨੇ [ਸੁਦਸ੍ਸਨੁਯ੍ਯਾਨਮੁਤ੍ਤਮੇ (ਸ੍ਯਾ. ਕਂ.)].

੨੨. ਨਿਸਭੋ ਚ ਅਨੋਮੋ ਚ [ਅਸੋਕੋ ਚ (ਸੀ.)], ਅਹੇਸੁਂ ਅਗ੍ਗਸਾਵਕਾ;

ਵਰੁਣੋ ਨਾਮੁਪਟ੍ਠਾਕੋ, ਅਨੋਮਦਸ੍ਸਿਸ੍ਸ ਸਤ੍ਥੁਨੋ.

੨੩. ਸੁਨ੍ਦਰੀ ਚ ਸੁਮਨਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਅਜ੍ਜੁਨੋਤਿ ਪਵੁਚ੍ਚਤਿ.

੨੪. ਨਨ੍ਦਿਵਡ੍ਢੋ ਸਿਰਿਵਡ੍ਢੋ, ਅਹੇਸੁਂ ਅਗ੍ਗੁਪਟ੍ਠਕਾ;

ਉਪ੍ਪਲਾ ਚੇਵ ਪਦੁਮਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੫. ਅਟ੍ਠਪਣ੍ਣਾਸਰਤਨਂ, ਅਚ੍ਚੁਗ੍ਗਤੋ ਮਹਾਮੁਨਿ;

ਪਭਾ ਨਿਦ੍ਧਾਵਤੀ ਤਸ੍ਸ, ਸਤਰਂਸੀਵ ਉਗ੍ਗਤੋ.

੨੬. ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੭. ਸੁਪੁਪ੍ਫਿਤਂ ਪਾਵਚਨਂ, ਅਰਹਨ੍ਤੇਹਿ ਤਾਦਿਹਿ;

ਵੀਤਰਾਗੇਹਿ ਵਿਮਲੇਹਿ, ਸੋਭਿਤ੍ਥ ਜਿਨਸਾਸਨਂ.

੨੮. ਸੋ ਚ ਸਤ੍ਥਾ ਅਮਿਤਯਸੋ, ਯੁਗਾਨਿ ਤਾਨਿ ਅਤੁਲਿਯਾਨਿ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.

੨੯. ਅਨੋਮਦਸ੍ਸੀ ਜਿਨੋ ਸਤ੍ਥਾ, ਧਮ੍ਮਾਰਾਮਮ੍ਹਿ ਨਿਬ੍ਬੁਤੋ;

ਤਤ੍ਥੇਵਸ੍ਸ ਜਿਨਥੂਪੋ, ਉਬ੍ਬੇਧੋ ਪਞ੍ਚਵੀਸਤੀਤਿ.

ਅਨੋਮਦਸ੍ਸਿਸ੍ਸ ਭਗਵਤੋ ਵਂਸੋ ਸਤ੍ਤਮੋ.