੨੬. ਕਸ੍ਸਪਬੁਦ੍ਧਵਂਸੋ

੧. ਕੋਣਾਗਮਨਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਧਮ੍ਮਰਾਜਾ ਪਭਙ੍ਕਰੋ.

੨. ਸਞ੍ਛਡ੍ਡਿਤਂ ਕੁਲਮੂਲਂ, ਬਹ੍ਵਨ੍ਨਪਾਨਭੋਜਨਂ;

ਦਤ੍ਵਾਨ ਯਾਚਕੇ ਦਾਨਂ, ਪੂਰਯਿਤ੍ਵਾਨ ਮਾਨਸਂ;

ਉਸਭੋਵ ਆਲ਼ਕਂ ਭੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੩. ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਕਸ੍ਸਪੇ ਲੋਕਨਾਯਕੇ;

ਵੀਸਕੋਟਿਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.

੪. ਚਤੁਮਾਸਂ ਯਦਾ ਬੁਦ੍ਧੋ, ਲੋਕੇ ਚਰਤਿ ਚਾਰਿਕਂ;

ਦਸਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੫. ਯਮਕਂ ਵਿਕੁਬ੍ਬਨਂ ਕਤ੍ਵਾ, ਞਾਣਧਾਤੁਂ ਪਕਿਤ੍ਤਯਿ;

ਪਞ੍ਚਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੁ.

੬. ਸੁਧਮ੍ਮਾ ਦੇਵਪੁਰੇ ਰਮ੍ਮੇ, ਤਤ੍ਥ ਧਮ੍ਮਂ ਪਕਿਤ੍ਤਯਿ;

ਤੀਣਿਕੋਟਿਸਹਸ੍ਸਾਨਂ, ਦੇਵਾਨਂ ਬੋਧਯੀ ਜਿਨੋ.

੭. ਨਰਦੇਵਸ੍ਸ ਯਕ੍ਖਸ੍ਸ, ਅਪਰੇ ਧਮ੍ਮਦੇਸਨੇ;

ਏਤੇਸਾਨਂ ਅਭਿਸਮਯਾ, ਗਣਨਾਤੋ ਅਸਙ੍ਖਿਯਾ.

੮. ਤਸ੍ਸਾਪਿ ਦੇਵਦੇਵਸ੍ਸ, ਏਕੋ ਆਸਿ ਸਮਾਗਮੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੯. ਵੀਸਭਿਕ੍ਖੁਸਹਸ੍ਸਾਨਂ, ਤਦਾ ਆਸਿ ਸਮਾਗਮੋ;

ਅਤਿਕ੍ਕਨ੍ਤਭਵਨ੍ਤਾਨਂ, ਹਿਰਿਸੀਲੇਨ ਤਾਦਿਨਂ.

੧੦. ਅਹਂ ਤਦਾ ਮਾਣਵਕੋ, ਜੋਤਿਪਾਲੋਤਿ ਵਿਸ੍ਸੁਤੋ;

ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ.

੧੧. ਲਕ੍ਖਣੇ ਇਤਿਹਾਸੇ ਚ, ਸਧਮ੍ਮੇ ਪਾਰਮਿਂ ਗਤੋ;

ਭੂਮਨ੍ਤਲਿਕ੍ਖਕੁਸਲੋ, ਕਤਵਿਜ੍ਜੋ ਅਨਾਵਯੋ.

੧੨. ਕਸ੍ਸਪਸ੍ਸ ਭਗਵਤੋ, ਘਟਿਕਾਰੋ ਨਾਮੁਪਟ੍ਠਾਕੋ;

ਸਗਾਰਵੋ ਸਪ੍ਪਤਿਸ੍ਸੋ, ਨਿਬ੍ਬੁਤੋ ਤਤਿਯੇ ਫਲੇ.

੧੩. ਆਦਾਯ ਮਂ ਘਟੀਕਾਰੋ, ਉਪਗਞ੍ਛਿ ਕਸ੍ਸਪਂ ਜਿਨਂ;

ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.

੧੪. ਆਰਦ੍ਧਵੀਰਿਯੋ ਹੁਤ੍ਵਾ, ਵਤ੍ਤਾਵਤ੍ਤੇਸੁ ਕੋਵਿਦੋ;

ਨ ਕ੍ਵਚਿ ਪਰਿਹਾਯਾਮਿ, ਪੂਰੇਸਿਂ ਜਿਨਸਾਸਨਂ.

੧੫. ਯਾਵਤਾ ਬੁਦ੍ਧਭਣਿਤਂ, ਨਵਙ੍ਗਂ ਜਿਨਸਾਸਨਂ;

ਸਬ੍ਬਂ ਪਰਿਯਾਪੁਣਿਤ੍ਵਾਨ, ਸੋਭਯਿਂ ਜਿਨਸਾਸਨਂ.

੧੬. ਮਮ ਅਚ੍ਛਰਿਯਂ ਦਿਸ੍ਵਾ, ਸੋਪਿ ਬੁਦ੍ਧੋ ਵਿਯਾਕਰਿ;

‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੭. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ, ਨਿਕ੍ਖਮਿਤ੍ਵਾ ਤਥਾਗਤੋ;

ਪਧਾਨਂ ਪਦਹਿਤ੍ਵਾਨ, ਕਤ੍ਵਾ ਦੁਕ੍ਕਰਕਾਰਿਕਂ.

੧੮. ‘‘ਅਜਪਾਲਰੁਕ੍ਖਮੂਲੇ, ਨਿਸੀਦਿਤ੍ਵਾ ਤਥਾਗਤੋ;

ਤਤ੍ਥ ਪਾਯਾਸਂ ਪਗ੍ਗਯ੍ਹ, ਨੇਰਞ੍ਜਰਮੁਪੇਹਿਤਿ.

੧੯. ‘‘ਨੇਰਞ੍ਜਰਾਯ ਤੀਰਮ੍ਹਿ, ਪਾਯਾਸਂ ਪਰਿਭੁਞ੍ਜਿਯ;

ਪਟਿਯਤ੍ਤਵਰਮਗ੍ਗੇਨ, ਬੋਧਿਮੂਲਮੁਪੇਹਿਤਿ.

੨੦. ‘‘ਤਤੋ ਪਦਕ੍ਖਿਣਂ ਕਤ੍ਵਾ, ਬੋਧਿਮਣ੍ਡਂ ਅਨੁਤ੍ਤਰੋ;

ਅਪਰਾਜਿਤਟ੍ਠਾਨਮ੍ਹਿ [ਅਪਰਾਜਿਤਨਿਸਭਟ੍ਠਾਨੇ (ਕ.)], ਬੋਧਿਪਲ੍ਲਙ੍ਕਮੁਤ੍ਤਮੇ;

ਪਲ੍ਲਙ੍ਕੇਨ ਨਿਸੀਦਿਤ੍ਵਾ, ਬੁਜ੍ਝਿਸ੍ਸਤਿ ਮਹਾਯਸੋ.

੨੧. ‘‘ਇਮਸ੍ਸ ਜਨਿਕਾ ਮਾਤਾ, ਮਾਯਾ ਨਾਮ ਭਵਿਸ੍ਸਤਿ;

ਪਿਤਾ ਸੁਦ੍ਧੋਦਨੋ ਨਾਮ, ਅਯਂ ਹੇਸ੍ਸਤਿ ਗੋਤਮੋ.

੨੨. ‘‘ਅਨਾਸਵਾ ਵੀਤਰਾਗਾ, ਸਨ੍ਤਚਿਤ੍ਤਾ ਸਮਾਹਿਤਾ;

ਕੋਲਿਤੋ ਉਪਤਿਸ੍ਸੋ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਕਾ;

ਆਨਨ੍ਦੋ ਨਾਮੁਪਟ੍ਠਾਕੋ, ਉਪਟ੍ਠਿਸ੍ਸਤਿਮਂ ਜਿਨਂ.

੨੩. ‘‘ਖੇਮਾ ਉਪ੍ਪਲਵਣ੍ਣਾ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਿਕਾ;

ਅਨਾਸਵਾ ਸਨ੍ਤਚਿਤ੍ਤਾ, ਵੀਤਰਾਗਾ ਸਮਾਹਿਤਾ;

ਬੋਧਿ ਤਸ੍ਸ ਭਗਵਤੋ, ਅਸ੍ਸਤ੍ਥੋਤਿ ਪਵੁਚ੍ਚਤਿ.

੨੪. ‘‘ਚਿਤ੍ਤੋ ਹਤ੍ਥਾਲ਼ਵਕੋ ਚ, ਅਗ੍ਗਾ ਹੇਸ੍ਸਨ੍ਤੁਪਟ੍ਠਕਾ;

ਨਨ੍ਦਮਾਤਾ ਚ ਉਤ੍ਤਰਾ, ਅਗ੍ਗਾ ਹੇਸ੍ਸਨ੍ਤੁਪਟ੍ਠਿਕਾ’’.

੨੫. ਇਦਂ ਸੁਤ੍ਵਾਨ ਵਚਨਂ, ਅਸ੍ਸਮਸ੍ਸ ਮਹੇਸਿਨੋ;

ਆਮੋਦਿਤਾ ਨਰਮਰੂ, ਬੁਦ੍ਧਬੀਜਂ ਕਿਰ ਅਯਂ.

੨੬. ਉਕ੍ਕੁਟ੍ਠਿਸਦ੍ਦਾ ਪਵਤ੍ਤਨ੍ਤਿ, ਅਪ੍ਫੋਟੇਨ੍ਤਿ ਹਸਨ੍ਤਿ ਚ;

ਕਤਞ੍ਜਲੀ ਨਮਸ੍ਸਨ੍ਤਿ, ਦਸਸਹਸ੍ਸੀ ਸਦੇਵਕਾ.

੨੭. ‘‘ਯਦਿਮਸ੍ਸ ਲੋਕਨਾਥਸ੍ਸ, ਵਿਰਜ੍ਝਿਸ੍ਸਾਮ ਸਾਸਨਂ;

ਅਨਾਗਤਮ੍ਹਿ ਅਦ੍ਧਾਨੇ, ਹੇਸ੍ਸਾਮ ਸਮ੍ਮੁਖਾ ਇਮਂ.

੨੮. ‘‘ਯਥਾ ਮਨੁਸ੍ਸਾ ਨਦਿਂ ਤਰਨ੍ਤਾ, ਪਟਿਤਿਤ੍ਥਂ ਵਿਰਜ੍ਝਿਯ;

ਹੇਟ੍ਠਾ ਤਿਤ੍ਥੇ ਗਹੇਤ੍ਵਾਨ, ਉਤ੍ਤਰਨ੍ਤਿ ਮਹਾਨਦਿਂ.

੨੯. ‘‘ਏਵਮੇਵ ਮਯਂ ਸਬ੍ਬੇ, ਯਦਿ ਮੁਞ੍ਚਾਮਿਮਂ ਜਿਨਂ;

ਅਨਾਗਤਮ੍ਹਿ ਅਦ੍ਧਾਨੇ, ਹੇਸ੍ਸਾਮ ਸਮ੍ਮੁਖਾ ਇਮਂ’’.

੩੦. ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੩੧. ਏਵਮਹਂ ਸਂਸਰਿਤ੍ਵਾ, ਪਰਿਵਜ੍ਜੇਨ੍ਤੋ ਅਨਾਚਰਂ;

ਦੁਕ੍ਕਰਞ੍ਚ ਕਤਂ ਮਯ੍ਹਂ, ਬੋਧਿਯਾਯੇਵ ਕਾਰਣਾ.

੩੨. ਨਗਰਂ ਬਾਰਾਣਸੀ ਨਾਮ, ਕਿਕੀ ਨਾਮਾਸਿ ਖਤ੍ਤਿਯੋ;

ਵਸਤੇ ਤਤ੍ਥ ਨਗਰੇ, ਸਮ੍ਬੁਦ੍ਧਸ੍ਸ ਮਹਾਕੁਲਂ.

੩੩. ਬ੍ਰਾਹ੍ਮਣੋ ਬ੍ਰਹ੍ਮਦਤ੍ਤੋਵ, ਆਸਿ ਬੁਦ੍ਧਸ੍ਸ ਸੋ ਪਿਤਾ;

ਧਨਵਤੀ ਨਾਮ ਜਨਿਕਾ, ਕਸ੍ਸਪਸ੍ਸ ਮਹੇਸਿਨੋ.

੩੪. ਦੁਵੇ ਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;

ਹਂਸੋ ਯਸੋ ਸਿਰਿਨਨ੍ਦੋ, ਤਯੋ ਪਾਸਾਦਮੁਤ੍ਤਮਾ.

੩੫. ਤਿਸੋਲ਼ਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਸੁਨਨ੍ਦਾ ਨਾਮ ਸਾ ਨਾਰੀ, ਵਿਜਿਤਸੇਨੋ ਨਾਮ ਅਤ੍ਰਜੋ.

੩੬. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਪਾਸਾਦੇਨਾਭਿਨਿਕ੍ਖਮਿ;

ਸਤ੍ਤਾਹਂ ਪਧਾਨਚਾਰਂ, ਅਚਰੀ ਪੁਰਿਸੁਤ੍ਤਮੋ.

੩੭. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਕਸ੍ਸਪੋ ਲੋਕਨਾਯਕੋ;

ਵਤ੍ਤਿ ਚਕ੍ਕਂ ਮਹਾਵੀਰੋ, ਮਿਗਦਾਯੇ ਨਰੁਤ੍ਤਮੋ.

੩੮. ਤਿਸ੍ਸੋ ਚ ਭਾਰਦ੍ਵਾਜੋ ਚ, ਅਹੇਸੁਂ ਅਗ੍ਗਸਾਵਕਾ;

ਸਬ੍ਬਮਿਤ੍ਤੋ ਨਾਮੁਪਟ੍ਠਾਕੋ, ਕਸ੍ਸਪਸ੍ਸ ਮਹੇਸਿਨੋ.

੩੯. ਅਨੁਲ਼ਾ ਉਰੁਵੇਲ਼ਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਨਿਗ੍ਰੋਧੋਤਿ ਪਵੁਚ੍ਚਤਿ.

੪੦. ਸੁਮਙ੍ਗਲੋ ਘਟਿਕਾਰੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਵਿਚਿਤਸੇਨਾ ਭਦ੍ਦਾ [ਭਦ੍ਰਾ (ਕ.)] ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.

੪੧. ਉਚ੍ਚਤ੍ਤਨੇਨ ਸੋ ਬੁਦ੍ਧੋ, ਵੀਸਤਿਰਤਨੁਗ੍ਗਤੋ;

ਵਿਜ੍ਜੁਲਟ੍ਠੀਵ ਆਕਾਸੇ, ਚਨ੍ਦੋਵ ਗਹਪੂਰਿਤੋ.

੪੨. ਵੀਸਤਿਵਸ੍ਸਸਹਸ੍ਸਾਨਿ, ਆਯੁ ਤਸ੍ਸ ਮਹੇਸਿਨੋ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੪੩. ਧਮ੍ਮਤਲ਼ਾਕਂ ਮਾਪਯਿਤ੍ਵਾ, ਸੀਲਂ ਦਤ੍ਵਾ ਵਿਲੇਪਨਂ;

ਧਮ੍ਮਦੁਸ੍ਸਂ ਨਿਵਾਸੇਤ੍ਵਾ, ਧਮ੍ਮਮਾਲਂ ਵਿਭਜ੍ਜਿਯ.

੪੪. ਧਮ੍ਮਵਿਮਲਮਾਦਾਸਂ, ਠਪਯਿਤ੍ਵਾ ਮਹਾਜਨੇ;

ਕੇਚਿ ਨਿਬ੍ਬਾਨਂ ਪਤ੍ਥੇਨ੍ਤਾ, ਪਸ੍ਸਨ੍ਤੁ ਮੇ ਅਲਙ੍ਕਰਂ.

੪੫. ਸੀਲਕਞ੍ਚੁਕਂ ਦਤ੍ਵਾਨ, ਝਾਨਕਵਚਵਮ੍ਮਿਤਂ;

ਧਮ੍ਮਚਮ੍ਮਂ ਪਾਰੁਪਿਤ੍ਵਾ, ਦਤ੍ਵਾ ਸਨ੍ਨਾਹਮੁਤ੍ਤਮਂ.

੪੬. ਸਤਿਫਲਕਂ ਦਤ੍ਵਾਨ, ਤਿਖਿਣਞਾਣਕੁਨ੍ਤਿਮਂ;

ਧਮ੍ਮਖਗ੍ਗਵਰਂ ਦਤ੍ਵਾ, ਸੀਲਸਂਸਗ੍ਗਮਦ੍ਦਨਂ.

੪੭. ਤੇਵਿਜ੍ਜਾਭੂਸਨਂ ਦਤ੍ਵਾਨ, ਆਵੇਲ਼ਂ ਚਤੁਰੋ ਫਲੇ;

ਛਲ਼ਭਿਞ੍ਞਾਭਰਣਂ ਦਤ੍ਵਾ, ਧਮ੍ਮਪੁਪ੍ਫਪਿਲ਼ਨ੍ਧਨਂ.

੪੮. ਸਦ੍ਧਮ੍ਮਪਣ੍ਡਰਚ੍ਛਤ੍ਤਂ, ਦਤ੍ਵਾ ਪਾਪਨਿਵਾਰਣਂ;

ਮਾਪਯਿਤ੍ਵਾਭਯਂ ਪੁਪ੍ਫਂ, ਨਿਬ੍ਬੁਤੋ ਸੋ ਸਸਾਵਕੋ.

੪੯. ਏਸੋ ਹਿ ਸਮ੍ਮਾਸਮ੍ਬੁਦ੍ਧੋ, ਅਪ੍ਪਮੇਯ੍ਯੋ ਦੁਰਾਸਦੋ;

ਏਸੋ ਹਿ ਧਮ੍ਮਰਤਨੋ, ਸ੍ਵਾਕ੍ਖਾਤੋ ਏਹਿਪਸ੍ਸਿਕੋ.

੫੦. ਏਸੋ ਹਿ ਸਙ੍ਘਰਤਨੋ, ਸੁਪ੍ਪਟਿਪਨ੍ਨੋ ਅਨੁਤ੍ਤਰੋ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.

੫੧. ਮਹਾਕਸ੍ਸਪੋ ਜਿਨੋ ਸਤ੍ਥਾ, ਸੇਤਬ੍ਯਾਰਾਮਮ੍ਹਿ ਨਿਬ੍ਬੁਤੋ;

ਤਤ੍ਥੇਵਸ੍ਸ ਜਿਨਥੂਪੋ, ਯੋਜਨੁਬ੍ਬੇਧਮੁਗ੍ਗਤੋਤਿ.

ਕਸ੍ਸਪਸ੍ਸ ਭਗਵਤੋ ਵਂਸੋ ਚਤੁਵੀਸਤਿਮੋ.