੨੭. ਗੋਤਮਬੁਦ੍ਧਵਂਸੋ
੧. ਅਹਮੇਤਰਹਿ ਸਮ੍ਬੁਦ੍ਧੋ [ਬੁਦ੍ਧੋ (ਸੀ.)], ਗੋਤਮੋ ਸਕ੍ਯਵਡ੍ਢਨੋ;
ਪਧਾਨਂ ਪਦਹਿਤ੍ਵਾਨ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.
੨. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਧਮ੍ਮਚਕ੍ਕਂ ਪਵਤ੍ਤਯਿਂ;
ਅਟ੍ਠਾਰਸਨ੍ਨਂ ਕੋਟੀਨਂ, ਪਠਮਾਭਿਸਮਯੋ ਅਹੁ.
੩. ਤਤੋ ਪਰਞ੍ਚ ਦੇਸੇਨ੍ਤੇ, ਨਰਦੇਵਸਮਾਗਮੇ;
ਗਣਨਾਯ ਨ ਵਤ੍ਤਬ੍ਬੋ, ਦੁਤਿਯਾਭਿਸਮਯੋ ਅਹੁ.
੪. ਇਧੇਵਾਹਂ ਏਤਰਹਿ, ਓਵਦਿਂ ਮਮ ਅਤ੍ਰਜਂ;
ਗਣਨਾਯ ਨ ਵਤ੍ਤਬ੍ਬੋ, ਤਤਿਯਾਭਿਸਮਯੋ ਅਹੁ.
੫. ਏਕੋਸਿ ਸਨ੍ਨਿਪਾਤੋ ਮੇ, ਸਾਵਕਾਨਂ ਮਹੇਸਿਨਂ;
ਅਡ੍ਢਤੇਲ਼ਸਸਤਾਨਂ, ਭਿਕ੍ਖੂਨਾਸਿ ਸਮਾਗਮੋ.
੬. ਵਿਰੋਚਮਾਨੋ ਵਿਮਲੋ, ਭਿਕ੍ਖੁਸਙ੍ਘਸ੍ਸ ਮਜ੍ਝਗੋ;
ਦਦਾਮਿ ਪਤ੍ਥਿਤਂ ਸਬ੍ਬਂ, ਮਣੀਵ ਸਬ੍ਬਕਾਮਦੋ.
੭. ਫਲਮਾਕਙ੍ਖਮਾਨਾਨਂ, ਭਵਚ੍ਛਨ੍ਦਜਹੇਸਿਨਂ;
ਚਤੁਸਚ੍ਚਂ ਪਕਾਸੇਮਿ, ਅਨੁਕਮ੍ਪਾਯ ਪਾਣਿਨਂ.
੮. ਦਸਵੀਸਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ;
ਏਕਦ੍ਵਿਨ੍ਨਂ ਅਭਿਸਮਯੋ, ਗਣਨਾਤੋ ਅਸਙ੍ਖਿਯੋ.
੯. ਵਿਤ੍ਥਾਰਿਕਂ ਬਾਹੁਜਞ੍ਞਂ, ਇਦ੍ਧਂ ਫੀਤਂ ਸੁਫੁਲ੍ਲਿਤਂ;
ਇਧ ਮਯ੍ਹਂ ਸਕ੍ਯਮੁਨਿਨੋ, ਸਾਸਨਂ ਸੁਵਿਸੋਧਿਤਂ.
੧੦. ਅਨਾਸਵਾ ਵੀਤਰਾਗਾ, ਸਨ੍ਤਚਿਤ੍ਤਾ ਸਮਾਹਿਤਾ;
ਭਿਕ੍ਖੂਨੇਕਸਤਾ ਸਬ੍ਬੇ, ਪਰਿਵਾਰੇਨ੍ਤਿ ਮਂ ਸਦਾ.
੧੧. ਇਦਾਨਿ ਯੇ ਏਤਰਹਿ, ਜਹਨ੍ਤਿ ਮਾਨੁਸਂ ਭਵਂ;
ਅਪ੍ਪਤ੍ਤਮਾਨਸਾ ਸੇਖਾ, ਤੇ ਭਿਕ੍ਖੂ ਵਿਞ੍ਞੁਗਰਹਿਤਾ.
੧੨. ਅਰਿਯਞ੍ਚ ਸਂਥੋਮਯਨ੍ਤਾ, ਸਦਾ ਧਮ੍ਮਰਤਾ ਜਨਾ;
ਬੁਜ੍ਝਿਸ੍ਸਨ੍ਤਿ ਸਤਿਮਨ੍ਤੋ, ਸਂਸਾਰਸਰਿਤਂ ਗਤਾ.
੧੩. ਨਗਰਂ ਕਪਿਲਵਤ੍ਥੁ ਮੇ, ਰਾਜਾ ਸੁਦ੍ਧੋਦਨੋ ਪਿਤਾ;
ਮਯ੍ਹਂ ਜਨੇਤ੍ਤਿਕਾ ਮਾਤਾ, ਮਾਯਾਦੇਵੀਤਿ ਵੁਚ੍ਚਤਿ.
੧੪. ਏਕੂਨਤਿਂਸਵਸ੍ਸਾਨਿ, ਅਗਾਰਂ ਅਜ੍ਝਹਂ ਵਸਿਂ;
ਰਮ੍ਮੋ ਸੁਰਮ੍ਮੋ ਸੁਭਕੋ, ਤਯੋ ਪਾਸਾਦਮੁਤ੍ਤਮਾ.
੧੫. ਚਤ੍ਤਾਰੀਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;
ਭਦ੍ਦਕਞ੍ਚਨਾ ਨਾਮ ਨਾਰੀ, ਰਾਹੁਲੋ ਨਾਮ ਅਤ੍ਰਜੋ.
੧੬. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਅਸ੍ਸਯਾਨੇਨ ਨਿਕ੍ਖਮਿਂ;
ਛਬ੍ਬਸ੍ਸਂ ਪਧਾਨਚਾਰਂ, ਅਚਰਿਂ ਦੁਕ੍ਕਰਂ ਅਹਂ.
੧੭. ਬਾਰਾਣਸਿਯਂ ਇਸਿਪਤਨੇ, ਚਕ੍ਕਂ ਪਵਤ੍ਤਿਤਂ ਮਯਾ;
ਅਹਂ ਗੋਤਮਸਮ੍ਬੁਦ੍ਧੋ, ਸਰਣਂ ਸਬ੍ਬਪਾਣਿਨਂ.
੧੮. ਕੋਲਿਤੋ ਉਪਤਿਸ੍ਸੋ ਚ, ਦ੍ਵੇ ਭਿਕ੍ਖੂ ਅਗ੍ਗਸਾਵਕਾ;
ਆਨਨ੍ਦੋ ਨਾਮੁਪਟ੍ਠਾਕੋ, ਸਨ੍ਤਿਕਾਵਚਰੋ ਮਮ;
ਖੇਮਾ ਉਪ੍ਪਲਵਣ੍ਣਾ ਚ, ਭਿਕ੍ਖੁਨੀ ਅਗ੍ਗਸਾਵਿਕਾ.
੧੯. ਚਿਤ੍ਤੋ ਹਤ੍ਥਾਲ਼ਵਕੋ ਚ, ਅਗ੍ਗੁਪਟ੍ਠਾਕੁਪਾਸਕਾ;
ਨਨ੍ਦਮਾਤਾ ਚ ਉਤ੍ਤਰਾ, ਅਗ੍ਗੁਪਟ੍ਠਿਕੁਪਾਸਿਕਾ.
੨੦. ਅਹਂ ਅਸ੍ਸਤ੍ਥਮੂਲਮ੍ਹਿ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ;
ਬ੍ਯਾਮਪ੍ਪਭਾ ਸਦਾ ਮਯ੍ਹਂ, ਸੋਲ਼ਸਹਤ੍ਥਮੁਗ੍ਗਤਾ.
੨੧. ਅਪ੍ਪਂ ਵਸ੍ਸਸਤਂ ਆਯੁ, ਇਦਾਨੇਤਰਹਿ ਵਿਜ੍ਜਤਿ;
ਤਾਵਤਾ ਤਿਟ੍ਠਮਾਨੋਹਂ, ਤਾਰੇਮਿ ਜਨਤਂ ਬਹੁਂ.
੨੨. ਠਪਯਿਤ੍ਵਾਨ ਧਮ੍ਮੁਕ੍ਕਂ, ਪਚ੍ਛਿਮਂ ਜਨਬੋਧਨਂ;
ਅਹਮ੍ਪਿ ਨਚਿਰਸ੍ਸੇਵ, ਸਦ੍ਧਿਂ ਸਾਵਕਸਙ੍ਘਤੋ;
ਇਧੇਵ ਪਰਿਨਿਬ੍ਬਿਸ੍ਸਂ, ਅਗ੍ਗੀ ਵਾਹਾਰਸਙ੍ਖਯਾ.
੨੩. ਤਾਨਿ ਚ ਅਤੁਲਤੇਜਾਨਿ, ਇਮਾਨਿ ਚ ਦਸਬਲਾਨਿ [ਯਸਬਲਾਨਿ (ਅਟ੍ਠ.)];
ਅਯਞ੍ਚ ਗੁਣਧਾਰਣੋ ਦੇਹੋ, ਦ੍ਵਤ੍ਤਿਂਸਵਰਲਕ੍ਖਣਵਿਚਿਤ੍ਤੋ.
੨੪. ਦਸ ਦਿਸਾ ਪਭਾਸੇਤ੍ਵਾ, ਸਤਰਂਸੀਵ ਛਪ੍ਪਭਾ;
ਸਬ੍ਬਂ ਤਮਨ੍ਤਰਹਿਸ੍ਸਨ੍ਤਿ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾਤਿ.
ਗੋਤਮਸ੍ਸ ਭਗਵਤੋ ਵਂਸੋ ਪਞ੍ਚਵੀਸਤਿਮੋ.