੨੦. ਫੁਸ੍ਸਬੁਦ੍ਧਵਂਸੋ

੧. ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਅਹੁ ਸਤ੍ਥਾ ਅਨੁਤ੍ਤਰੋ;

ਅਨੁਪਮੋ ਅਸਮਸਮੋ, ਫੁਸ੍ਸੋ ਲੋਕਗ੍ਗਨਾਯਕੋ.

੨. ਸੋਪਿ ਸਬ੍ਬਂ ਤਮਂ ਹਨ੍ਤ੍ਵਾ, ਵਿਜਟੇਤ੍ਵਾ ਮਹਾਜਟਂ;

ਸਦੇਵਕਂ ਤਪ੍ਪਯਨ੍ਤੋ, ਅਭਿਵਸ੍ਸਿ ਅਮਤਮ੍ਬੁਨਾ.

੩. ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਫੁਸ੍ਸੇ ਨਕ੍ਖਤ੍ਤਮਙ੍ਗਲੇ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.

੪. ਨਵੁਤਿਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ;

ਅਸੀਤਿਸਤਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੁ.

੫. ਸਨ੍ਨਿਪਾਤਾ ਤਯੋ ਆਸੁਂ, ਫੁਸ੍ਸਸ੍ਸਾਪਿ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੬. ਸਟ੍ਠਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਪਞ੍ਞਾਸਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੭. ਚਤ੍ਤਾਰੀਸਸਤਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਅਨੁਪਾਦਾ ਵਿਮੁਤ੍ਤਾਨਂ, ਵੋਚ੍ਛਿਨ੍ਨਪਟਿਸਨ੍ਧਿਨਂ.

੮. ਅਹਂ ਤੇਨ ਸਮਯੇਨ, ਵਿਜਿਤਾਵੀ ਨਾਮ ਖਤ੍ਤਿਯੋ;

ਛਡ੍ਡਯਿਤ੍ਵਾ ਮਹਾਰਜ੍ਜਂ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.

੯. ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਫੁਸ੍ਸੋ ਲੋਕਗ੍ਗਨਾਯਕੋ;

‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੦. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.

੧੧. ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੧੨. ਸੁਤ੍ਤਨ੍ਤਂ ਵਿਨਯਞ੍ਚਾਪਿ, ਨਵਙ੍ਗਂ ਸਤ੍ਥੁਸਾਸਨਂ;

ਸਬ੍ਬਂ ਪਰਿਯਾਪੁਣਿਤ੍ਵਾ, ਸੋਭਯਿਂ ਜਿਨਸਾਸਨਂ.

੧੩. ਤਤ੍ਥਪ੍ਪਮਤ੍ਤੋ ਵਿਹਰਨ੍ਤੋ, ਬ੍ਰਹ੍ਮਂ ਭਾਵੇਤ੍ਵ ਭਾਵਨਂ;

ਅਭਿਞ੍ਞਾਸੁ ਪਾਰਮਿਂ ਗਨ੍ਤ੍ਵਾ, ਬ੍ਰਹ੍ਮਲੋਕਮਗਞ੍ਛਹਂ.

੧੪. ਕਾਸਿਕਂ ਨਾਮ ਨਗਰਂ, ਜਯਸੇਨੋ ਨਾਮ ਖਤ੍ਤਿਯੋ;

ਸਿਰਿਮਾ ਨਾਮ ਜਨਿਕਾ, ਫੁਸ੍ਸਸ੍ਸਾਪਿ ਮਹੇਸਿਨੋ.

੧੫. ਨਵਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;

ਗਰੁਲ਼ਪਕ੍ਖ ਹਂਸ ਸੁਵਣ੍ਣਭਾਰਾ, ਤਯੋ ਪਾਸਾਦਮੁਤ੍ਤਮਾ.

੧੬. ਤਿਂਸਇਤ੍ਥਿਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਕਿਸਾਗੋਤਮੀ ਨਾਮ ਨਾਰੀ, ਅਨੂਪਮੋ ਨਾਮ ਅਤ੍ਰਜੋ.

੧੭. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਹਤ੍ਥਿਯਾਨੇਨ ਨਿਕ੍ਖਮਿ;

ਛਮਾਸਂ ਪਧਾਨਚਾਰਂ, ਅਚਰੀ ਪੁਰਿਸੁਤ੍ਤਮੋ.

੧੮. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਫੁਸ੍ਸੋ ਲੋਕਗ੍ਗਨਾਯਕੋ;

ਵਤ੍ਤਿ ਚਕ੍ਕਂ ਮਹਾਵੀਰੋ, ਮਿਗਦਾਯੇ ਨਰੁਤ੍ਤਮੋ.

੧੯. ਸੁਰਕ੍ਖਿਤੋ ਧਮ੍ਮਸੇਨੋ, ਅਹੇਸੁਂ ਅਗ੍ਗਸਾਵਕਾ;

ਸਭਿਯੋ ਨਾਮੁਪਟ੍ਠਾਕੋ, ਫੁਸ੍ਸਸ੍ਸਾਪਿ ਮਹੇਸਿਨੋ.

੨੦. ਚਾਲਾ ਚ ਉਪਚਾਲਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਆਮਣ੍ਡੋਤਿ ਪਵੁਚ੍ਚਤਿ.

੨੧. ਧਨਞ੍ਚਯੋ ਵਿਸਾਖੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਪਦੁਮਾ ਚੇਵ ਨਾਗਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੨. ਅਟ੍ਠਪਣ੍ਣਾਸਰਤਨਂ, ਸੋਪਿ ਅਚ੍ਚੁਗ੍ਗਤੋ ਮੁਨਿ;

ਸੋਭਤੇ ਸਤਰਂਸੀਵ, ਉਲ਼ੁਰਾਜਾਵ ਪੂਰਿਤੋ.

੨੩. ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੪. ਓਵਦਿਤ੍ਵਾ ਬਹੂ ਸਤ੍ਤੇ, ਸਨ੍ਤਾਰੇਤ੍ਵਾ ਬਹੂ ਜਨੇ;

ਸੋਪਿ ਸਤ੍ਥਾ ਅਤੁਲਯਸੋ, ਨਿਬ੍ਬੁਤੋ ਸੋ ਸਸਾਵਕੋ.

੨੫. ਫੁਸ੍ਸੋ ਜਿਨਵਰੋ ਸਤ੍ਥਾ, ਸੇਨਾਰਾਮਮ੍ਹਿ ਨਿਬ੍ਬੁਤੋ;

ਧਾਤੁਵਿਤ੍ਥਾਰਿਕਂ ਆਸਿ, ਤੇਸੁ ਤੇਸੁ ਪਦੇਸਤੋਤਿ.

ਫੁਸ੍ਸਸ੍ਸ ਭਗਵਤੋ ਵਂਸੋ ਅਟ੍ਠਾਰਸਮੋ.