੨੧. ਵਿਪਸ੍ਸੀਬੁਦ੍ਧਵਂਸੋ

੧. ਫੁਸ੍ਸਸ੍ਸ ਚ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਵਿਪਸ੍ਸੀ ਨਾਮ ਨਾਮੇਨ, ਲੋਕੇ ਉਪ੍ਪਜ੍ਜਿ ਚਕ੍ਖੁਮਾ.

੨. ਅਵਿਜ੍ਜਂ ਸਬ੍ਬਂ ਪਦਾਲੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ;

ਧਮ੍ਮਚਕ੍ਕਂ ਪਵਤ੍ਤੇਤੁਂ, ਪਕ੍ਕਾਮਿ ਬਨ੍ਧੁਮਤੀਪੁਰਂ.

੩. ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ, ਉਭੋ ਬੋਧੇਸਿ ਨਾਯਕੋ;

ਗਣਨਾਯ ਨ ਵਤ੍ਤਬ੍ਬੋ, ਪਠਮਾਭਿਸਮਯੋ ਅਹੁ.

੪. ਪੁਨਾਪਰਂ ਅਮਿਤਯਸੋ, ਤਤ੍ਥ ਸਚ੍ਚਂ ਪਕਾਸਯਿ;

ਚਤੁਰਾਸੀਤਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੫. ਚਤੁਰਾਸੀਤਿਸਹਸ੍ਸਾਨਿ, ਸਮ੍ਬੁਦ੍ਧਂ ਅਨੁਪਬ੍ਬਜੁਂ;

ਤੇਸਮਾਰਾਮਪਤ੍ਤਾਨਂ, ਧਮ੍ਮਂ ਦੇਸੇਸਿ ਚਕ੍ਖੁਮਾ.

੬. ਸਬ੍ਬਾਕਾਰੇਨ ਭਾਸਤੋ, ਸੁਤ੍ਵਾ ਉਪਨਿਸਾਦਿਨੋ [ਉਪਨਿਸ੍ਸਾ ਜਿਨੋ (ਸ੍ਯਾ. ਕਂ.)];

ਤੇਪਿ ਧਮ੍ਮਵਰਂ ਗਨ੍ਤ੍ਵਾ, ਤਤਿਯਾਭਿਸਮਯੋ ਅਹੁ.

੭. ਸਨ੍ਨਿਪਾਤਾ ਤਯੋ ਆਸੁਂ, ਵਿਪਸ੍ਸਿਸ੍ਸ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੮. ਅਟ੍ਠਸਟ੍ਠਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਭਿਕ੍ਖੁਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੯. ਅਸੀਤਿਭਿਕ੍ਖੁਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਤਤ੍ਥ ਭਿਕ੍ਖੁਗਣਮਜ੍ਝੇ, ਸਮ੍ਬੁਦ੍ਧੋ ਅਤਿਰੋਚਤਿ.

੧੦. ਅਹਂ ਤੇਨ ਸਮਯੇਨ, ਨਾਗਰਾਜਾ ਮਹਿਦ੍ਧਿਕੋ;

ਅਤੁਲੋ ਨਾਮ ਨਾਮੇਨ, ਪੁਞ੍ਞਵਨ੍ਤੋ ਜੁਤਿਨ੍ਧਰੋ.

੧੧. ਨੇਕਾਨਂ ਨਾਗਕੋਟੀਨਂ, ਪਰਿਵਾਰੇਤ੍ਵਾਨਹਂ ਤਦਾ;

ਵਜ੍ਜਨ੍ਤੋ ਦਿਬ੍ਬਤੁਰਿਯੇਹਿ, ਲੋਕਜੇਟ੍ਠਂ ਉਪਾਗਮਿਂ.

੧੨. ਉਪਸਙ੍ਕਮਿਤ੍ਵਾ ਸਮ੍ਬੁਦ੍ਧਂ, ਵਿਪਸ੍ਸਿਂ ਲੋਕਨਾਯਕਂ;

ਮਣਿਮੁਤ੍ਤਰਤਨਖਚਿਤਂ, ਸਬ੍ਬਾਭਰਣਵਿਭੂਸਿਤਂ;

ਨਿਮਨ੍ਤੇਤ੍ਵਾ ਧਮ੍ਮਰਾਜਸ੍ਸ, ਸੁਵਣ੍ਣਪੀਠਮਦਾਸਹਂ.

੧੩. ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸਙ੍ਘਮਜ੍ਝੇ ਨਿਸੀਦਿਯ;

‘‘ਏਕਨਵੁਤਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੪. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ, ਨਿਕ੍ਖਮਿਤ੍ਵਾ ਤਥਾਗਤੋ;

ਪਧਾਨਂ ਪਦਹਿਤ੍ਵਾਨ, ਕਤ੍ਵਾ ਦੁਕ੍ਕਰਕਾਰਿਕਂ.

੧੫. ‘‘ਅਜਪਾਲਰੁਕ੍ਖਮੂਲਸ੍ਮਿਂ, ਨਿਸੀਦਿਤ੍ਵਾ ਤਥਾਗਤੋ;

ਤਤ੍ਥ ਪਾਯਾਸਂ ਪਗ੍ਗਯ੍ਹ, ਨੇਰਞ੍ਜਰਮੁਪੇਹਿਤਿ.

੧੬. ‘‘ਨੇਰਞ੍ਜਰਾਯ ਤੀਰਮ੍ਹਿ, ਪਾਯਾਸਂ ਅਦ ਸੋ ਜਿਨੋ;

ਪਟਿਯਤ੍ਤਵਰਮਗ੍ਗੇਨ, ਬੋਧਿਮੂਲਮੁਪੇਹਿਤਿ.

੧੭. ‘‘ਤਤੋ ਪਦਕ੍ਖਿਣਂ ਕਤ੍ਵਾ, ਬੋਧਿਮਣ੍ਡਂ ਅਨੁਤ੍ਤਰੋ;

ਅਸ੍ਸਤ੍ਥਮੂਲੇ ਸਮ੍ਬੋਧਿਂ, ਬੁਜ੍ਝਿਸ੍ਸਤਿ ਮਹਾਯਸੋ.

੧੮. ‘‘ਇਮਸ੍ਸ ਜਨਿਕਾ ਮਾਤਾ, ਮਾਯਾ ਨਾਮ ਭਵਿਸ੍ਸਤਿ;

ਪਿਤਾ ਸੁਦ੍ਧੋਦਨੋ ਨਾਮ, ਅਯਂ ਹੇਸ੍ਸਤਿ ਗੋਤਮੋ.

੧੯. ‘‘ਅਨਾਸਵਾ ਵੀਤਰਾਗਾ, ਸਨ੍ਤਚਿਤ੍ਤਾ ਸਮਾਹਿਤਾ;

ਕੋਲਿਤੋ ਉਪਤਿਸ੍ਸੋ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਕਾ;

ਆਨਨ੍ਦੋ ਨਾਮੁਪਟ੍ਠਾਕੋ, ਉਪਟ੍ਠਿਸ੍ਸਤਿਮਂ ਜਿਨਂ.

੨੦. ‘‘ਖੇਮਾ ਉਪ੍ਪਲਵਣ੍ਣਾ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਿਕਾ;

ਅਨਾਸਵਾ ਵੀਤਰਾਗਾ, ਸਨ੍ਤਚਿਤ੍ਤਾ ਸਮਾਹਿਤਾ;

ਬੋਧਿ ਤਸ੍ਸ ਭਗਵਤੋ, ਅਸ੍ਸਤ੍ਥੋਤਿ ਪਵੁਚ੍ਚਤਿ.

੨੧. ‘‘ਚਿਤ੍ਤੋ ਚ ਹਤ੍ਥਾਲ਼ਵਕੋ, ਅਗ੍ਗਾ ਹੇਸ੍ਸਨ੍ਤੁਪਟ੍ਠਕਾ;

ਨਨ੍ਦਮਾਤਾ ਚ ਉਤ੍ਤਰਾ, ਅਗ੍ਗਾ ਹੇਸ੍ਸਨ੍ਤੁਪਟ੍ਠਿਕਾ;

ਆਯੁ ਵਸ੍ਸਸਤਂ ਤਸ੍ਸ, ਗੋਤਮਸ੍ਸ ਯਸਸ੍ਸਿਨੋ.

੨੨. ‘‘ਇਦਂ ਸੁਤ੍ਵਾਨ ਵਚਨਂ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.

੨੩. ਤਸ੍ਸਾਹਂ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੨੪. ਨਗਰਂ ਬਨ੍ਧੁਮਤੀ ਨਾਮ, ਬਨ੍ਧੁਮਾ ਨਾਮ ਖਤ੍ਤਿਯੋ;

ਮਾਤਾ ਬਨ੍ਧੁਮਤੀ ਨਾਮ, ਵਿਪਸ੍ਸਿਸ੍ਸ ਮਹੇਸਿਨੋ.

੨੫. ਅਟ੍ਠਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;

ਨਨ੍ਦੋ ਸੁਨਨ੍ਦੋ ਸਿਰਿਮਾ, ਤਯੋ ਪਾਸਾਦਮੁਤ੍ਤਮਾ.

੨੬. ਤਿਚਤ੍ਤਾਰੀਸਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਸੁਦਸ੍ਸਨਾ ਨਾਮ ਸਾ ਨਾਰੀ, ਸਮਵਤ੍ਤਕ੍ਖਨ੍ਧੋ ਨਾਮ ਅਤ੍ਰਜੋ.

੨੭. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਰਥਯਾਨੇਨ ਨਿਕ੍ਖਮਿ;

ਅਨੂਨਅਟ੍ਠਮਾਸਾਨਿ, ਪਧਾਨਂ ਪਦਹੀ ਜਿਨੋ.

੨੮. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਵਿਪਸ੍ਸੀ ਲੋਕਨਾਯਕੋ;

ਵਤ੍ਤਿ ਚਕ੍ਕਂ ਮਹਾਵੀਰੋ, ਮਿਗਦਾਯੇ ਨਰੁਤ੍ਤਮੋ.

੨੯. ਖਣ੍ਡੋ ਚ ਤਿਸ੍ਸਨਾਮੋ ਚ, ਅਹੇਸੁਂ ਅਗ੍ਗਸਾਵਕਾ;

ਅਸੋਕੋ ਨਾਮੁਪਟ੍ਠਾਕੋ, ਵਿਪਸ੍ਸਿਸ੍ਸ ਮਹੇਸਿਨੋ.

੩੦. ਚਨ੍ਦਾ ਚ ਚਨ੍ਦਮਿਤ੍ਤਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਪਾਟਲੀਤਿ ਪਵੁਚ੍ਚਤਿ.

੩੧. ਪੁਨਬ੍ਬਸੁਮਿਤ੍ਤੋ ਨਾਗੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਸਿਰਿਮਾ ਉਤ੍ਤਰਾ ਚੇਵ, ਅਹੇਸੁਂ ਅਗ੍ਗੁਪਟ੍ਠਿਕਾ.

੩੨. ਅਸੀਤਿਹਤ੍ਥਮੁਬ੍ਬੇਧੋ, ਵਿਪਸ੍ਸੀ ਲੋਕਨਾਯਕੋ;

ਪਭਾ ਨਿਦ੍ਧਾਵਤਿ ਤਸ੍ਸ, ਸਮਨ੍ਤਾ ਸਤ੍ਤਯੋਜਨੇ.

੩੩. ਅਸੀਤਿਵਸ੍ਸਸਹਸ੍ਸਾਨਿ, ਆਯੁ ਬੁਦ੍ਧਸ੍ਸ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੪. ਬਹੁਦੇਵਮਨੁਸ੍ਸਾਨਂ, ਬਨ੍ਧਨਾ ਪਰਿਮੋਚਯਿ;

ਮਗ੍ਗਾਮਗ੍ਗਞ੍ਚ ਆਚਿਕ੍ਖਿ, ਅਵਸੇਸਪੁਥੁਜ੍ਜਨੇ.

੩੫. ਆਲੋਕਂ ਦਸ੍ਸਯਿਤ੍ਵਾਨ, ਦੇਸੇਤ੍ਵਾ ਅਮਤਂ ਪਦਂ;

ਜਲਿਤ੍ਵਾ ਅਗ੍ਗਿਕ੍ਖਨ੍ਧੋਵ, ਨਿਬ੍ਬੁਤੋ ਸੋ ਸਸਾਵਕੋ.

੩੬. ਇਦ੍ਧਿਵਰਂ ਪੁਞ੍ਞਵਰਂ, ਲਕ੍ਖਣਞ੍ਚ ਕੁਸੁਮਿਤਂ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.

੩੭. ਵਿਪਸ੍ਸੀ ਜਿਨਵਰੋ ਬੁਦ੍ਧੋ, ਸੁਮਿਤ੍ਤਾਰਾਮਮ੍ਹਿ ਨਿਬ੍ਬੁਤੋ;

ਤਤ੍ਥੇਵਸ੍ਸ ਥੂਪਵਰੋ, ਸਤ੍ਤਯੋਜਨਮੁਸ੍ਸਿਤੋਤਿ.

ਵਿਪਸ੍ਸਿਸ੍ਸ ਭਗਵਤੋ ਵਂਸੋ ਏਕੂਨਵੀਸਤਿਮੋ.