੨੪. ਕਕੁਸਨ੍ਧਬੁਦ੍ਧਵਂਸੋ

੧. ਵੇਸ੍ਸਭੁਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਕਕੁਸਨ੍ਧੋ ਨਾਮ ਨਾਮੇਨ, ਅਪ੍ਪਮੇਯ੍ਯੋ ਦੁਰਾਸਦੋ.

੨. ਉਗ੍ਘਾਟੇਤ੍ਵਾ ਸਬ੍ਬਭਵਂ, ਚਰਿਯਾਯ ਪਾਰਮਿਂ ਗਤੋ;

ਸੀਹੋਵ ਪਞ੍ਜਰਂ ਭੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੩. ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਕਕੁਸਨ੍ਧੇ ਲੋਕਨਾਯਕੇ;

ਚਤ੍ਤਾਰੀਸਕੋਟਿਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ.

੪. ਅਨ੍ਤਲਿਕ੍ਖਮ੍ਹਿ ਆਕਾਸੇ, ਯਮਕਂ ਕਤ੍ਵਾ ਵਿਕੁਬ੍ਬਨਂ;

ਤਿਂਸਕੋਟਿਸਹਸ੍ਸਾਨਂ, ਬੋਧੇਸਿ ਦੇਵਮਾਨੁਸੇ.

੫. ਨਰਦੇਵਸ੍ਸ ਯਕ੍ਖਸ੍ਸ, ਚਤੁਸਚ੍ਚਪ੍ਪਕਾਸਨੇ;

ਧਮ੍ਮਾਭਿਸਮਯੋ ਤਸ੍ਸ, ਗਣਨਾਤੋ ਅਸਙ੍ਖਿਯੋ.

੬. ਕਕੁਸਨ੍ਧਸ੍ਸ ਭਗਵਤੋ, ਏਕੋ ਆਸਿ ਸਮਾਗਮੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੭. ਚਤ੍ਤਾਲੀਸਸਹਸ੍ਸਾਨਂ, ਤਦਾ ਆਸਿ ਸਮਾਗਮੋ;

ਦਨ੍ਤਭੂਮਿਮਨੁਪ੍ਪਤ੍ਤਾਨਂ, ਆਸਵਾਰਿਗਣਕ੍ਖਯਾ.

੮. ਅਹਂ ਤੇਨ ਸਮਯੇਨ, ਖੇਮੋ ਨਾਮਾਸਿ ਖਤ੍ਤਿਯੋ;

ਤਥਾਗਤੇ ਜਿਨਪੁਤ੍ਤੇ, ਦਾਨਂ ਦਤ੍ਵਾ ਅਨਪ੍ਪਕਂ.

੯. ਪਤ੍ਤਞ੍ਚ ਚੀਵਰਂ ਦਤ੍ਵਾ, ਅਞ੍ਜਨਂ ਮਧੁਲਟ੍ਠਿਕਂ;

ਇਮੇਤਂ ਪਤ੍ਥਿਤਂ ਸਬ੍ਬਂ, ਪਟਿਯਾਦੇਮਿ ਵਰਂ ਵਰਂ.

੧੦. ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਕਕੁਸਨ੍ਧੋ ਵਿਨਾਯਕੋ;

‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੧. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.

੧੨. ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੧੩. ਨਗਰਂ ਖੇਮਾਵਤੀ ਨਾਮ, ਖੇਮੋ ਨਾਮਾਸਹਂ ਤਦਾ;

ਸਬ੍ਬਞ੍ਞੁਤਂ ਗਵੇਸਨ੍ਤੋ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.

੧੪. ਬ੍ਰਾਹ੍ਮਣੋ ਅਗ੍ਗਿਦਤ੍ਤੋ ਚ, ਆਸਿ ਬੁਦ੍ਧਸ੍ਸ ਸੋ ਪਿਤਾ;

ਵਿਸਾਖਾ ਨਾਮ ਜਨਿਕਾ, ਕਕੁਸਨ੍ਧਸ੍ਸ ਸਤ੍ਥੁਨੋ.

੧੫. ਵਸਤੇ ਤਤ੍ਥ ਖੇਮੇ ਪੁਰੇ, ਸਮ੍ਬੁਦ੍ਧਸ੍ਸ ਮਹਾਕੁਲਂ;

ਨਰਾਨਂ ਪਵਰਂ ਸੇਟ੍ਠਂ, ਜਾਤਿਮਨ੍ਤਂ ਮਹਾਯਸਂ.

੧੬. ਚਤੁਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;

ਕਾਮ -ਕਾਮਵਣ੍ਣ-ਕਾਮਸੁਦ੍ਧਿਨਾਮਾ [ਸੁਚਿ ਸੁਰੁਚਿ ਰਤਿਵਦ੍ਧਨਨਾਮਕਾ (ਸੀ.)], ਤਯੋ ਪਾਸਾਦਮੁਤ੍ਤਮਾ.

੧੭. ਸਮਤਿਂਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਰੋਚਿਨੀ ਨਾਮ ਸਾ ਨਾਰੀ, ਉਤ੍ਤਰੋ ਨਾਮ ਅਤ੍ਰਜੋ.

੧੮. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਰਥਯਾਨੇਨ ਨਿਕ੍ਖਮਿ;

ਅਨੂਨਅਟ੍ਠਮਾਸਾਨਿ, ਪਧਾਨਂ ਪਦਹੀ ਜਿਨੋ.

੧੯. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਕਕੁਸਨ੍ਧੋ ਵਿਨਾਯਕੋ;

ਵਤ੍ਤਿ ਚਕ੍ਕਂ ਮਹਾਵੀਰੋ, ਮਿਗਦਾਯੇ ਨਰੁਤ੍ਤਮੋ.

੨੦. ਵਿਧੁਰੋ ਚ ਸਞ੍ਜੀਵੋ ਚ, ਅਹੇਸੁਂ ਅਗ੍ਗਸਾਵਕਾ;

ਬੁਦ੍ਧਿਜੋ ਨਾਮੁਪਟ੍ਠਾਕੋ, ਕਕੁਸਨ੍ਧਸ੍ਸ ਸਤ੍ਥੁਨੋ.

੨੧. ਸਾਮਾ ਚ ਚਮ੍ਪਾਨਾਮਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਸਿਰੀਸੋਤਿ ਪਵੁਚ੍ਚਤਿ.

੨੨. ਅਚ੍ਚੁਤੋ ਚ ਸੁਮਨੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਨਨ੍ਦਾ ਚੇਵ ਸੁਨਨ੍ਦਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੩. ਚਤ੍ਤਾਲੀਸਰਤਨਾਨਿ, ਅਚ੍ਚੁਗ੍ਗਤੋ ਮਹਾਮੁਨਿ;

ਕਨਕਪ੍ਪਭਾ ਨਿਚ੍ਛਰਤਿ, ਸਮਨ੍ਤਾ ਦਸਯੋਜਨਂ.

੨੪. ਚਤ੍ਤਾਲੀਸਵਸ੍ਸਸਹਸ੍ਸਾਨਿ, ਆਯੁ ਤਸ੍ਸ ਮਹੇਸਿਨੋ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੫. ਧਮ੍ਮਾਪਣਂ ਪਸਾਰੇਤ੍ਵਾ, ਨਰਨਾਰੀਨਂ ਸਦੇਵਕੇ;

ਨਦਿਤ੍ਵਾ ਸੀਹਨਾਦਂਵ, ਨਿਬ੍ਬੁਤੋ ਸੋ ਸਸਾਵਕੋ.

੨੬. ਅਟ੍ਠਙ੍ਗਵਚਨਸਮ੍ਪਨ੍ਨੋ, ਅਚ੍ਛਿਦ੍ਦਾਨਿ ਨਿਰਨ੍ਤਰਂ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.

੨੭. ਕਕੁਸਨ੍ਧੋ ਜਿਨਵਰੋ, ਖੇਮਾਰਾਮਮ੍ਹਿ ਨਿਬ੍ਬੁਤੋ;

ਤਤ੍ਥੇਵਸ੍ਸ ਥੂਪਵਰੋ, ਗਾਵੁਤਂ ਨਭਮੁਗ੍ਗਤੋਤਿ.

ਕਕੁਸਨ੍ਧਸ੍ਸ ਭਗਵਤੋ ਵਂਸੋ ਦ੍ਵਾਵੀਸਤਿਮੋ.