੨੩. ਵੇਸ੍ਸਭੂਬੁਦ੍ਧਵਂਸੋ

੧. ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਅਸਮੋ ਅਪ੍ਪਟਿਪੁਗ੍ਗਲੋ;

ਵੇਸ੍ਸਭੂ ਨਾਮ ਨਾਮੇਨ, ਲੋਕੇ ਉਪ੍ਪਜ੍ਜਿ ਨਾਯਕੋ [ਸੋ ਜਿਨੋ (ਸ੍ਯਾ. ਕਂ. ਕ.)].

੨. ਆਦਿਤ੍ਤਂ ਵਤ ਰਾਗਗ੍ਗਿ, ਤਣ੍ਹਾਨਂ ਵਿਜਿਤਂ ਤਦਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੩. ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਵੇਸ੍ਸਭੂਲੋਕਨਾਯਕੇ;

ਅਸੀਤਿਕੋਟਿਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.

੪. ਪਕ੍ਕਨ੍ਤੇ ਚਾਰਿਕਂ ਰਟ੍ਠੇ, ਲੋਕਜੇਟ੍ਠੇ ਨਰਾਸਭੇ;

ਸਤ੍ਤਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੫. ਮਹਾਦਿਟ੍ਠਿਂ ਵਿਨੋਦੇਨ੍ਤੋ, ਪਾਟਿਹੇਰਂ ਕਰੋਤਿ ਸੋ;

ਸਮਾਗਤਾ ਨਰਮਰੂ, ਦਸਸਹਸ੍ਸੀ ਸਦੇਵਕੇ.

੬. ਮਹਾਅਚ੍ਛਰਿਯਂ ਦਿਸ੍ਵਾ, ਅਬ੍ਭੁਤਂ ਲੋਮਹਂਸਨਂ;

ਦੇਵਾ ਚੇਵ ਮਨੁਸ੍ਸਾ ਚ, ਬੁਜ੍ਝਰੇ ਸਟ੍ਠਿਕੋਟਿਯੋ.

੭. ਸਨ੍ਨਿਪਾਤਾ ਤਯੋ ਆਸੁਂ, ਵੇਸ੍ਸਭੁਸ੍ਸ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੮. ਅਸੀਤਿਭਿਕ੍ਖੁਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਸਤ੍ਤਤਿਭਿਕ੍ਖੁਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੯. ਸਟ੍ਠਿਭਿਕ੍ਖੁਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਜਰਾਦਿਭਯਭੀਤਾਨਂ, ਓਰਸਾਨਂ ਮਹੇਸਿਨੋ.

੧੦. ਅਹਂ ਤੇਨ ਸਮਯੇਨ, ਸੁਦਸ੍ਸਨੋ ਨਾਮ ਖਤ੍ਤਿਯੋ;

ਨਿਮਨ੍ਤੇਤ੍ਵਾ ਮਹਾਵੀਰਂ, ਦਾਨਂ ਦਤ੍ਵਾ ਮਹਾਰਹਂ;

ਅਨ੍ਨਪਾਨੇਨ ਵਤ੍ਥੇਨ, ਸਸਙ੍ਘਂ ਜਿਨ ਪੂਜਯਿਂ.

੧੧. ਤਸ੍ਸ ਬੁਦ੍ਧਸ੍ਸ ਅਸਮਸ੍ਸ, ਚਕ੍ਕਂ ਵਤ੍ਤਿਤਮੁਤ੍ਤਮਂ;

ਸੁਤ੍ਵਾਨ ਪਣਿਤਂ ਧਮ੍ਮਂ, ਪਬ੍ਬਜ੍ਜਮਭਿਰੋਚਯਿਂ.

੧੨. ਮਹਾਦਾਨਂ ਪਵਤ੍ਤੇਤ੍ਵਾ, ਰਤ੍ਤਿਨ੍ਦਿਵਮਤਨ੍ਦਿਤੋ;

ਪਬ੍ਬਜ੍ਜਂ ਗੁਣਸਮ੍ਪਨ੍ਨਂ, ਪਬ੍ਬਜਿਂ ਜਿਨਸਨ੍ਤਿਕੇ.

੧੩. ਆਚਾਰਗੁਣਸਮ੍ਪਨ੍ਨੋ, ਵਤ੍ਤਸੀਲਸਮਾਹਿਤੋ;

ਸਬ੍ਬਞ੍ਞੁਤਂ ਗਵੇਸਨ੍ਤੋ, ਰਮਾਮਿ ਜਿਨਸਾਸਨੇ.

੧੪. ਸਦ੍ਧਾਪੀਤਿਂ ਉਪਗਨ੍ਤ੍ਵਾ, ਬੁਦ੍ਧਂ ਵਨ੍ਦਾਮਿ ਸਤ੍ਥਰਂ;

ਪੀਤਿ ਉਪ੍ਪਜ੍ਜਤਿ ਮਯ੍ਹਂ, ਬੋਧਿਯਾਯੇਵ ਕਾਰਣਾ.

੧੫. ਅਨਿਵਤ੍ਤਮਾਨਸਂ ਞਤ੍ਵਾ, ਸਮ੍ਬੁਦ੍ਧੋ ਏਤਦਬ੍ਰਵਿ;

‘‘ਏਕਤਿਂਸੇ ਇਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੬. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.

੧੭. ਤਸ੍ਸਾਹਂ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੧੮. ਅਨੋਮਂ ਨਾਮ ਨਗਰਂ, ਸੁਪ੍ਪਤੀਤੋ ਨਾਮ ਖਤ੍ਤਿਯੋ;

ਮਾਤਾ ਯਸਵਤੀ ਨਾਮ, ਵੇਸ੍ਸਭੁਸ੍ਸ ਮਹੇਸਿਨੋ.

੧੯. ਛ ਚ ਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;

ਰੁਚਿ ਸੁਰੁਚਿ ਰਤਿਵਡ੍ਢਨੋ, ਤਯੋ ਪਾਸਾਦਮੁਤ੍ਤਮਾ.

੨੦. ਅਨੂਨਤਿਂਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਸੁਚਿਤ੍ਤਾ ਨਾਮ ਸਾ ਨਾਰੀ, ਸੁਪ੍ਪਬੁਦ੍ਧੋ ਨਾਮ ਅਤ੍ਰਜੋ.

੨੧. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਸਿਵਿਕਾਯਾਭਿਨਿਕ੍ਖਮਿ;

ਛਮਾਸਂ ਪਧਾਨਚਾਰਂ, ਅਚਰੀ ਪੁਰਿਸੁਤ੍ਤਮੋ.

੨੨. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਵੇਸ੍ਸਭੂਲੋਕਨਾਯਕੋ;

ਵਤ੍ਤਿ ਚਕ੍ਕਂ ਮਹਾਵੀਰੋ, ਅਰੁਣਾਰਾਮੇ ਨਰੁਤ੍ਤਮੋ.

੨੩. ਸੋਣੋ ਚ ਉਤ੍ਤਰੋ ਚੇਵ, ਅਹੇਸੁਂ ਅਗ੍ਗਸਾਵਕਾ;

ਉਪਸਨ੍ਤੋ ਨਾਮੁਪਟ੍ਠਾਕੋ, ਵੇਸ੍ਸਭੁਸ੍ਸ ਮਹੇਸਿਨੋ.

੨੪. ਰਾਮਾ [ਦਾਮਾ (ਸੀ.)] ਚੇਵ ਸਮਾਲਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਮਹਾਸਾਲੋਤਿ ਵੁਚ੍ਚਤਿ.

੨੫. ਸੋਤ੍ਥਿਕੋ ਚੇਵ ਰਮ੍ਭੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਗੋਤਮੀ ਸਿਰਿਮਾ ਚੇਵ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੬. ਸਟ੍ਠਿਰਤਨਮੁਬ੍ਬੇਧੋ, ਹੇਮਯੂਪਸਮੂਪਮੋ;

ਕਾਯਾ ਨਿਚ੍ਛਰਤਿ ਰਸ੍ਮਿ, ਰਤ੍ਤਿਂਵ ਪਬ੍ਬਤੇ ਸਿਖੀ.

੨੭. ਸਟ੍ਠਿਵਸ੍ਸਸਹਸ੍ਸਾਨਿ, ਆਯੁ ਤਸ੍ਸ ਮਹੇਸਿਨੋ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੮. ਧਮ੍ਮਂ ਵਿਤ੍ਥਾਰਿਕਂ ਕਤ੍ਵਾ, ਵਿਭਜਿਤ੍ਵਾ ਮਹਾਜਨਂ;

ਧਮ੍ਮਨਾਵਂ ਠਪੇਤ੍ਵਾਨ, ਨਿਬ੍ਬੁਤੋ ਸੋ ਸਸਾਵਕੋ.

੨੯. ਦਸ੍ਸਨੇਯ੍ਯਂ ਸਬ੍ਬਜਨਂ, ਵਿਹਾਰਂ ਇਰਿਯਾਪਥਂ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.

੩੦. ਵੇਸ੍ਸਭੂ ਜਿਨਵਰੋ ਸਤ੍ਥਾ, ਖੇਮਾਰਾਮਮ੍ਹਿ ਨਿਬ੍ਬੁਤੋ;

ਧਾਤੁਵਿਤ੍ਥਾਰਿਕਂ ਆਸਿ, ਤੇਸੁ ਤੇਸੁ ਪਦੇਸਤੋਤਿ.

ਵੇਸ੍ਸਭੁਸ੍ਸ ਭਗਵਤੋ ਵਂਸੋ ਏਕਵੀਸਤਿਮੋ.